Read Northwest Gbaya KU̧U̧NAŊMƆ 49 Bible Online

KU̧U̧NAŊMƆ 49 - Northwest Gbaya bible

KU̧U̧NAŊMƆ 49

¹Jakob saa o bem kɔ‘i a nù, ɓɛɛ tɔ̧: «Ɛ̀nɛ̀ mɔ́í̧ ŋmaa pii ti, ha̧‘m mbaŋ tɛ‘nɛ́ wen o mɔ nɛ tɛ hɔ zu'nɛ́ nɛ ɗoŋ:

²«O bem ko Jakob, ɛ̀nɛ̀ mɔ́í̧ ŋmaa, ɛ̀nɛ̀ zíí mbɔrɔ ko dáà k’ɛ́nɛ́ Israɛl!

³Rubɛn, mɛ́ nɛ́ kaya-bem kɔ‘m, ŋgai kɔ‘m, kuti tɔk-tɛ‘m, tu̧u̧-tɛ-bíí, ŋga-wi mgbara o bem kɔ‘m lɛŋ.

⁴Mɛ́ dúk hee giti ha̧a̧-yì ga! Mɛ́ beka dúk nɛ́ kpasa bíí na, wen nɛ mɛ ɔɔ in ŋma kóò kɔ‘m, de nɛ ndiŋ a tɛ gado kɔ‘m!

⁵«Simɛɔŋ in Levii nɛ́ o nya, gbama-a kɔ-wa nɛ́ wen dee ŋgamɔ.

⁶Mi beka duk tɛ tɔ̧ɔ̧ ee-zu-mɔ kɔ-wa na, mi beka duk tɛ mɔi̧a-a kɔ-wa na; wen wa gbɛɛ o bíí tɛ nyimsea kɔ-wa, wa ɓira ɗaɗi-naŋ o ndai de nɛ zɛŋ.

⁷Fom a̧ ba ŋga ɗaŋsee kɔ-wa in ɗaŋ nyimsea kɔ-wa! Mi tɛ kɛ̧ wa dam nú Israɛl, mi tɛ pɛsi wa dam nú Israɛl.

⁸«Juda, war kɔ-mɛ, o nya-mɛ tɛ tu̧ tɛ-mɛ, mɛ́ tɛ́ gan zu o wisɛn kɔ-mɛ, o bem ko dáà kɔ-mɛ tɛ́ gu nù ti mɛ.

⁹Mɛ́ nɛ́ be-dila, oee bem kɔ‘m Juda wa! Hee nana-dila ga, mɛ pia nɛ tɛ ŋga gia! Mɛ gbɛɛ zugur-mɛ nù, ɓɛɛ mɛ ɔ nù hee dila ga, nɛ́ o'o tɛ fo mɛ nɛ ŋgɔn o?

¹⁰Mɔɔ-wan tɛ duk nutua ko Juda, dɔ́rá-wan tɛ duk nutua ko o bezaŋ-aa hɔ ŋgimbi nɛ mgbák wan-aa, wi nɛ̀ o dukbíí tɛ́ mbo zu ha̧ a̧, tɛ hɔ.

¹¹A̧ kuna tuifuu kɔ̧-a̧ gun nyak-dɔ̧ɔ̧, ɓɛɛ be-a tɛ gbaa-er-a; a̧ vata laa kɔ̧-a̧ ɗɔɔ yí dɔ̧ɔ̧, ɓɛɛ a̧ vati be-laa kɔ̧-a̧ ɗɔɔ yí waya-nyak-dɔ̧ɔ̧.

¹²Gbaayí-a duk nɛ̀ tu̧-a̧ hee yí waya-nyak-dɔ̧ɔ̧ ga, gba̧a̧-nin-a duk ndáká-ndáká hee yibere ga.

¹³«Fara ko Zabulɔŋ tɛ́ duk nɛ́ ká̧ zaŋ gba-tɔp, nɛ́ fara'i a̧ o kombon tɛ yor sɛnɛ, nduti-nu kɔ̧-a̧ tɛ hɔ Sidɔŋ.

¹⁴«Isakar nɛ́ ŋma ɔ̧ka̧ tuifuu nɛ̀ ɔ kɔ̧ ŋgárá nɛ‘i ɓora ɗoŋ ŋmaa yiitoo.

¹⁵A̧ zɔka'e, ɔma-tɛ ɔ dee in nù ɔ dee mbɛt, a̧ nyafi nɛ ɗoŋ-aa ɗɔɔ dita tui; kɔ̧-a̧ nɛ́ ŋga tom-bara á̧ nyɛma nɛ̀ a̧.

¹⁶«Dan tɛ́ gɔn kita zu o bíí kɔ‘i hee ŋma kpɔk mgbara o zuduk be Israɛl ga.

¹⁷Dan tɛ́ duk hee gɔ́k nɛ̀ kar kar yuwar ga, hee kóró nɛ̀ duk yuwar gɔm nɛ̀ ɗaɗi-naŋ nyaŋa ɓɛɛ wan-aa hɔ̧fa̧ tik nù'ɛ ga.

¹⁸«GASA WAN, mi e ta'm nɛ̀ kpas'am n’ɛnɛ tɛ́ kpasi!

¹⁹«O wi nɛ tɛ́ tik zu Gad mɛ kai mɔ kɔ̧-a̧, a̧ mbɛt tɛ kai mɔ er-wa ɓɛɛ a̧ dee ŋmaa in wa.

²⁰«Nɛ́ Asɛr a̧ tɛ dɛm de nyɔŋmɔ, ɓɛɛ o wannu kpaa de nyɔŋmɔ nɛ ɗoŋ-aa.

²¹«Nɛftalii nɛ́ zɔŋa-zambɛrɛ, nɛ̀ duk géè ko nɛ̀ o de be-a.

²²«Jozɛf nɛ́ be gbaa-er-te nɛ ɓɔ ɓɔɔ zu-zer, o gbaa-er-a dáŋ nɛ́ zu ŋgeŋ.

²³Wa kia wen in a̧, wa kpɛra in a̧; o wi-pi̧-góò bìí biro in a̧,

²⁴ɓɛɛ kusaa kɔ̧-a̧ fo tɛ na; o ɓaa-a in o er-a ya nɛ nɔa-a tɛ ŋgai ko Sɔ̧, wan-ŋgayamɔ ko Jakob, wi-dai Israɛl in wi-pɛm-aa.

²⁵Sɔ̧ ko dáà kɔ-mɛ a̧ tɛ́ɛ̀ gbak mɛ, Sɔ̧ wan-ŋgayamɔ a̧ tok de yoŋgo zu mɛ; o de yoŋgo mɛ yiwese, o de yoŋgo mɛ ɗuka-fara ɗɔɔ nu, o de yoŋgo mɛ nú bere,

²⁶o de yoŋgo ko dáà kɔ-mɛ nɛ gana o de yoŋgo wan mɛ́ gba̧‘a̧ zu kaya ɓéé, in nɛ gana o demɔ zu o zu-tɔ̧́ nɛ yaa ɓéé, o de yoŋgo nɔ‘i lɛŋ a̧ zir pii zu Jozɛf, wi nɛ‘i ee nɛtɛ mgbara o nya-a̧.

²⁷«Bɛnjamin nɛ́ ŋma ŋga gbóò, nɛ̀ tutuyɛ ɓɛɛ a̧ nyɔŋa o saɗi kɔ̧-a̧, mɛ́ ga̧a̧mɔ ɓɛɛ a̧ kɛ̧ɛ̧ oi-aa.»

²⁸Nɛ́ wa lɛŋ a̧ dee duk be Israɛl ɓu-zua-yiitoo. Mɔ nɛ dáà kɔ-wa tɔ̧ɔ̧ ha̧ wa, tok nɛ de yoŋgo nyɛm wa kpɔk kpɔk nɛ mɔ‘i.

²⁹Jakob ha̧a̧ nú ha̧ wa hee mɔ'ɔ ga: «Mi tɛ si kpa o bíí kɔ‘m; ɛ̀nɛ̀ gún am katɛ o dáà kɔ‘m sɛn kɔ̧ di̧i̧ nɛ duk sɛn kpɛɛfɔ ko Efrɔŋ be Hit,

³⁰sɛn kɔ̧ di̧i̧ kpɛɛfɔ Makpɛla, nɛ zɔk ŋmaa in Mambre, sɛn nú Kanaŋ, fara nɛ Abraham hi̧fa so er Efrɔŋ be Hit wen guna fio.

³¹Nɛ́ fara'i a̧ wa guna Abraham in kóò kɔ̧-a̧ Sara sɛnɛ; nɛ́ hi̧i̧ a̧ wa guna Izak in kóò kɔ̧-a̧ Rebeka sɛnɛ. Nɛ́ fara'i a̧‘m guna Lea sɛnɛ mbɛt.

³²Fɔ nɛ a̧a̧ hi̧i̧ gu nɛ di̧i̧-ta'i nɛ o bezaŋ Hɛt a̧ ɗɔra.»

³³Ŋgimbi nɛ Jakob kaɗa ha̧a̧ nú ha̧ o bem kɔ‘i, a̧ kaia naŋ-a a gɔn gado, a̧ pɛɛ see-aa, ɓɛɛ a̧ si ɗoŋ kpa o zɔmdáa kɔ̧-a̧.