Read Northwest Gbaya KU̧U̧NAŊMƆ 44 Bible Online

KU̧U̧NAŊMƆ 44 - Northwest Gbaya bible

KU̧U̧NAŊMƆ 44

¹[22] Jozɛf ha̧a̧ nú ha̧ wi-de-tom kɔ‘i; a̧ tɔ̧a̧: «Mɛ̀ á nyɔŋmɔ dun bufu ko o wi nɔ'ɔ hee mɔ'ɔ nɛ wa nyɛma mɛ tui ga, a̧ mɛ̀ á sede kɔ-wa kpɔk kpɔk siɗoŋ nú bufu.

²Mɛ tɛ pi̧ be-ɗele kɔ‘m nɛ‘i dee nɛ bu-mbɔi kɔ̧ bufu ko sɔŋkur nya-wa in sede alkamaari kɔ̧-a̧ mbɛt.» A̧ dee mɔ hee mɔ'ɔ nɛ Jozɛf tɔ̧ɔ̧ ha̧ a̧ mɛ de ga.

³Mɔ sa̧a̧ kaɗi, ɓɛɛ wa e ha̧ o wi nɔ‘i mɛ yak in o tuifuu kɔ-wa.

⁴Wa gboo saaye yak tikiɗi, ɗoŋ wa tɛ nyɛi̧ na, ɓɛɛ Jozɛf tɔ̧ ha̧ wi-duk-zu o wi-de-tom kɔ‘i: «Mɛ̀ kúr ŋgɔn, mɛ̀ wár yì ndak nɛ ɗoŋ o wi nɔ‘i; ŋgimbi nɛ mɛ tɛ kpa wa, mɛ̀ tɔ̧́ ha̧ wa: ‹Wen ge s’ɛnɛ kifa er demɔ nɛ̀ ɗaŋmɔ ge?

⁵Wen ge ɛ́nɛ́ zu̧u̧ be-ɗele ko wan kɔ‘m n'aa nɔ nɛ mɔ in n'aa zɔk nɛ mɔ mbɛt ge? Ɛ́nɛ́ dee ɗaŋmɔ batɛ!› »

⁶Wi-duk-zu o wi-de-tom nɛ̀ɛ́ kpa wa, ɓɛɛ we ɗoŋ o wen nɔ‘i ha̧ wa.

⁷Wa kifa nú ha̧ a̧: «Nyaa tɛ́ tɔ̧ pɛrti wen hegɔ hee ge? O wi-de-tom k’ɛ́nɛ́ beka nyɛm mɛ de pɛrti mɔ hegɔ na.

⁸Bó nɛ́ sede n’ɛɛ kpaa so sɛn nú bufu k’ɛɛ, ɛ́ɛ́ kaia pii ɗoŋ h’ɛ́nɛ́ nɛ nú Kanaŋ mɛ na nde? Hee ge ɛ̀ɛ̀ tɛ́ zu̧ bu-mbɔi in lɔr kɔ̧ tua ko wan k’ɛ́nɛ́ ge?

⁹Ŋma kpɔk mgbara o wi-de-tom k’ɛ́nɛ́ n’ɛnɛ tɛ́ kpa ɗele'i er-a, a̧ a̧ fe, ɓɛɛ ɛ́ɛ́ tɛ́ ya nɛ́ bara ko wan k’ɛɛ.»

¹⁰A̧ kɔ̧ɔ̧ ɗɔaa: «Mɔ'ɔ de kànà hee mɔ'ɔ n’ɛnɛ tɔ̧ɔ̧ ga, wi n'am tɛ kpa be-ɗele'i sɛn er-a, tɛ duk nɛ bara kɔ‘m, ɓɛɛ nɛ̀ war k’ɛ́nɛ́, wen beka bo zu'nɛ́ na.»

¹¹Nɛ̀ haya-a, kóó o ndé baa bufu alkamaari kɔ‘i e nù, ɓɛɛ bur nú-a.

¹²Wi-duk-zu o wi-de-tom ku̧u̧ naŋ kia mɔ nɛ kɔ̧ bufu ko kaya-wi hɔ nɛnɛ tɛ sɔŋkur nya-wa, ɓɛɛ wa kpa be-ɗele'i sɛn kɔ̧ bufu ko Bɛnjamin!

¹³Wa a̧ka̧ laa tɛ-wa yinɛ, ɓɛɛ wa kai mɔ a sɛn zu o tuifuu kɔ-wa ba war pii ɗoŋ sɛn saaye.

¹⁴Ŋgimbi nɛ̀ Juda in o nya-a̧ yee tua ko Jozɛf, ká a̧ ɓɔna so hi̧i̧ kaŋ, ɓɛɛ wa hɔ̧fi̧ a nù ti a̧.

¹⁵Ɓɛɛ Jozɛf ak wa: «Nɛ́ ge a̧ ɛ́nɛ́ dea’ɛ ge! Ɛ́nɛ́ iŋ‘e ndé, pɛrti bíí hee mi’ɛ ga iŋa zɔka mɔ na nde?»

¹⁶Juda kifa nú: «Nɛ́ ge ɛ̀ɛ̀ tɛ́ tɔ̧ ha̧ wan k’ɛɛ ɓɔ ge? Nɛ́ ge wen ge ɛ̀ɛ̀ tɛ́ tɔ̧ ge! Nɛ́ ge mɔ ge ɛ̀ɛ̀ tɛ́ tɔ̧ ha̧ yuwar wen k’ɛ́ɛ́ mɛ sa̧ ge! Nɛ́ Sɔ̧'ɔ̧ dee ha̧ ɗaŋmɔ ko o wi-de-tom k’ɛ́nɛ́ mɛ gbo zan. Kinii, ɛ́ɛ́ nɛ́ bara k’ɛ́nɛ́ wan k’ɛɛ, ɛ́ɛ́ gu nɛ̀ wi nɛ wa kpaa be-ɗele k’ɛ́nɛ́ er-a'i.»

¹⁷A̧ kifa nú-a: «Mi nyɛm mɛ de pɛrti mɔ hegɔ na! Wi’ɛi nɛ wa kpaa be-ɗele er-a'i tɛ duk nɛ bara kɔ‘m; ɓɛɛ war k’ɛ́nɛ́, ɛ̀nɛ̀ sí ɗoŋ nɛ de-a tɛ dáà k’ɛ́nɛ́.»

¹⁸Juda ɗɔŋa si katɛ Jozɛf, ɓɛɛ tɔ̧: «Nyaa, mi gɔma er h’ɛ́nɛ́. Ɛ̀nɛ̀ yéŋ zer'nɛ́ tɛ wen ko wi-de-tom k’ɛ́nɛ́, nɛ tɛ tɔ̧ h’ɛ́nɛ́; ká see'nɛ́ kur zu wi-de-tom k’ɛ́nɛ́ na mbɛt, wen ɛ́nɛ́ nyɛma ŋmaa in wannu Egiptɛ!

¹⁹Nɛ́ nyaa a̧ aka so yɛ, o wi-de-tom kɔ‘i'e, ɛ́ɛ́ a̧a̧ nɛ̀ dáà in ŋma nya-ɛɛ nde?

²⁰Ɛ́ɛ́ kifa nú h’ɛ́nɛ́‘e, ɛ́ɛ́ a̧a̧ nɛ̀ dáà in ŋma nya-ɛɛ nɛ̀ sɔka dáà k’ɛɛ kòó zu sɔki, nɛ ɓɔna nɛ geɗek-a nyɛmna. Zɔmwi kɔ̧-a̧ fee so e nɛ a̧, kpɔk-zaŋ ko nàà kɔ̧-a̧, ɓɛɛ dáà kɔ̧-a̧ del'aa nyɛmna.

²¹Ɛ́nɛ́ tɔ̧ɔ̧ ha̧ o wi-de-tom k’ɛ́nɛ́, ɛ̀ɛ̀ mgbɔ́ a̧ tɛnɛ ha'i, wi tɛ zɔk a̧.

²²Ɛ́ɛ́ kifa nú h’ɛ́nɛ́‘e, bem’ɛi nyɛm mɛ e dáà kɔ‘i duk na, wen kà a̧ e a̧ dúk, dáà kɔ̧-a̧ tɛ fe.

²³Ɓɛɛ ɛ́nɛ́ tɔ̧ɔ̧ so kànà ha̧ o wi-de-tom k’ɛ́nɛ́‘e, kà sɔŋkur nya-ɛɛ tɛ in yɛɛ na, wi beka kpɛk yɛ sɛn ti wi na.

²⁴«Ɓɛɛ ŋgimbi n’ɛɛ sii ɗoŋ sitɛ wi-de-tom k’ɛ́nɛ́ dáà k’ɛɛ, ɛ́ɛ́ wee ɗoŋ mɔ n’ɛnɛ tɔ̧ɔ̧ so ha̧ a̧.

²⁵Dáà k’ɛɛ tɔ̧a̧, ɛ̀ɛ̀ sí ɗoŋ, ɛ̀ɛ̀ hí̧fí nyɔŋmɔ,

²⁶ɓɛɛ ɛ́ɛ́ kífí nú‘e, ɛ́ɛ́ beka nyɛm mɛ si ɗoŋ na; kà sɔŋkur nya yɛ á̧ kura in yɛɛ, ɓɛɛ ɛ́ɛ́ yaka; kà sɔŋkur nya yɛ nɛ́ in yɛɛ na, wannu'i beka kpɛk yɛ ti a̧ na.

²⁷Dáà k’ɛɛ, wi-de-tom k’ɛ́nɛ́ tɔ̧ɔ̧ h’ɛ́ɛ́: ‹Ɛ́nɛ́ iŋa kóò kɔ‘m kòó ha̧‘m yiitoo ɓɛɛ.

²⁸Ŋma kpɔk ea'm duk, ɓɛɛ taamɔ kɔ‘m'e, saɗi nyɔŋa nɛ a̧, ɓɛɛ mi zɔk a̧ ɓɔna hɔ sɔsɔɔ.

²⁹Ɛ́nɛ́ kɔ̧ɔ̧ mɛ ba ɛ̧ɛ̧ bem’ɛ yinɛ er-am? Kà ŋma ŋgamɔ kpa a̧, nɛ oi sɔki kɔ‘m'i, mi tɛ fe nɛ tu̧u̧-see.›

³⁰«Kinii'i, kà‘m si ɗoŋ kpa wi-de-tom k’ɛ́nɛ́, dáà k’ɛɛ, kà sɔŋkur nya yɛ bo in yɛɛ na, hee mɔ'ɔ nɛ duka-a kɔ-wa ndaɗa ŋmaa ga,

³¹a̧ tɛ fe ŋgimbi n'aa be tɛɛ zɔk'e a̧ bo na. Ɓɛɛ fio kɔ̧-a̧‘i, nɛ́ ɛ́ɛ́ a̧ dee ha̧ a̧ mɛ fe nɛ tu̧u̧-see nɛ oi sɔki kɔ̧-a̧.

³²Ɛ̀nɛ̀ íŋ‘e, mi wi-de-tom k’ɛ́nɛ́ ha̧a̧ nú ha̧ dáà kɔ‘m'e, bem’ɛi a̧a̧ kɔ̧ er-am. Mi tɔ̧ɔ̧ so, kà‘m mgbɔ a̧ piinɛ na, ɓáá-wen-aa tɛ duk zu'm sɛn ti dáà kɔ‘m wese lɛŋ n'am biti duk kpasa.

³³Ɛ̀nɛ̀ é ha̧‘m, mi wi-de-tom k’ɛ́nɛ́ mɛ duk bara k’ɛ́nɛ́, ha̧ bem’ɛ si ɗoŋ in o zɔmwi kɔ‘i.

³⁴Kà bem’ɛ nɛ́ bòò in am na, hee ge mi tɛ si ɗoŋ tɛ dáà kɔ‘m ge? Dáà kɔ‘m beka zɔk bɔnɛ hegɔ nɛ gbaayí‘m na!»