Read Northwest Gbaya KU̧U̧NAŊMƆ 37 Bible Online

KU̧U̧NAŊMƆ 37 - Northwest Gbaya bible

KU̧U̧NAŊMƆ 37

¹Jakob ɓɔna so tɛ nù nɛ dáà kɔ̧-a̧ duka so sɛnɛ, sɛn nú Kanaŋ.

²Nyɛrɛ mɔ zu o bem ko Jakob nɛ́ mɔ'ɔ: Jozɛf kpaa so nɛ́ pɛ ɓu-zua-mɔɔrɔ-ɗoŋ-yiitoo, ɓɛɛ a̧ duk so in o zɔmwi kɔ̧-a̧ pɛm nɛ̀ o mɔ-dai. A̧ duka so mɛ yar in o bem ko Bilha gu nɛ o bem ko Zilpa, o kóò ko dáà kɔ̧-a̧, ɓɛɛ a̧ duka so mɛ tɛɛ dali ɗaŋ nyɛrɛ kɔ-wa ha̧ dáà kɔ-wa.

³Jakob kɔ̧ɔ̧ so Jozɛf gan o dɔka bem kɔ̧-a̧ lɛŋ, wen Jozɛf duka nɛ́ bem n'aa kòó zaŋ sɔki kɔ̧-a̧. A̧ fura ŋunyuŋ gasa laa ha̧ Jozɛf.

⁴O zɔmwi kɔ̧-a̧ zɔka'e dáà kɔ-wa kɔ̧ɔ̧ nɛ́ Jozɛf gan wi lɛŋ; nɛ́ hegɔ a̧ wa sɛna nɛ̀ Jozɛf pi̧ er tɛ wee, ɓɛɛ wa tɔ̧ de ger wen in a̧ ɓɔna.

⁵Jozɛf ɔɔ zu, ɓɛɛ a̧ ba zu'i tɔ̧ ha̧ o zɔmwi kɔ̧-a̧, ɓɛɛ wa sɛn a̧ siti woyo.

⁶A̧ tɔ̧ɔ̧ ha̧ wa: «Ɛ̀nɛ̀ zíí ŋma zu n'am ɔa:

⁷Ɛ́ɛ́ yaa so sik nɛ̀ alkamaari, ɓɛɛ nɛ́ mɔ'ɔ nɛ̀ sika alkamaari kɔ‘m kura yor ŋgɔn, ɓɛɛ o sika-a k’ɛ́nɛ́ mɔi̧ ŋmaa zik sika-a kɔ‘m e see-a, ɓɛɛ wa gu nù ti sika kɔ‘m'i.»

⁸O zɔmwi kɔ̧-a̧ kifa nú ha̧ a̧: «Mɛ kɔ̧ɔ̧ so kɔ-mɛ mɛ́ ɔ nɛ́ wan zu yɛ, kóó mɛ́ duk nɛ́ gasawi k’ɛɛ nde?» Ɓɛɛ wa sɛn a̧ siti gan woyo, wen ɔɔ-zu in o tɔ̧ɔ̧-wen kɔ̧-a̧.

⁹Siti woyo, a̧ ɔɔ ŋma mbe zu, ɓɛɛ a̧ ba tɔ̧ ha̧ o zɔmwi kɔ̧-a̧: «Mi ɔɔ zu woyo'e, wese in nyaŋa-zɛ gu nɛ o sɔra ɓu-zua-kpɔk guu nù sɛn ti'm.»

¹⁰Ɓɛɛ a̧ tɔ̧ zu'i ha̧ dáà kɔ̧-a̧ in o zɔmwi kɔ̧-a̧ lɛŋ, ɓɛɛ dáà kɔ̧-a̧ tuɓi da̧ a zu-a: «Nɛ́ ge zu ge a̧ mɛ ɔ kɔ-mɛ hegɔ‘i ge? Mɛ kɔ̧ɔ̧ so kɔ-mɛ ha̧‘m in nàà kɔ-mɛ in o zɔmwi kɔ-mɛ, h’ɛ́ɛ́ mɛ nɛ̀ɛ́ gu nù ti mɛ nde?»

¹¹See o zɔmwi kɔ̧-a̧ lɛŋ nyima zu a̧, ɓɛɛ dáà kɔ̧-a̧ kasi mɔ‘i e kɔ̧ see.

¹²O zɔmwi ko Jozɛf yaka si sɛn Sikɛm, wen daia o mɔ-dai ko dáà kɔ-wa.

¹³Jakob tɔ̧ɔ̧ ha̧ Jozɛf: «Bó nɛ́ o zɔmwi kɔ-mɛ yaka mɛ nɛ̀ɛ́ kɔr o mɔ-dai sɛn Sikɛm na? Mi kɔ̧ɔ̧ mɛ tom mɛ sitɛ wa.» Ɓɛɛ Jozɛf kifi nú: «Mi tɛ nɛ.»

¹⁴Ɓɛɛ Jakob tɔ̧ woyo: «Mɛ̀ nɛ́ɛ̀ zɔ́k o zɔmwi kɔ-mɛ. Wa in o mɔ-dai ya hee ge? A̧ mɛ̀ tɛ́ɛ̀ wé ɗoŋ mɔ nɛ yak ha̧‘m zii.» Jakob duka mgbara ɗɔŋgɔ Hebrɔŋ tom nɛ a̧, ɓɛɛ Jozɛf nɛ hɔ Sikɛm.

¹⁵Ŋma bíí kpaa a̧ fara yɔ mɔ nɛ zaŋbɛɛ, ɓɛɛ ak a̧: «Mɛ kii nɛ ge?»

¹⁶Jozɛf kifa nú: «Mi kii nɛ o zɔmwi kɔ‘m, mi ai nú ha̧ mɛ́, mɛ̀ usi fara nɛ wa kɔr o mɔ-dai kɔ-wa sɛnɛ‘i ha̧‘m.»

¹⁷Ɓɛɛ wi’ɛi tɔ̧: «Wa gbina ɛ̧ɛ̧ fara’ɛ yak kaɗi; mi zia wa tɛ tɔ̧a̧-a̧‘e, a'i yak si sɛn Dotaŋ mɛ.» Nɛ mɔ'ɔ nɛ Jozɛf ndaka pata o zɔmwi kɔ‘i nɛɛ kpa wa sɛn Dotaŋ.

¹⁸Wa zɔka a̧ fara tɛa-a nɛ nyɛi̧a-a, ɓɛɛ nɛti ha̧ a̧ mɛ hɔ, wa ee nú mɛ gbɛ a̧.

¹⁹Wa tɔ̧ɔ̧ nɛ nú ŋmaa: «Ɛ̀nɛ̀ zɔ́k yaa-ɔ-zu a̧ tɛ‘i!

²⁰Ɛ̀ɛ̀ gbɛ́ a̧ ŋgaɓo, ɓɛɛ ɛ̀ɛ̀ bá wɔr-aa pi̧ kɔ̧ ɗuka kɔ̧, ɓɛɛ ɛ̀ɛ̀ tɔ̧́‘e, nɛ́ ŋma boko-nam a̧ gbɛɛ a̧, h’ɛ́ɛ́ zɔk ndaa ɔɔ-zu kɔ̧-a̧‘i.»

²¹Rubɛn zia wen'i, ɓɛɛ a̧ kii mɛ́ kpasi Jozɛf. A̧ tɔ̧a̧: «K’ɛ́ɛ́ gbɛ a̧ na!

²²K’ɛ́nɛ́ de ha̧ tɔk mɛ a nù na! Ɛ̀nɛ̀ bá a̧ pi̧ sɛn kɔ̧ ŋma ɗuka kɔ̧ ŋga-gbárà, ɓɛɛ k’ɛ́nɛ́ de ŋma ŋgamɔ in a̧ na.» Taamɔ ko Rubɛn duka so wen gboo a̧ yinɛ er-wa, ha̧ a̧ mɛ si tɛ dáà kɔ̧-a̧.

²³Ŋgimbi nɛ Jozɛf hɔa sɛn mgbara o zɔmwi kɔ̧-a̧, wa kpɔ̧i̧a̧ ŋunyuŋ gasa laa nɛ duka so tɛ-a yinɛ.

²⁴Wa baa a̧, ɓɛɛ wa pi̧ a̧ sɛn kɔ̧ ɗuka kɔ̧; nɛ́ ŋma kɔ̧ nɛ̀ duka géè, nɛ̀ yì bó sɛnɛ na.

²⁵Wa yaa nù mɛ nyɔŋ mɔ. Kà wa tɛ ba yí-wa nɛ ŋgɔn wó, wa zɔk nɛ o wi-ɗɔr-mɔ nɛ gbar nɛ ɗoŋ ŋmaa tɛnɛ. Nɛ́ o be Ismaɛl a̧ tɛ nɛ nú Galad kai nɛ o fuu-nyama, o nɔ̧́-nyama in o yí-nyama zu ŋgeloba kɔ-wa yak nɛnɛ si Egiptɛ.

²⁶Ɓɛɛ Juda tɔ̧ ha̧ o nya-a̧: «Nɛ́ ge a̧ ɛ̀ɛ̀ tɛ kpa oi gbɛɛ nya yɛ in hu̧sa̧ tɔk-tɛ-a ge?

²⁷Ɛ̀ɛ̀ nɛ́ɛ̀ ɗɔ́r nɛ́ a̧ ha̧ o be Ismaɛl, ɓɛɛ k’ɛ́ɛ́ de ŋgamɔ in a̧ na, wen nya yɛ nɛ kiitɛ yɛ.» Ɓɛɛ o nya-a̧ zii wen nú-a.

²⁸Ŋgimbi nɛ̀ o wi-ɗɔr-mɔ, o be Madiaŋ ɓira mɛ yak, o zɔmwi ko Jozɛf daka a̧ gbonɛ nɛ̀ kɔ̧́ kɔ̧‘i, ɓɛɛ wa ɗɔr a̧ ha̧ o be Ismaɛl tɛ kɔya sede ɓu yiitoo, ɓɛɛ o wi nɔ‘i ba kɔ‘i Jozɛf yaknɛ si Egiptɛ.

²⁹Ŋgimbi nɛ̀ Rubɛn sii ɗoŋ nú kɔ̧‘i, Jozɛf bo sɛn hi̧i̧ ɓɔna. See Rubɛn ɗaŋa, ɓɛɛ a̧k laa tɛ yinɛ.

³⁰A̧ pia ɗoŋ tɛɛ kpa o nya-a̧, ɓɛɛ a̧ tɔ̧: «Bem’ɛi bo hi̧i̧ ɓɔna! War kɔ‘m, mi tɛ e zu'm si dee?»

³¹Wa baa laa ko Jozɛf, ɓɛɛ wa gɔn gbadua, ba laa'i zakati nɛ tɔk-aa.

³²Wa toma ŋunyuŋ gasa laa nɛ dap-aa nɛtɛ nɛtɛ ha̧ dáà kɔ-wa, ɓɛɛ wa tɔ̧: «Ɛ̀nɛ̀ zɔ́k laa n’ɛɛ kpaa’ɛ! Nɛ́ laa ko bem k’ɛ́nɛ́ nde?»

³³Jakob zɔka laa'i, ɓɛɛ tɔ̧: «Nɛ́ laa ko bem kɔ‘m! Boko-nam a̧ nyɔŋa a̧. Mur-tɛ Jozɛf ɓira sɛ́kɛ́ɗɛ́-sɛ́kɛ́ɗɛ́.»

³⁴Jakob a̧ka̧ laa tɛ yinɛ, ɓɛɛ mar nɛ bufu zim nɛ bem kɔ‘i ɗoŋ-aa nyɛi̧.

³⁵O bem kɔ̧-a̧ be-wiwii-a in o be-okoo-a lɛŋ mɔi̧a ŋmaa mɛ ga̧ see-aa, ɓɛɛ a̧ bɛ̧; a̧ tɔ̧a̧: «Mi kɔ̧ na! Mi tɛ zim kànà bem kɔ‘m hegɔ fio ba nɛ‘m si kpa nɛ a̧ fara ko o fio mɛ.» Ɓɛɛ dáà kɔ̧-a̧ hi̧i̧ a̧.

³⁶O be Madiaŋ baa kɔ‘i Jozɛf nɛ́ɛ̀ ɗɔr siti ha̧ Potifar, gasa wi-duk-zu o wi-pɛm-nù ko wannu Egiptɛ.