Read Northwest Gbaya 2 SAMUƐL 4 Bible Online

2 SAMUƐL 4 - Northwest Gbaya bible

2 SAMUƐL 4

¹Ŋgimbi nɛ Isbosɛt bem ko Saul zia'e, Abnɛr fea sɛn Hebrɔŋ, tɛ-a gbina, ɓɛɛ o be Israɛl lɛŋ ya yelem.

²Isbosɛt bem ko Saul a̧a̧ so nɛ̀ gasawi ko o wi-biro yiitoo. Nin kuti-a nɛ́ Baana; nin ɓii-aa nɛ́ Rekab. Wa nɛ́ o bem ko Rimɔŋ, ŋma bezaŋ Bɛnjamin nɛ duka sɛn Bɛrot, wen Bɛrot duka so nɛ́ ŋma ye tɛ nú Bɛnjamin.

³O kuti be Bɛrot yuu so mɔ hu̧si sɛn Gitayim, ɓɛɛ wa de ye hi̧i̧ hɔ sɔsɔɔ.

⁴Ŋma bem ko Jɔnataŋ, be-koo Saul duka so nɛ̀ ku yiitoo mɔka mɔk. A̧ a̧a̧ so nɛ̀ pɛ mɔɔrɔ, ŋgimbi nɛ nyɛrɛ fio ko Saul in Jɔnataŋ hɔɔ nɛnɛ nɛ Yizreɛl. Kó-dai-bem’ɛi kɔ̧ɔ̧ so mɛ ba a̧ yu nɛ mɔ yak, ɓɛɛ tɛ maa yì yu nɛ mɔ, bem’ɛi tika nù, ɓɛɛ a̧ kpa kum. Nin bem’ɛi nɛ́ Mɛfibosɛt.[2]

⁵O bem ko Rimɔŋ be Bɛrot, Rekab in Bana yaka, ɓɛɛ wa hɔ tɛ ŋgimbi kpɔra wese sɛn nutua ko Isbosɛt, ká a̧ ɔ nɛ́ ya-wese.

⁶Rekab in nya-wi Bana yee kɔ̧ tua hee wa ba nɛ alkamaari nɛnɛ ga; ŋgimbi nɛ wa yee kɔ̧ tua, Isbosɛt nyafa so gɔn gado bɛr tua-ɔɔ kɔ̧-a̧. Wa toka a̧ tɛ zaŋ-aa gbɛ; wa ɓira ger-a ba zu-a yak. Nɛ́ mɔ'ɔ nɛ̀ wa baa yuwar Araba yak nɛ zɛ nɛ zɛ.

⁸Wa baa zu Isbosɛt nɛnɛ ha̧ wannu David sɛn Hebrɔŋ, ɓɛɛ wa tɔ̧ ha̧ a̧: «Ɛ̀nɛ̀ zɔ́k zu Isbosɛt bem ko Saul, wisɛn k’ɛ́nɛ́ nɛ kɔ̧ɔ̧ so mɛ gbɛ‘nɛ́ hɛ̧ɛ̧. GASA WAN ee war ha̧ wannu mɛ kifi er zu Saul in o bezaŋ-aa sɔsɔɔ.»

⁹David kifa nú ha̧ Rekab in nya-wi Bana, o bem ko Rimɔŋ, be Bɛrot; a̧ tɔ̧ɔ̧ ha̧ wa: «Nɛ̀ nin GASA WAN nɛ̀ duk kpasa nɛ̀ gboo am tɛ ŋga bɔnɛ lɛŋ,

¹⁰wi nɛ̀ baa nyɛrɛ fio ko Saul tɛnɛ ha̧‘m, zia so kɔ‘i'e, wi baa nɛ́ de nyɛrɛ tɛnɛ ha̧‘m. Ɓɛɛ kɔ‘m, mi baa a̧ gbɛ sɛn Siklag yoɓi nɛ̀ de nyɛrɛmɔ kɔ̧-a̧.

¹¹Ɓɛɛ nɛ̀ war k’ɛ́nɛ́, o wi-gbɛ-zu nɛ kura nɛ́ɛ̀ gbɛ wi nɛ̀ de ŋma mɔ na, nɛ̀ ɔ nɛ́ nù kɔ̧ tua kɔ‘i géè, mi beka ak tɔk tɛ-a er'nɛ́ na nde? Mi beka gbɛ‘nɛ́ yinɛ na nde?»

¹²Ɓɛɛ David ha̧ nú ha̧ o ŋgaiwi kɔ̧-a̧ mɛ gbɛ wa yinɛ. Wa ɓira er-wa in naŋ-wa, ga̧i̧ ká̧ tɔp Hebrɔŋ, ɓɛɛ nɛ̀ ko gɔɔ-zu Isbosɛt, wa baa nɛ́ɛ̀ gun kɔ̧ pɛsi ko Abnɛr sɛn Hebrɔŋ.