Read Northwest Gbaya KU̧U̧NAŊMƆ 9 Bible Online

KU̧U̧NAŊMƆ 9 - Northwest Gbaya bible

KU̧U̧NAŊMƆ 9

¹Sɔ̧ toka de yoŋgo zu Nɔe in o bem kɔ̧-a̧ hee mɔ'ɔ ga: «Ɛ̀nɛ̀ kó o bem, ɛ̀nɛ̀ dɔ́k, ɛ̀nɛ̀ dún zu nù.

²O saɗi zu nu lɛŋ in o nɔ̧́í̧ mbɛt tɛ yu'nɛ́; o mɔ nɛ yar yar nɛ mbɔɗɔnu in o zoro ɗɔɔ gba-tɔp tɛ ya ɗɔɔ ŋgai k’ɛ́nɛ́.

³O mɔ lɛŋ nɛ yar yar nɛ duk kpasa tɛ duk nɛ́ mɔɔ-nyɔŋ k’ɛ́nɛ́. Mi ha̧a̧ wa h’ɛ́nɛ́ hee mɔ'ɔ n'am ha̧a̧ so nɛ nyɔnɔ h’ɛ́nɛ́ nɛti ga.

⁴Mɔ kpɔk, ɛnɛ beka nyɔŋ kpoo nɛ oi tɔk-aa na, wen ɔmi duk tɛ tɔk.

⁵Kà bó nɛ́ tɔk-tɛ‘nɛ nɛ̀ duk nɛ́ ɔmi k’ɛ́nɛ́ a̧ gbaia a nù, tɔk'i beka a nù gee na. Kà bó nɛ́ saɗi a̧ gbaia tɔk-tɛ bíí a nù, mi beka e saɗi'i gee na, ɓɛɛ kà bó nɛ́ bíí a̧ gbɛɛ ŋma-a̧, mi beka e wi’ɛi gee na mbɛt.

⁶Kà bíí gbai tɔk-tɛ bíí a nù, bíí tɛ́ gbai tɔk-tɛ wi’ɛi a nù mbɛt; wen Sɔ̧ dee bíí hɔ ŋmaa in wìì.

⁷«Ɓɛɛ k’ɛ́nɛ́, ɛ̀nɛ̀ kó, ɛ̀nɛ̀ dɔ́k, ɛ̀nɛ̀ dún zu nù lɛŋ, ɛ̀nɛ̀ ɔ́ wan zu a̧.»

⁸Sɔ̧ tɔ̧ɔ̧ ha̧ Nɔe in o bem kɔ̧-a̧:

⁹«Mi tɛ nɔ tɔk in'nɛ̀ɛ́ in o bezaŋ‘nɛ́ mɛ ɗoŋ,

¹⁰gu nɛ o mɔ lɛŋ nɛ ya kpasa in'nɛ̀ɛ́: o nɔ̧́í̧, o mɔ-dai, o saɗi-zaŋbɛɛ, mɔ lɛŋ nɛ gboo nɛ kɔ̧ gasa kombon in'nɛ̀ɛ́.

¹¹Mi tɛ nɔ tɔk in'nɛ̀ɛ́. Mi beka ɗaŋ mɔ nɛ ɔm ɔm nɛ̀ gasa ha̧a̧-yì ɓɔna, gasa ha̧a̧-yì beka ɗaŋ nù ɓɔna.»

¹²Sɔ̧ tɔ̧a̧: «Zɔ́k mɔɔ-sedaako nɔɔ-tɔk mgbara'm in'nɛ̀ɛ́ in o mɔ lɛŋ nɛ ɔm ɔm nɛ ya in'nɛ̀ɛ́, wen zu o bezaŋ‘nɛ́ nɛ ɗoŋ, n'am e’ɛ.

¹³Mi ee ɓutu kɔ‘m sɛn mgbara tura-zan, ha̧ a̧ mɛ duk nɛ mɔɔ-sedaako nɔɔ-tɔk mgbara'm in nù.

¹⁴Ŋgimbi n'am tɛ de ha̧ zan mɛ tur sɛn zu nù, ɓɛɛ nɛ‘i tɛ zɔk ɓutu mgbara tura-zan,

¹⁵tɛ‘m tɛ mbaŋ ɗoŋ nɔɔ-tɔk kɔ‘m in'nɛ̀ɛ́, in ge nde lɛŋ nɛ ɔm ɔm; hegɔ gasa yì beka ha̧ wen ɗaŋa ɔmi ɓɔna.

¹⁶Ŋgimbi nɛ ɓutu tɛ yɔr mgbara tura-zan, mi tɛ zɔk ha̧ tɛ‘m mɛ mbaŋ ɗoŋ nɔɔ-tɔk mgbara'm kpoo nɛ kpoo in mɔ lɛŋ nɛ duk kpasa, in mɔ lɛŋ nɛ ɔm ɔm nɛ duk zaŋnu.»

¹⁷Sɔ̧ tɔ̧ɔ̧ ha̧ Nɔe: «Mɔɔ-sedaako nɔɔ-tɔk n'am ee mgbara'm in mɔ lɛŋ nɛ ɔm ɔm zu nu nɛ́ mɔ‘i.»

¹⁸Sɛm, Kam in Jafɛt nɛ́ o bem ko Nɔe nɛ gboo nɛ kɔ̧ gasa kombon. (Kam nɛ dáà ko Kanaŋ.)

¹⁹O bem ko Nɔe nɛ mɔɔ nɔ‘i taar'i, ɓɛɛ bíí gboo nɛ tɛ-wa dɔk nɛnɛ sɛn zu nù.

²⁰Nɔe duka so nɛ kuti wi-wa-fɔ; a̧ waa fɔ-nyak-dɔ̧ɔ̧,

²¹ɓɛɛ a̧ nɔ dɔ̧ɔ̧-a̧a̧ gbɛ a̧, ɓɛɛ a̧ duk nɛ̀ mgbii kɔ̧ tua-laa kɔ̧-a̧.

²²Kam, dáà ko Kanaŋ zɔka dáà kɔ‘i nɛ mgbii, ɓɛɛ nɛ́ɛ̀ tɔ̧ ha̧ o nya kɔ‘i yiitoo zan mɛ.

²³Sɛm in Jafɛt baa gba-laa ko Nɔe pi̧ zu kóŋgó-ɓaa, wa nɛ̀ɛ́ nɛ ɗoŋ-wa nɛ́ɛ̀ kpe nɛ tɛ dáà kɔ-wa. Hee mɔ'ɔ nɛ wa zika nɛ́ ɗoŋ-wa nɛ́ nɛnɛ ga, wa zɔk dáà kɔ-wa nɛ̀ mgbii na.

²⁴Ŋgimbi nɛ yí Nɔe gɔna oi dɔ̧ɔ̧, n'aa zia mɔ nɛ sɔŋkur bem kɔ̧-a̧ dea,

²⁵a̧ tɔ̧a̧: «Fom a̧ ba Kanaŋ! A̧ a̧ dúk nɛ́ sɔŋkur-wi mgbara o wi-de-tom ko o nya-a̧.»

²⁶Ɓɛɛ a̧ tɔ̧ woyo: «Zɔnamɔ à̧ dúk nɛ́ ko GASA WAN Sɔ̧ ko Sɛm, ɓɛɛ Kanaŋ á̧ dúk nɛ́ bara kɔ̧-a̧.

²⁷Sɔ̧ à̧ há̧ kpaamɔ ha̧ Jafɛt, à̧ à̧ dúk kɔ̧ tua-laa ko Sɛm, ɓɛɛ Kanaŋ à̧ dúk nɛ́ wi-de-tom kɔ-wa!»

²⁸Nɔe duka ɗoŋ ha̧a̧-yì pɛ 350.

²⁹Zɛ duka-a ko Nɔe lɛŋ nɛ pɛ 950, ɓɛɛ a̧ fe.