Read Northwest Gbaya KU̧U̧NAŊMƆ 48 Bible Online

KU̧U̧NAŊMƆ 48 - Northwest Gbaya bible

KU̧U̧NAŊMƆ 48

¹Ɗoŋ o mɔɔ nɔ‘i, wa tɔ̧ɔ̧ ha̧ Jozɛf ndé, tɛ dáà kɔ̧-a̧ hai na. A̧ mgbɔɔ o bem kɔ̧-a̧ Efraim in Manase yak nɛnɛ tɛ a̧.

²Wa mbaŋa tɛ Jakob ndé, bem kɔ̧-a̧ Jozɛf hɔa. Israɛl nyɔŋa nin kur duk gɔn mɔ,

³ɓɛɛ a̧ tɔ̧ ha̧ Jozɛf: «Sɔ̧ nɛ a̧a̧ nɛ ŋgayamɔ lɛŋ usa tɛ ha̧‘m sɛn Luz, sɛn nú Kanaŋ, a̧ toka de yoŋgo zu'm,

⁴ɓɛɛ a̧ tɔ̧ ha̧‘m: ‹Mi tɛ de ha̧ mɛ mɛ ko nɛ dɔka-a, in ha̧ bezaŋ-mɛ mɛ dɔk siti. Mi tɛ de mɛ́ nɛ̀ dáà ko o dɔka dukbíí, ɓɛɛ mi tɛ ha̧ nù'ɛ ha̧ o bezaŋ-mɛ, nɛ tɛ duk nɛ kɔ-mɛ kpoo nɛ kpoo.›

⁵«Kinii, o bem nɔ'ɔ yiitoo’ɛ nɛ mɛ koa sɛn nú Egiptɛ nɛti sɛka'm biti hɔ ɗoŋ mɛ hɛ̧ɛ̧ ya nɛ́ kɔ‘m! Efraim in Manase tɛ ya nɛ́ kɔ‘m, hee mɔ'ɔ nɛ Rubɛn in Simɛɔŋ ya nɛnɛ'ɛ ga.

⁶Ɓɛɛ nɛ war ko o bem nɛ mɛ tɛ ko ɗoŋ wa, wa tɛ ya nɛ kɔ-mɛ; kɔ-wa, wa tɛ kpa mɔɔ-oi nɛ ɗoŋ o zɔmwi kɔ-wa.

⁷Ŋgimbi n'am pia so nɛ bɔkɔ-nú Aram, nàà kɔ-mɛ Rachɛl fee er-am sɛn nú Kanaŋ, ɓɔna so tikiɗi, h’ɛ́ɛ́ mɛ hɔ sɛn Efrata. Mi guna a̧ sɛn hi̧i̧ sɛn yuwar Efrata nú Bɛtlɛhɛm.»

⁸Israɛl zɔka o bem ko Jozɛf yiitoo'i, ɓɛɛ ak mɔ nɛ ŋgaya-a: «Nɛ́ o?»

⁹Jozɛf kifa nú ha̧ dáà kɔ‘i: «Nɛ́ o bem nɛ Sɔ̧ ha̧a̧ ha̧‘m sɛn hɛ̧ɛ̧!» A̧ tɔ̧ɔ̧ woyo: «Mɛ̀ á wa katɛ‘m ha̧‘m tok de yoŋgo zu wa!»

¹⁰Sɔki ɗaŋa so yí Israɛl kaɗi, ɓɛɛ a̧ zɔk mɔ nɛ sa̧a̧-a̧ na. Jozɛf kaia wa a katɛ a̧, ɓɛɛ Israɛl hɛr wa ndaɗi yí-see nɛ ŋgaya-a.

¹¹Israɛl tɔ̧ɔ̧ ha̧ Jozɛf: «Bo nɛ mi taa so mɛ zɔk sɔnti-mɛ na, nɛ mɔ'ɔ nɛ Sɔ̧ dea ha̧‘m mɛ zɔk sɔnti-mɛ in o bem kɔ-mɛ mbɛt.»

¹²Ɓɛɛ Jozɛf kai wa yinɛ gɔn ku dáà kɔ‘i, ɓɛɛ gu nù, ba yí gu nù.

¹³Jozɛf kaia wa yiitoo, Efraim nɛ war wii-er, wen duka-a nɛ war gale ko Israɛl, ɓɛɛ a̧ kasi Manase nɛ war gale wen duka-a nɛ war wii-er Israɛl, ɓɛɛ a̧ kai wa a ti Israɛl.

¹⁴Israɛl nyɛi̧a er mɛ wiiko, e zu Efraim nɛ̀ duka nɛ́ be-ɗoŋ, ɓɛɛ er-a mɛ gale duk zu Manase; a̧ kpaia er-a kpai wen Manase duka so nɛ́ kaya-bem.

¹⁵A̧ toka de yoŋgo zu Jozɛf, ɓɛɛ a̧ tɔ̧: «Sɔ̧ nɛ̀ o dáà kɔ‘m Abraham in Izak nɛ̀ɛ́ so ɗoŋ-aa, Sɔ̧ nɛ̀ daia so'm hegɔɔ hɔ nɛnɛ sɔsɔɔ,

¹⁶betom ko Sɔ̧ nɛ̀ kpasa'm ŋgimbi bɔnɛ lɛŋ, a̧ ha̧ de sɔnti ha̧ o bem nɔ'ɔ! Nɛ́ wa a̧ tɛ ba nin-am in nin o zɔmdáa kɔ‘m Abraham in Izak e ŋgɔn. Wa a̧ dɔk siti, ɓɛɛ wa a̧ dun zu nù mbɛt!»

¹⁷Jozɛf zɔka'e dáà kɔ‘i ee er mɛ wiiko zu Efraim, ɓɛɛ mɔ‘i ha̧ desee ha̧ a̧ na; a̧ baa er dáà kɔ̧-a̧ yinɛ zu Efraim mɛ e zu Manase.

¹⁸A̧ tɔ̧ɔ̧ ha̧ dáà kɔ̧-a̧: «Bo a̧‘i na, dáà, kaya-wi nɛ ɛ̧ɛ̧; ɛ̀nɛ̀ é er'nɛ́ mɛ wiiko zu-a.»

¹⁹Dáà kɔ̧-a̧ bɛ̧a̧ ɓɛɛ tɔ̧: «Mi iŋa, bem kɔ‘m, mi iŋa a̧ tɛ duk nɛ́ ŋma dukbíí mbɛt. A̧ tɛ duk nɛ́ ŋma gasa bíí mbɛt, ɓɛɛ be-ɗoŋ tɛ duk nɛ gasa-a gan a̧. O bezaŋ-aa tɛ ya nɛ́ ŋma gasa tugun bíí hegɔ siti.»

²⁰A̧ toka de yoŋgo zu wa hee mɔ'ɔ ga: «O be Israɛl tɛ sa nin’ɛ tok nɛ̀ de yoŋgo'e: ‹Sɔ̧ a̧ duk in mɛɛ hee mɔ'ɔ n'aa duka nɛnɛ in Efraim, ká bá nɛ̀ Manase ga!› » Hegɔ, a̧ ee Efraim nɛti ha̧ Manase.

²¹Israɛl tɔ̧ɔ̧ ha̧ Jozɛf: «Mi tɛ fe, ɓɛɛ Sɔ̧ tɛ duk in mɛɛ; a̧ tɛ mgbɔ‘nɛ́ siɗoŋ tɛ nù ko o dáà k’ɛ́nɛ́.

²²Mi ha̧a̧ mɔ ha̧ mɛ gan ko o nya-mɛ; mi ha̧a̧ Sikɛm n'am baa nɛ ŋgai gba-paa in kusaa er o be Amɔr ha̧ mɛ.»