Read Northwest Gbaya KU̧U̧NAŊMƆ 47 Bible Online

KU̧U̧NAŊMƆ 47 - Northwest Gbaya bible

KU̧U̧NAŊMƆ 47

¹Jozɛf nɛ̀ɛ́ mbaŋ tɛ wannu Egiptɛ, ɓɛɛ tɔ̧ ha̧ a̧: «Dáà kɔ‘m in o nya'm hɔɔ nɛ nú Kanaŋ nɛ̀ mɔ-dai kɔ-wa lɛŋ: o geɗek-a in o gasa-a mbɛt, in o mɔ kɔ-wa lɛŋ. Wa a̧a̧ sɛn nú Gɔsɛn.»

²Jozɛf mgbɔɔ o ŋma nya-a̧ mɔɔrɔ e ɗoŋ-aa nɛ́ɛ̀ usi wa ha̧ wannu Egiptɛ.

³Wannu Egiptɛ aka o nya Jozɛf: «Tom k’ɛ́nɛ́ nɛ́ ge tom ge?» Ɓɛɛ wa kifi nú ha̧ wannu Egiptɛ: «Tom k’ɛɛ, wi-de-tom k’ɛ́nɛ́ nɛ daia o mɔ-dai; ɛ́ɛ́ nɛ́ o wi-dai-mɔ-dai hee mɔ'ɔ nɛ o dáà k’ɛɛ yaa so ga.»

⁴Ɓɛɛ wa tɔ̧ ha̧ wannu Egiptɛ woyo: «Ɛ́ɛ́ kura pii hɛ̧ɛ̧, wen o wi-de-tom k’ɛ́nɛ́ bo so nɛ̀ zɔ̧ wen o mɔ-dai kɔ-wa ɓɔna, wen kaɓa baa nú Kanaŋ lɛŋ. Ɛ̀nɛ̀ é yuwar ha̧ o wi-de-tom k’ɛ́nɛ́ mɛ ba fara sɛn Gɔsɛn.»

⁵Wannu Egiptɛ tɔ̧ɔ̧ ha̧ Jozɛf: «Kinii o nya-mɛ in dáà kɔ-mɛ pia zu mɛ.

⁶Nù'ɛ nɛ́ kɔ-mɛ, mɛ̀ é o nya-mɛ in dáà kɔ-mɛ tɛ de fara nɛ gana o dɔka-a. Wa a̧ de ye tɛ nú Gɔsɛn. Kà mɛ nɛ́ iŋa o ŋma mgbara wa nɛ nyɛma mɛ de kpasamɔ, mɛ̀ á wa nɛ o wi-dai-mɔ-dai kɔ‘m.»

⁷Jozɛf mgbɔɔ dáà kɔ‘i nɛ́ɛ̀ usi ha̧ wannu Egiptɛ, ɓɛɛ Jakob tok de yoŋgo zu wannu.

⁸Wannu Egiptɛ aka a̧: «Mɛ a̧a̧ nɛ pɛ ge?»

⁹Ɓɛɛ Jakob kifi nú: «Dee nɛ́ pɛ gɔmŋmaa-nɛ-ɓu-taar n'am yar nɛnɛ zu nù nɛnɛ hee gɛnɛ ga; ɗoŋ duka-kpasa kɔ‘m nyɛi̧ na, in mi zɔka bɔnɛ nyɛmna. Mi kpa pɛ hee ko o zɔmdáa kɔ‘m nɛ yaa zu nù hee o gɛnɛ ga na mbɛt.»

¹⁰Jakob toka de yoŋgo zu wannu Egiptɛ, ɓɛɛ a̧ war a̧.

¹¹Jozɛf usa fara-duk ha̧ dáà kɔ‘i in ha̧ o nya-wi, ɓɛɛ a̧ usi nɛ́ de fara ha̧ wa sɛn Egiptɛ tɛ nù ko Ramsɛs, hee mɔ'ɔ nɛ wannu Egiptɛ tɔ̧ɔ̧ so ga.

¹²Jozɛf ha̧a̧ o nyɔŋmɔ ha̧ dáà kɔ‘i, ha̧ o nya kɔ‘i gu nɛ o bíí nutua ko dáà kɔ̧-a̧ lɛŋ, nyɛm nɛ ɗoŋ o geɗek bem nɛ a̧a̧ sɛn er wa.

¹³Nyɔŋmɔ ɓana zaŋnu lɛŋ, wen kaɓa baa nù nyɛmna. Nú Egiptɛ in nú Kanaŋ iŋ mɔ nɛ wa tɛ de ŋgimbi kaɓa'i ɓɔna.

¹⁴Jozɛf mɔi̧a sede nú Egiptɛ in nú Kanaŋ lɛŋ nɛ̀ o bíí hi̧fa so nɛ nyɔŋmɔ a fara-a-sede ko wannu Egiptɛ.

¹⁵Ŋgimbi nɛ sede kaɗa sɛn nú Egiptɛ in nú Kanaŋ kaɗi, o be Egiptɛ lɛŋ mɔi̧a ŋmaa tɛ́ɛ̀ kpa Jozɛf, ɓɛɛ wa tɔ̧: «Ɛ̀nɛ̀ há̧ nyɔŋmɔ h’ɛ́ɛ́! Ɛ́ɛ́ tɛ fe ti'nɛ́ wen nɛ sede bo na nde?»

¹⁶Ɓɛɛ Jozɛf tɔ̧ ha̧ wa: «Kà sede á̧ boo na, ɛ̀nɛ̀ káí o mɔ-dai k’ɛ́nɛ́ tɛnɛ, wen hi̧fa-a nɛ nyɔŋmɔ.»

¹⁷Ɓɛɛ wa kai o mɔ-dai kɔ-wa tɛnɛ ha̧ Jozɛf, ɓɛɛ a̧ ha̧ nyɔŋmɔ ha̧ wa nyɛm nɛ gɛnɛ mɔ-dai: o nyaŋa, o ndai, o sami, o gbadua ká bá nɛ̀ o tuifuu. Nɛ́ hegɔ a̧ o bíí kpaa nɛ nyɔŋmɔ tɛ pɛ‘i, nyɛm nɛ ɗoŋ mɔ-dai kɔ-wa nɛ wa ha̧a̧ lɛŋ.

¹⁸Ŋgimbi nɛ pɛ‘i yaka kaɗi, wa pia ɗoŋ woyo tɛ-a, ɓɛɛ wa tɔ̧: «Ɛ́ɛ́ beka hu̧si tɔ̧a̧-a̧ ha̧ wan k’ɛɛ ndé, nɛ́ kpasawen, sede kaɗa kaɗi na. O mɔ-dai lɛŋ nɛ́ ko wan k’ɛɛ kinii. Mɔ nɛ ɓɔna er yɛ mɛ ha̧ ha̧ wan k’ɛɛ, nɛ́ kiitɛ-ɛɛ in o nù k’ɛɛ ɓɛɛ.

¹⁹Ɛ́ɛ́ tɛ́ fe bɔɔ ti'nɛ́ nde? K’ɛ̀ɛ̀ bo na, nù k’ɛɛ bó nɛ́ ŋma mɔ na. Ɛ̀nɛ̀ gɔ́n zu yɛ in nù k’ɛɛ nɛ nyɔŋmɔ, ɓɛɛ ɛ́ɛ́ in nù k’ɛɛ, ɛ́ɛ́ tɛ de tom ha̧ wannu Egiptɛ. Ɛ̀nɛ̀ há̧ kpar-nyɔnɔ h’ɛ́ɛ́, h’ɛ́ɛ́ mɛ duk kpasa, wen k’ɛɛ tɛɛ fe, ɓɛɛ ká nù tɛɛ ɗaŋ!»

²⁰Jozɛf hi̧fa nú Egiptɛ lɛŋ ha̧ wannu. O be Egiptɛ lɛŋ ɗɔra nù kɔ‘i, wen kaɓa ŋgaya nyɛmna, ɓɛɛ nù nɛ oi-aa duk nɛ ko wannu.

²¹Jozɛf kaia wa nɛ bara wen dee tom dam nú Egiptɛ lɛŋ.

²²Ɓɛɛ Jozɛf hi̧fi nù ko o wi-ɗafi-sɔ̧ na, wen nɛ̀ wannu Egiptɛ ha̧a̧ so nú zu wa. Nɛ́ a̧ á̧ duka so ha̧ nyɔŋmɔ ha̧ wa. Nɛ́ hegɔ sa wa ɗɔr nù kɔ-wa na.

²³Jozɛf hee mbea ha̧ o bíí‘e: «Kinii, ɛ́nɛ́ ɗɔra tɛ‘nɛ́ in nù k’ɛ́nɛ́ ha̧ wannu. Ɛ́nɛ́ tɛ́ kpa kpar-nyɔnɔ ɓɛɛ ɛ́nɛ́ guna.

²⁴Zaŋ gɛsɛ nyɔnɔ mɔɔrɔ n’ɛnɛ tɛ kpa, ɛ́nɛ́ tɛ ha̧ kpɔk ha̧ wannu Egiptɛ, ɓɛɛ oi gɛsɛ naar nɛ k’ɛ́nɛ́ wen guna-a siti in wen nyɔŋa-a, ɛ́nɛ́, o bíí nutua k’ɛ́nɛ́ in o bem k’ɛ́nɛ́.»

²⁵Wa kifa nú: «Ɛ́nɛ́ kpasa ɛ́ɛ́! Ɛ̀nɛ̀ zɔ́k yɛ nɛ de yí, ɓɛɛ h’ɛ́ɛ́ ya bara ko wannu ɓɛɛ.»

²⁶Mɔ‘i duka nɛ́ heembea ko Jozɛf sɛn nú Egiptɛ nɛ duk hɔ sɔsɔɔ. Kà bíí a̧ kpaa nyɔnɔ tɛ gɛsɛ mɔɔrɔ, ɓɛɛ a̧ tɛ ha̧ gɛsɛ kpɔk ha̧ wannu Egiptɛ, ɓɛɛ kànà nɛ́ nù ko o wi-ɗafi-sɔ̧ a̧ duk nɛ ko wannu na ɓɛɛ.

²⁷Israɛl duka sɛn Egiptɛ nú Gɔsɛn. O bezaŋ Israɛl baa nù nɛ kɔ-wa, wa koo nyɛmna ɓɛɛ wa dɔk.

²⁸Jakob duka sɛn Egiptɛ tɛ pɛ ɓu-zua-mɔɔrɔ-ɗoŋ-yiitoo, a̧ dee nɛ pɛ gɔmŋmaa-nɛ-ɓu-naar-zua-mɔɔrɔ-ɗoŋ-yiitoo sɛn zu nù.

²⁹Ŋgimbi nɛ̀ fio hɛɗa zu Jakob kaɗi, a̧ saa bem kɔ̧-a̧ Jozɛf, ɓɛɛ a̧ tɔ̧ ha̧ a̧: «Kà mɛ̀ nɛ́ zɔka'm nɛ ko, mɛ̀ pí̧ er-mɛ ɗɔɔ ku'm kan nɛ mɔ‘e ndé, mɛ beka gun am Egiptɛ hɛ̧ɛ̧ na. Nɛ́ mɔ‘i a̧ tɛ usi kɔ̧ɔ̧mɔ in mboozu kɔ-mɛ ha̧‘m. Ŋgimbi n'am tɛ́ fe, mɛ tɛ́ ba'm gbonɛ Egiptɛ, ɓɛɛ mɛ nɛ̀ɛ́ gun am sɛn kɔ̧ pɛsi ko o zɔmdáa kɔ‘m.» Jozɛf kifa nú: «Mi tɛ de hee mɔ'ɔ n’ɛnɛ tɔ̧ɔ̧ ga.»

³¹Jakob tɔ̧ɔ̧ woyo: «Mɛ̀ kán mɔ ti'm.» Jozɛf kana mɔ, ɓɛɛ Jakob gbɛ zugur nù ɛk-tɛ nɛ gado kɔ‘i.