Read Northwest Gbaya 2 SAMUƐL 16 Bible Online

2 SAMUƐL 16 - Northwest Gbaya bible

2 SAMUƐL 16

¹Ŋgimbi nɛ David yaka si ɗoŋ kaya tikiɗi, a̧ kpaa ŋmaa in Siba, wi-de-tom ko Mɛfibosɛt fara kai tuifuu yiitoo tɛnɛ; wa tui nɛ́ o brɛt gɔmŋmaa-yiitoo, sikila kora waya-nyak-dɔ̧ɔ̧ gɔmŋmaa, o de gbɛ̧ waya-te gɔmŋmaa ká bá nɛ̀ dak dɔ̧ɔ̧ kpɔk.

²Wannu aka Siba: «Nɛ́ ge a̧ mɛ kai’ɛ ge?» Ɓɛɛ Siba kifi nú: «O tuifuu nɔ'ɔ tɛ duk nɛ́ mɔɔ-daŋ ko o nam ko wannu; brɛt in o waya-te nɛ́ nyɔŋmɔ ko o ŋgaiwi; dɔ̧ɔ̧ tɛ duk nɛ́ mɔɔ-nɔ ko bíí nɛ tɛ mbɔi sɛn ŋga-gbárà.»

³Wannu aka a̧ siti: «Bem ko wan kɔ-mɛ a̧a̧ dee?» Ɓɛɛ Siba kifi nú ha̧ wannu: «A̧ ɓɔna kɔ̧-a̧ sɛn Jerusalɛm, wen a̧ taa so kɔ̧-a̧‘e, o bíí nutua ko Israɛl tɛ ha̧ wan ko dáà kɔ‘i ha'i sɔsɔɔ.»

⁴Ɓɛɛ wannu tɔ̧ ha̧ Siba: «Mɔ nɛ Mɛfibosɛt a̧a̧ nɛnɛ lɛŋ zii nɛ̀ mɛ sɔsɔɔ.» Siba kifa nú: «Mi gbɛɛ zugur-am nù ti'nɛ́, ɛnɛ dé ko ha̧‘m, nyaa wannu kɔ‘m.»

⁵Ŋgimbi nɛ wannu David hɔɔ Bahurim, Simɛi bem ko Gera, ŋma nam ko Saul gboo kpa a̧, da̧ nɛ̀ a̧.

⁶A̧ duka yo nɛ wannu David, in o gasawi ko o wi-biro nɛ̀ ta. Wannu duka so kɔ‘i see-a, ɓɛɛ o ŋgaŋa-wi in o wi-biro ya zik a̧.

⁷Gba̧a̧ dara ko Simɛi nɛ́ mɔ'ɔ: «Mɛ̀ yák siɓi, mɛ̀ yák siɓi; mɛ wi-gbɛ-zu nɛ gba̧a̧ mɔ kɔ-mɛ bo na’ɛ!

⁸GASA WAN foo tɔk tɛ o bíí nutua ko Saul nɛ̀ mɛ ɔɔ wan oi-aa’ɛ pi̧ zu mɛ. GASA WAN ha̧a̧ wan ha̧ bem kɔ-mɛ Absalɔm, ɓɛɛ kɔ-mɛ kinii mɛ a̧a̧ tɛ bɔnɛ, wen mɛ́ nɛ́ wi-gbɛ-zu!»

⁹Abisai bem ko Sɛruya tɔ̧ɔ̧ ha̧ wannu: «Wen ge sa géé ɗaŋ fio toyo’ɛ da̧ nyaa wannu ge? Ɛ̀nɛ̀ é ha̧‘m nɛ́ɛ̀ ɓir zu-a pi̧ nù.»

¹⁰Wannu tɔ̧a̧: «Ŋma mɔ a̧a̧ so mgbara'm in'nɛ̀ɛ́, bem ko Sɛruya nde? A̧ nɛ́ da̧a̧ dara, in kà bó nɛ́ GASA WAN a̧ tɔ̧ɔ̧ ha̧ a̧, a̧ a̧ dá̧‘m wó, nɛ́ o a̧ nyɛma mɛ ak a̧, wen ge a̧ dee mɔ‘i ge nde, o?»

¹¹Ɓɛɛ David tɔ̧ ha̧ Abisai in o wi-biro kɔ‘i lɛŋ: «Bem n'am koo nɛ zaŋ-am nɛ́ mɔ'ɔ nɛ̀ kɔ̧ɔ̧ mɛ gbɛ‘m mbɛt’ɛ, kà bó nɛ̀ bezaŋ Bɛnjamin nde! Ɛ̀nɛ̀ é ha̧ a̧ da̧‘m, kà nɛ́ bòò nɛ́ GASA WAN a̧ ha̧a̧ nú ha̧ a̧.

¹²Ŋmafara GASA WAN tɛ zɔk bɔnɛ kɔ‘m, ɓɛɛ ha̧a̧ bɔtɛ ha̧‘m gan dara kɔ̧-a̧ sɔsɔɔ.»

¹³David in o bíí kɔ‘i lɛŋ nɛ́ kànà nɛ́ nɔ̀ kɔ-wa siti, ɓɛɛ Simɛi e wa duk na; a̧ baa ká̧ zaŋ kaya nɛnɛ, da̧ nɛ̀ David, pi̧ nɛ̀ ta, a nɛ̀ fuunu sitɛ wa mbɛt.

¹⁴Wannu in o bíí nɛ nɛ̀ɛ̀ in a̧ hɔɔ nú Jurdɛn. Wa mbɔia so nyɛmna, ɓɛɛ wa ɔm tɛ-wa hi̧i̧.

¹⁵Absalɔm yee ye Jerusalɛm in gíí o be Israɛl lɛŋ. Ahitɔfɛl a̧a̧ in a̧ mbɛt.

¹⁶Ŋgimbi nɛ Husai be Ark, sɛm ko David hɔɔ ti Absalɔm, a̧ tɔ̧ɔ̧ ha̧ a̧: «Wannu kànà nɛ́ ɛ́nɛ́ ɓɛɛ, ɛ̀nɛ̀ kásí a̧!»

¹⁷Absalɔm aka Husai: «Kɔ̧ɔ̧mɔ kɔ-mɛ sitɛ sɛm kɔ-mɛ nɛ́ mɔ‘i nde? Wen ge sa mɛ yak in sɛm kɔ-mɛ na ge?»

¹⁸Husai kifa nú ha̧ Absalɔm: «Bo hegɔ na; wi nɛ̀ GASA WAN in dukbíí ká bá nɛ̀ gíí o be Israɛl lɛŋ hoka nɛ̀ wannu, nɛ́ wi’ɛi a̧‘m tɛ duk in a̧, nɛ́ wi’ɛi a̧‘m tɛ ndaɗi in a̧!

¹⁹Kóó bòò so hegɔ na, nɛ́ o a̧‘m tɛ de tom ha̧ a̧ o? Bo nɛ ha̧ bem kɔ̧-a̧ na? Mi tɛ de tom h’ɛ́nɛ́, hee mɔ'ɔ n'am dee so nɛ̀ tom ha̧ dáà k’ɛ́nɛ́ ga.»

²⁰Absalɔm tɔ̧ɔ̧ ha̧ Ahitɔfɛl: «Ɛ̀nɛ̀ tɔ̧́ wen zu mɔ n’ɛɛ tɛ de.»

²¹Ahitɔfɛl kifa nú ha̧ Absalɔm: «Mɛ̀ nɛ́ɛ̀ ɔ in o zɔŋa-kóò ko dáà kɔ-mɛ n'aa ee kɔ̧ kira mɛ pɛm mɔ. Hegɔ o be Israɛl lɛŋ tɛ iŋ‘e, mɛ dee mɔɔ-tu̧-see dáà kɔ-mɛ, ɓɛɛ o wi-ye-ɗoŋ-mɛ lɛŋ tɛ kpa ŋgai.»

²²Wa yaia tua-laa e nù ha̧ Absalɔm zu gasa tua-wan, ɓɛɛ nɛ́ fara'i a̧ Absalɔm duk sɛnɛ, ɔ nɛnɛ in o zɔŋa-kóò ko dáà kɔ‘i nɛ̀ yí o be Israɛl lɛŋ.

²³Mbɔrɔ nɛ Ahitɔfɛl tɔ̧ɔ̧ tɛ ŋgimbi nɔ‘i lɛŋ duka hee wen ko Sɔ̧ ga. David in Absalɔm mbɛt duka so mbo nɛ̀ zu tɛ o mbɔrɔ nɔ‘i.