Read Northwest Gbaya KU̧U̧NAŊMƆ 40 Bible Online

KU̧U̧NAŊMƆ 40 - Northwest Gbaya bible

KU̧U̧NAŊMƆ 40

¹Ŋgimbi nɛ o mɔɔ nɔ‘i yaka lɛŋ kaɗi, wi-ha̧-dɔ̧ɔ̧ in wi-gi-brɛt ko wannu Egiptɛ dee ŋma ɗaŋmɔ yí wannu kɔ-wa.

²Wannu Egiptɛ kpaa tu̧u̧-see nyɛmna zu o gasawi kɔ̧-a̧ yiitoo'i, wi-ha̧-dɔ̧ɔ̧ in wi-gi-brɛt.

³A̧ kaia wa a er gasawi nɛ zɔk o wi-zɔɓɔ, sɛn kɔ̧ zɔɓɔ, tɛ kpɔk kale fara nɛ Jozɛf duk sɛnɛ.

⁴Gasawi nɛ̀ zɔk o wi-zɔɓɔ baa Jozɛf mɛ de tom ha̧ wa; wa duka hi̧i̧ ɗoŋ-aa nyɛi̧.

⁵Sɛn tɛ kpɔk zɛ, wi-ha̧-dɔ̧ɔ̧ in wi-gi-brɛt ko wannu Egiptɛ nɛ̀ yaa kɔ̧ tua-zɔɓɔ‘i yiitoo lɛŋ ɔɔ zu nɛ gba̧a̧-a̧ nɛtɛ nɛtɛ.

⁶Ŋgimbi nɛ̀ Jozɛf tɛ̀ɛ́ kpa wa mɛ́ tutuyɛ, a̧ zɔka'e wa kai nɛ́ sɔnti-wa kpa nɛ̀ ɗaŋsee.

⁷A̧ aka o gasawi ko wannu Egiptɛ nɔ‘i nɛ ya kɔ̧ zɔɓɔ in a̧ sɛn fara ko dáà-wan kɔ̧-a̧: «Wen ge s’ɛ́nɛ́ kai nɛ́ sɔnti'nɛ́ kpa nɛ̀ ɗaŋsee ge?»

⁸Wa kifa nú ha̧ Jozɛf: «Ɛ́ɛ́ ɔɔ nɛ zu tɛ yɛ, ɓɛɛ wi nɛ tɛ we ɗoŋ zu'i h’ɛ́ɛ́ bo na.» Ɓɛɛ Jozɛf tɔ̧ ha̧ wa: «Nɛ́ Sɔ̧ a̧ iŋa wee ɗoŋ zu. Ɛ̀nɛ̀ tɔ̧́ zu k’ɛ́nɛ́ ha̧‘m zii.»

⁹Gasa wi-ha̧-dɔ̧ɔ̧ ha̧ wannu tɔ̧ɔ̧ war zu kɔ‘i ha̧ Jozɛf hee mɔ'ɔ ga: «Sɛn ti'm, ŋma nyak-dɔ̧ɔ̧[20] a̧a̧ sɛnɛ,

¹⁰ɓɛɛ nyak-dɔ̧ɔ̧‘i a̧a̧ nɛ gbaa-er-a taar; ŋgimbi n'aa ku̧u̧ naŋ ɓɔa-a, o do-a gboa, zur, ɓɛɛ gbɛ̧.

¹¹Mi kasi nɛ́ be ɗele ko wannu sɛn er-am, nɛ mɔ'ɔ n'am ɓii o waya-nyak-dɔ̧ɔ̧, vati a sɛn kɔ̧ ɗele ko wannu, ɓɛɛ mi ba ɗele'i nyɛi̧ e er wannu.»

¹²Jozɛf tɔ̧ɔ̧ ha̧ a̧: «Mɔ nɛ zu kɔ-mɛ tɔ̧ nɛ mɔ'ɔ: o gbaa-er-te nɔ‘i taar'i, usi nɛ́ zɛ taar.

¹³Ɗoŋ zɛ taar, wannu tɛ́ gbo mɛ yinɛ sɛn kɔ̧ zɔɓɔ ɓɛɛ a̧ ha̧a̧ tom kɔ-mɛ ha̧ mɛ woyo; mɛ́ tɛ́ nyɛi̧ be ɗele kɔ̧-a̧ ha̧ a̧ woyo, a̧ tɛ ba, hee mɔ'ɔ nɛ̀ mɛ́ duka so de nɛti ga.

¹⁴Tɛ‘mɛ'ɛ mbaŋ ɗoŋ-am ŋgimbi nɛ mɛ tɛ kpa desee. Mi ai nú ha̧ mɛ, mɛ̀ dé demɔ in am, mɛ̀ tɔ̧́ de wen-tɛ‘m ha̧ wannu, ɓɛɛ mɛ̀ gbó‘m yinɛ kɔ̧ tua’ɛ.

¹⁵Wen wa baa so'm nɛ̀ nú hébreu mɛ tɛnɛ; sɛn hɛ̧ɛ̧ mbɛt, mi de ŋma ɗaŋmɔ na, nɛ mɔ'ɔ nɛ wa baa nɛ‘m pi̧ kɔ̧ zɔɓɔ'ɛ.»

¹⁶Gasa wi-gi-brɛt ko wannu zɔka'e, wee-ɗoŋ-zu ko Jozɛf ɔ sa̧a̧, ɓɛɛ a̧ tɔ̧ ha̧ a̧: «Mi mbɛt, mi ɔɔ zu fara n'am tui so nɛ́ bɔtɔ-brɛt taar.

¹⁷Sɛn kɔ̧ bɔtɔ mɛ́ ŋgɔn, o nyɔŋmɔ ko wannu Egiptɛ lɛŋ a̧a̧ sɛnɛ nɛ wa gia nɛtɛ, ɓɛɛ o nɔ̧́í̧ mɔi̧ ŋmaa nyɔŋ nɛ mɔ kɔ̧ bɔtɔ zu'm'i.»

¹⁸Jozɛf kifa nú ha̧ a̧: «Gba̧a̧ zu kɔ-mɛ nɛ mɔ'ɔ: o bɔtɔ nɔ‘i taar'i usi nɛ́ zɛ taar.

¹⁹Zɛ taar, ɓɛɛ wannu Egiptɛ tɛ fo mɛ gbonɛ; a̧ tɛ ba mɛ kun nyak ger-mɛ ga̧i̧ tɛ te, ɓɛɛ o nɔ̧́í̧ tɛ́ mɔi̧ ŋmaa, wen nyɔŋa mur-tɛ-mɛ.»

²⁰Sɛn tɛ taar zɛ kale ŋgimbi'i duka nɛ́ gbaŋa, wese nɛ wa koo nɛ wannu Egiptɛ; nɛ́ hegɔ n'aa dee gasa gbaŋa ha̧ o wi-de-tom kɔ̧-a̧. O wi-de-tom kɔ̧-a̧ tɛɛ lɛŋ sɛn tɛ gbaŋa'i, ɓɛɛ wa mgbɔ gasa wi-ha̧-dɔ̧ɔ̧ ha̧ a̧ in gasa wi-gi-brɛt tɛnɛ mgbara o dɔka bíí.

²¹Wannu Egiptɛ baa wi-ha̧-dɔ̧ɔ̧ ha̧ a̧ tom si fara tom kɔ̧-a̧ woyo, wen ha̧ a̧ mɛ nyɛi̧ be ɗele ha'i.

²²Ɓɛɛ war ko wi-gi-brɛt, a̧ kuna nyak ger-a ga̧i̧ tɛ te. Mɔ nɛ Jozɛf wee so ɗoŋ-aa ha̧ wa'i, nɛ́ mɔ‘i a̧ dea'i.

²³Ɓɛɛ gasa wi-ha̧-dɔ̧ɔ̧ ha̧ wannu tɔ̧ wen ko Jozɛf na; tɛ-a bìí ɗoŋ-aa.