Read Northwest Gbaya KU̧U̧NAŊMƆ 46 Bible Online

KU̧U̧NAŊMƆ 46 - Northwest Gbaya bible

KU̧U̧NAŊMƆ 46

¹Israɛl kura yak in o mɔ kɔ‘i lɛŋ. A̧ hɔɔ Bɛrseba, ɓɛɛ a̧ ɗafi Sɔ̧ ko dáà kɔ̧-a̧ Izak.

²Mɛ zaŋzɛ, Sɔ̧ hɔɔ zu ha̧ Israɛl, ɓɛɛ sa a̧: «Jakob! Jakob!» Ɓɛɛ a̧ kɔ̧ sara: «Mi nɛ mɔ'ɔ.»

³Ɓɛɛ Sɔ̧ tɔ̧ woyo: «Mi nɛ Sɔ̧, Sɔ̧ ko dáà kɔ-mɛ, ká kíì de mɛ tɛ yaka-a si Egiptɛ mɛ na; wen nɛ́ hi̧i̧ a̧‘m tɛ de ha̧ mɛ mɛ kifi gasa dukbíí.

⁴Nɛ́ mi'i tɛ mgbɔ mɛ nɛnɛ si Egiptɛ mɛ, ɓɛɛ nɛ́ mi'i tɛ mgbɔ mɛ pii nɛnɛ mbɛt. Ŋgimbi nɛ mɛ tɛ́ fe, nɛ́ Jozɛf a̧ tɛ́ kpe yí-mɛ.»

⁵Jakob kura Bɛrseba; o bem kɔ̧-a̧ baa a̧ in o bem kɔ-wa ká bá nɛ̀ o kóò kɔ-wa a kɔ̧ keekee nɛ wannu Egiptɛ toma so tɛnɛ wen kaia wa.

⁶Wa kaia o mɔ-dai kɔ-wa in o mbɔi nɛ wa kpaa so nú Kanaŋ. Jakob yaka si nú Egiptɛ in o bezaŋ-aa lɛŋ,

⁷o bem in o be-koo-aa, wiwii in okoo-a; a̧ kaia wa lɛŋ si nú Egiptɛ mɛ.

⁸Nin o be Israɛl nɛ̀ zira si Egiptɛ nɛ́ mɔ'ɔ: Jakob in o bem kɔ‘i. Kaya-bem ko Jakob nɛ́ Rubɛn.

⁹O bem ko Rubɛn nɛ́ Hanɔk, Palu, Ɛsrɔŋ in Karmi.

¹⁰O bem ko Simɛɔŋ nɛ́ Yɛmuɛl, Yamin, Ohad, Yakin, Sɔhar in Saul bem nɛ̀ zɔŋa Kanaŋ koa.

¹¹O bem ko Levii nɛ́ Gɛrsɔŋ, Kehat in Mɛrari.

¹²O bem ko Juda nɛ́ Ɛr, Onaŋ, Sela, Pɛrɛs in Zera; mɔ kpɔk, Ɛr in Onaŋ fea so sɛn nú Kanaŋ. O bem ko Pɛrɛs nɛ́ Ɛsrɔŋ in Hamul.

¹³O bem ko Isakar nɛ́ Tola, Pua, Yov in Simrɔŋ.

¹⁴O bem ko Zabulɔŋ nɛ́ Sɛrɛd, Elɔŋ in Yaleɛl.

¹⁵O bem lɛŋ nɛ̀ Lea koo ha̧ Jakob sɛn bɔkɔ-nú Aram nɛ́ mɔɔ nɔ‘i. Dina duka nɛ́ kpɔk boko-bem mgbara wa. Wa lɛŋ duka nɛ́ o bíí ɓu-taar-zua-taar, o bem mɛ́ be-wiwii-a in be-okoo-a.

¹⁶O bem ko Gad nɛ́ Sifiɔŋ, Hagi, Suni, Ɛsbɔŋ, Eri, Arodi in Areli.

¹⁷O bem ko Asɛr nɛ́ Yimna, Yiswa, Yiswi, Bɛria in boko-nya-wa Sɛra. O bem ko Bɛria nɛ́ Ebɛr in Malkiɛl.

¹⁸O bem ko Zilpa kó-de-tom nɛ̀ Labaŋ ha̧a̧ so ha̧ bem kɔ‘i Lea nɛ̀ kòó ha̧ Jakob nɛ́ mɔ‘i. Wa ɓu-zua-mɔɔrɔ-ɗoŋ-kpɔk.

¹⁹O bem ko Rachɛl nɛ̀ koo ha̧ Jakob nɛ́ Jozɛf in Bɛnjamin.

²⁰O bem nɛ̀ Jozɛf koo sɛn Egiptɛ nɛ́ Manase in Efraim. O bem nɛ̀ Asnat, boko-bem ko Poti-Fera, wi-ɗafi-sɔ̧ Ɔn koo nɛ́ mɔ‘i.

²¹O bem ko Bɛnjamin nɛ́ Bɛla, Bɛkɛr, Asbɛl, Gera, Namaŋ, Ehi, Ros, Mupim, Hupim in Ard.

²²O bem nɛ̀ Rachɛl koo ha̧ Jakob nɛ́ mɔ‘i. Wa lɛŋ ɓu-zua-naar.

²³Bem ko Dan nɛ́ Husim.

²⁴O bem ko Nɛftalii nɛ́ Yaseɛl, Guni, Yɛsɛr in Silɛm.

²⁵O bem ko Bilha kó-de-tom nɛ̀ Labaŋ ha̧a̧ so ha̧ Rachɛl, bem kɔ̧-a̧ nɛ̀ koo ha̧ Jakob nɛ́ mɔ‘i. Wa lɛŋ nɛ́ bíí mɔɔrɔ-ɗoŋ-yiitoo.

²⁶O bíí nutua ko Jakob nɛ̀ duk nɛ́ tɔk-tɛ Jakob nɛ̀ yaka si sɛn nú Egiptɛ nɛ́ o bíí ɓu-mɔɔrɔ-ɗoŋ-kpɔk-zua-mɔɔrɔ-ɗoŋ-kpɔk, wi tɔr o kóò ko o bem kɔ̧-a̧ na.

²⁷O bem nɛ̀ Jozɛf koo sɛn Egiptɛ nɛ́ bem yiitoo, o bíí lɛŋ nɛ̀ Jakob mgbɔɔ si sɛn Egiptɛ mɛ, nɛ́ bíí ɓu-mɔɔrɔ-ɗoŋ-yiitoo.

²⁸Israɛl toma Juda yak nɛti sitɛ Jozɛf sɛn Gɔsɛn. Ŋgimbi nɛ wa hɔɔ nú Gɔsɛn,

²⁹Jozɛf hɛra nyaŋa tɛ keekee kɔ‘i, ɓɛɛ daŋ si Gɔsɛn mɛ we ti dáà kɔ‘i Israɛl. Ŋgimbi nɛ Jozɛf zɔka dáà kɔ‘i, a̧ hɛra a̧ hi̧i̧ nɛ kɔ̧a̧ ɗoŋ-aa nyɛi̧.

³⁰Israɛl tɔ̧ɔ̧ ha̧ Jozɛf: «Ɛ̧ɛ̧ kinii, hee mɔ'ɔ n'am zɔka yí-mɛ ga, mi nyɛma mɛ fe, wen nɛ mɛ duk kpasa!»

³¹Nɛ́ mɔ'ɔ nɛ̀ Jozɛf tɔ̧ɔ̧ ha̧ o nya-wi in ha̧ o bíí nutua ko dáà kɔ̧-a̧: «Mi nɛ̀ɛ́ tɛ wannu Egiptɛ wen mbaŋa tɛ-a'e, o nya'm in o bíí nutua ko dáà kɔ‘m, nɛ̀ a̧a̧ so nú Kanaŋ, pia kpa'm.

³²O wi nɔ‘i nɛ́ o wi-dai-mɔ-dai, wen wa zɔk nɛ́ o mɔ-dai ɓɔnsɛnɛ; wa kaia o gasa mɔ-dai in o geɗek-a mbɛt in o mɔ kɔ-wa lɛŋ tɛnɛ.

³³Ɓɛɛ ŋgimbi nɛ̀ wannu Egiptɛ tɛ sa'nɛ́, mɛ ak'nɛ́‘e, tom k’ɛ́nɛ́ nɛ́ ge tom ge nde,

³⁴ɛ́nɛ́ tɛ kifi nú: ‹Tom k’ɛɛ wi-de-tom k’ɛ́nɛ́ nɛ daia mɔ-dai tɛ ŋgimbi ŋgaiwi k’ɛɛ hɔ nɛnɛ sɔsɔɔ. Ɛ́ɛ́ yá kànà nɛ́ o wi-dai-mɔ-dai hee mɔ'ɔ nɛ o dáà k’ɛɛ yaa so ga.› Hegɔ ɛ́nɛ́ nyɛma mɛ ya sɛn Gɔsɛn wen o be Egiptɛ sɛn o wi-dai-mɔ nyɛmna.»