Read Northwest Gbaya 2 SAMUƐL 13 Bible Online

2 SAMUƐL 13 - Northwest Gbaya bible

2 SAMUƐL 13

¹Mɔ nɛ̀ hɔɔ nɛ̀ ɗoŋ nɛ́ mɔ'ɔ. Absalɔm bem ko David a̧a̧ so nɛ́ boko-nya-wi nɛ̀ yora so zɔŋa nyɛmna. Nin-a nɛ́ Tamar. Ɓɛɛ Amnɔŋ bem ko David de wɔ a̧.

²Amnɔŋ dee wɔ boko-nya-wi nyɛmna, ɓɛɛ pi̧ zɛɛ tɛ-a. Tamar tɛ iŋ so tɛ hɔ̧ɔ̧ na, ɓɛɛ Amnɔŋ iŋ so yuwar mɔ n'aa tɛ de in a̧ na.

³Mɔ kpɔk, a̧ a̧a̧ so nɛ̀ ŋma sɛm kɔ̧-a̧, nin-a nɛ́ Yonadab, bem ko Simɛa nya David. Yonadab duka so nɛ́ ŋma wi-iŋ-mgbara-mɔ nyɛmna.

⁴A̧ aka Amnɔŋ: «Bem ko wannu, wen ge sa mɛ tutuyɛ lɛŋ, mɛ duk nɛ̀ de-a na’ɛ ge? Mɛ beka nyɛm so mɛ tɔ̧ gba̧a̧ mɔ‘i nɛ̀ de mɛ‘i ha̧‘m na nde?» Amnɔŋ kifa nú: «Mi kɔ̧ɔ̧ Tamar, boko-nya nya'm Absalɔm.»

⁵Yonadab tɔ̧ɔ̧ ha̧ a̧: «Mɛ̀ ɔ́ nù, ɓɛɛ mɛ̀ gɔ́n tɛ-mɛ de nɛ̀ zɛɛ, ɓɛɛ ŋgimbi nɛ dáà kɔ-mɛ be tɛ̀ɛ́ tɛ mɛ zɔk mɛ, ɓɛɛ mɛ tɔ̧ɔ̧ ha̧ a̧‘e: ‹Ɛ̀nɛ̀ é ha̧ boko-nya'm Tamar mɛ tɛ̀ɛ́ ha̧ nyɔŋmɔ ha̧‘m. A̧ a̧ tɛ́ɛ̀ gí nyɔŋmɔ nɛ yí‘m ha̧‘m mɛ zɔk, ɓɛɛ a̧ baa tɛnɛ nɛ̀ tɛ-a sɛka'm nyɔŋa.› »

⁶Nɛ́ mɔ'ɔ nɛ̀ Amnɔŋ gɔna tɛ ɔ zɛɛ. Wannu tɛɛ mɛ ga̧a̧mɔ mɛ zɔk Amnɔŋ, ɓɛɛ Amnɔŋ tɔ̧ ha̧ a̧: «Ɛ̀nɛ̀ é ha̧ boko-nya'm Tamar mɛ tɛ a̧ gí be makala yiitoo nɛ̀ yí‘m ha̧‘m nyɔŋ.»

⁷David toma sa Tamar kɔ̧ kira mɛ: «Mɛ̀ nɛ́ tɛ bu̧i̧-nya-mɛ Amnɔŋ, mɛ̀ gí nyɔŋmɔ ha̧ a̧.»

⁸Tamar nɛ̀ɛ́ tɛ ko bu̧i̧-nya-wi Amnɔŋ, ɓɛɛ ká a̧ ɔ nɛ nù. Tamar ɗuu fuu, ɓɛɛ vati, de nɛ̀ o be makala nɛ̀ yí Amnɔŋ ɓɛɛ han.

⁹Tamar kaia o makala nɛ kɔ̧ nyɛk-hana-a a ti a̧, ɓɛɛ a̧ bɛ̧ nyɔŋa a̧. A̧ tɔ̧a̧: «Ɛ̀nɛ̀ fó o bíí lɛŋ katɛ‘m gbonɛ!» Ɓɛɛ o bíí nɛ yaa katɛ a̧ lɛŋ gbo.

¹⁰Amnɔŋ tɔ̧ɔ̧ ha̧ Tamar: «Mɛ̀ bá nyɔŋmɔ pii kɔ̧ gɔna-bɛr-tua, mɛ̀ há̧ ha̧‘m, ɓɛɛ mi nyɔŋa.» Tamar kaia o makala n'aa dee nɛ er-a nɛnɛ ha̧ Amnɔŋ bu̧i̧-nya-a si kɔ̧ gɔna-bɛr-tua.

¹¹Hee mɔ'ɔ nɛ Tamar ha̧ nɛ nyɔŋmɔ ha̧ Amnɔŋ ga, Amnɔŋ tika er-a, ɓɛɛ tɔ̧: «Boko-nya'm, mɛ̀ tɛ́ ha̧‘m ɔ in mɛɛ.»

¹²Ɓɛɛ Tamar kifi nú ha̧ a̧: «Bo hegɔ na, bu̧i̧-nya'm; ká mɛ́ de ŋgayamɔ in am na, wen wi de pɛrti mɔ hegɔ sɛn Israɛl na. Ká mɛ de mɔɔ-búù hegɔ na.

¹³Kà pɛrti mɔ hegɔ de, mi tɛ ba foe kɔ‘m pi̧ déè? Kɔ-mɛ mbɛt, búù tɛ ba mɛ sɛn Israɛl! Mɛ̀ ák wannu; a̧ beka bɛ̧ ha̧a̧‘m nɛ̀ kóò ha̧ mɛ na.»

¹⁴Amnɔŋ kɔ̧ zia-a na. A̧ baa a̧ nɛ̀ ŋgai, ɓɛɛ ɔ in a̧.

¹⁵Tɛ kale ŋgimbi'i, Amnɔŋ ku̧u̧ naŋ sɛna Tamar pi̧-er-tɛ-wee; sɛnmɔ‘i ŋgaia gan kɔ̧ɔ̧ a̧ n'aa kɔ̧ɔ̧ so, ɓɛɛ Amnɔŋ tɔ̧ ha̧ a̧: «Mɛ̀ kúr, mɛ̀ yák!»

¹⁶Tamar kifa nú ha̧ a̧: «Bo hegɔ na, bu̧i̧-nya'm. Kà mɛ̀ ndak am kinii, ɓɛɛ tɛ ɗaŋ gan gan kuti mɔ nɛ̀ mɛ dea'i.» Amnɔŋ kɔ̧ zia wen nú Tamar na.

¹⁷Amnɔŋ saa wi-de-tom kɔ‘i, ɓɛɛ tɔ̧ ha̧ a̧: «Mɛ̀ fó be-okoo’ɛ yinɛ katɛ‘m; mɛ̀ fó a̧ gbonɛ, a̧ mɛ̀ kpé nú tua.»

¹⁸Laa nɛ Tamar duka so pi̧ nɛ gasa laa nɛ zi̧a̧ ɓaa-a, wen pi̧i̧-laa ko o boko-bem ko wannu nɛ̀ tɛ iŋ wiwii na nɛ́ mɔ‘i. Wi-de-tom ko Amnɔŋ foo Tamar pi̧ zan, ɓɛɛ kpe nú tua.

¹⁹Ɓɛɛ Tamar ŋma nú tɛ hiɗimɔ, ɗu bùk a zu, a̧k laa tɛ a nù, ɓɛɛ kai er a gba̧a̧-zu yak nɛnɛ.

²⁰Bu̧i̧-nya-a̧ Absalɔm tɔ̧ɔ̧ ha̧ a̧: «Nɛ́ nya-mɛ Amnɔŋ a̧ ɔɔ in mɛɛ nde? Mɛ̀ kàɗì, boko-nya'm, nɛ́ bu̧i̧-nya-mɛ a̧ dee mɔ‘i. Ká mɛ́ ta i̧i̧ ɓɔna.» Ɓɛɛ Tamar ɓɔn kɔ̧ tua ko bu̧i̧-nya-a Absalɔm.

²¹Ŋgimbi nɛ Wannu David zia wen'i, a̧ kpaa ɗaŋsee nyɛmna, ɓɛɛ a̧ nyɛm so mɛ de ɗaŋmɔ in Amnɔŋ na, wen Amnɔŋ so nɛ kaya-bem n'aa kɔ̧ɔ̧ nyɛmna.

²²Absalɔm tɔ̧ ŋma wen sitɛ Amnɔŋ zu mɔ‘i na, ɓɛɛ Absalɔm e kànà nɛ́ kiri ha̧ Amnɔŋ, wen ɗaŋa boko-nya-a̧ Tamar n'aa ɗaŋa.

²³Duka pɛ yiitoo ɗoŋ mɔ‘i, ɓɛɛ Absalɔm sa o be-wan lɛŋ si Bal-Hasɔr sɛn ká̧ Efraim, wen o wi-gɔn-buma-sami kɔ̧-a̧ a̧a̧ so hi̧i̧.

²⁴Absalɔm nɛɛ tɛ wannu, ɓɛɛ tɔ̧ ha̧ a̧: «Mi aia nú h’ɛ́nɛ́; wa gɔn nɛ buma sami tɛ̀ ko wi-de-tom k’ɛ́nɛ́. Wannu in o wi-de-tom kɔ‘i a̧ nɛ́ɛ̀ e'm.»

²⁵Wannu kifa nú ha̧ Absalɔm: «Weyaa, bem kɔ‘m, k’ɛ́ɛ́ nɛ́ lɛŋ na, wen ká bɔnɛ-ɗafa-mɔ tɛ̀ɛ́ ba tɛ mɛ.» Absalɔm aia kànà nú ha̧ wannu; wannu bɛ̧a̧, ɓɛɛ tok nɛ́ de yoŋgo zu a̧.

²⁶Ɓɛɛ Absalɔm tɔ̧: «Kà nɛ́ bòò hegɔ, ɓɛɛ ɛ̀nɛ̀ é war ha̧ nya'm Amnɔŋ mɛ nɛ in yɛɛ na nde?» Wannu kifa nú: «Mɛ kɔ̧ɔ̧ ha̧ a̧ mɛ nɛ in mɛɛ wen ge?»

²⁷Absalɔm aia kànà nú siti ha̧ wannu, ɓɛɛ wannu e ha̧ Amnɔŋ in oi o dɔka bem kɔ̧-a̧ lɛŋ mɛ nɛ in a̧.

²⁸Nɛ́ mɔ'ɔ nɛ̀ Absalɔm tɔ̧ɔ̧ ha̧ o wi-de-tom kɔ‘i lɛŋ hee mɔ'ɔ ga: «Ɛ̀nɛ̀ zɔ́k mɔ nɛ̀ de-a; k’ɛ̀nɛ̀ zɔ́k ndé dɔ̧ɔ̧ pi̧i̧ Amnɔŋ tɛ tortɛ kaɗi, ɓɛɛ kà‘m tɔ̧ h’ɛ́nɛ́‘e ndé, ɛ̀nɛ̀ gbɛ́ Amnɔŋ wó, ɓɛɛ ɛ̀nɛ̀ gbɛ́ a̧. Ká kíì de'nɛ́ na, nɛ́ tɔ̧ɔ̧-wen kɔ‘m. Ɛ̀nɛ̀ nɔ́ ŋgiɗi, ɛ̀nɛ̀ úsí‘e ɛ́nɛ́ nɛ́ ŋgaŋa-wi.»

²⁹O wi-de-tom ko Absalɔm dee mɔ in Amnɔŋ hee mɔ'ɔ nɛ Absalɔm tɔ̧ɔ̧ so ha̧ wa ga. O be-wan lɛŋ kaia o tuifuu kɔ‘i, ɓɛɛ pɛsi yak.

³⁰Wa ɓɔna fara pia-a, ká wen mɔ‘i aa so zer David kaɗi ndé, Absalɔm gbɛɛ o bem ko wannu lɛŋ, ŋma kpɔk ɓɔn na.

³¹Wannu kura, a̧k laa tɛ a nù, ɔ nù gbutu-nù. O gasawi lɛŋ nɛ yaa so katɛ David a̧ka̧ laa tɛ a nù mbɛt.

³²Yonadab bem ko Simɛa, nya David tɔ̧a̧: «Ká nyaa tɔ̧‘e, wa gbɛɛ o be-ŋgaiwi, o bem ko wannu lɛŋ na, wen wa gbɛɛ nɛ́ Amnɔŋ kpɔk ɓɛɛ. Akamɔ ko Absalɔm wese nɛ̀ Amnɔŋ ɔɔ nɛnɛ in boko-nya-a̧ Tamar usa so'e, a̧ tɛ de pɛrti mɔ hegɔ.

³³Ká nyaa wannu ta'e o bem kɔ‘i lɛŋ kuma na, nɛ́ Amnɔŋ kpɔk a̧ fee ɓɛɛ.»

³⁴Nɛ́ mɔ'ɔ nɛ̀ Absalɔm yuu mɔ yak. Wi-biro nɛ̀ duka so kɔ‘i pɛm nɛ̀ mɔ pi̧i̧ yí, ɓɛɛ zɔk o bíí nɛ̀ dɔka-a fara zira-a tɛnɛ nɛ̀ ká̧ naŋ kaya.

³⁵Ɓɛɛ Yonadab tɔ̧ ha̧ wannu: «O bem ko wannu nɛ́ mɔ'ɔ nɛ̀ hɔɔ kaɗi’ɛ, mɔ yaka hee mɔ'ɔ nɛ wi-de-tom k’ɛ́nɛ́ tɔ̧ɔ̧ so ga.»

³⁶A̧ tɛ kaɗi tɔ̧ɔ̧ wen'i hɔ̧ɔ̧ na, ɓɛɛ o bem ko wannu hɔ. Ɓɛɛ wa ku̧ naŋ hiɗa mɔ, hi̧i̧ nɛ̀ kɔ̧a̧. Wannu in o gasawi kɔ‘i lɛŋ hi̧a̧ kɔ̧a̧ nɛ̀ ŋgaya-a mbɛt.

³⁷Absalɔm yuu mɔ sitɛ Talmai, bem ko Amihud, wannu Gɛsur, ɓɛɛ a̧ duk hi̧i̧ pɛ taar. Ŋgimbi'i lɛŋ, David zim so nɛ́ bem kɔ‘i.

³⁹Ɓɛɛ ɗoŋ ŋgimbi'i, ɗaŋsee kɔ̧-a̧ kaɗa zu Absalɔm, wen see-aa ga̧a̧ oi fio ko Amnɔŋ kaɗi.