Read Northwest Gbaya 2 SAMUƐL 11 Bible Online

2 SAMUƐL 11 - Northwest Gbaya bible

2 SAMUƐL 11

¹Tɛ ku̧u̧naŋ pɛ nú kórò, ŋgimbi nɛ o wannu bi nɛ biro, David toma Jɔab in o wi-biro kɔ‘i gu nɛ̀ o be Israɛl lɛŋ. Wa nɛ̀ɛ̀ kum o be Amɔŋ lɛŋ, ɓɛɛ wa nɛ́ɛ̀ kɛr Raba e nù; ká David ɓɔna so kɔ‘i sɛn Jerusalɛm.

²Ŋma wese mɛ ga̧a̧mɔ, David kura, ɓɛɛ yar nɛ̀ zu tua-wan. A̧ duka hi̧i̧ zɔk nɛ̀ ŋma okoo fara zuia yì. Kóò‘i yora so zɔŋa nyɛmna.

³David toma ak mɔ wen zu kóò‘i, ɓɛɛ wa tɔ̧ ha̧ a̧‘e, nɛ́ Bɛtseba, boko-bem ko Eliam, kóò ko Urii be Hit.

⁴David toma o betom nɛ́ɛ̀ mgbɔ a̧. Kóò‘i tɛɛ tɛ ko David, ɓɛɛ David ɔ in a̧. Kóò‘i sii ɗoŋ tɛ kɔ‘i. Ŋgimbi'i, a̧ zuia so nɛ́ yì oi zɔka-zɛ.

⁵Zaŋ yee tɛ kóò‘i, ɓɛɛ a̧ pi̧ tom ha̧ David'e, wi a̧a̧ nɛ̀ zaŋ.

⁶Nɛ́ mɔ'ɔ nɛ̀ David toma tɔ̧ ha̧ Jɔab: «Mɛ̀ tóm Urii be Hit tɛnɛ ha̧‘m.» Ɓɛɛ Jɔab tom Urii tɛnɛ ha̧ David.

⁷Ŋgimbi nɛ Urii hɔɔ ti David, David aka nyɛrɛ mɔ ko Jɔab in o wi-biro lɛŋ in nyɛrɛ biro mbɛt.

⁸David tɔ̧ɔ̧ ha̧ Urii: «Mɛ̀ sí ɗoŋ kɔ̧ tua kɔ-mɛ, a̧ mɛ̀ nɛ́ɛ̀ ɔm tɛ-mɛ.» Urii gboo kɔ̧ tua ko wannu, ɓɛɛ wannu tom o ŋma ha̧a̧mɔ nɛnɛ ha̧ a̧.

⁹Mɔ kpɔk, Urii ɔɔ kɔ‘i ɓɔn nú garo ko wan kɔ‘i in o dɔka ŋgaiwi ko wannu; a̧ si ɗoŋ hɔ kɔ̧ tua kɔ̧-a̧ na.

¹⁰Wa tɛ̀ɛ̀ tɔ̧ ha̧ David'e, Urii si ɗoŋ tɛ kɔ‘i na; nɛ́ mɔ'ɔ nɛ̀ David aka Urii: «Bo nɛ mɛ pia nɛ̀ gɛnɛ na? Wen ge sa mɛ si bɔɔ hɔ tɛ kɔ-mɛ na ge?»

¹¹Ɓɛɛ Urii kifi nú ha̧ David: «Kuɓa nɔɔ-tɔk in o be Israɛl ká bá nɛ̀ o be Juda ɔ kɔ̧ tua-laa; wan kɔ‘m Jɔab in o gasa wi-biro kɔ̧-a̧ baa gbagari zaŋbɛɛ; ɓɛɛ kɔ‘m, a̧‘m sí ɗoŋ kɔ̧ tua kɔ‘m, a̧‘m nyɔ́ŋ mɔ, a̧‘m nɔ́ mɔ ɔ nɛnɛ in kóò kɔ‘m nde? Mi kàná mɔ nɛ nin'nɛ́, hee mɔ'ɔ n’ɛnɛ duk kpasa ga, mi beka de pɛrti mɔ hegɔ na.»

¹²David tɔ̧ɔ̧ ha̧ Urii: «Mɛ̀ ɔ́ hɛ̧ɛ̧ sɔsɔɔ woyo, ɓɛɛ mɛ́ sa̧a̧mɔ mi foo mɛ sinɛ.» Urii ɓɔna Jerusalɛm wese'i hɔ mɔɔsa̧.

¹³David saa a̧; a̧ nyɔŋa mɔ, ɓɛɛ a̧ nɔ mɔ. David nɔsa̧ a̧ nɛ dɔ̧ɔ̧. Urii gboo mɛ ga̧a̧mɔ mɛ nɛ̀ɛ́ ɔ nù gɔn gado kɔ‘i in o ŋgaiwi ko wannu, ɓɛɛ a̧ si tɛ kɔ̧-a̧ na.

¹⁴Nɛ̀ mɔ sa̧a̧ mɛ tutuyɛ, David yɔra kalata ha̧ Jɔab, ɓɛɛ ba e er Urii.

¹⁵Mɔ n'aa yɔra zaŋ kalata'i nɛ́ mɔ'ɔ: «Ɛ̀nɛ̀ fó Urii e ti sɛn yí biro, ɓɛɛ ɛ̀nɛ̀ yú ɗoŋ-aa ha̧ biro gbɛ a̧.»

¹⁶Hee mɔ'ɔ nɛ Jɔab iŋa fara nɛ̀ o ŋga wisɛn kɔ-wa tɛ biro yor sɛnɛ ga, a̧ foo Urii e nɛ̀ fara'i ŋgimbi kɛra ye.

¹⁷O wi saaye gboo a zu Jɔab; o ŋma wi-biro ko David fea in o ŋma gasawi kɔ-wa, Urii be Hit fea mbɛt.

¹⁸Nɛ́ mɔ'ɔ nɛ̀ Jɔab toma nyɛrɛ mɔ nɛ yaka tɛ biro lɛŋ ha̧ David.

¹⁹Mɔ nɛ̀ Jɔab tɔ̧a̧ ha̧ betom mɛ nɛ̀ɛ́ tɔ̧ nɛ́ mɔ'ɔ: «Ŋgimbi nɛ̀ mɛ tɛ we ɗoŋ mɔ nɛ yaka tɛ biro ha̧ wannu kaɗi,

²⁰ɓɛɛ kà wannu nɛ́ kura nɛ nyimsea mɛ tɔ̧‘e: ‹Wen ge s’ɛnɛ nɛa hɛɗi nɛ̀ saaye mɛ bi biro ge, bo nɛ́ ɛ́nɛ́ iŋa'e wi a boi nɛ̀ zu garo pii ɗɔɔ na nde?

²¹Wi nɛ gbɛɛ Abimɛlɛk, bem ko Yerubal duka so nɛ́ o? Bo nɛ okoo a̧ pii so gasa ta-hɔ̧n-mɔ tik zu a̧ sɛn Tebɛs na nde? Wen ge s’ɛnɛ ɗɔŋa si ká̧ garo ge?› Ɓɛɛ mɛ tɛ tɔ̧ ha̧ a̧: ‹Gasa wi-biro k’ɛ́nɛ́ Urii be Hit fea mbɛt!› »

²²Nɛ́ mɔ'ɔ nɛ̀ betom yaka nɛ̀ɛ̀ hɔ ti David, ɓɛɛ a̧ we ɗoŋ mɔ nɛ Jɔab tɔ̧ɔ̧ ha̧ a̧ lɛŋ.

²³Betom'i tɔ̧ɔ̧ ha̧ David: «O wi nɔ‘i ŋgaia gan yɛ; o wi nɔ‘i gboo nɛ̀ ŋgai pii tɛ yɛ pii zaŋbɛɛ, ɓɛɛ ɛɛ nasi wa hɔ nú garo.

²⁴O wi-pi̧-góò yaa nɛ̀ zu garo pi̧ nɛ̀ o wi-biro k’ɛ́nɛ́, o bíí fee mgbara o bíí k’ɛ́nɛ́. Urii be Hit, gasa wi-biro k’ɛ́nɛ́ fee mbɛt.»

²⁵Ɓɛɛ David tɔ̧ ha̧ betom'i: «Mɔ nɛ mɛ tɛ tɔ̧ ha̧ Jɔab nɛ mɔ'ɔ: ‹Ká see-mɛ ɗaŋ tɛ mɔ nɛ yaka'i na; wen gba-paa gbɛ bíí siɓi, siɓi’ɛ mbɛt. Mɛ̀ há̧ ŋgai tɛ-mɛ tɛ biro siti, a̧ mɛ̀ gbín ye'i.› Mɛ̀ há̧ nɔɔ-ŋgiɗi ha̧ Jɔab hee mɔ‘i ga.»

²⁶Kóò ko Urii zia'e, wíì kɔ‘i fea. A̧ hi̧a̧ wíì kɔ̧-a̧.

²⁷Nɛ̀ ŋgimbi zima gera kaɗa, David toma mgbɔ kóò‘i tɛnɛ sɛn tɛ kɔ‘i, ɓɛɛ a̧ ba a̧ nɛ̀ kóò. Kóò‘i kòò be-wiwii ha̧ a̧. Ɓɛɛ mɔ nɛ̀ David dea'i tu̧u̧ see GASA WAN.