Read Northwest Gbaya KU̧U̧NAŊMƆ 43 Bible Online

KU̧U̧NAŊMƆ 43 - Northwest Gbaya bible

KU̧U̧NAŊMƆ 43

¹Kaɓa ba so kana nɛ́ nú Kanaŋ nɛ̀ ŋgaya-a.

²Ŋgimbi nɛ wa kaɗa nyɔŋa mɔ nɛ wa kaia so piinɛ nɛ Egiptɛ kaɗi, dáà kɔ-wa tɔ̧ɔ̧ ha̧ wa: «Ɛ̀nɛ̀ sí ɗoŋ wen hi̧fa mbe nyɔŋmɔ h’ɛ́ɛ́ woyo.»

³Juda kifa nú ha̧ a̧: «Wannu'i tɔ̧ɔ̧ h’ɛ́ɛ́ nɛ̀ sa̧a̧-a̧‘e ndé, k’ɛ̀ɛ̀ nɛ́ baa nya-ɛɛ sinɛ ɗoŋ in yɛ̀ɛ́ na, ɛ́ɛ́ beka hɔ ti wi na.

⁴K’ɛ̀nɛ̀ nɛ́ kpɛka h’ɛ́ɛ́ mɛ́ si ɗoŋ in sɔŋkur nya-ɛɛ, ɛ́ɛ́ tɛ́ yak mɛ́ hi̧fi nyɔŋmɔ pii ɗoŋ h’ɛ́nɛ́.

⁵Ɓɛɛ k’ɛ̀nɛ̀ e war ha̧ a̧ mɛ́ nɛ̀ na, ɛ́ɛ́ beka kur nɔ̀ na, wen wi’ɛi tɔ̧ɔ̧ h’ɛ́ɛ́‘e: ‹K’ɛ̀nɛ̀ nɛ́ baa sɔŋkur nya'nɛ́ piinɛ ɗoŋ na, mi beka kpɛk'nɛ́ na.› »

⁶Israɛl tɔ̧a̧: «Wen ge ɛ́nɛ́ dee ɗaŋmɔ in am tɔ̧ nɛnɛ ha̧ wannu'i'e, ɛ́nɛ́ a̧a̧ nɛ̀ ŋma nya'nɛ́ woyo ge?»

⁷Wa kifa nú: «Wannu'i aka ndaa yɛ in tugun yɛ. A̧ aka mɔ ndé, dáà k’ɛ́ɛ́ dúk kpasa, in ɛ́ɛ́ a̧a̧ nɛ̀ ŋma nya yɛ nde? Bek’ɛ̀ɛ̀ kifi so nú tɛ o akamɔ kɔ̧-a̧ na nde? Ɛ́ɛ́ iŋa so'e a̧ tɛ̀ɛ́ tɔ̧ h’ɛ́ɛ́‘e ɛ̀ɛ̀ mgbɔ nya-ɛɛ nɛnɛ nde?»

⁸Ɓɛɛ Juda tɔ̧ ha̧ dáà kɔ‘i Israɛl: «Ɛ̀nɛ̀ é ha̧ Bɛnjamin nɛ́ in am; ɛ̀ɛ̀ kúr yak, k’ɛ́ɛ́ tɛɛ fe in'nɛ̀ɛ́ gu nɛ̀ o bem k’ɛɛ lɛŋ, ɓɛɛ h’ɛ́ɛ́ duk kpasa.

⁹Kà mɔ a̧ hɔɔ zu-a, mɔ-a lɛŋ a̧ tik nɛ́ zu'm. Kà‘m nɛ́ mgbɔɔ a̧ pii ɗoŋ h’ɛ́nɛ́ na, ɓɛɛ ɓaa-wen-aa a̧ duk nɛ́ zu'm sɛn ti'nɛ́ wese lɛŋ n'am biti duk kpasa.

¹⁰K’ɛ̀ɛ̀ zik so mɔ na, ɓɛɛ ŋmafara ɛ́ɛ́ nɛ̀ɛ́ so hɔ hi̧i̧ pii ɗoŋ war yiitoo kaɗi!»

¹¹Dáà kɔ-wa Israɛl tɔ̧ɔ̧ ha̧ wa: «Kà nɛ́ bòò hegɔ, ɛ̀nɛ̀ dé mɔ'ɔ: ɛ̀nɛ̀ káí o waya-te nù'ɛ a kɔ̧ tui k’ɛ́nɛ́ wen ha̧a̧ ha̧ wannu'i: be-sɔ̧ɔ̧-te, gɔrɔ tikiɗi, yí-nyama, fuu-nyama in o gba̧a̧-nyɔnɔ.[21]

¹²Ɛ̀nɛ̀ bá ŋma mbe sede er'nɛ́ woyo, ɓɛɛ ɛ̀nɛ̀ káí o sede nɛ wa kaia so a sɛn kɔ̧ bufu alkamaari k’ɛ́nɛ́‘i sinɛ ɗoŋ, ŋmafara mɔ‘i duka nɛ́ yɔɔ-kaya.

¹³Ɛ̀nɛ̀ mgbɔ́ nya'nɛ́, ɓɛɛ ɛ̀nɛ̀ yak, ɛ̀nɛ̀ sí ɗoŋ tɛ wi’ɛi.

¹⁴Sɔ̧ nɛ a̧a̧ nɛ ŋgayamɔ lɛŋ a̧ de ha̧ wi’ɛi mɛ́ de ko h’ɛ́nɛ́, ɓɛɛ a̧ a̧ e ha̧ Bɛnjamin in Simɛɔŋ mɛ́ pii ɗoŋ in'nɛ̀ɛ́; war kɔ‘m, mi tɛ duk, bem bo na, hee mi ko so bem na ga.»

¹⁵O wi nɔ‘i kaia o ha̧a̧mɔ nɔ‘i, wa baa ŋma mbe sede, ɓɛɛ wa mgbɔ Bɛnjamin. Wa yaka si Egiptɛ, ɓɛɛ wa hɔ ti Jozɛf.

¹⁶Ŋgimbi nɛ Jozɛf zɔka wa in Bɛnjamin, a̧ tɔ̧ɔ̧ ha̧ gasawi ko wi-de-tom kɔ̧-a̧: «Mɛ̀ mgbɔ́ o wi nɔ'ɔ si kɔ̧ tua. Mɛ̀ gɔ́n ŋma mɔ-dai ɓɛɛ mɛ̀ gí, wen o wi nɔ'ɔ tɛ nyɔŋ mɔ in am, ŋgimbi nɛ wese tɛ yor see zu.»

¹⁷Wi’ɛi dee kànà nɛ́ mɔ nɛ̀ Jozɛf tɔ̧ɔ̧ ha̧ a̧ mɛ de, ɓɛɛ a̧ mgbɔ wa nɛnɛ si kɔ̧ tua ko Jozɛf.

¹⁸Kíì dee wa nyɛmna, wen wa mgbɔɔ wa si sɛn kɔ̧ tua ko Jozɛf, ɓɛɛ wa tɔ̧ sitɛ ŋmaa: «Nɛ́ wen zu sede nɛ̀ wa baa e so sɛn kɔ̧ bufu alkamaari k’ɛ́ɛ́ tɛ́ kuti tɛa-a k’ɛ́ɛ́ hɛ̧ɛ̧ a̧ wa kai nɛ̀ ɛ́ɛ́ yaknɛ‘i. Wa kai yɛ yaknɛ in o tuifuu k’ɛɛ ha̧ wa mɛ de bɔnɛ in yɛɛ, ha̧ wa mɛ tik zu yɛ mɛ de yɛ nɛ̀ bara.»

¹⁹Wa ɗɔŋa pii katɛ gasa wi-duk-zu o wi-de-tom ko Jozɛf, ɓɛɛ wa ak a̧ sɛn nú tua:

²⁰«Nyaa, ɛ́ɛ́ gɔma er ti'nɛ́, ɛ́ɛ́ tɛ̀ɛ́ so sɛn hɛ̧ɛ̧ nɛti wen hi̧fa nyɔŋmɔ.

²¹Ŋgimbi n’ɛɛ hɔɔ yuwar fara-ɔ nu, n’ɛɛ hu̧i̧a̧ nú o bufu-alkamaari k’ɛɛ, ɓɛɛ kóó o ndé kpɔk kpɔk kpaa sede kɔ‘i sɛn kɔ̧ hɛra-bufu kɔ‘i; mgbák sede n’ɛɛ kaia so tɛnɛ wen hi̧fa nyɔŋmɔ, nɛ mɔ'ɔ n’ɛɛ kai pii ɗoŋ h’ɛ́nɛ́'ɛ.

²²Ɛ́ɛ́ baa ŋma mbe sede tɛnɛ woyo wen hi̧fa-a nɛ nyɔŋmɔ, ɓɛɛ ɛ́ɛ́ iŋ yí wi nɛ̀ aa so sede siɗoŋ kɔ̧ bufu-alkamaari k’ɛɛ na.»

²³Ɓɛɛ a̧ kifi nú ha̧ wa: «K’ɛ́nɛ́ ta ŋma mɔ na, ká kíì de'nɛ́ na mbɛt! Nɛ́ Sɔ̧ k’ɛ́nɛ́, Sɔ̧ ko dáà k’ɛ́nɛ́ a̧ aa mbɔi sɛn nú bufu alkamaari k’ɛ́nɛ́. Mi kpaa so sede k’ɛ́nɛ́.» Ɓɛɛ a̧ gbo Simɛɔŋ ha̧ wa.

²⁴Wi’ɛi mgbɔɔ wa ye kɔ̧ tua ko Jozɛf; a̧ baa yì tɛnɛ ha̧ wa, wen fɔra naŋ-wa, ɓɛɛ a̧ ha̧ nyɔŋmɔ ha̧ o tuifuu kɔ-wa.

²⁵Wa ɗafa mɔ mɛ ha̧ há̧ Jozɛf, pɛm nɛ ŋgimbi pia-ɗoŋ kɔ̧-a̧ mɛ wese-see-zu, wen wa iŋa so kaɗi'e, wi tɛ nyɔŋ mɔ sɛn hi̧i̧.

²⁶Ŋgimbi nɛ Jozɛf pia ɗoŋ sɛn kɔ̧ tua kaɗi, wa ha̧a̧ mɔ nɛ wa kaia so tɛnɛ ha̧ a̧ sɛn kɔ̧ tua'i, ɓɛɛ wa gu nù ti a̧.

²⁷A̧ kpɛka wa ak nɛ wa: «Sɔka dáà k’ɛ́nɛ́, n’ɛnɛ baa tɔ̧ so wen kɔ̧-a̧ ha̧‘m’ɛ duk nɛ de-a nde? A̧ duk kànà kpasa nde?»

²⁸Wa kifa nú: «Dáà k’ɛɛ, wi-de-tom k’ɛ́nɛ́ duk nɛ de-a. A̧ duk kpasa.» Wa gbɛɛ zugur-wa nù gu nù ti a̧.

²⁹Jozɛf baa zu nɛ ŋgɔn, ɓɛɛ a̧ zɔk Bɛnjamin, nya-a̧ kpɔk kɔ̧ zaŋ, ɓɛɛ a̧ ak mɔ: «Sɔŋkur nya'nɛ́ n’ɛnɛ tɔ̧ɔ̧ nɛnɛ ha̧‘m’ɛ nɛ́ mɔ'ɔ?» Ɓɛɛ Jozɛf tɔ̧ ha̧ Bɛnjamin: «Bem kɔ‘m, Sɔ̧ a̧ tok de yoŋgo zu mɛ!»

³⁰Nɛ̀ Jozɛf zɔka nya-wi, ko dee a̧, ɓɛɛ a̧ kii ŋma fara nɛ haya-a wen hi̧a̧ kɔ̧a̧. A̧ yee kɔ̧ gɔna-bɛr-tua kɔ̧-a̧, ɓɛɛ a̧ hi̧i̧ kɔ̧a̧ hi̧i̧.

³¹Ɗoŋ n'aa taia yí-a kaɗi, a̧ pia ɗoŋ nɛ nɔɔ-ŋgiɗi, ɓɛɛ a̧ ha̧ nú: «Ɛ̀nɛ̀ kɛ̧́ nyɔŋmɔ!»

³²Wa ha̧a̧ nyɔŋmɔ kɔ̧-a̧ nɛtɛ, ɓɛɛ wa ha̧ ko o nya-a̧ nɛtɛ in o be Egiptɛ nɛ nyɔŋ mɔ hi̧i̧ mbɛt nɛtɛ, wen o be Egiptɛ nyɛm mɛ nyɔŋ mɔ in o be Hebreu na, wen yuwar-kia-sɔ̧ kɔ-wa dora mɔ‘i.

³³Wa aa o be Hebreu nɔ‘i nɛ yuwar-a tan ti Jozɛf, ku̧u̧naŋ-a nɛ kaya-wi hɔ nɛnɛ tɛ́ sɔŋkur bem; wa yaa zɔk nɛ́ yí ŋmaa, nɛ̀ gɔna-ɗɛɗɛ.

³⁴Jozɛf ha̧a̧ nú, ɓɛɛ wa kai nyɔŋmɔ nɛ yaa ti-a ha̧ wa, ɓɛɛ war ko Bɛnjamin dɔka gan ko o dɔka bíí war mɔɔrɔ. Wa nyɔŋa mɔ, ɓɛɛ wa nɔ mɔ nyɛm tɛ-wa in Jozɛf.