Read Northwest Gbaya KU̧U̧NAŊMƆ 45 Bible Online

KU̧U̧NAŊMƆ 45 - Northwest Gbaya bible

KU̧U̧NAŊMƆ 45

¹Jozɛf nyɛm so mɛ nɔ ŋgiɗi sɛn mgbara o gii bíí nɛ̀ yaa katɛ a̧ na, ɓɛɛ a̧ tɔ̧ wen nɛ̀ hee-ger'e: «Ɛ̀nɛ̀ tɔ̧́ ha̧ o bíí lɛŋ a̧ gbo katɛ‘m.» Ŋma bíí kpɔk duk in a̧ ŋgimbi n'aa dee nɛnɛ ha̧ o nya-a̧ mɛ iŋ nɛ a̧ na.

²A̧ hi̧a̧ kɔ̧a̧ nɛ ŋgaya-a, ɓɛɛ o be Egiptɛ zii tiger-a, kóó o bíí kɔ̧ kira ko wannu mbɛt.

³Jozɛf tɔ̧ɔ̧ ha̧ o nya-a̧‘e: «Mi nɛ Jozɛf! Dáà kɔ‘m duk kpasa hɔ kinii nde?» Ɓɛɛ o nya-a̧ bó nɛ̀ ŋgai mɛ kifi nú ha̧ a̧ na, wen ɗɛɗɛ-wa gɔna ŋgimbi nɛ wa iŋa'e nɛ́ a̧.

⁴Jozɛf tɔ̧ɔ̧ ha̧ o nya-wi: «Ɛ̀nɛ̀ ɗɔ́ŋ pii katɛ‘m,» ɓɛɛ wa ɗɔŋ si katɛ a̧. A̧ tɔ̧a̧: «Mi nɛ́ Jozɛf n’ɛnɛ ɗɔra so pii Egiptɛ.

⁵Ɓɛɛ kinii, k’ɛ́nɛ́ ta mɔ gan na, k’ɛ́nɛ́ kpa ɗaŋsee wen n’ɛnɛ ɗɔra so'm pii sɛn hɛ̧ɛ̧ na. Mɔ‘i dee hegɔ wen h’ɛ́nɛ́ mɛ́ ya kpasa. Nɛ́ Sɔ̧ a̧ toma'm yak ti h’ɛ́nɛ́.

⁶Dee nɛ́ pɛ yiitoo kinii nɛ kaɓa tika nɛnɛ zu nù'ɛ; oi-aa ɓɔna pɛ mɔɔrɔ, wi beka wa fɔ in wi beka mɔi̧ nyɔnɔ na mbɛt.

⁷Sɔ̧ toma'm yak ti h’ɛ́nɛ́, wen mɔi̧a nyɔnɔ e h’ɛ́nɛ́, wen kpasa zuduk bíí k’ɛ́nɛ́ zu nù in kpasa o dɔka bíí mgbara'nɛ́.

⁸Bó nɛ́ ɛ́nɛ́ a̧ toma'm tɛnɛ hɛ̧ɛ̧ na, nɛ́ Sɔ̧ a̧ toma'm tɛnɛ mɛ duk nɛ́ gasawi ko wannu Egiptɛ, wi-duk-zu o bíí kɔ̧ tua kɔ̧-a̧, gasawi nú Egiptɛ lɛŋ.

⁹«Ɛ̀nɛ̀ sí ɗoŋ nɛ haya-a sɛn tɛ dáà kɔ‘m, ɓɛɛ ɛ̀nɛ̀ tɔ̧́ ha̧ wa; nɛ́ bem kɔ-wa Jozɛf a̧ tɔ̧ wen’ɛ: ‹Sɔ̧ dee ha̧‘m mɛ ɔ wan zu nú Egiptɛ lɛŋ. Ɛ̀nɛ̀ zír pii tɛ‘m nɛ haya-a, k’ɛ́nɛ́ nik naŋ‘nɛ́ na.

¹⁰Ɛ́nɛ́ tɛ́ kpa fara-duk sɛn nú Gɔsɛn, ɛ́nɛ́ tɛ ya katɛ‘m, ɛ́nɛ́ nɛ̀ tɛ‘nɛ́, o bem k’ɛ́nɛ́, o be-koo'nɛ́, o geɗek mɔ-dai in o gasa-a, gu nɛ o mɔ k’ɛ́nɛ́ lɛŋ.

¹¹Nɛ́ sɛn fara'i a̧‘m tɛ ha̧ nyɔŋmɔ h’ɛ́nɛ́ ɓɔnsɛnɛ wen oi pɛ-kaɓa ɓɔna mɔɔrɔ, wen k’ɛ́nɛ́ tɛ́ɛ̀ duk tɛ́ bɔnɛ, ɛ́nɛ́ in o bíí nutua k’ɛ́nɛ́ gu nɛ̀ o bíí k’ɛ́nɛ́ lɛŋ.›

¹²«Ɛ́nɛ́ nɛ̀ tɛ‘nɛ́ zɔka nɛ̀ yí‘nɛ́, sɔŋkur nya'm Bɛnjamin zɔka nɛ̀ yí mbɛt, nɛ́ mi a̧‘m tɔ̧ wen’ɛ h’ɛ́nɛ́ nɛ̀ nú‘m.

¹³Ɛ̀nɛ̀ wé ɗoŋ zɔnamɔ in hura-nin n'am a̧a̧ nɛnɛ Egiptɛ hɛ̧ɛ̧ ha̧ dáà kɔ‘m, in mɔ lɛŋ n’ɛnɛ zɔka; ɛ̀nɛ̀ dé ha̧ dáà kɔ‘m mɛ zir pii hɛ̧ɛ̧ nɛ haya-a.»

¹⁴Jozɛf sii hɛr ger nya-wi Bɛnjamin nɛ kɔ̧a̧, Bɛnjamin hɛra ger-a mbɛt hi̧i̧ nɛ kɔ̧a̧.

¹⁵A̧ hɛra o nya-a̧ kpɔk kpɔk hi̧i̧ nɛ kɔ̧a̧, ɓɛɛ wa ye tɛ tɔ̧ɔ̧ nyɛrɛ in a̧.

¹⁶Nyɛrɛ mɔ‘i sii a zer wannu Egiptɛ‘e, o nya Jozɛf hɔa, ɓɛɛ wannu in o wi-de-tom kɔ‘i lɛŋ kpa desee zu mɔ‘i.

¹⁷Wannu Egiptɛ tɔ̧ɔ̧ ha̧ Jozɛf: «Mɛ̀ tɔ̧́ ha̧ o nya-mɛ, wa a̧ a tui zu o mɔ-dai kɔ-wa, wa a̧ si ɗoŋ sɛn nú Kanaŋ,

¹⁸ɓɛɛ wa a̧ mgbɔ dáà kɔ-wa in o bíí kɔ-wa pii ɗoŋ pii tɛ‘m; mi tɛ ha̧ de nù, fara-dɛm-nyɔnɔ nú Egiptɛ ha̧ wa, ɓɛɛ wa kpaa de fara-nyɔŋ-mɔ mbɛt.

¹⁹Ɓɛɛ kɔ-mɛ, mɛ̀ tɔ̧́ ha̧ wa'e, wa a̧ kai o keekee nú Egiptɛ hɛ̧ɛ̧, wen kaia o geɗek bem kɔ-wa gu nɛ o kóò kɔ-wa, wa a̧ mgbɔ dáà kɔ-wa, ɓɛɛ wa a̧ pii ɗoŋ.

²⁰Ká wa ta mɔ nɛ dɔka-a wen zu o ŋma oi mɔ kɔ-wa nɛ tɛ ɓɔn na, wen o gba demɔ nɛ a̧a̧ sɛn nú Egiptɛ lɛŋ tɛ duk nɛ́ kɔ-wa.»

²¹O bem ko Israɛl dee kànà mɔ hegɔ, Jozɛf ha̧a̧ o keekee ha̧ wa, nyɛm nɛ ɗoŋ ha̧a̧nú ko wannu Egiptɛ, ɓɛɛ wa ha̧ o nyɔŋmɔ-yuwar ha̧ wa.

²²Ɓɛɛ Jozɛf ha̧ laa ha̧ wa kpɔk kpɔk, ɓɛɛ nɛ war ko Bɛnjamin, a̧ ha̧a̧ kɔya-sede gɔmŋmaa taar in laa mɔɔrɔ ha̧ a̧.

²³A̧ toma o wiwii tuifuu ɓu nɛ o demɔ Egiptɛ in o nana tuifuu ɓu nɛ̀ alkamaari, nɛ̀ nyɔŋmɔ in nyɔŋmɔ-yuwar wen tɛa-a ko dáà kɔ̧-a̧.

²⁴A̧ ee wa yuwar, ɓɛɛ a̧ war wa; a̧ tɔ̧ɔ̧ ha̧ wa: «K’ɛ́nɛ́ kpɛr nɛ yuwar na.»

²⁵Wa kura sɛn nú Egiptɛ, ɓɛɛ wa si hɔ nú Kanaŋ ti dáà kɔ-wa Jakob,

²⁶ɓɛɛ wa tɔ̧ ha̧ a̧: «Jozɛf dúk kpasa, nú Egiptɛ lɛŋ duk kɔ̧ er-a!» Wen'i de ŋma mɔ tɛ Jakob na, wen a̧ kpɛk wen nɛ wa tɔ̧‘i na.

²⁷Wa wee ɗoŋ wen nɛ Jozɛf tɔ̧ɔ̧ lɛŋ ha̧ a̧, ɓɛɛ a̧ zɔk o keekee nɛ Jozɛf toma tɛnɛ wen baa a̧, ɓɛɛ see-aa ga̧.

²⁸Israɛl tɔ̧ɔ̧ nɛ̀ hee-ger: «Nyɛma hegɔ! Jozɛf, bem kɔ‘m duk kpasa nɛ̀ mbetɛ! Mi tɛ́ nɛ̀ɛ́ zɔk a̧ nɛti sɛka'm fea!»