Read Northwest Gbaya KU̧U̧NAŊMƆ 39 Bible Online

KU̧U̧NAŊMƆ 39 - Northwest Gbaya bible

KU̧U̧NAŊMƆ 39

¹O be Ismaɛl baa so Jozɛf yaknɛ si sɛn Egiptɛ, ɓɛɛ Potifar be Egiptɛ, gasa wi-duk-zu o wi-pɛm-nú kira ko wannu Egiptɛ hi̧fi so a̧.

²GASA WAN yora so ɗoŋ Jozɛf; hegɔ mɔ lɛŋ n'aa dea hɔɔ nɛ gba̧a̧, ɓɛɛ a̧ duka so ɔ kɔ̧ tua ko dáà-bara kɔ̧-a̧, be-nú Egiptɛ.

³Hee mɔ'ɔ nɛ dáà-bara ko Jozɛf zɔka'e GASA WAN yor nɛ ɗoŋ-aa sɛn tɛ mɔ n'aa de lɛŋ ga,

⁴Jozɛf baa see dáà-bara kɔ‘i, ɓɛɛ dáà-bara kɔ̧-a̧ ba a̧ e nɛ gasawi zu o wi-de-tom in o mɔ lɛŋ kɔ̧ tua kɔ‘i.

⁵Ŋgimbi nɛ Potifar ee nɛ Jozɛf hee wi-duk-zu mɔ kɔ‘i lɛŋ ga, GASA WAN toka de yoŋgo a zu o kpaamɔ kɔ̧-a̧ nɔ‘i lɛŋ wen zu Jozɛf. De yoŋgo ko GASA WAN duka zu o kpaamɔ kɔ̧-a̧, ku̧naŋ-a nɛ kɔ̧ tua kɔ̧-a̧ hɔ nɛnɛ kpɛɛfɔ kɔ̧-a̧ mɛ mbɛt.

⁶A̧ ea ha̧ mɔ lɛŋ mɛ zii nɛ Jozɛf, ɓɛɛ mɔ kɔ̧-a̧ kpɔk n'aa ta nɛ nyɔŋa mɔ si tɛ-a ɓɛɛ. Jozɛf yora so ŋgaiwi nɛ kpoo-tɛ in saŋa-yí mbɛt.

⁷Hɔ-ɗoŋ mɔɔ nɔ‘i, kóò ko dáà-bara ko Jozɛf ee yí sitɛ a̧, ɓɛɛ tɔ̧: «Mɛ̀ ɔ́ in am!»

⁸Jozɛf bɛ̧ɛ̧ mɔ‘i, ɓɛɛ tɔ̧ ha̧ kóò ko dáà-bara kɔ‘i: «Zɔk, dáà-bara kɔ‘m ea'm ká̧ tɛ-wi. A̧ ee mɔ kɔ̧-a̧ lɛŋ er-am, ɓɛɛ a̧ e kɔ̧-a̧ see-aa tɛ mɔ kɔ̧ tua’ɛ na.

⁹Dáà-bara kɔ‘m nɛ zu kpa ŋgai sɛn kɔ̧ tua’ɛ hee mi ga na. Mɔ kpɔk n'aa dora er-am bo na, nɛ́ mɛ́ ɓɛɛ, wen mɛ́ nɛ́ kóò kɔ̧-a̧. Hee ge mi tɛ de ndiŋmɔ hegɔ de nɛ ɗaŋmɔ ti Sɔ̧ ge?»

¹⁰Kóò‘i ŋgii nɛ Jozɛf ɓɔnsɛnɛ, ɓɛɛ Jozɛf kɔ̧ so mɛ duk in koo'i na.

¹¹Ŋma wese, Jozɛf yee tua wen dee tom kɔ‘i, ɓɛɛ gee ŋma wi-de-tom kpɔk bo kɔ̧ tua na.

¹²Kóò‘i kasa laa tɛ-a yor nɛnɛ, ɓɛɛ tɔ̧ ha̧ a̧: «Mɛ̀ ɔ́ in am!» Ɓɛɛ Jozɛf siŋ laa kɔ‘i e er kóò‘i, ɓɛɛ war yì gbo kɔ̧ tua.

¹³Ŋgimbi nɛ kóò‘i zɔka'e Jozɛf gɔma gbo e laa kɔ̧-a̧ ɓɔn er-wi,

¹⁴a̧ saa o wi-de-tom tɛnɛ, ɓɛɛ tɔ̧ ha̧ wa: «Ɛ̀nɛ̀ zɔ́k ŋma ɛ̧ɛ̧! Wa baa ŋma be Hebreu pi̧ mgbara yɛ, wen dee ŋma mɔ yek nɛ ɛɛ! A̧ tɛɛ mɛ ɔ in am, ɓɛɛ mi hiɗi mɔ nɛ ŋgaya-a sa nɛ mɔ.

¹⁵Ŋgimbi n'aa zia mi hiɗi nɛ́ mɔ nɛ̀ ŋgaya-a sa nɛ mɔ, a̧ siŋa laa kɔ̧-a̧ pi̧ katɛ‘m, ɓɛɛ a̧ gɔm gbo.»

¹⁶Kóò‘i baa laa e katɛ pɛm nɛ ŋgimbi pia ɗoŋ ko wíì kɔ‘i.

¹⁷A̧ tɔ̧ɔ̧ ha̧ dáà-wan-tua hee mɔ'ɔ ga: «Bara be Hebreu nɛ mɛ baa tɛnɛ'ɛ tɛɛ pii tɛ‘m mɛ fɛŋ am!

¹⁸Ŋgimbi n'am hiɗa mɔ nɛ ŋgaya-a sa nɛ mɔ, a̧ siŋa laa pi̧ katɛ‘m, ɓɛɛ a̧ gɔm gbo si zan.»

¹⁹Ŋgimbi nɛ dáà-wan-tua zia wen nɛ kóò tɔ̧‘e: «Mɛ̀ zɔ́k yí-tom ko bara kɔ-mɛ nɛ dee in am’ɛ!» see-aa nyima nyɛmna.

²⁰Wan kɔ̧-a̧ ha̧a̧ nú, ɓɛɛ wa ba Jozɛf pi̧ kɔ̧ zɔɓɔ, fara nɛ wannu kai o wi-zɔɓɔ kɔ‘i a sɛnɛ; nɛ́ hegɔ n'aa duka nɛnɛ kɔ̧ tua-zɔɓɔ.

²¹GASA WAN yora so ɗoŋ Jozɛf; a̧ zɔka a̧ nɛ de yí, ɓɛɛ a̧ de ha̧ wi nɛ zɔk o wi-zɔɓɔ mɛ kpa desee zu a̧.

²²Wi’ɛi baa Jozɛf e zu o wi-zɔɓɔ lɛŋ. Mɔ nɛ tɛ de kɔ̧ tua-zɔɓɔ lɛŋ tɛ de ɗoŋ ha̧a̧nú ko Jozɛf.

²³Gasa wi-duk-zu o wi-zɔɓɔ ta kɔ‘i ŋma mɔ na, wen mɔ lɛŋ duk er Jozɛf, wen nɛ GASA WAN a̧a̧ in Jozɛf, ɓɛɛ Sɔ̧ de ha̧ mɔ ko Jozɛf lɛŋ mɛ hɔ gba̧a̧.