Read Northwest Gbaya 2 SAMUƐL 7 Bible Online

2 SAMUƐL 7 - Northwest Gbaya bible

2 SAMUƐL 7

¹Kinii, David duk kɔ̧ tua kɔ‘i nɛ desee; GASA WAN gboo a̧ yinɛ er o wisɛn kɔ̧-a̧ nɛ̀ yaa so zik a̧ lɛŋ.

²Wannu tɔ̧ɔ̧ ha̧ Nataŋ, wi-tɔ̧-wen oi nú Sɔ̧: «Mɛ̀ zɔ̀k, mi ɔ kɔ‘m kɔ̧ tua nɛ‘i dee nɛ te gbatui, ɓɛɛ kuɓa ko GASA WAN duk kɔ‘i kɔ̧ tua nɛ‘i dee nɛ̀ laa.»

³Nataŋ tɔ̧ɔ̧ ha̧ wannu: «Mɔ lɛŋ n’ɛnɛ ta mɛ de, ɛ̀nɛ̀ dé nɛ́ dea-a, wen GASA WAN a̧a̧ in'nɛ̀ɛ́.»

⁴Mɛ zɛ‘i, GASA WAN tɔ̧ɔ̧ wen ha̧ Nataŋ hee mɔ'ɔ ga:

⁵«Mɛ̀ nɛ́ɛ̀ tɔ̧ wen’ɛ ha̧ wi-de-tom kɔ‘m David: ‹Nɛ́ GASA WAN a̧ tɔ̧ wen’ɛ. Bo nɛ mɛ a̧ tɛ de Tua ha̧‘m sɛka'm ɔɔ kɔ̧ a̧ na.

⁶N'am gboo nɛ̀ o be Israɛl nú Egiptɛ, mi tɛ ɔ kɔ̧ Tua na hɔ kinii. Fara-duk kɔ‘m nɛ́ tua-laa.

⁷Zɛ ɔ dɔka n'am yar nɛnɛ in o be Israɛl lɛŋ, mɛ zia'e, mi tɔ̧ɔ̧ ŋma wese ha̧ o gasawi n'am hoka mɛ dai Israɛl dukbíí kɔ‘m ndé, wen ge sa wa de Tua nɛ̀ te gbatui ha̧‘m na ge, nde?›

⁸«Kinii, mɛ̀ tɔ̧́ hegɔ ha̧ wi-de-tom kɔ‘m David: ‹Tɔ̧ɔ̧-wen ko GASA WAN Sɔ̧ ko o gii wi-biro nɛ mɔ'ɔ: Nɛ́ mi'i baa mɛ nɛ̀ poo zɔ̧ ɗoŋ o mɔ-dai ha̧ mɛ mɛ ɔ wan zu Israɛl dukbíí kɔ‘m.

⁹Mi duka in mɛɛ fara lɛŋ nɛ mɛ nɛɛ sɛnɛ. Mi gbɛɛ o wisɛn kɔ-mɛ yinɛ ti mɛ lɛŋ. Mi tɛ de ha̧ nin-mɛ mɛ hur hee mɔ'ɔ nɛ nin o gasawi hur nɛnɛ zaŋnu’ɛ ga.

¹⁰Mi tɛ ha̧ ŋma fara ha̧ Israɛl dukbíí kɔ‘m; mi tɛ e wa fara'i, ɓɛɛ wa tɛ ya hi̧i̧, tɛ-wa beka nak ɓɔna, ɓɛɛ o wi-gbɛ-zu beka de ŋgamɔ in wa hee nɛti,

¹¹ŋgimbi n'am ee nɛ o wi-gɔn-kita zu wa ga ɓɔna. Mi tɛ de ha̧ ga̧a̧mɔ mɛ duk tɛ kɔ-mɛ fo nɛ̀ o wisɛn kɔ-mɛ nyɛi̧ nɛ̀ mɛ. GASA WAN tɔ̧ɔ̧ ha̧ mɛ ndé, wi tɛ ha̧ o bezaŋ ha̧ mɛ.

¹²Ɓɛɛ ŋgimbi nɛ wese kɔ-mɛ tɛ dam ha̧ mɛ mɛ si kpa o dáà kɔ-mɛ, mi tɛ ba bezaŋ-mɛ nɛ̀ tɛ gbo nɛ̀ tɛ-mɛ e ŋgɔn oi mɛ, ɓɛɛ wan kɔ̧-a̧ tɛ yor nɛ̀ nɔa-a.

¹³Mɛ̀ nɛ́ a̧ a̧ tɛ de Tua ha̧‘m; ɓɛɛ mi tɛ de ha̧ damti kɔ̧-a̧ mɛ yor nɛ̀ ŋgaya-a ɓɔnsɛnɛ.

¹⁴Mi tɛ duk nɛ́ dáà kɔ̧-a̧, ɓɛɛ a̧ duka nɛ́ bem kɔ‘m. Kà a̧ nɛ́ dee ŋma ɗaŋmɔ, mi tɛ usi bɔnɛ oi-aa ha̧ a̧, hee mɔ'ɔ nɛ̀ dáa-wan-bem usi nɛ bɔnɛ-oi-ɗaŋmɔ ha̧ bem’ɛ ga.

¹⁵Mɔ kpɔk, mi beka e a̧ duk hee mɔ'ɔ n'am ee nɛ̀ Saul duk, fo nɛ̀ a̧ yinɛ ti mɛ ga na.

¹⁶Nutua kɔ-mɛ in wan kɔ-mɛ tɛ duk ti'm hegɔ ɓɔnsɛnɛ, ɓɛɛ wan kɔ-mɛ tɛ duk nɛ̀ nɔa-a hegɔ kpoo nɛ kpoo.› »

¹⁷Nataŋ tɔ̧ɔ̧ wen ha̧ David nyɛm nɛ ɗoŋ o mɔ n'aa zia tɛ hɔɔ-zu'i.

¹⁸Wannu David tɛɛ duk nù ti GASA WAN kɔ̧ sa̧a̧ tua-laa, ɓɛɛ ak mɔ: «Gasa Wan, Sɔ̧, mi nɛ́ o? Mi nɛ́ bíí nutua ko o, k’ɛ́nɛ́ ba nɛ‘m e fara’ɛ o?

¹⁹Zu-a'i, mɔ‘i duka nɛ geɗek mɔ yí‘nɛ́ Gasa Wan Sɔ̧. Ɛnɛ ha̧a̧ nú zu o bezaŋ wi-de-tom k’ɛ́nɛ́ nɛti ɓeemɛ. Zu-a'i woyo, ɛnɛ mbaŋa tɛ‘m tɛ mɔ‘i, mi nɛ̀ dúk nɛ́ géé bíí géè.

²⁰Mɛ̀ nɛ́ ge wen ge a̧ David tɛ tɔ̧ h’ɛ́nɛ́, n’ɛnɛ iŋa wi-de-tom k’ɛ́nɛ́'ɛ ge, Gasa Wan Sɔ̧?

²¹Mɛ̀ nɛ́ wen wen k’ɛ́nɛ́, nyɛm nɛ ɗoŋ taamɔ k’ɛ́nɛ́, ɛnɛ dee nɛ̀ gasa tom’ɛ lɛŋ, usi nɛnɛ ha̧ wi-de-tom k’ɛ́nɛ́.

²²Gasa Wan Sɔ̧, ɛ́nɛ́ ɔ gasa, ŋma wi nɛ nyɛma ŋmaa in'nɛ̀ɛ́ bo na; ŋma sɔ̧ gan'nɛ bo na, kànà nɛ́ ɛ́nɛ́ hee mɔ'ɔ n’ɛɛ zia nɛ̀ zer yɛ ga ɓɛɛ.

²³Ŋma dukbíí zu nù'ɛ nɛ nyɛma ŋmaa in dukbíí k’ɛ́nɛ́ Israɛl n’ɛnɛ gɔna zu-a e nɛ̀ k’ɛ́nɛ́, ha̧ nɛ̀ nin ha̧ a̧, de nɛ̀ gasa tom’ɛ, de nɛ̀ gasa mɔɔ-kíì wen nù k’ɛ́nɛ́, bo na. Ŋma dukbíí nɛ hɔɔ ŋmaa in dukbíí k’ɛ́nɛ́ n’ɛnɛ gɔna zu-a sɛn Egiptɛ, ndak nɛ̀ ŋma o dukbíí in o géé-sɔ̧ kɔ-wa yinɛ ti wa, bo na.

²⁴Ɛnɛ ɗafa Israɛl e nɛ́ dukbíí k’ɛ́nɛ́ kpoo nɛ kpoo, ɓɛɛ k’ɛ́nɛ́ GASA WAN, ɛnɛ kifa duk nɛ́ Sɔ̧ kɔ-wa.

²⁵«Kinii, Gasa Wan Sɔ̧, ɛ̀nɛ̀ kásí wen n’ɛnɛ tɔ̧a̧ zu wi-de-tom k’ɛ́nɛ́ in o bíí nutua kɔ̧-a̧ ɓɔnsɛnɛ hee mɔ'ɔ n’ɛnɛ tɔ̧ɔ̧ ga;

²⁶hegɔ nin'nɛ́ tɛ hur ɓɔnsɛnɛ, ɓɛɛ o bíí tɛ tɔ̧: ‹GASA WAN ko o gíí wi-biro nɛ́ Sɔ̧ ko Israɛl.› Tua ko wi-de-tom k’ɛ́nɛ́ David a̧ yór nɛ nɔa-a sɛn ti'nɛ́.

²⁷Wen mɛ̀ nɛ́ ɛnɛ, GASA WAN ko o gíí wi-biro, Sɔ̧ ko Israɛl a̧ ha̧a̧ nú ha̧ wi-de-tom k’ɛ́nɛ́‘e, wi tɛ ha̧ o bezaŋ ha̧ wi-de-tom k’ɛ́nɛ́ mɛ duk oi-aa. Mɛ̀ nɛ́ mɔ‘i a̧ wi-de-tom k’ɛ́nɛ́ kpaa nɛ̀ nɔɔ-ŋgiɗi mɛ kɔfi mɔ in'nɛ̀ɛ́.

²⁸«Ɓɛɛ kinii, Gasa Wan Sɔ̧, ɛ́nɛ́ nɛ́ Sɔ̧. O wen k’ɛ́nɛ́ lɛŋ nɛ́ kpasawen, ɓɛɛ ɛ́nɛ́ tɔ̧ɔ̧ wen gasa demɔ'ɛ ha̧ wi-de-tom k’ɛ́nɛ́.

²⁹Kinii, ɛ̀nɛ̀ tók de yoŋgo zu o bíí nutua ko wi-de-tom k’ɛ́nɛ́, ha̧ a̧ mɛ duk yí‘nɛ́ ɓɔnsɛnɛ, wen kà bó nɛ́ ɛ́nɛ́, Gasa Wan Sɔ̧ a̧ tɔ̧ wen, ɓɛɛ o bezaŋ wi-de-tom k’ɛ́nɛ́ tɛ kpa toka-de-yoŋgo k’ɛ́nɛ́ ɓɔnsɛnɛ.»