Read Northwest Gbaya KU̧U̧NAŊMƆ 50 Bible Online

KU̧U̧NAŊMƆ 50 - Northwest Gbaya bible

KU̧U̧NAŊMƆ 50

¹Jozɛf tika zu dáà kɔ‘i, hɛr a̧ hi̧i̧ nɛ kɔ̧a̧.

²Ɓɛɛ Jozɛf ha̧ nú ha̧ o wi-de-nyina mɛ a nyama tɛ dáà kɔ̧-a̧ ɗafi nɛ a̧ wen guna a̧, ɓɛɛ o wi-de-nyina a nyama tɛ Israɛl.

³Yuwar-aa-nyama tɛ fio dee nɛ zɛ ɓu-naar, o be Egiptɛ hi̧a̧ Jakob tɛ zɛ ɓu-mɔɔrɔ-ɗoŋ-yiitoo.

⁴Ŋgimbi nɛ hi̧a̧-fio kaɗa, Jozɛf tɔ̧ɔ̧ ha̧ o bíí nutua ko wannu Egiptɛ: «K’ɛ̀nɛ̀ nɛ́ zɔka'm nɛ de yí, ɛ̀nɛ̀ wé ɗoŋ wen’ɛ ha̧ wannu Egiptɛ.

⁵Dáà kɔ‘m dee ha̧‘m mɛ kan mɔ tɛ wen’ɛ: ‹Mi tɛ fe. Mɛ́ tɛ́ gun am sɛn kɔ̧ pɛsi-fio n'am za̧a̧ sɛn nú Kanaŋ.› Kinii, mi kɔ̧ɔ̧ mɛ́ nɛ̀ɛ́ gun dáà kɔ‘m, ɓɛɛ mi pia ɗoŋ.»

⁶Wannu Egiptɛ kifa nú ha̧ a̧: «Mɛ̀ dáŋ mɛ̀ nɛ́ɛ̀ gún dáà kɔ-mɛ, wen n'aa dee ha̧ mɛ mɛ kan mɔ ti a̧.»

⁷Jozɛf yaka mɛ nɛ̀ɛ́ gun dáà kɔ‘i. O wi-de-tom ko wannu Egiptɛ, o gasawi nutua kɔ̧-a̧ in o kuti gasawi nú Egiptɛ lɛŋ yaka in a̧

⁸gu nɛ o bíí nutua ko Jozɛf lɛŋ, o nya-a̧ in o bíí nutua ko dáà kɔ̧-a̧. Oi mɔ nɛ ɓɔna sɛn Gɔsɛn kànà nɛ́ o bem, o sami, o gbadua in o ndai.

⁹Wa kaia o keekee in o nyaŋa yak nɛnɛ in a̧. O bíí nɛ gara fio dɔka so nyɛmna.

¹⁰Wa hɔɔ sɛn fara-gusi-alkamaari nɛ war kur Jurdɛn, ɓɛɛ hi̧a̧-fio ba dik hi̧i̧. Jozɛf zima fio ko dáà kɔ‘i sɛn hi̧i̧ tɛ zɛ mɔɔrɔ-ɗoŋ-yiitoo.

¹¹O be Kanaŋ zɔka hi̧a̧-fio sɛn Atad'i, ɓɛɛ wa tɔ̧: «Nɛ́ ŋgaŋa-fio a̧ fea mgbara o be Egiptɛ.» Ɓɛɛ wa sa nin fara'i nɛ̀ duk nɛ war kur Jurdɛn'e Abɛl-Misraim; wen nɛ tɔ̧, «Fara-hi̧i̧-fio ko o be Egiptɛ».

¹²O bem ko Jakob dee mɔ zu-a nyɛm nɛ ɗoŋ o ha̧a̧nú kɔ̧-a̧.

¹³Wa baa a̧ hɔ nú Kanaŋ mɛ, ɓɛɛ wa gun a̧ sɛn kɔ̧ di̧i̧ nɛ duk sɛn kpɛɛfɔ Makpɛla, fara nɛ Abraham baa hi̧fi so sɛn er Efrɔŋ be Hit nɛ́ duk nɛ́ fara-gun-fio nɛ̀ zɔk ŋmaa in Mambre.

¹⁴Ɗoŋ guna fio ko dáà kɔ̧-a̧, Jozɛf, o nya-a̧ in o bíí lɛŋ nɛ nɛ̀ɛ́ in a̧ wen guna fio pia ɗoŋ pii Egiptɛ.

¹⁵Nɛ̀ wa zɔka'e, dáà kɔ-wa fee kaɗi, o zɔmwi ko Jozɛf tɔ̧ɔ̧ nɛ nú ŋmaa: «Jozɛf nyɛma mɛ zɔk yɛ hee o wisɛn ga, ɓɛɛ a̧ kifa er ɗaŋmɔ n’ɛɛ dee in a̧ lɛŋ.»

¹⁶Wa toma sitɛ Jozɛf: «Dáà kɔ-mɛ ha̧a̧ nú hee mɔ'ɔ ga nɛti ha̧ a̧ mɛ fe:

¹⁷‹Ɛ́nɛ́ tɛ́ tɔ̧ ha̧ Jozɛf ndé, a̧ a̧ e ɗaŋmɔ ko o nya-a̧ ha̧ wa. Nɛ mbetɛ wa dee ɗaŋmɔ in a̧, ɓɛɛ a̧ a̧ de ko ha̧ o wi-de-tom ko Sɔ̧ ko dáà kɔ̧-a̧, e nɛ ɗaŋmɔ kɔ-wa ha̧ wa.› » Ŋgimbi nɛ wa tɔ̧ɔ̧ ha̧ Jozɛf hee mɔ‘i ga, a̧ hi̧a̧ kɔ̧a̧.

¹⁸O zɔmwi kɔ̧-a̧ nɛ̀ɛ́ gu nù sɛn ti a̧, ɓɛɛ tɔ̧: «Kinii, ɛ́ɛ́ nɛ́ bara k’ɛ́nɛ́.»

¹⁹Ɓɛɛ Jozɛf kifi nú ha̧ wa: «K’ɛ́nɛ́ de kíì na! Mi so nɛ́ Sɔ̧ nde?

²⁰Ɛ́nɛ́ kɔ̧ɔ̧ so mɛ de ɗaŋmɔ in am, ɓɛɛ Sɔ̧ kifi e nɛ de-a: a̧ kpasa o bíí nɛ dɔka-a hee mɔ'ɔ n’ɛnɛ zɔk sɔsɔɔ ga.

²¹K’ɛ́nɛ́ yu mɔ kinii ɓɔna; mi tɛ ha̧ nyɔŋmɔ h’ɛ́nɛ́ in o bem k’ɛ́nɛ́.» A̧ ha̧a̧ nɔɔ-ŋgiɗi ha̧ wa, ɓɛɛ a̧ ga̧ see-wa.

²²Jozɛf dee ye sɛn nú Egiptɛ in o bíí nutua ko dáà kɔ̧-a̧. Jozɛf duka zu nù pɛ gɔmŋmaa-nɛ-ɓu,

²³ɓɛɛ a̧ zɔk taar bezaŋ Efraim. Wa koo o bem ko Makir, o bezaŋ Manase nɛ yí Jozɛf mbɛt.

²⁴Nɛ́ mɔ'ɔ nɛ̀ Jozɛf tɔ̧ɔ̧ ha̧ o nya-wi: «Mi hɛɗa mɛ fe kaɗi; mɔ kpɔk, Sɔ̧ tɛ yor ɗoŋ‘nɛ́ h’ɛ́nɛ́ mɛ́ si ɗoŋ sitɛ nù n'aa baa kan so mɔ ha̧ nɛnɛ ha̧ Abraham, Izak in Jakob.»

²⁵Ɓɛɛ Jozɛf de ha̧ o bem ko Israɛl mɛ́ kan mɔ‘e: «Ŋgimbi nɛ Sɔ̧ tɛ yor ɗoŋ yɛ, ɛ́ɛ́ tɛ kai gba̧a̧-mɛ yaknɛ hɛ̧ɛ̧!»

²⁶Jozɛf kpaa pɛ gɔmŋmaa-nɛ-ɓu ɓɛɛ a̧ fe. Wa aa nyama tɛ Jozɛf, ɓɛɛ wa ba a̧ pi̧ sɛn kɔ̧ zimbi sɛn Egiptɛ.