Read Northwest Gbaya 2 SAMUƐL 20 Bible Online

2 SAMUƐL 20 - Northwest Gbaya bible

2 SAMUƐL 20

¹Ŋma wi-de-gba̧a̧-mɔ na duka so sɛn hi̧i̧; nin-a nɛ́ Seba, bem ko Bikri ŋma bezaŋ Bɛnjamin. A̧ dɔma zak ɓɛɛ a̧ tɔ̧: «Ŋma war mɔ k’ɛɛ bo er David na. Ɛ́ɛ́ bó k’ɛɛ nɛ̀ mɔɔ-oi in bem ko Jɛse na. O be Israɛl, kóó o ndé a̧ sí ɗoŋ kɔ̧ tua kɔ‘i.»

²Nɛ́ mɔ'ɔ nɛ̀ o be Israɛl lɛŋ ee David duk ndak nɛ́ ɗoŋ Seba bem ko Bikri, ɓɛɛ o be Juda ndaɗi kɔ‘i in wan kɔ‘i, ku̧u̧naŋ-a nɛ̀ Jurdɛn hɔ nɛnɛ sɛn Jerusalɛm.

³David sii ɗoŋ si tɛ kɔ‘i Jerusalɛm, ɓɛɛ a̧ kai o kóò kɔ̧-a̧ ɓu n'aa aa so mɛ pɛm kira, ɓɛɛ a̧ a wa kɔ̧ ŋma tua nɛ‘i pɛm pɛm. A̧ ha̧a̧ mɔ nɛ wa kɔ̧ɔ̧ ha̧ wa, ɓɛɛ a̧ duk in wa na. Wa yaa hi̧i̧ hee o ko-gera nɛ̀ wíì kɔ-wa tɛ fe na ga hɔ nɛnɛ wese fio kɔ-wa.

⁴Wannu tɔ̧ɔ̧ ha̧ Amasa: «Mɛ̀ sá o be Juda tɛnɛ ha̧‘m zaŋ zɛ nɔ'ɔ taar’ɛ, a̧ mɛ̀ píí ɗoŋ dúk hɛ̧ɛ̧.»

⁵Amasa yaka mɛ sa o be Juda, ɓɛɛ a̧ ɓɔn gan zu ŋgimbi nɛ David gɔna so ha̧ a̧.

⁶David tɔ̧ɔ̧ ha̧ Abisai: «Kinii, Seba, bem ko Bikri tɛ de mɔ in yɛɛ ɗaŋ gan ko Absalɔm. Mɛ̀ káí o wi-biro ko wan kɔ-mɛ a̧ mɛ̀ ndák ɗoŋ Seba, wen ká a̧ tɛ́ɛ̀ ye tɛ o ye-ŋgárá, ɓɛɛ ká a̧ yak er yɛ.»

⁷O wi-biro ko Jɔab in o be Kɛrɛt, o be Pɛlɛt in o ŋgaŋa-wi lɛŋ kaia ŋmaa a ɗoŋ Abisai, wen yaka biro. Wa kura Jerusalɛm ndak ɗoŋ Seba bem ko Bikri nɛ̀ biro.

⁸Nɛ̀ wa hɛɗa nɛ̀ gasa ta nɛ̀ duk Gabaɔŋ mɛ kaɗi, wa kpaa ŋmaa in Amasa. Jɔab pi̧i̧ so nɛ́ laa-biro nɛ̀ gba-paa kɔ̧ koɓo-a guntir sɛn zu laa. Ŋgimbi n'aa gboo siti, gba-paa hɔ̧fa̧ nɛ̀ kɔ̧ koɓo-a ɓɛɛ tik nù.

⁹Jɔab aka Amasa: «Nya'm, mɛ duk nɛ̀ de-a nde?» Nɛ́ mɔ'ɔ n'aa pi̧i̧ er-a mɛ wiiko kasi zera ko Amasa mɛ hɛr a̧.

¹⁰Amasa zɔk so kɔ‘i gba-paa nɛ duk ɓii er Jɔab'i na. Jɔab toka zaŋ-aa, ɓɛɛ nyak zaŋ-aa gbo a nù. Ɓɔna nɛ̀ toka a̧‘i, ɓɛɛ Amasa fe ɓɔn oi. Nɛ́ mɔ'ɔ nɛ̀ Jɔab in nya-wi Abisai ndaka ɗoŋ Seba bem ko Bikri yaknɛ.

¹¹Ŋma ŋgaiwi ko Jɔab ɓɔna kɔ‘i hi̧i̧ mɛ pɛm wɔr Amasa, ɓɛɛ a̧ tɔ̧: «O wi nɛ̀ kɔ̧ɔ̧ Jɔab nɛ̀ duk nɛ́ o bíí ko David a̧ ndak pata Jɔab!»

¹²Ŋgimbi'i, ká wɔr Amasa a̧a̧ mbɔɗɔnu see war; tɔk kpee tɛ-a lɛŋ. Ŋgaiwi'i zɔka'e, dukbíí lɛŋ yor yor zɔk nɛ wɔr Amasa, ɓɛɛ a̧ gbur a̧ yinɛ yuwar si zaŋbɛɛ, ɓɛɛ ba laa kpe nɛ̀ zu a̧.

¹³Ŋgimbi n'aa gbura Amasa yinɛ yuwar kaɗi, o bíí lɛŋ nɛ hɔ, ɓir ɓir yak si ɗoŋ Jɔab wen ndaka pata Seba bem ko Bikri.

¹⁴Seba nɛ̀ɛ̀ dam ɗoŋ o duk be Israɛl lɛŋ hɔ nɛnɛ Abɛl-Bɛt-Maka. Nɛ́ mɔ'ɔ nɛ̀ o be Bɛr mɔi̧a ŋmaa lɛŋ, ɓɛɛ wa ye ɗoŋ-aa mbɛt.

¹⁵O wi-biro ko Jɔab gɔna nú-a e sɛn Abɛl-Bɛt-Maka, ɓɛɛ wa a mɔ daŋ hɔ zu garo. O wi-biro lɛŋ nɛ̀ tɛɛ in Jɔab sɔkɔɗa garo wen ha̧ mɛ tik nù.

¹⁶Ŋma haya okoo duka kɔ̧ garo hiɗi nɛ mɔ: «Ɛ̀nɛ̀ zìì, ɛ̀nɛ̀ tɔ̧́ ha̧ Jɔab a̧ a̧ ɗɔŋ piiti ha̧‘m tɔ̧ wen ha̧ a̧.»

¹⁷Jɔab ɗɔŋa piiti, ɓɛɛ kóò‘i ak a̧: «Jɔab nɛ́ mɛ́ nde?» Ɓɛɛ Jɔab kifi nú: «Nɛ́ mí.» Ɓɛɛ kóò‘i tɔ̧: «Mɛ̀ zíí wen ko kó-de-tom kɔ-mɛ.» Ɓɛɛ Jɔab kifi nú: «Mi a̧‘m zii'i.»

¹⁸Kóò‘i tɔ̧ɔ̧ siti: «Ɓeemɛ, ɛɛ a̧a̧ so nɛ̀ tua-wen ndé: ‹Mɛ̀ ák Abɛl-Bɛt-Maka,› ɓɛɛ wen kaɗa.

¹⁹Ŋma ye sɛn Israɛl nɛ̀ gana ɛ̧ɛ̧ ye’ɛ nɛ̀ ga̧a̧mɔ in mboozu bo na. Ɓɛɛ kɔ-mɛ, mɛ kɔ̧ɔ̧ mɛ ɗaŋ ye nɛ duk nɛ́ nàà ko Israɛl. Wen ge mɛ kɔ̧ɔ̧ mɛ ɗaŋ mɔɔ-oi ko GASA WAN ge?»

²⁰Jɔab kifa nú: «Gasa ɗaŋmɔ a̧ tík zu'm ka'm nɛ ɗaŋa mɔ.

²¹Bo nɛ mɔ‘i ɛ̀ɛ̀ kíí na. Ŋma be zu-kaya Efraim, nin-a nɛ́ Seba bem ko Bikri dee ŋgazu in wannu David. Ɛ̀nɛ̀ fó a̧ ɛ̀nɛ́-a gbonɛ ha̧‘m, ɓɛɛ mi ee ye k’ɛ́nɛ́ duk.» Ɓɛɛ kóò‘i tɔ̧ ha̧ Jɔab: «Ɛɛ tɛ pi̧ gɔɔ-zu-a nɛ̀ zu garo ha̧ mɛ.»

²²Kóò‘i tɔ̧ɔ̧ wen ha̧ o bíí lɛŋ nyɛm nɛ ɗoŋ iŋa-mgbara-mɔ kɔ̧-a̧. Wa gɔna ger Seba bem ko Bikri, ɓɛɛ wa pi̧ gɔɔ-zu-a nɛ zu garo ha̧ Jɔab. Jɔab dɔma zak, ɓɛɛ wa e ye'i duk si ɗoŋ si kɔ̧ tua kɔ-wa. Jɔab sii kɔ‘i ɗoŋ si Jerusalɛm si katɛ wannu.

²³Jɔab duka so zu o wi-biro Israɛl lɛŋ. Bɛnaya bem ko Yehoyada duka so kɔ‘i zu o be Kɛrɛt in o be Pɛlɛt,

²⁴Adoram duka so kɔ‘i zu o bara, Yehosafat, bem ko Ahilud duka so kɔ‘i nɛ́ mɔ-geŋa.

²⁵Sɛwa so nɛ́ wi-yɔr-mɔ; Sadɔk in Abiatar so nɛ́ o wi-ɗafi-sɔ̧,

²⁶ɓɛɛ Ira be Yair so nɛ́ wi-ɗafi-sɔ̧ ko David mbɛt.