Read Northwest Gbaya 2 SAMUƐL 21 Bible Online

2 SAMUƐL 21 - Northwest Gbaya bible

2 SAMUƐL 21

¹Ŋgimbi wan ko David, kaɓa tika so nù tɛ pɛ taar. Nɛ́ mɔ'ɔ nɛ̀ David nɛ̀ɛ̀ ak mɔ in GASA WAN, ɓɛɛ GASA WAN tɔ̧ ha̧ a̧: «Simbo tɔk a̧a̧ zu Saul in o bíí nutua kɔ̧-a̧, wen a̧ gbɛɛ so o be Gabaɔŋ.»

²Wannu saa o be Gabaɔŋ: o be Gabaɔŋ nɔ‘i bó so nɛ́ o be Israɛl na; wa nɛ́ o ŋma bezaŋ o be Amɔr nɛ ɓɔna so kpasa ŋgimbi nɛ o be Israɛl yee so ŋmaa in wa nɛ̀ kanamɔ. Nɛ ɗoŋ, Saul kɔ̧ɔ̧ so mɛ gbɛ o be Gabaɔŋ, wen n'aa kɔ̧ɔ̧ so mɛ de mɔ nyɛm see o be Israɛl in o be Juda.

³David aka o be Gabaɔŋ: «Mɔ n'am tɛ de h’ɛ́nɛ́ nɛ ge? Mi tɛ ɗafi mɔ hee ge h’ɛ́nɛ́ mɛ tok de yoŋgo zu dukbíí ko GASA WAN ge?»

⁴O be Gabaɔŋ kifa nú ha̧ a̧: «Bo nɛ bu-mbɔi in lɔr, kóó gbɛɛ ŋma be Israɛl a̧ mɛ tɛ gbɛ ɗafi nɛ̀ mgbara yɛ in o bíí nutua ko Saul na.» David tɔ̧a̧: «Mɔ n’ɛnɛ tɛ tɔ̧ lɛŋ, mi tɛ de h’ɛ́nɛ́.»

⁵O be Gabaɔŋ tɔ̧ɔ̧ ha̧ wannu: «Wi nɛ̀ kɔ̧ɔ̧ so mɛ kum yɛ, nɛ̀ taa so kɔ‘i, ɛɛ kuma sɛn nú Israɛl lɛŋ kaɗi'i,

⁶ɛɛ kɔ̧ɔ̧ bezaŋ-aa mɔɔrɔ-ɗoŋ-yiitoo h’ɛ́ɛ́ mɛ ga̧i̧ tɛ te ti GASA WAN sɛn saaye Gibea ko Saul, wannu nɛ GASA WAN hoka so.» Ɓɛɛ wannu tɔ̧: «Mi tɛ ha̧ wa h’ɛ́nɛ́.»

⁷Wannu ee Mɛfibosɛt, bem ko Jɔnataŋ, be-koo Saul wen zu kanamɔ nɛ̀ David in Jɔnataŋ kànà so mgbara ŋmaa ti GASA WAN.

⁸A̧ kaia o be-wiwii ko Rispa yiitoo, boko-bem ko Aya n'aa koo so ha̧ Saul. Nin-wa nɛ Armɔni in Mɛfibosɛt. A̧ kaia o bem ko Mikal, boko-bem ko Saul n'aa koo so ha̧ Adriɛl bem ko Barzilai be Mɛhɔla mɔɔrɔ mbɛt,

⁹ɓɛɛ a̧ a wa er o be Gabaɔŋ. Wa nɛ̀ɛ̀ ga̧i̧ wa tɛ te zu kaya ti GASA WAN. Wa fee mɔɔrɔ-ɗoŋ-yiitoo'i lɛŋ. Wa gbɛɛ wa tɛ kuti ŋgimbi-mɔi̧a-nyɔnɔ tɛ ku̧u̧naŋ mɔi̧a be-fon.[15]

¹⁰Nɛ́ mɔ'ɔ nɛ̀ Rispa boko-bem ko Aya kaia laa-zim-fio tati zu ta ku̧u̧naŋ-a nɛ ŋgimbi mɔi̧a alkamaari hɔ nɛnɛ tɛ ŋgimbi nɛ kórò aa nɛ̀ nù. A̧ kɔ̧ so ha̧ o nɔ̧́í̧ mɛ nyɔŋ wɔr mɛ wese in ha̧ o saɗi mɛ nyɔŋ wɔr mɛ zɛ na mbɛt.

¹¹Wa nɛ̀ɛ̀ tɔ̧ mɔ nɛ Rispa boko bem ko Aya, kóò ko Saul dea'i ha̧ David,

¹²ɓɛɛ nɛ́ mɔ'ɔ n'aa nɛ̀ɛ̀ kai o gba̧a̧ Saul in o gba̧a̧ Jɔnataŋ bem kɔ̧-a̧ er o wanmbɔi Yabɛs nú Galad. O wanmbɔi nɔ‘i zu̧u̧ so o gba̧a̧ nɔ‘i sɛn bee-gara Bɛt-Seaŋ, fara nɛ o be Filistii ga̧i̧a so wa sɛnɛ, wese nɛ wa gbɛɛ nɛ Saul sɛn Gilboa.

¹³David kaia o gba̧a̧ Saul in o gba̧a̧ bem kɔ̧-a̧ Jɔnataŋ sɛn nú Bɛnjamin sɛn Yabɛs yinɛ nɛ́ɛ̀ a zu ko o wi nɛ wa ga̧i̧a so.

¹⁴Wa guna o gba̧a̧ Saul in o gba̧a̧ bem kɔ̧-a̧ Jɔnataŋ sɛn nú Bɛnjamin sɛn Sela, kɔ̧ pɛsi ko Kis dáà ko Saul. Ɗoŋ nɛ wa dee mɔ lɛŋ nyɛm nɛ̀ ɗoŋ wen nɛ̀ wannu tɔ̧ɔ̧ ha̧ wa mɛ de'i kaɗi, Sɔ̧ zɔka nù‘i nɛ̀ de yí.

¹⁵Biro ku̧u̧ mgbara o be Filistii in o be Israɛl woyo, ɓɛɛ David in o wi-biro kɔ‘i yak mɛ nɛ̀ɛ́ bi o be Filistii. David zɔka'e wi mbɔia.

¹⁶Isbi-Benɔb nɛ̀ duk nɛ́ bezaŋ Harafa, nɛ̀ a̧a̧ nɛ̀ sɛ́ɛ̀ nɛ̀ dita-a nɛ́ kilo taar nɛ̀ ŋma mɔ zu-a, in nɛ̀ hɛra so mbe gba-paa, gasi nɛ́ zu'e, wi tɛ gbɛ David.

¹⁷Nɛ́ mɔ'ɔ nɛ̀ Abisai bem ko Sɛruya tɛ̀ɛ̀ gbak David, ɓɛɛ gbɛ be Filistii'i nɛ̀ gba-paa. Hegɔ, o bíí ko David ha̧a̧ nú, ɓɛɛ tɔ̧ ha̧ a̧: «Ɛnɛ beka nɛ biro in yɛɛ ɓɔna, wen o be Israɛl e ta nɛ ɛnɛ.»

¹⁸Ɗoŋ mɔ‘i, biro ku̧u̧ naŋ sɛn Gob mɛ in o be Filistii; ɓɛɛ nɛ́ hi̧i̧ a̧ Sibɛkai be Husa gbɛɛ nɛ Saf ŋma bezaŋ Harafa.

¹⁹Biro ku̧u̧ naŋ woyo sɛn Gob mɛ in o be Filistii; ɓɛɛ Ɛlhanaŋ bem ko Yair be Bɛtlɛhɛm gbɛ Goliat be Gat; te-sɛ́ɛ̀ kɔ̧-a̧ ndota so hee te-mgboi-laa ko wi-de-laa ga.

²⁰Nɛ́ mɔ'ɔ nɛ̀ biro baa woyo sɛn Gat. Ŋma bíí a̧a̧ so hi̧i̧, waza-er-a mɔɔrɔ-ɗoŋ-kpɔk, waza-naŋ-a mɔɔrɔ-ɗoŋ-kpɔk mbɛt. O waza-er-a in o waza-naŋ-a lɛŋ nɛ́ ɓu-yiitoo-zua-naar. A̧ mbɛt duka so nɛ́ ŋma bezaŋ Arafa.

²¹A̧ pɛra wen in o be Israɛl, ɓɛɛ Yɔnataŋ bem ko Simɛa nya David gbɛ a̧.

²²Wa lɛŋ naar'i yaa so nɛ́ o bezaŋ Harafa sɛn Gat, ɓɛɛ David in o wi-biro kɔ‘i kum wa lɛŋ.