Read Northwest Gbaya 2 SAMUƐL 19 Bible Online

2 SAMUƐL 19 - Northwest Gbaya bible

2 SAMUƐL 19

¹Ɗɛɗɛ wannu ŋmana. A̧ daŋa si kɔ̧ gɔna-bɛr-tua zu nú-garo-ye, ɓɛɛ a̧ ŋma nú-a tɛ kɔ̧a̧. A̧ taŋa kɔ̧a̧ tɔ̧ nɛnɛ: «Oee bem kɔ‘m Absalɔm, oee bem kɔ‘m wa! Mi tɛ̀ɛ́ fe so oi nú mɛ ɓɛɛ wa. Oee Absalɔm bem kɔ‘m, oee bem kɔ‘m wa!»

²Wa mbaŋa tɛ Jɔab ndé, wannu ai nɛ́ nú, hi̧i̧ nɛ̀ kɔ̧a̧ Absalɔm.

³Gbina-biro wese'i kifa nɛ́ zima-fio, wen bíí lɛŋ zia wese'i ndé, wannu duk nɛ̀ tu̧u̧-see nyɛmna, wen zu bem kɔ‘i.

⁴O wi-biro lɛŋ sii nɛ̀ hu̧sa̧-a̧ si saaye, hee o wi-biro nɛ̀ yuu biro ɓɛɛ nɛ̀ foe ba ga.

⁵Wannu kpee so mɔ yí, hiɗi nɛ̀ mɔ nɛ̀ ŋgaya-a: «Oee Absalɔm bem kɔ‘m! Oee bem kɔ‘m wa!»

⁶Nɛ́ mɔ'ɔ nɛ̀ Jɔab yee tua sitɛ wannu, ɓɛɛ tɔ̧ ha̧ a̧: «Ɛnɛ pi̧i̧ foe zu o wi-biro k’ɛ́nɛ́ nɛ foo fio zu'nɛ́ yinɛ sɔsɔɔ. Wa kpasa'nɛ́, wa kpasa o bem k’ɛ́nɛ́, be-wiwii-a in be-okoo-a ká bá nɛ̀ o kóò k’ɛ́nɛ́ lɛŋ.

⁷Ɛ́nɛ́ kɔ̧ɔ̧ nɛ́ o wi nɛ sɛn'nɛ́, ɓɛɛ ɛnɛ sɛn o wi nɛ kɔ̧ɔ̧‘nɛ́. Mɔ n’ɛnɛ usa h’ɛ́ɛ́ sɔsɔɔ, mɛ̀ nɛ́ wen nɛ tɔ̧‘e, o gasawi in o wi-biro k’ɛ́nɛ́ lɛŋ nɛ́ geemɔ sɛn ti'nɛ́. Mi iŋa sɔsɔɔ‘i, kà Absalɔm a̧ duk so kpasa, ɓɛɛ ɛɛ fee k’ɛɛ lɛŋ, ɛnɛ tɛ̀ɛ́ zɔk k’ɛ́nɛ́ mɔ‘i nɛ́ demɔ nyɛmna.

⁸Ɓɛɛ kinii, mi ai nú h’ɛ́nɛ́, ɛ̀nɛ̀ gbó, ɛ̀nɛ̀ zɔ́n o wi-biro k’ɛ́nɛ́. K’ɛ̀nɛ̀ gbo na, mi kan mɔ nɛ̀ nin GASA WAN ndé, ŋma bíí kpɔk nɛ tɛ ɓɔn in'nɛ̀ɛ́ mɛ zɛ hɛ̧ɛ̧ bo na, ɓɛɛ tɛ duk nɛ́ gasa bɔnɛ gan o dɔka-a nɛ̀ kpaa'nɛ ku̧u̧naŋ-a nɛ̀ ŋgaiwi k’ɛ́nɛ́ hɔ nɛnɛ sɔsɔɔ.»

⁹Nɛ́ mɔ'ɔ nɛ̀ wannu kura nɛ́ɛ̀ duk nù sɛn nú garo, ɓɛɛ wa mbaŋ tɛ o wi-biro lɛŋ‘e: «Wannu gboo zan duk nú garo.» Ɓɛɛ o wi-biro lɛŋ mɔi̧ pii ti wannu. O bíí lɛŋ yuu so mɔ, o ndé si kɔ̧ tua kɔ‘i.

¹⁰Mgbara zuduk o be Israɛl lɛŋ, o bíí kpɛr nɛ ŋmaa tɔ̧ nɛnɛ‘e: «Mɛ̀ nɛ́ wannu’ɛ a̧ gboo yɛ er o wisɛn k’ɛɛ; nɛ́ a̧ a̧ gboo yɛ er o be Filistii, ɓɛɛ kinii a̧ yuu mɔ tɛ nù'ɛ yak nyɛi̧ nɛ Absalɔm.

¹¹Ɓɛɛ nɛ̀ war ko Absalɔm n’ɛɛ tɛna nɔ̧́-wan a zu a̧ wen ha̧ a̧ mɛ ɔ wan zu yɛ, a̧ fea tɛ biro mɛ kaɗi. Ɛnɛ zɛm nɛ ge h’ɛ́ɛ́ mɛ nɛ̀ɛ́ mgbɔ wan k’ɛɛ piinɛ ge?»

¹²Wannu David toma nɛ́ɛ̀ tɔ̧ ha̧ o wi-ɗafi-sɔ̧, Sadɔk in Abiatar: «Ɛ̀nɛ̀ tɔ̧́ ha̧ o gasawi Juda ndé, mɔ nɛ o be Israɛl lɛŋ tɔ̧, aa zer wannu sɛn tɛ kɔ̧-a̧ mɛ. Wen ge ɛ́nɛ́ tɛ ya nɛ̀ sɔŋkur bíí mɛ mgbɔ wannu piinɛ tɛ kɔ̧-a̧ ge?

¹³Ɛ́nɛ́ nɛ́ o nya'm, ɛ́nɛ́ nɛ́ tɔk-tɛ‘m; wen ge ɛ́nɛ́ tɛ ɓɔn nɛ́ o sɔŋkur wi nɛ̀ tɛ kur mɛ mgbɔ wannu piinɛ ge?

¹⁴Ɛ̀nɛ̀ nɛ́ɛ̀ ak Amasa'e, a̧ bo nɛ tɔk-tɛ‘m na nde? Sɔ̧ a̧ dé ŋgamɔ in am, kà‘m nɛ́ baa a̧ e oi Jɔab hee wi-duk-zu o wi-biro kɔ‘m ga na ɓɔnsɛnɛ.»

¹⁵David kpaia taamɔ ko o bíí Juda lɛŋ hee taamɔ ko kpɔk bíí ga, ɓɛɛ wa tom tɔ̧ ha̧ wannu: «Ɛ̀nɛ̀ píí ɗoŋ in o bíí k’ɛ́nɛ́ lɛŋ.»

¹⁶Wannu pia ɗoŋ hɔ nú Jurdɛn, ɓɛɛ ká o bíí Juda hɔɔ so kɔ-wa sɛn Gilgal mɛ we ti a̧ kaɗi, wen mgbɔɔ a̧ ku nɛ̀ Jurdɛn.

¹⁷Simɛi bem ko Gɛra, bezaŋ Bɛnjamin saaye Bahurim zira nɛ̀ haya-a in o be Juda mɛ we ti wannu David.

¹⁸O bíí nù ko Bɛnjamin nɛ̀ nɛ̀ɛ̀ in a̧ nɛ́ bíí booro-kpɔk. Ɓɛɛ Siba wi-de-tom kɔ̧ tua ko Saul kur in o bem kɔ‘i ɓu-zua-mɔɔrɔ gu nɛ̀ o wi-de-tom kɔ̧-a̧ ɓu-yiitoo mbɛt. Wa yaka mɛ we ti wannu si nú Jurdɛn,

¹⁹ɓɛɛ ka kombon ku nɛ́ yì mɛ nɛ̀ɛ́ kai o bíí nutua ko wannu, in ha̧ o wi-ba-kombon mɛ de o tom lɛŋ nɛ̀ wannu tɛ kɔ̧. Ŋgimbi nɛ wannu kuu Jurdɛn kaɗi, Simɛi bem ko Gɛra tika nù ti a̧,

²⁰ɓɛɛ tɔ̧ ha̧ a̧: «Ká nyaa pi̧ nú tɛ yɔɔ-kaya kɔ‘m na! Ká tɛ‘nɛ́ mbaŋ ɗoŋ ɗaŋmɔ kɔ‘m n'am dee in'nɛ̀ɛ́ wese n’ɛnɛ gboo nɛnɛ Jerusalɛm yak na. Ká wannu e mɔ‘i sɛn kɔ̧ see na.

²¹«Wi-de-tom k’ɛ́nɛ́ iŋa ɗaŋmɔ n'aa dea. Mi dee ɗaŋmɔ, ɓɛɛ sɔsɔɔ, mi yaka ti ha̧ o bíí nutua ko Jozɛf lɛŋ ha̧‘m mɛ we ti nyaa wannu kɔ‘m.»

²²Abisai bem ko Sɛruya gɔna nú a̧, ɓɛɛ tɔ̧: «Bo nɛ Simɛi nyɛma so mɛ fe wen n'aa da̧a̧ so wi nɛ GASA WAN tɛna nɔ̧́ a zu a̧ na nde?»

²³David tɔ̧a̧: «Ŋma mɔ a̧a̧ mgbara mɛ in am, wen ha̧ mɛ mɛ kii war mɛ duk nɛ wisɛn kɔ‘m sɔsɔɔ nde, bem ko Sɛruya? Wi tɛ gbɛ ŋma bíí sɔsɔɔ sɛn Israɛl hee ge, n'am iŋa nɛ mbetɛ‘e mi nɛ́ wannu Israɛl sɔsɔɔ'ɛ ge?»

²⁴Hegɔ wannu tɔ̧ɔ̧ ha̧ Simɛi: «Mɛ beka fe na.» Ɓɛɛ wannu kan mɔ ha̧ a̧.

²⁵Tɛ ŋgimbi'i, Mɛfibosɛt bem ko Saul zira mɛ we ti wannu; a̧ fɔr naŋ-a na, a̧ kpui zera na, a̧ fɔr laa kɔ̧-a̧ na mbɛt, ku̧u̧naŋ-a nɛ̀ wese nɛ̀ wannu yaka nɛnɛ hɔ wese n'aa pia nɛ̀ ɗoŋ, mɔ kpa wannu na.

²⁶Ŋgimbi n'aa wee nɛ ti wannu hɔ Jerusalɛm, wannu aka a̧: «Mɛfibosɛt, wen ge sa mɛ yak so in am na ge?»

²⁷Mɛfibosɛt kifa nú: «Nyaa wannu, wi-de-tom kɔ‘m ɔra'm. Mi wi-de-tom k’ɛ́nɛ́ taa so: ‹Mi tɛ hɛr nana tuifuu kɔ‘m mɛ daŋ yak nɛnɛ in wannu,› wen mi nɛ wi-kum.

²⁸Nɛ́ mɔ'ɔ nɛ̀ wi-de-tom kɔ‘m nɛ̀ɛ̀ tɔ̧ ɗaŋ wen tɛ‘m h’ɛ́nɛ́, ɓɛɛ ɛ́nɛ́ nyaa wannu, ɛ́nɛ́ duk hee betom ko Sɔ̧ ga. Ɛ̀nɛ̀ dé mɔ n’ɛnɛ kɔ̧a̧.

²⁹«Ko nyaa wannu kɔ‘m, o bíí nutua ko dáà kɔ‘m lɛŋ nyɛma so mɛ fe; mɔ kpɔk, ɛnɛ kpɛka ha̧‘m, wi-de-tom k’ɛ́nɛ́, mɛ ye mgbara o bíí nɛ nyɔŋ mɔ kpɔk in'nɛ̀ɛ́. Ŋma mɔ kɔ‘m nɛ́ ge ɓɔ ge? Nɛ́ ge a̧‘m tɛ ak er wannu woyo ɓɔ ge?»

³⁰Wannu tɔ̧ɔ̧ ha̧ a̧: «Wi dɔk wen de nɛ ge ɓɔ ge? Ɛnɛ tɛ kɛ̧ nù in Siba.»

³¹Mɛfibosɛt tɔ̧ɔ̧ ha̧ wannu: «A̧ a̧ bá kɔ̧-a̧ nù nɛ̀ oi-aa lɛŋ, wen nɛ̀ nyaa wannu pia, ŋma mɔ kpa a̧ na.»

³²Barzilai be Galad zira so tɛnɛ nɛ̀ Rogɛlim; a̧ mgbɔɔ wannu ku nɛ Jurdɛn, ɓɛɛ a̧ yak kɔ̧-a̧ e a̧ hi̧i̧.

³³Barzilai sɔka so nyɛmna, a̧ a̧a̧ so nɛ̀ pɛ ɓu-mɔɔrɔ-ɗoŋ-taar; nɛ́ a̧ a̧ zɔka so wannu nɛ̀ de-a ŋgimbi nɛ wannu nɛ̀ɛ̀ so nɛnɛ si Mahanayim; wen Barzilai duka so nɛ́ ŋma wanmbɔi.

³⁴Wannu tɔ̧ɔ̧ ha̧ Barzilai: «Mɛ̀ tɛ́ ɛ̀ɛ̀ yák in mɛɛ; mi tɛ zɔk mɛ nɛ̀ de-a katɛ‘m sɛn Jerusalɛm.»

³⁵Barzilai kifa nú ha̧ wannu: «Oi ŋgimbi ɓɔna ha̧‘m géè sa'm tɛ nɛ in wannu si Jerusalɛm ge?

³⁶Mi a̧a̧ nɛ̀ pɛ ɓu-mɔɔrɔ-ɗoŋ-taar sɔsɔɔ, mi nyɛm mɛ kɛ̧ mgbara mɔ ɓɔna. Mi nyɛma so mɛ kpa nyɔ̧ɔ̧ mɔ n'am nyɔŋ in mɔ n'am nɔ nde? Mi nyɛma so mɛ kɛ̧ mgbara tiger o wiwii in o okoo-bii-gima nde? Ɓɛɛ wen ge mi tɛ nɛ kɔ‘m ha̧ nɛ̀ ŋma dita tui h’ɛ́nɛ́ ge nde?

³⁷Wi-de-tom k’ɛ́nɛ́ tɛ ku nɛ́ Jurdɛn in'nɛ̀ɛ́ ɓɛɛ; wen ge ɛ́nɛ́ kɔ̧ɔ̧ mɛ de er-demɔ hegɔ ha̧‘m ge?

³⁸Ɛ̀nɛ̀ é yuwar ha̧ wi-de-tom k’ɛ́nɛ́ mɛ si kɔ‘i ɗoŋ. Mi kɔ̧ɔ̧ mɛ fe ɓɔn ye kɔ‘m sɛn ká̧ pɛsi-fio ko dáà kɔ‘m in nàà kɔ‘m. Ɛ̀nɛ̀ zɔ́k bem kɔ‘m Kimham; a̧ tɛ nɛ in'nɛ̀ɛ́, nyaa wannu kɔ‘m; ɛ̀nɛ̀ dé mɔ lɛŋ n’ɛnɛ kɔ̧ɔ̧ mɛ de in a̧.»

³⁹Wannu tɔ̧a̧: «Kimham a̧ sí in am, ɓɛɛ mi tɛ de mɔ lɛŋ nɛ mɛ kɔ̧ɔ̧ ha̧ a̧. Mɔ lɛŋ nɛ mɛ tɛ hok ha̧‘m mɛ de ha̧ mɛ, mi tɛ de ha̧ mɛ.»

⁴⁰O bíí lɛŋ kuu Jurdɛn, ɓɛɛ wannu ku mbɛt, ɓɛɛ a̧ hɛr ŋmaa in Barzilai, tok de yoŋgo ha̧ a̧, ɓɛɛ Barzilai si ɗoŋ tɛ kɔ‘i.

⁴¹Nɛ́ mɔ'ɔ nɛ̀ wannu baa war yak si Gilgal, ɓɛɛ Kimham yak in a̧. O be Juda lɛŋ in reeta duk be Israɛl mgbɔɔ so wannu ku nɛ yì.

⁴²O be Israɛl lɛŋ tɛɛ pii katɛ wannu, ɓɛɛ ak a̧: «Wen ge o nya-ɛɛ o be Juda ɓara'nɛ́ in o bíí nutua k’ɛ́nɛ́ ku nɛ̀ Jurdɛn, ɓɛɛ ka o bíí k’ɛ́nɛ́ lɛŋ a̧ ya kɔ‘i’ɛ ge?»

⁴³O bíí Juda lɛŋ kifa nú ha̧ o be Israɛl: «Wannu ndaɗa in yɛɛ gan. Wen ge sa see'nɛ́ nyim tɛ mɔ‘i ge? Ɛɛ nyɔŋa nɛ́ ŋma mɔ ko wannu náà, kóó a̧ baa nɛ́ ŋma mɔ e h’ɛ́ɛ́ nde?»

⁴⁴O be Israɛl kifa nú ha̧ o be Juda: «Ɛɛ a̧a̧ nɛ̀ ŋgai zu mɔɔ-wan war ɓu gan'nɛ; kóó David duk nɛ ŋma bíí k’ɛ́nɛ́ mbɛt, ɛɛ a̧a̧ nɛ ŋgai zu a̧ gan'nɛ. Wen ge s’ɛnɛ e yɛ tɛ geemɔ ge? Bo nɛ ɛɛ a̧ tɔ̧ɔ̧ wen mgbɔɔ wannu k’ɛɛ piinɛ ɗoŋ nɛti na nde?» Ɓɛɛ nú wen ko o be Juda a̧ ŋgaya gan nú wen ko o be Israɛl.