Read Northwest Gbaya KU̧U̧NAŊMƆ 7 Bible Online

KU̧U̧NAŊMƆ 7 - Northwest Gbaya bible

KU̧U̧NAŊMƆ 7

¹GASA WAN tɔ̧ɔ̧ ha̧ Nɔe: «Mɛ̀ yé kombon, mɛ in o bíí kɔ̧ tua kɔ-mɛ, wen ɓàà wi-de-mɔ nɛ yuwar-a mgbara o bíí ŋgimbi’ɛ nɛ́ mɛ kpɔk ɓɛɛ.

²Mɛ tɛ kai o saɗi nɛ ɔ sa̧a̧, wíì-a in kóò-a tɛ fara mɔɔrɔ-ɗoŋ-yiitoo, ɓɛɛ mɛ̀ káí o zuduk saɗi nɛ sa̧ na, wíì-a kpɔk in kóò-a,

³gu nɛ o zuduk nɔ̧́í̧ mbɛt, wíì-a in kóò-a tɛ fara mɔɔrɔ-ɗoŋ-yiitoo wen ha̧ kpar-wa mɛ duk ɓɔnsɛnɛ zaŋnu.

⁴Ɗoŋ zɛ mɔɔrɔ-ɗoŋ-yiitoo, mi tɛ de ha̧ kórò mɛ hɔ sɛn zaŋnu tɛ zɛ ɓu-naar zɛ nɛ wese, ha̧‘m mɛ kum o mɔ n'am dee lɛŋ zu nù yinɛ.»

⁵Nɔe dee kànà mɔ lɛŋ nyɛm nɛ ɗoŋ ha̧a̧nú ko GASA WAN.

⁶Nɔe a̧a̧ so nɛ pɛ 600 ŋgimbi nɛ ndiɓa-kórò hɔɔ nɛnɛ.

⁷Nɔe in kóò, in o bem ká bá nɛ̀ o kóò kɔ-wa yee kɔ̧ kombon wen zu gasa ha̧a̧-yì.

⁸O sa̧a̧ saɗi in o wan nɛ sa̧ na, o nɔ̧́í̧ in o saɗi lɛŋ nɛ yar nɛ mbɔɗɔnu,

⁹kóò-a in wíì-a, yee kɔ̧ kombon in Nɔe hee mɔ'ɔ nɛ Sɔ̧ baa ha̧ nú sɛnɛ ga.

¹⁰Ɗoŋ zɛ mɔɔrɔ-ɗoŋ-yiitoo, ɓɛɛ yì hur nù lɛŋ.

¹¹Ŋgimbi nɛ Nɔe kpaa nɛ pɛ gɔmŋmaa-mɔɔrɔ-ɗoŋ-kpɔk nɛ fio-zɛ yiitoo nɛ zɛ ɓu-zua-mɔɔrɔ-ɗoŋ-yiitoo, o kpút-kpút mɛ ɗuka-fara mbaŋa, ɓɛɛ o woi yiwese hú̧í̧ bóóŋ.

¹²Kórò zuɗa zaŋnu zɛ ɓu-naar zɛ nɛ wese.

¹³Wese'i, Nɔe in kóò, o bem kɔ̧-a̧ Sɛm, Kam, Jafɛt ká bá nɛ̀ o kóò kɔ-wa taar yee kombon.

¹⁴O saɗi-zaŋbɛɛ lɛŋ, o zuduk mɔ-dai lɛŋ, o zuduk be saɗi nɛ yar nɛ mbɔɗɔnu, o zuduk nɔ̧́í̧ lɛŋ in o mɔɔ-bu̧i̧-bu̧i̧ lɛŋ yee kombon in wa mbɛt.

¹⁵Mɔ lɛŋ nɛ duk kpasa yee kombon in Nɔe, wíì-a in kóò-a.

¹⁶Duka nɛ wíì-a in kóò-a tɛ mɔ lɛŋ nɛ ɔm ɔm a̧ yee kɔ̧ kombon, nyɛm nɛ ɗoŋ ha̧a̧nú ko Sɔ̧ ha̧ Nɔe. Ɓɛɛ GASA WAN kpe nú kombon e zu Nɔe.

¹⁷Ndiɓa-kórò zuɗa tɛ zɛ ɓu-naar sɛn zaŋnu; yì ha̧a̧ ɓɛɛ gasa kombon kur zu yì.

¹⁸Yì ha̧a̧ mbɛr mbayaŋga ɓɛɛ gasa kombon ba yì yaknɛ.

¹⁹Yì ha̧a̧ siti siti zu nù kpe zu o kusa kaya zaŋnu lɛŋ.

²⁰Yì ha̧a̧ yak zu o kusa kaya tɛ mɛtrɛ mɔɔrɔ-ɗoŋ-yiitoo.

²¹Hegɔ, o mɔ nɛ duka so ɔm ɔm lɛŋ kuma. O nɔ̧́í̧, o mɔ-dai, o saɗi-zaŋbɛɛ, o be saɗi lɛŋ nɛ hai nɛ mbɔɗɔnu in o bíí lɛŋ kuma.

²²Mɔ lɛŋ nɛ duka so ɔm ɔm, mɔ nɛ‘i saa'e saɗi-zan lɛŋ kuma.

²³GASA WAN kuma mɔ lɛŋ zu nù, ku̧u̧naŋ-a tɛ o bíí hɔ nɛnɛ tɛ o gasa saɗi, o be saɗi in o nɔ̧́í̧ mbɛt. Hegɔ o mɔ lɛŋ kuma zu nù, ɓɛɛ wi nɛ ɓɔna nɛ́ Nɔe in o wi nɛ yaa so in a̧ sɛn kɔ̧ gasa kombon.

²⁴Ha̧a̧-yì duka hegɔ zu nù zɛ gɔmŋmaa-nɛ-ɓu-mɔɔrɔ.