Read Northwest Gbaya 2 SAMUƐL 24 Bible Online

2 SAMUƐL 24 - Northwest Gbaya bible

2 SAMUƐL 24

¹See GASA WAN tu̧u̧ zu o be Israɛl woyo, ɓɛɛ a̧ a wen ha̧ see David mɛ kur zu wa. GASA WAN tɔ̧ɔ̧ ha̧ David: «Mɛ̀ tɔ́r o be Israɛl in o be Juda lɛŋ.»

²Nɛ́ mɔ'ɔ nɛ̀ wannu tɔ̧ɔ̧ ha̧ Jɔab gasawi ko o wi-biro nɛ duka in a̧: «Mɛ̀ yár dam mgbara o zuduk be Israɛl lɛŋ ku̧u̧naŋ-a nɛ Dan hɔ Bɛrseba, ɓɛɛ ɛ̀nɛ̀ tɔ́r o bíí ha̧‘m iŋ dɔka wa.»

³Jɔab kifa nú ha̧ wannu: «GASA WAN Sɔ̧ k’ɛ́nɛ́ a̧ dé ha̧ bíí k’ɛ́nɛ́ mɛ dɔk war gɔmŋmaa, ha̧ nyaa wannu mɛ zɔk nɛ̀ yí. Wen ge s’ɛnɛ kɔ̧ɔ̧ mɛ tɔr wa ge nde?»

⁴Wannu yora kànà ɗoŋ ha̧a̧nú n'aa ha̧a̧ ha̧ Jɔab in o gasa wi-biro wen tɔra bíí, ɓɛɛ wa yak nɛ̀ yí wannu mɛ nɛ̀ɛ́ tɔr o be Israɛl.

⁵Wa kuu Jurdɛn, ɓɛɛ wa ba gbagari sɛn Arɔɛr, nɛ̀ war ká̧-zan-mɛ́-ɗɔɔ ha̧ ye nɛ̀ duk kɔ̧ ɗɔŋgɔ be-zer ko Gad, ɓɛɛ wa yak si war Yazɛr.

⁶Wa nɛɛ hɔ Galad in sɛn bɔkɔ-nú sɛn Hodsi. Wa nɛɛ hɔ Dan-Yan, ɓɛɛ wa ɓir hɔ Sidɔŋ.

⁷Wa yee Ŋga-ye-Tir ɓɛɛ wa yar dam tɛ o ye ko o be Hiv, in o be Kanaŋ lɛŋ. Wa yaka si Nɛgɛb nú Juda sɛn Bɛrseba mbɛt.

⁸Ɗoŋ nɛ wa yara dam nù lɛŋ tɔr nɛ̀ bíí kaɗi, wa pia ɗoŋ Jerusalɛm ɗoŋ fio-zɛ mɔɔrɔ-ɗoŋ-naar nɛ ɔɔ-zɛ ɓu-yiitoo.

⁹Ɓɛɛ Jɔab tɔ̧ dɔka bíí nɛ̀ wa tɔra lɛŋ ha̧ wannu: o be Israɛl nɛ̀ nyɛma so mɛ dak gba-paa-biro nɛ́ bíí booro-gɔmŋmaa-mɔɔrɔ-ɗoŋ-taar, ɓɛɛ ko Juda nɛ́ bíí booro-gɔmŋmaa-mɔɔrɔ.

¹⁰Ɗɛɗɛ David ku̧u̧naŋ gɔna-a ɗoŋ n'aa tɔra nɛ̀ o bíí kɔ̧-a̧ kaɗi, ɓɛɛ a̧ tɔ̧ ha̧ GASA WAN: «Nɛ́ gasa ɗaŋmɔ nyɛmna a̧‘m dea! Kinii, GASA WAN, ɛ̀nɛ̀ é ɗaŋmɔ ko wi-de-tom k’ɛ́nɛ́ ha̧ a̧, wen mi dee mɔ hee mgbelewi ga nɛ̀ mbetɛ.»

¹¹Ŋgimbi nɛ David kura mɛ tutuyɛ, GASA WAN tɔ̧ɔ̧ so kɔ‘i wen ha̧ wi-tɔ̧-wen oi nú Sɔ̧ Gad, wi-zɔk-mɔ ko David hee mɔ'ɔ ga kaɗi:

¹²«Mɛ̀ nɛ́ɛ̀ tɔ̧́ ha̧ David'e, GASA WAN tɔ̧a̧: ‹Mi aa ŋga bɔnɛ taar ti mɛ; mɛ̀ hók kpɔk, ɓɛɛ nɛ́ i̧i̧ a̧‘m tɛ de.› »

¹³Gad nɛɛ kpa David, ɓɛɛ we ɗoŋ mɔ‘i ha̧ a̧: «Mɛ kɔ̧ɔ̧ ha̧ kaɓa mɛ tik zu nù kɔ-mɛ tɛ pɛ mɔɔrɔ-ɗoŋ-yiitoo náà, kóó yuu mɔ ti o wisɛn kɔ-mɛ nɛ tɛ ndak pata-mɛ tɛ fio-zɛ taar náà, kóó mɛ kɔ̧ɔ̧ nɛ zɛɛ-geŋa ha̧ mɛ tik tɛ nù kɔ-mɛ tɛ zɛ taar nde? Kinii, mɛ̀ tá mɔ a̧ mɛ̀ kífí nú ha̧‘m, wen ha̧‘m mɛ nɛ̀ɛ́ we ɗoŋ-aa ha̧ wi nɛ̀ toma'm tɛnɛ.»

¹⁴David kifa nú ha̧ Gad: «Mi a̧a̧ tɛ dita-see nyɛmna. Gana so ha̧‘m mɛ tik sɛn kɔ̧ er GASA WAN, wen deako kɔ̧-a̧ ɔ gasa, ba nɛ̀ tika-a kɔ̧ er o bíí.»

¹⁵Nɛ́ mɔ'ɔ nɛ̀ GASA WAN toma zɛɛ-geŋa pi̧ sɛn Israɛl, ku̧u̧ naŋ-a mɛ tutuyɛ‘i kaɗi nɛ́ ŋgimbi nɛ̀ GASA WAN gɔna. Bíí nɛ fea ku̧u̧naŋ-a nɛ̀ Dan hɔ Bɛrseba nɛ́ bíí booro-ɓu-mɔɔrɔ-ɗoŋ-yiitoo.

¹⁶Betom ko Sɔ̧ nyɛi̧a er si zu Jerusalɛm mɛ kum o bíí, ɓɛɛ GASA WAN kpai taamɔ tɛ dea ɗaŋmɔ‘i, ɓɛɛ a̧ tɔ̧ ha̧ betom-ɗaŋ-mɔ‘i: «Kaɗa! Mɛ̀ dák er-mɛ.» Betom ko Sɔ̧ duka so fara-gusi-alkamaari ko Aravna, be Jebus.

¹⁷Ɓɛɛ ŋgimbi nɛ̀ David zɔka betom ko Sɔ̧ fara kuma o bíí, a̧ tɔ̧ɔ̧ ha̧ GASA WAN: «Nɛ́ mi'i yɔɔ kaya; wi nɛ̀ dee ɗaŋmɔ‘i nɛ́ mi nɛ̀ tɛ‘m. Ɓɛɛ ko o wi nɔ'ɔ nɛ̀ zɔk bɔnɛ'ɛ, wa duk hee o sami ga, wa dee kɔ-wa nɛ́ ge? Gana so ɛ̀nɛ̀ úsí nɛ́ bɔnɛ ha̧‘m in o bíí nutua kɔ‘m ɓɛɛ.»

¹⁸Wese'i, Gad nɛɛ David, ɓɛɛ tɔ̧ ha̧ a̧: «Mɛ̀ dáŋ si fara-gusi-alkamaari ko Aravna, be Jebus, ɓɛɛ mɛ̀ mbó fara-ɗafi-sɔ̧ ha̧ GASA WAN sɛn hi̧i̧.»

¹⁹David daŋa si hi̧i̧ hee mɔ'ɔ nɛ Gad tɔ̧ɔ̧ ga, nyɛm nɛ̀ ɗoŋ tɔ̧ɔ̧-wen ko GASA WAN.

²⁰Aravna pi̧i̧ yí, ɓɛɛ zɔk wannu in o gasa wi-biro kɔ‘i fara tɛa-a pii tɛ-a. Aravna gboo, gu nù ti wannu, baa yí hikiɗi nù.

²¹A̧ aka mɔ: «Nyaa wannu tɛ́ tɛ ko wi-de-tom kɔ‘i wen ge?» David kifa nú ha̧ a̧: «Mi tɛ mɛ hi̧fi fara-gusi-alkamaari kɔ-mɛ er-mɛ, ha̧‘m mɛ mbo fara-ɗafi-sɔ̧ sɛnɛ ha̧ GASA WAN; hegɔ zɛɛ-geŋa tɛ yu zu bíí.»

²²Aravna kifa nú ha̧ David: «Nyaa wannu a̧ káí mɔ lɛŋ nɛ̀ dee tɛ-a, ha̧ mɛ dɔ nɛ̀ kpoo-sɔ̧: o ndai tɛ ya wen dɔa-a nɛ̀ kpoo-sɔ̧; mɔɔ-gbur-mɔ in te-keekee tɛ ya kɔ‘i nɛ́ gua.»

²³A̧ ha̧a̧ mɔɔ nɔ‘i lɛŋ ha̧ wannu, ɓɛɛ a̧ tɔ̧: «GASA WAN Sɔ̧ k’ɛ́nɛ́ a̧ kpɛ́k ha̧a̧mɔ k’ɛ́nɛ́‘i.»

²⁴Ɓɛɛ wannu tɔ̧ ha̧ Aravna: «Mi kɔ̧ɔ̧ kànà mɛ hi̧fi hi̧fi nyɛm ɗoŋ gɛnɛ-a; mi kɔ̧ mɛ dɔ kpoo-sɔ̧ ha̧ GASA WAN Sɔ̧ kɔ‘m nɛ̀ mɔ n'am baa géè na.» Nɛ́ mɔ'ɔ nɛ̀ David hi̧fa fara-gusi-alkamaari in o ndai tɛ kɔya bu-mbɔi ɓu-mɔɔrɔ.

²⁵David mboo fara-ɗafi-sɔ̧ ha̧ GASA WAN sɛn hi̧i̧, ɓɛɛ a̧ dɔ kpoo-sɔ̧ ɗafi nɛ̀ sɔ̧ wen ga̧a̧mɔ mbɛt ha̧ GASA WAN. GASA WAN dee ko ha̧ nù‘i, ɓɛɛ zɛɛ-geŋa'i yu sɛn Israɛl.