Read Northwest Gbaya 2 SAMUƐL 6 Bible Online

2 SAMUƐL 6 - Northwest Gbaya bible

2 SAMUƐL 6

¹Nɛ́ mɔ'ɔ nɛ̀ David mɔi̧a o ŋgaŋa wi-biro nú Israɛl lɛŋ woyo; nɛ́ o bíí booro-ɓu-taar.

²David in o wi-biro nɛ̀ nɛ́ in a̧‘i yee yuwar mɛ yak si Baala nù Juda, wen ha̧ wa mɛ nɛ̀ɛ́ ba Kuɓa nɔɔ-tɔk ko Sɔ̧. Nɛ́ zu Kuɓa nɔɔ-tɔk'i a̧ GASA WAN ko o gii wi-biro duk so sɛnɛ zu keribim, ɓɛɛ wa saa nin-a sɛnɛ.

³Wa nɛɛ ba kuɓa'i kɔ̧ tua ko Abinadab nɛ̀ duk zu kaya e zu mbe keekee ba yaknɛ. Nɛ́ o bem ko Abinadab yiitoo, Uza in Ahio a̧ bàà báá mbe keekee-gɔ-kuɓa'i.

⁴Wa baa kuɓa gbonɛ kɔ̧ tua ko Abinadab nɛ̀ duk zu kaya yaknɛ, ɓɛɛ nɛ́ Ahio a̧ duk ti.

⁵David in o be Israɛl lɛŋ yɔ so kɔ‘i nɛ yɔyɛ ti GASA WAN nɛ̀ o mɔɔ-mbɛr nɛ̀‘i dee nɛ̀ te:[7] o koloŋ, o kunde, o bi̧ɔ̧, o sɔkɔ in o kuŋge.

⁶Wa hɔɔ fara-gusi-alkamaari ko Nakɔŋ, nɛ́ mɔ'ɔ nɛ̀ o ndai foo mɔ, ɓɛɛ Uza nyɛi̧ er mɛ kasi kuɓa wen ka a̧ tɛ̀ɛ́ tik nù.

⁷Nyimsea ko GASA WAN kura zu a̧, ɓɛɛ a̧ gbɛ a̧ wen zu yɔɔ-kaya'i; a̧ fee ká̧ kuɓa ko GASA WAN.

⁸See David ɗaŋa wen nɛ Sɔ̧ dee ŋgayamɔ in Uza, ɓɛɛ wa a nin fara'i'e Pɛrɛs-Uza,[8] nɛ duk kànà hɔ sɔsɔɔ.

⁹Kíí GASA WAN dee David wese'i, ɓɛɛ a̧ tɔ̧: «Kuɓa ko GASA WAN tɛ tɛ pii tɛ kɔ‘m hee ge?»

¹⁰David bɛ̧ɛ̧ baa Kuɓa ko GASA WAN si tɛ kɔ‘i sɛn ye ko David, ɓɛɛ a̧ ba a̧ nɛ́ɛ̀ e tɛ ko Obɛd-Edɔm be Gat.

¹¹Kuɓa ko GASA WAN dee fio-zɛ taar sɛn tɛ ko Obɛd-Edɔm be Gat, ɓɛɛ GASA WAN tok de yoŋgo zu Obɛd-Edɔm in o bíí nutua kɔ̧-a̧ lɛŋ.

¹²Nɛ́ mɔ'ɔ nɛ̀ wa tɛɛ tɔ̧ ha̧ wannu David ndé, GASA WAN toka de yoŋgo zu Obɛd-Edɔm in o mɔ kɔ̧-a̧ lɛŋ, wen zu kuɓa ko Sɔ̧. David nɛa tɛ ko Obɛd-Edɔm, ɓɛɛ nɛ́ɛ̀ ba kuɓa ko Sɔ̧ piinɛ pii tɛ kɔ‘i nɛ tortɛ.

¹³Kà o wi-ba-kuɓa ko GASA WAN hu̧i̧ naŋ mɔɔrɔ-ɗoŋ-kpɔk, ɓɛɛ David gbɛɛ wiwii ndai kpɔk in ŋmaŋa be ndai kpɔk ɗafi nɛ sɔ̧.

¹⁴David yɔ kɔ‘i nɛ yɔyɛ nɛ̀ ŋgai-tɛ lɛŋ zik nɛnɛ ti GASA WAN; a̧ pii so nɛ yɛ́m-yɛ́m laa-ɗafi-sɔ̧ nɛ‘i sa'e Efod tɛ-a.

¹⁵David in o be Israɛl lɛŋ gɔɔ kuɓa ko GASA WAN sinɛ gai nɛ̀ mɔ, dɔm nɛ̀ o zak.

¹⁶Ɓɛɛ hee mɔ'ɔ nɛ kuɓa ko GASA WAN ye nɛ saaye ko David ga, Mikal, boko-bem ko Saul, kóò ko David zɔka mɔ nɛ̀ woi-tua. A̧ zɔka wannu David nɛ kpíɗí zik nɛnɛ ti GASA WAN, ɓɛɛ a̧ ba a̧ e tɛ geemɔ.

¹⁷Wa baa kuɓa ko GASA WAN ye nɛ̀ tua, ɓɛɛ wa e a̧ sɛn fara kɔ̧-a̧ nɛ̀ David ɗafa so nɛti sɛn see tua. David dɔɔ kpoo-sɔ̧ in a̧ ɗafa sɔ̧ wen kpaa ga̧a̧mɔ mbɛt.

¹⁸Ŋgimbi nɛ David kaɗa dɔɔ kpoo-sɔ̧ in ɗafa sɔ̧ wen kpaa ga̧a̧mɔ kaɗi, a̧ toka de yoŋgo zu o bíí lɛŋ nɛ̀ nin GASA WAN Sɔ̧ ko o gíí wi-biro.

¹⁹A̧ kɛ̧ɛ̧ nyɔŋmɔ ha̧ o bíí lɛŋ, ha̧ o gíí be Israɛl lɛŋ, ha̧ o wiwii in o okoo; a̧ kɛ̧ɛ̧ brɛt, makala waya te-mbɔra in makala kora waya-nyak-dɔ̧ɔ̧ dam bíí kpɔk kpɔk, ɓɛɛ kóó o ndé si ɗoŋ tɛ kɔ‘i.

²⁰Hee mɔ'ɔ nɛ David si nɛ̀ ɗoŋ tɛ kɔ‘i wen toka de yoŋgo zu o bíí nutua kɔ‘i ga, Mikal boko-bem ko Saul wee ti a̧ tɛnɛ, ɓɛɛ tɔ̧: «Ɛ̧ɛ̧ tortɛ nɛ̀ pi̧ wannu sɔsɔɔ'ɛ, ho! Mɛ̀ nɛ́ wannu a̧ nɛ́ nɔ̀ nɛ̀ géé zaŋ ti o kó-de-tom ko o ŋgaiwi kɔ̧-a̧, hee mɛ̀ nɛ́ ŋma géé bíí a̧ de mɔ ga’ɛ nde?»

²¹Nɛ́ mɔ'ɔ nɛ̀ David kifa nú ha̧ Mikal: «Mi yɔ yɔyɛ ti GASA WAN, nɛ̀ hoka'm e dáà kɔ-mɛ in o bíí nutua kɔ‘i lɛŋ duk, mɛ́ ba'm e nɛ̀ wan zu Israɛl dukbíí kɔ‘i. Mi tɛ yɔ yɔyɛ ti GASA WAN.

²²War kɔ‘m nɛ̀ tɛ‘m, mi tɛ duk si ɗɔɔ gan kuti-a, mi tɛ de ko nɛ̀ tɛ‘m mbɛt; ɓɛɛ nɛ̀ war ko o kó-de-tom nɛ̀ mɛ tɔ̧ nɛnɛ‘i, wa tɛ tu̧ tɛ‘m.»

²³Ɗoŋ wese'i, Mikal bem ko Saul yara kànà nɛ ndɔra hegɔ kpa fe nɛnɛ.