Read Northwest Gbaya KU̧U̧NAŊMƆ 28 Bible Online

KU̧U̧NAŊMƆ 28 - Northwest Gbaya bible

KU̧U̧NAŊMƆ 28

¹Nɛ́ mɔ'ɔ nɛ̀ Izak saa Jakob, tok de yoŋgo zu a̧, ɓɛɛ tɔ̧ ha̧ a̧: «Ká mɛ́ ba ŋma boko be Kanaŋ nɛ kóò na.

²Mɛ̀ kúr, mɛ̀ yák si bɔkɔ-nú Aram sɛn tɛ ko Bɛtuɛl, dáà ko nàà kɔ-mɛ. Mɛ̀ nɛ́ɛ̀ ba nɛ́ ŋma bem ko Labaŋ nya nàà kɔ-mɛ nɛ kóò.

³Sɔ̧ nɛ a̧a̧ nɛ ŋgayamɔ lɛŋ a̧ tok de yoŋgo zu mɛ; a̧ a̧ de ha̧ mɛ mɛ ko dɔk siti, ha̧ mɛ mɛ duk nɛ tugun gíí bíí.

⁴A̧ a̧ ha̧ de toka yoŋgo ko Abraham ha̧ mɛ in ha̧ o bezaŋ-mɛ, ha̧ nù nɛ mɛ ɔ sɛnɛ hee gɛnɛ ga, mɛ zii nɛ mɛ; wen nɛ́ nù nɛ GASA WAN baa ha̧ so ha̧ Abraham.»

⁵Ɓɛɛ Izak e yuwar ha̧ Jakob mɛ kur yak si sɛn bɔkɔ-nu Aram, si tɛ ko Labaŋ, bem ko Bɛtuɛl, be Aram. Labaŋ nɛ nya Rebeka, naa ko Jakob in Esau.

⁶Esau zɔka'e ndé Izak toka de yoŋgo zu Jakob, ɓɛɛ fo a̧ yaknɛ si sɛn bɔkɔ-nú Aram wen baa kóò, wen ŋgimbi nɛ Izak toka so de yoŋgo zu Jakob, a̧ baa ha̧ so nú ha̧ a̧ nde: «Mɛ beka ba boko be Kanaŋ nɛ kóò na.»

⁷Esau zɔka ndé, Jakob zia wen nú dáà kɔ‘i in naa kɔ‘i, wen n'aa yaka so si bɔkɔ-nú Aram.

⁸Esau zɔka'e ndé o boko be Kanaŋ nyɛm see dáà kɔ̧-a̧ Izak na,

⁹ɓɛɛ a̧ kur nɛ sɛn tɛ Ismaɛl, ɓɛɛ a̧ ba kóò sɛn hi̧i̧, e zu o wan nɛ duka so er-a nɛti. A̧ baa nɛ Mahalat, bem ko Ismaɛl, bem ko Abraham. Mahalat duka nɛ boko-nya Nɛbayot.

¹⁰Jakob kura Bɛrseba wen yaka-a si nú Haraŋ.

¹¹A̧ hɔɔ ŋma fara hegɔ n'aa iŋ na, ɓɛɛ a̧ ɔ hi̧i̧ wen wese yee so kaɗi. A̧ baa ŋma ta sɛn mbɔɗɔnu fara'i ɛk nɛ zu-a, ɓɛɛ a̧ ɔ ya hi̧i̧.

¹²A̧ ɔɔ zu fara n'aa zɔk sara-daŋ-mɔ zu nù hegɔɔ hɔ yiwese mɛ, ɓɛɛ o betom ko Sɔ̧ daŋ nɛnɛ in zir nɛnɛ mbɛt.

¹³A̧ zɔka GASA WAN nɛ yor sɛn ti a̧ tɔ̧ nɛ wen ha̧ a̧‘e: «Mi nɛ GASA WAN Sɔ̧ ko Abraham, zɔmdáa kɔ-mɛ, mi nɛ Sɔ̧ ko Izak; fara nɛ mɛ ɔ nù sɛnɛ kinii'i’ɛ, mi ha̧a̧ ha̧ mɛ in o bezaŋ-mɛ mbɛt.

¹⁴O bezaŋ-mɛ tɛ ko dɔk hee fuunu ga, ɛnɛ tɛ dɔk si yee-wese, si daŋa-wese, si ká̧-zan-mɛ́-ŋgɔn in si ká̧-zan-mɛ́-ɗɔɔ mbɛt, ɓɛɛ o tugun bíí zu nù lɛŋ tɛ kpa de toka yoŋgo nɛ ɗoŋ mɛ in o bezaŋ-mɛ.

¹⁵Mi a̧a̧ in mɛɛ, mi tɛ yor ɗoŋ mɛ hɔ fara lɛŋ nɛ mɛ tɛ hɔ, mi tɛ ba mɛ piinɛ ɗoŋ sɛn tɛ nù'ɛ. Mi beka e mɛ duk na hɔ ŋgimbi n'am tɛ de mɔ lɛŋ n'am tɔ̧ɔ̧ nɛnɛ ha̧ mɛ.»

¹⁶Jakob tuna tɛ ya, ɓɛɛ tɔ̧: «Nɛ́ kpasawen, GASA WAN a̧a̧ sɛn fara’ɛ, ɓɛɛ mi iŋ so na.»

¹⁷Jakob dee kíì, ɓɛɛ tɔ̧: «Wi tɛ yu fara’ɛ yuu. Bo nɛ gee fara na; ɛ̧ɛ̧ nɛ tua ko Sɔ̧ in nú tua daŋa-a si yiwese.»

¹⁸Jakob kura mɛ tutuyɛ sut; a̧ baa ta n'aa ee so ɗɔɔ zu-a e ŋgɔn, a̧ tɛna nɔ̧́ a zu-a,

¹⁹ɓɛɛ a̧ a nin fara'i'e Bɛtɛl; nɛ wen nɛ tɔ̧ Tua ko Sɔ̧. (Nɛti nin gasa ye fara'i duka nɛ Luz.)

²⁰Jakob ha̧a̧ nú, ɓɛɛ tɔ̧: «Kà Sɔ̧ nɛ́ duka in am, kà a̧ pɛm am tɛ nɔ̀ n'am nɛ'ɛ, kà a̧ nɛ́ ha̧a̧ nyɔŋmɔ ha̧‘m in o laa ha̧‘m mɛ pi̧ tɛ‘m,

²¹kà‘m nɛ́ pia ɗoŋ nɛ ga̧a̧-see kɔ̧ tua ko dáà kɔ‘m, ɓɛɛ GASA WAN tɛ duk nɛ Sɔ̧ kɔ‘m.

²²Ta n'am baa e ŋgɔn’ɛ tɛ duk nɛ tua ko Sɔ̧, ɓɛɛ mi tɛ ha̧ zu-mɔ lɛŋ n’ɛnɛ tɛ ha̧‘m h’ɛ́nɛ́.»