Read Northwest Gbaya KU̧U̧NAŊMƆ 41 Bible Online

KU̧U̧NAŊMƆ 41 - Northwest Gbaya bible

KU̧U̧NAŊMƆ 41

¹Ɗoŋ pɛ yiitoo, ɓɛɛ wannu Egiptɛ ɔ zu fara n'aa yor ká̧ zaŋ Nil.

²A̧ zɔka de nana ndai mɔɔrɔ-ɗoŋ-yiitoo nɛ ŋmaŋa-a nɛ daŋ nɛ ɗɔɔ nana-yì Nil tɛnɛ. Wa ku̧u̧ naŋ nyɔŋa mbɔɗi zɔ̧.

³O ŋma nana ndai mɔɔrɔ-ɗoŋ-yiitoo woyo nɛ ɔ̧ka̧ ɗaŋ lɛŋ daŋa nɛ ɗɔɔ Nil tɛnɛ ɗoŋ o de ŋmaŋa-a, ɓɛɛ kai ŋmaa ya katɛ wa.

⁴O ɗaŋ ɔ̧ka̧ nana ndai nɔ‘i nyɔŋa o de ŋmaŋa-a mɔɔrɔ-ɗoŋ-yiitoo. Ɓɛɛ wannu tun tɛ ya.

⁵Nɛ́ mɔ'ɔ nɛ wannu ɔɔ ya woyo, ɓɛɛ ɔ mbe zu: sikila-alkamaari mɔɔrɔ-ɗoŋ-yiitoo nɛ gasa nɛ de-a gboo tɛ kpɔk kan-te-a.

⁶O ɔ̧ka̧ kan-te-alkamaari mɔɔrɔ-ɗoŋ-yiitoo nɛ búk-bɛɛ dɔɔ kor lɛŋ hɔɔ katɛ o kuti-a.

⁷Nɛ́ mɔ'ɔ nɛ o ɔ̧ka̧ sikila-alkamaari mɔɔrɔ-ɗoŋ-yiitoo nɔ‘i gura o de gasa-a, ɓɛɛ wannu tun tɛ ya; zu'i nɛ́ mɔ‘i.

⁸Mɛ́ tutuyɛ, taamɔ ko wannu duka yemsele; a̧ saa o wi-de-mɔɔ-kifi in o wi-iŋ-mgbara-mɔ Egiptɛ lɛŋ tɛnɛ, ɓɛɛ a̧ tɔ̧ o zu kɔ̧-a̧ lɛŋ ha̧ wa. Ŋma bíí kóó kpɔk nyɛm so mɛ tɔ̧ gba̧a̧-a̧ ha̧ a̧ na.

⁹Nɛ́ ŋgimbi'i a̧ gasa wi-ha̧-dɔ̧ɔ̧ ha̧ wannu tɔ̧a̧: «Tɛ‘m mbaŋa ɗoŋ yɔɔ-kaya kɔ‘m sɔsɔɔ!

¹⁰Ŋma wese see wannu ɗaŋa so zu o wi-de-tom kɔ‘i; a̧ tɔ̧a̧ ha̧ wa mɛ ba'm in gasa wi-gi-brɛt pi̧ kɔ̧ tua-zɔɓɔ ko gasawi nɛ zɔk o wi-zɔɓɔ.

¹¹Ɛ́ɛ́ yiitoo mbɛt ɔɔ zu tɛ kpɔk kale zɛ, ɓɛɛ wee-ɗoŋ-zu kpɔk kpɔk a̧a̧ nɛ̀ gba̧a̧ wen kɔ‘i.

¹²Ɛ́ɛ́ yaa so kpɔk fara in ŋma be Hebreu, ŋma bara ko gasa wi zɔk o wi-zɔɓɔ. Nɛ́ mɔ'ɔ n’ɛɛ wee ɗoŋ zu k’ɛɛ ha̧ a̧, ɓɛɛ a̧ tɔ̧ gba̧a̧-a̧ h’ɛ́ɛ́.

¹³Mɔ dee nyɛm nɛ ɗoŋ gba̧a̧ zu n'aa tɔ̧ɔ̧ h’ɛ́ɛ́. Kɔ‘m, wa foa'm e tɛ tom kɔ‘m woyo, ɓɛɛ ko ɓii bíí, wa ga̧i̧a a̧ tɛ te.»

¹⁴Wannu pi̧i̧ tom sa Jozɛf, ɓɛɛ wa ba a̧ nɛ kɔ̧ zɔɓɔ gbonɛ nɛ haya-a. A̧ kpuia zera, kpai laa, ɓɛɛ a̧ nɛ ti wannu.

¹⁵Wannu tɔ̧ɔ̧ ha̧ a̧: «Mi ɔɔ zu, ɓɛɛ ŋma bíí kpɔk nyɛm mɛ tɔ̧ gba̧a̧-a̧ ha̧‘m na. Mi zia'e ndé, kà bíí we ɗoŋ zu ha̧ mɛ, ɓɛɛ mɛ tɔ̧ɔ̧ gba̧a̧-a̧.»

¹⁶Jozɛf kifa nú ha̧ wannu: «Bó nɛ́ mi nɛ tɛ‘m na! Nɛ́ Sɔ̧ a̧ tɛ tɔ̧ gba̧a̧ zu'i ha̧ wannu.»

¹⁷Wannu tɔ̧ɔ̧ ha̧ Jozɛf: «Tɛ ɔɔ-zu kɔ‘m, mi duka ká̧ Nil,

¹⁸nɛ́ mɔ'ɔ nɛ ŋmaŋa nana ndai mɔɔrɔ-ɗoŋ-yiitoo daŋa nɛ ɗɔɔ Nil tɛnɛ, ɓɛɛ ku̧ naŋ nyɔŋa mbɔɗi zɔ̧.

¹⁹Ɓɛɛ o ŋma nana ndai mɔɔrɔ-ɗoŋ-yiitoo nɛ ɔ̧ka̧ ɗaŋ lɛŋ daŋa nɛ ɗɔɔ yi mbɛt. Mi tɛ zɔk o pɛrti ɔ̧ka̧ ndai nɔ‘i sɛn nu Egiptɛ nɛti na.

²⁰O ɗaŋ ɔ̧ka̧ nana ndai nɔ‘i mɔɔrɔ-ɗoŋ-yiitoo'i daŋa, ɓɛɛ nyɔŋ o ŋmaŋa ndai lɛŋ nɛ yaa so nɛti.

²¹Wa nyɔŋa wa, ɓɛɛ wi iŋ ndé, wa nyɔŋa nɛ́ ŋma mɔ na. Tɛ-wa ɗaŋa gan kuti-a, ɓɛɛ mi tun tɛ ya.

²²Mi ɔɔ zu woyo zɔk nɛ o de sikila-alkamaari nɛ ɔ gasa mɔɔrɔ-ɗoŋ-yiitoo nɛ hɔɔ tɛ kpɔk kale kan-te-a.

²³O ɔ̧ka̧ sikila-a mɔɔrɔ-ɗoŋ-yiitoo nɛ yí-a bo na nɛ̀ búk-bɛɛ dɔɔ kor lɛŋ hɔɔ katɛ wa mbɛt.

²⁴O ɔ̧ka̧ sikila-a mɔɔrɔ-ɗoŋ-yiitoo gura o de gasa-a. Mi tɔ̧ɔ̧ o zu nɔ‘i ha̧ o wi-de-mɔɔ-kifi, ɓɛɛ ŋma bíí kpɔk tɔ̧ gba̧a̧-a̧ ha̧‘m na.»

²⁵Jozɛf tɔ̧ɔ̧ ha̧ wannu: «Zu nɛ wannu ɔɔ yiitoo hɛ̧ɛ̧ nɛ kpɔk mɔ. Sɔ̧ mbaŋ nɛ tɛ wannu tɛ mɔ n'aa tɛ de.

²⁶O de ŋmaŋa ndai mɔɔrɔ-ɗoŋ-yiitoo nɔ‘i usi nɛ pɛ mɔɔrɔ-ɗoŋ-yiitoo, ɓɛɛ o de sikila-alkamaari mɔɔrɔ-ɗoŋ-yiitoo usi nɛ pɛ mɔɔrɔ-ɗoŋ-yiitoo mbɛt. Nɛ́ kale zu nɛ tɔ̧ nɛ kpɔk mɔ.

²⁷O ɗaŋ ɔ̧ka̧ ndai mɔɔrɔ-ɗoŋ-yiitoo, in o sikila-alkamaari nɛ yí-a bo na mɔɔrɔ-ɗoŋ-yiitoo nɛ̀ búk-bɛɛ dɔa'i, usi nɛ́ pɛ-kaɓa mɔɔrɔ-ɗoŋ-yiitoo.

²⁸Ɓɛɛ wen n'am kpaa mɛ tɔ̧ ha̧ wannu nɛ mɔ'ɔ. Sɔ̧ usa nɛ mɔ n'aa tɛ de ha̧ wannu.

²⁹Pɛ mɔɔrɔ-ɗoŋ-yiitoo nɛ tɛ tɛ, nyɔnɔ tɛ dɛm sɛn nú Egiptɛ lɛŋ.

³⁰Ɗoŋ ŋgimbi'i, kaɓa tɛ tik nù sɛn nú Egiptɛ tɛ pɛ mɔɔrɔ-ɗoŋ-yiitoo, ɓɛɛ tɛ-wi tɛ bi ɗoŋ nyɔnɔ nɛ dɛma so sɛn nú Egiptɛ‘i. Kaɓa tɛ ɗaŋ nù,

³¹ɓɛɛ wi beka iŋ oi nyɔnɔ nɛ dɛma so sɛn Egiptɛ ɓɔna. Ŋgimbi nɛ kaɓa'i tɛ́ tik nù, tɛ́ duk nɛ́ ŋgayamɔ nyɛmna.

³²Hee mɔ'ɔ nɛ zu'i tɔ̧ɔ̧ mɔ war yiitoo ha̧ wannu ga, mɛ̀ nɛ́ wen nɛ tɔ̧‘e Sɔ̧ ee see wen dee mɔ‘i kaɗi, ɓɛɛ Sɔ̧ tɛ de ha̧ mɔ‘i mɛ hɔ gba̧a̧ nɛ haya-a.

³³«Ɓɛɛ kinii, dee so gan ha̧ wannu mɛ hok ŋma bíí nɛ a̧a̧ nɛ iŋamɔ in iŋa-mgbara-mɔ mbɛt, mɛ ba a̧ e zu nú Egiptɛ,

³⁴ɓɛɛ a̧ a̧ kii o bíí nɛ tɛ ndɛm zu nyɔnɔ dam ɗoŋ pɛ-dɛma-nyɔnɔ mɔɔrɔ-ɗoŋ-yiitoo nɛ tɛ hɔ‘i.

³⁵Tɛ gɛsɛ nyɔnɔ mɔɔrɔ nɛ bíí tɛ kpa, wa tɛ ba kpɔk e ŋgɔn ha̧ wannu. Wa a̧ mɔi̧ o nyɔnɔ nɔ‘i ɗɔɔ ŋgai ko wannu tɛ pɛ mɔɔrɔ-ɗoŋ-yiitoo, ɓɛɛ wa a̧ e ŋgɔn tɛ o gasa ye.

³⁶O zu nyɔnɔ nɔ‘i tɛ duk nɛ ee mɔ ŋgɔn ko o ye nú Egiptɛ wen kaɓa nɛ tɛ tik nù zaŋ pɛ mɔɔrɔ-ɗoŋ-yiitoo; hegɔ, bíí beka fe wɔ sɛn nú Egiptɛ na.»

³⁷Wen'i dee tɛ wannu Egiptɛ in o gasawi kɔ̧-a̧ lɛŋ.

³⁸A̧ tɔ̧ɔ̧ ha̧ wa: «Ɔmi ko Sɔ̧ a̧a̧ tɛ wi’ɛ. Ɛɛ tɛ kpa ŋma bíí nɛ tɛ gan zu a̧ woyo nde?»

³⁹Ɓɛɛ wannu Egiptɛ tɔ̧ ha̧ Jozɛf: «Hee mɔ'ɔ nɛ Sɔ̧ usa yuwar mɔ‘i ha̧ mɛ ga, ŋma bíí nɛ iŋa mɔ in nɛ a̧a̧ nɛ iŋa-mgbara-mɔ hee mɛ ga bo na.

⁴⁰Mɛ tɛ ɔ wan zu o bíí kɔ̧ tua kɔ‘m. O bíí kɔ‘m lɛŋ tɛ mbo zu tɛ o ha̧a̧nú kɔ-mɛ, ɓɛɛ mɔ kpɔk n'am tɛ gan nɛ mɛ, mɛ̀ nɛ́ wen nɛ mi nɛ wannu ɓɛɛ.»

⁴¹Wannu Egiptɛ tɔ̧ɔ̧ ha̧ Jozɛf: «Kinii mi ee mɛ nɛ wan zu nú Egiptɛ lɛŋ.»

⁴²A̧ kpɔ̧i̧a̧ wele lɔr, pi̧ er Jozɛf, a̧ pi̧i̧ o yɛ́m-yɛ́m laa tɛ-a, ɓɛɛ pi̧ o kísí-lɔr ger-a.

⁴³Wannu Egiptɛ baa Jozɛf e kɔ̧ yiitoo keekee-nyaŋa kɔ‘i, ɓɛɛ o bíí ya ti a̧ ŋgan nɛ mɔ tɔ̧ nɛnɛ: «Ɛ̀nɛ̀ gú nù!» Wannu Egiptɛ ee ha̧ a̧ mɛ ɔ wan zu nú Egiptɛ lɛŋ.

⁴⁴Wannu Egiptɛ tɔ̧ɔ̧ ha̧ Jozɛf: «Mi nɛ wannu Egiptɛ; ɓɛɛ kà mɛ nɛ́ ha̧a̧ nú mɛ na, ŋma bíí kpɔk nɛ tɛ ba zu nɛ ŋgɔn sɛn nú Egiptɛ hɛ̧ɛ̧ bo na.»

⁴⁵Wannu Egiptɛ gɔna ŋma nin pi̧ zu Jozɛf'e nde, Safnɛt-Panea, ɓɛɛ a̧ ha̧ Asnat, boko-bem ko Poti-Fera wi-ɗafi-sɔ̧ Ɔn nɛ kóò ha̧ a̧. Jozɛf a̧a̧ so nɛ pɛ ɓu-taar, ŋgimbi n'aa nɛɛ nɛnɛ ti Faraɔŋ, wannu Egiptɛ. Jozɛf wara wannu Egiptɛ kaɗi, ɓɛɛ a̧ yak wen zɔka nú Egiptɛ lɛŋ.

⁴⁶

⁴⁷Zaŋ pɛ-dɛma-nyɔnɔ mɔɔrɔ-ɗoŋ-yiitoo'i, nyɔnɔ dɛma nyɛmna.

⁴⁸Jozɛf mɔi̧a o nyɔnɔ tɛ pɛ mɔɔrɔ-ɗoŋ-yiitoo dɛma-nyɔnɔ nú Egiptɛ a tɛ o gasa ye. A̧ mɔi̧a o wan nɛ dɛma tɛ o be ye a tɛ o gasa ye.

⁴⁹Jozɛf mɔi̧a nyɔnɔ nɛ dɔka-a hee nyɛmɛ ká̧ gba-tɔp ga a kɔ̧ dam. Wa nyɛm mɛ tɔr na, wa nyɛm mɛ we na mbɛt.

⁵⁰Nɛti ha̧ pɛ-kaɓa mɛ tik nù, Asnat boko-bem ko Poti-Fera, wi-ɗafi-sɔ̧ Ɔn koo be-wiwii yiitoo ha̧ Jozɛf.

⁵¹Jozɛf aa nin kaya-a nɛ́ Manase, wen a̧ taa so: «Sɔ̧ dee ha̧ tɛ‘m mɛ bi ɗoŋ bɔnɛ kɔ‘m gu nɛ o bíí tɛ pɛ́r-nam ko dáà kɔ‘m.»

⁵²A̧ aa nin hɔ-ɗoŋ kaya-a nɛ Efraim, wen a̧ taa so'e: «Sɔ̧ dee ha̧‘m mɛ ko bem sɛn fara bɔnɛ kɔ‘m.»

⁵³Pɛ-dɛma-nyɔnɔ mɔɔrɔ-ɗoŋ-yiitoo sɛn Egiptɛ kaɗa,

⁵⁴ɓɛɛ pɛ-kaɓa mɔɔrɔ-ɗoŋ-yiitoo ku̧ naŋ hɔa-a hee mɔ'ɔ nɛ Jozɛf baa tɔ̧ so ga. Kaɓa baa so nù lɛŋ, ɓɛɛ war ko nú Egiptɛ, nyɔŋmɔ a̧a̧ sɛnɛ dam fara lɛŋ.

⁵⁵Kaɓa tika zu o bíí Egiptɛ lɛŋ, ɓɛɛ hiɗimɔ-nyɔŋmɔ ɔ ŋgúr-ŋgúr sitɛ wannu. A̧ tɔ̧ɔ̧ ha̧ o be Egiptɛ lɛŋ: «Ɛ̀nɛ̀ nɛ́ tɛ Jozɛf, ɛ̀nɛ̀ dé mɔ lɛŋ n'aa tɛ tɔ̧ h’ɛ́nɛ́.»

⁵⁶Kaɓa tika nù dam fara lɛŋ, ɓɛɛ Jozɛf hú̧í̧ nú o dam-nyɔnɔ nɛ wa mɔi̧a so a tɛ o gasa ye wen ɗɔra-a ha̧ o be Egiptɛ. Kaɓa baa nú Egiptɛ nɛ ŋgaya-a.

⁵⁷Bíí lɛŋ tɛɛ so pii nú Egiptɛ wen hi̧fa nyɔŋmɔ er Jozɛf, wen kaɓa'i duka nɛ ŋga kaɓa zaŋnu lɛŋ.