Read Northwest Gbaya KU̧U̧NAŊMƆ 29 Bible Online

KU̧U̧NAŊMƆ 29 - Northwest Gbaya bible

KU̧U̧NAŊMƆ 29

¹Jakob kura nɔ̀ wen nɛa-a si sɛn Kedɛm, nù si daŋa-wese.

²Kà a̧ zɔk wó, ŋma gɔna-yì a̧ dúk zaŋbɛɛ'ɛ, ɓɛɛ duk sami a̧a̧ hi̧i̧ taar. Nɛ́ fara'i a̧ o mɔ-dai nɔ yì sɛnɛ. Mɔɔ-kpe-nú-yì‘i nɛ́ ŋma gasa ta.

³Ŋgimbi nɛ o mɔ-dai mɔi̧ ŋmaa sɛn ká̧ gɔna-yì‘i, ɓɛɛ wi kina ta'i yinɛ wen ha̧a̧ yì ha̧ wa. Kà o mɔ-dai nɔ yì kaɗi, ɓɛɛ wi kpee nú gɔna-yì‘i woyo.

⁴Jakob tɔ̧ɔ̧ ha̧ o wi-dai-mɔ: «O nya'm, ɛ́nɛ́ nɛ́ be ge nù ge?» Wa kifa nú: «Ɛ́ɛ́ nɛ́ o be Haraŋ.»

⁵Jakob tɔ̧ɔ̧ ha̧ wa: «Ɛ́nɛ́ iŋa Labaŋ, bem ko Nahɔr nde?» Ɓɛɛ wa kifi nú: «Ɛ́ɛ́ iŋa a̧.»

⁶A̧ aka wa: «A̧ duk nɛ de-a nde?» Ɓɛɛ wa kifi nú ha̧ a̧: «A̧ duk nɛ de-a! Bem kɔ̧-a̧ Rachɛl nɛ mɔ'ɔ nɛ zir tɛnɛ in o sami mɛ‘i.»

⁷Jakob tɔ̧a̧: «Wese tɛ ye wen kaia mɔ-dai si kɔ̧ mɔ hɔ̧ɔ̧ na. Ɛ̀nɛ̀ há̧ yì ha̧ wa, ɓɛɛ ɛ̀nɛ̀ kɔ́r wa yaknɛ.»

⁸Ɓɛɛ wa kifi nú nde: «O mɔ-dai tɛ mɔi̧ lɛŋ kà de k’ɛ́ɛ́ ha̧a̧ yì ha̧ wa na. Ŋgimbi nɛ wa tɛ mɔi̧ lɛŋ, ɓɛɛ ɛ́ɛ́ kina ta nú gɔna-yì yinɛ, wen ha̧a̧ yì ha̧ wa.»

⁹Ŋgimbi nɛ Jakob biti tɔ̧ɔ̧ wen in wa'i, Rachɛl hɔɔ in o sami ko dáà kɔ‘i, wen a̧ duka so nɛ zɔŋa-dai-mɔ.

¹⁰Ŋgimbi nɛ Jakob zɔka nɛ Rachɛl, bem ko nɔkɔ kɔ̧-a̧ gu nɛ o sami ko nɔkɔ kɔ̧-a̧, a̧ ɗɔŋa pii ti, tɛɛ kin ta nú gɔna-yì yinɛ, ɓɛɛ a̧ ha̧ yì ha̧ o sami ko nɔkɔ kɔ̧-a̧.

¹¹Jakob hɛra Rachɛl hi̧i̧ nɛ kɔ̧a̧ nɛ ŋgaya-a.

¹²A̧ tɔ̧ɔ̧ mgbara nam kɔ̧-a̧ in dáà ko Rachɛl ha̧ Rachɛl; a̧ tɔ̧a̧ nɛ wi nɛ bem ko Rebeka, ɓɛɛ Rachɛl war yì nɛ́ɛ̀ tɔ̧ ha̧ dáà kɔ‘i.

¹³Ŋgimbi nɛ Labaŋ zia'e nɛ́ Jakob bem ko boko-nya-a̧ wó, a̧ wara yì we ti Jakob. A̧ hɛra a̧, a̧ duia nú-a ɓɛɛ mgbɔ a̧ si sɛn kɔ̧ tua. Jakob tɔ̧ɔ̧ mgbara mɔ nɛ yaka lɛŋ ha̧ Labaŋ.

¹⁴Labaŋ tɔ̧ɔ̧ ha̧ Jakob: «Nɛ mbetɛ, mɛ́ nɛ́ tɔk-tɛ‘m.» Ɓɛɛ Jakob ɔ sɛn kɔ̧ tua ko Labaŋ kii-zɛ kpɔk.

¹⁵Labaŋ tɔ̧ɔ̧ ha̧ Jakob: «Mɛ́ tɛ́ de so tom ha̧‘m gee, wen nɛ mɛ nɛ nam kɔ‘m? Mɛ̀ tɔ̧́ mɔ n'am tɛ́ yoɓi nɛ mɛ ha̧‘m zii sɛ!»

¹⁶Labaŋ a̧a̧ so nɛ boko-bem yiitoo: nin kaya-a nɛ́ Lea, hɔ-ɗoŋ-aa nɛ́ Rachɛl.

¹⁷Lea zɔk so mɔ nɛ de-a na, ɓɛɛ Rachɛl yora so kɔ‘i zɔŋa, nɛ de saŋa-yí mbɛt.

¹⁸Jakob kɔ̧ɔ̧ so nɛ́ Rachɛl, ɓɛɛ a̧ tɔ̧ ha̧ Labaŋ: «Mi tɛ de kɔfɛ h’ɛ́nɛ́ pɛ mɔɔrɔ-ɗoŋ-yiitoo wen zu Rachɛl, hɔ-ɗoŋ-kaya-bem k’ɛ́nɛ́.»

¹⁹Labaŋ tɔ̧a̧: «Mi kɔ̧ɔ̧ nyɛmna ha̧ mɛ mɛ ba a̧ nɛ̀ bó nɛ́ ŋma bíí na. Mɛ̀ dúk tɛ kɔ‘m.»

²⁰Ɓɛɛ Jakob de kɔfɛ Rachɛl tɛ pɛ mɔɔrɔ-ɗoŋ-yiitoo nɛ duka yí-a hee ɔɔ-zɛ tikiɗi ga, wen a̧ kɔ̧ɔ̧ so Rachɛl nyɛmna.

²¹Ɓɛɛ Jakob tɔ̧ ha̧ Labaŋ: «Ɛ̀nɛ̀ mgbɔ́ kóò kɔ‘m ha̧‘m, wen ŋgimbi dee kɔfɛ kɔ‘m nyɛma sɛnɛ kaɗi, wen ha̧‘m mɛ si tua ɗoŋ-aa.»

²²Labaŋ saa o bíí saaye lɛŋ, ɓɛɛ de gbaŋa.

²³Mɛ́ ga̧a̧mɔ, Labaŋ mgbɔɔ kaya-boko-bem kɔ̧-a̧, Lea ha̧ Jakob, ɓɛɛ Jakob si tua ɗoŋ-aa.

²⁴Labaŋ baa Zilpa nɛ̀ duka so nɛ́ kó-de-tom kɔ̧-a̧ ha̧ Lea wen gbaka a̧ tɛ tom.

²⁵Nɛ̀ mɔ'ɔ sa̧a̧ kaɗi, Jakob kpaa nɛ́ Lea nɛ̀ ɔ nù in a̧. Ɓɛɛ Jakob ak Labaŋ: «Bó nɛ́ wen Rachɛl a̧‘m dee nɛ̀ kɔfɛ h’ɛ́nɛ́ na? Wen ge s’ɛnɛ ɔra'm ge? Nɛ́ ge ɛ́nɛ́ dee in am’ɛ ge?»

²⁶Labaŋ kifa nú ha̧ a̧: «Tɛ yuwar duka-a k’ɛɛ hɛ̧ɛ̧, boko-bem mɛ́ ɗoŋ ba wíì nɛti ha̧ kaya-wi na.

²⁷Ɛ̀nɛ̀ dám nú ŋgimbi baa-ŋmaa k’ɛ́nɛ́ sɛka'm ha̧a̧ ɓii boko-bem ha̧ mɛ́ nyɛm nɛ ɗoŋ kɔfɛ nɛ mɛ tɛ de pɛ mɔɔrɔ-ɗoŋ-yiitoo ha̧‘m woyo.»

²⁸Jakob duka hegɔ, zɛ mɔɔrɔ-ɗoŋ-yiitoo in Lea, ɓɛɛ Labaŋ mgbɔ Rachɛl bem kɔ̧-a̧ nɛ kóò ha̧ Jakob.

²⁹Labaŋ baa Bilha kó-de-tom kɔ̧-a̧ ha̧ bem kɔ̧-a̧ Rachɛl wen gbaka a̧ tɛ tom.

³⁰Jakob duka in Rachɛl, ɓɛɛ see-aa ba Rachɛl gan Lea, ɓɛɛ a̧ de kɔfɛ ha̧ nɔkɔ kɔ̧-a̧ pɛ mɔɔrɔ-ɗoŋ-yiitoo woyo.

³¹GASA WAN zɔka'e Jakob kɔ̧ Lea gan na, ɓɛɛ a̧ e ha̧ Lea mɛ́ ko nɛ̀ dɔka-a. Ɓɛɛ war ko Rachɛl ko bem na.

³²Lea baa zaŋ, ɓɛɛ ko nɛ̀ be-wiwii, a̧ aa nin-a nɛ́ Rubɛn;[6] wen a̧ tɔ̧a̧: «GASA WAN zɔka ɗaŋsee kɔ‘m, ɓɛɛ kinii, wíì kɔ‘m tɛ kɔ̧‘m.»

³³A̧ baa zaŋ woyo, ɓɛɛ a̧ ko nɛ̀ be-wiwii; a̧ tɔ̧a̧: «GASA WAN iŋa'e wa kɔ̧‘m na, ɓɛɛ a̧ ha̧ ɛ̧ɛ̧ bem’ɛ ha̧‘m woyo,» ɓɛɛ a̧ a nin-a Simɛɔŋ.[7]

³⁴A̧ baa mbe zaŋ woyo ko nɛ̀ be-wiwii, ɓɛɛ a̧ tɔ̧: «Kinii’ɛ wíì kɔ‘m tɛ kɔ̧‘m, a̧ tɛ ndaɗi in am; zɔk mi koo be-wiwii taar ha̧ a̧,» ɓɛɛ a̧ a nin-a nɛ Levii.

³⁵A̧ baa zaŋ woyo ko nɛ̀ be-wiwii, ɓɛɛ a̧ tɔ̧: «Kinii'i, mi tɛ zɔn GASA WAN!» A̧ aa nin i̧i̧ bem’ɛi Juda.[8] Nɛ́ ŋgimbi'i a̧ a̧ kaɗa nɛ̀ koa-a.