Read Northwest Gbaya KU̧U̧NAŊMƆ 33 Bible Online

KU̧U̧NAŊMƆ 33 - Northwest Gbaya bible

KU̧U̧NAŊMƆ 33

¹Jakob baa yí nɛ̀ ŋgɔn, a̧ zɔka Esau nɛ̀ o bíí ɗoŋ ŋmaa gɔmŋmaa-naar gbar tɛnɛ in a̧, ɓɛɛ a̧ kɛ̧ o bem ha̧ Lea in Rachɛl, in ha̧ o kó-de-tom yiitoo.

²A̧ kaia o kó-de-tom in o bem a ti; nɛ̀ ɗoŋ, Lea in o bem kɔ‘i, sɛka Rachɛl in Jozɛf.

³A̧ yaka ti ha̧ wa, ɓɛɛ a̧ gu nù war mɔɔrɔ-ɗoŋ-yiitoo nɛti kaɗi sɛka a̧ hɔ katɛ nya-a̧.

⁴Ɓɛɛ Esau ma yì we nɛ ti a̧ tɛnɛ, hɛr ŋmaa in a̧, dui nú-a, ɓɛɛ wa a nú-wa tɛ kɔ̧a̧.

⁵Ŋgimbi nɛ Esau baa yí nɛ̀ ŋgɔn, n'aa zɔka o kóò in o bem, a̧ aka mɔ: «Nɛ́ o'o ya mɛ‘i o?» Jakob kifa nú: «Nɛ́ o bem nɛ Sɔ̧ ha̧a̧ ha̧ wi-de-tom k’ɛ́nɛ́.»

⁶O kó-de-tom ɗɔŋa pii ti, wa in o bem kɔ-wa, ɓɛɛ wa gu nù.

⁷Lea ɗɔŋa pii ti in o bem kɔ‘i mbɛt, ɓɛɛ wa gu nù. Mɛ ɗoŋ Jozɛf ɗɔŋa pii ti in Rachɛl, ɓɛɛ wa gu nù mbɛt.

⁸Esau aka mɔ: «O gba mɔ-dai n'am kpaa nɛ yuwar tɛnɛ‘i, tɔ̧ nɛ ge?» Ɓɛɛ Jakob tɔ̧: «Nɛ́ wen ha̧ nyaa mɛ kpa desee zu'm.»

⁹Ɓɛɛ Esau tɔ̧ woyo: «Mi a̧a̧ nɛ mɔ nyɛm am, nya'm! Mɔ nɛ̀ dúk nɛ́ kɔ-mɛ a̧ ɓɔn nɛ́ kɔ-mɛ.»

¹⁰Ɓɛɛ Jakob tɔ̧: «K’ɛ́nɛ́ bɛ̧ mɔ n'am ha̧‘nɛ́ na, mi aia nú h’ɛ́nɛ́. K’ɛ̀nɛ̀ nɛ́ zɔka'm nɛ̀ de yí, ɛ̀nɛ̀ kpɛ́k o mɔ n'am ha̧‘nɛ́'ɛ, hee mɔ'ɔ n'am zɔka nɛ̀ sɔnti'nɛ́ hee mɔ'ɔ nɛ‘i zɔk nɛ̀ sɔnti Sɔ̧'ɛ ga, ɓɛɛ k’ɛ́nɛ́ kpɛk am nɛ̀ de-a,

¹¹ɛ̀nɛ̀ kpɛ́k mɔ n'am baa tɛnɛ h’ɛ́nɛ́, wen Sɔ̧ ha̧a̧ mɔ ha̧‘m, mi a̧a̧ nɛ mɔ lɛŋ nɛ‘i nyɛma so mɛ kpa.» Jakob ira Esau ɓɛɛ a̧ kpɛk.

¹²Esau tɔ̧a̧: «Ɛ̀ɛ̀ kúr ɛ̀ɛ̀ yak, mi tɛ nɛ kpɔk in mɛɛ.»

¹³Jakob kifa nú ha̧ a̧: «Nyaa, ɛ́nɛ́ iŋa o bem bo nɛ̀ ŋgai na. Mi a̧a̧ nɛ o sami in o nana ndai, nɛ̀ ha̧ nɛ́ bere ha̧ bem; kà‘i nɛ́ nɔ̀ gan ŋgai kɔ-wa, nɛ́ kpɔk kale wese a̧ o geɗek mɔ-dai tɛ kum nɛnɛ.

¹⁴Nyaa, ɛ̀nɛ̀ yák ti ha̧ wi-de-tom k’ɛ́nɛ́, mi tɛ nɛ kɔ‘m mɔktɛ nyɛm nɛ ɗoŋ naŋanɔ ko o mɔ-dai nɛ a̧a̧ ti'm in nyɛm nɛ ɗoŋ naŋanɔ ko o bem mbɛt, hegɔ hɔ nɛnɛ ŋgimbi n'am tɛ hɔ tɛ ko nyaa sɛn nú Sɛir.»

¹⁵Esau tɔ̧a̧: «Mi kɔ̧ɔ̧ mɛ e o ŋma wi nɔ'ɔ nɛ tɛɛ in am’ɛ in mɛɛ.» Ɓɛɛ Jakob kifi nú: «Wen ge? Gana so à̧‘m dé tɛ nyaa, ɓɛɛ kaɗa.»

¹⁶Nɛ́ kpɔk kale wese'i, a̧ Esau baa nɛ̀ yuwar kɔ‘i si ɗoŋ sɛn Sɛir,

¹⁷ɓɛɛ war ko Jakob nɛ̀ɛ́ kɔ‘i si sɛn Sukot. Nɛ́ sɛn hi̧i̧ á̧ a̧ dee tua kɔ̧-a̧ in o gbaksak wen o mɔ-dai kɔ̧-a̧; nɛ́ hegɔ sa a̧ a nin fara'i Sukot, mɛ nɛ wen nɛ tɔ̧ «gbaksak».

¹⁸Jakob nɛ pii nɛ bɔkɔ-nú Aram hɔɔ nɛ de-a sɛn saaye Sikɛm sɛn nú Kanaŋ, ɓɛɛ a̧ ba gbagari nú ye.

¹⁹A̧ hi̧fa fara n'aa ee tua-laa kɔ̧-a̧ sɛnɛ tɛ kɔya-sede gɔmŋmaa sɛn er o bem ko Hamɔr dáà ko Sikɛm.

²⁰A̧ mboo fara-ɗafi-sɔ̧ hi̧i̧, ɓɛɛ a̧ sa nin-a'e: Sɔ̧ ko Israɛl.