Read Northwest Gbaya 2 SAMUƐL 8 Bible Online

2 SAMUƐL 8 - Northwest Gbaya bible

2 SAMUƐL 8

¹Ɗoŋ mɔ‘i, David bìì o be Filistii, ɓɛɛ ɔ wan zu wa. A̧ foo o mɔɔ-wan er o gasawi nɛ duka so zu nù kɔ-wa yinɛ.

²A̧ bìì o be Mɔab, ɓɛɛ a̧ kai wa gu nù. A̧ kɛ̧ɛ̧ wa tɛ dùk-aa taar, ɓɛɛ a̧ kum o ɛ̧ɛ̧ nɔ'ɔ yiitoo’ɛ. Nɛ́ mɔ'ɔ nɛ̀ o be Mɔab yaa ɗɔɔ ŋgai kɔ̧-a̧, ɓɛɛ wa duk gbo nɛ̀ garama ha̧ a̧.

³David bìí Hadadɛzɛr bem ko Rehob wannu Soba, ŋgimbi nɛ Hadadɛzɛr nɛɛ so mɛ ba nɛ nana-yì Efrat pii ɗoŋ e tɛ nù kɔ̧-a̧.

⁴Ɓɛɛ David kai o wi-daŋ-nyaŋa kɔ̧-a̧ booro-nɛ-gɔmŋmaa mɔɔrɔ-ɗoŋ-yiitoo in o wi-nɛ-biro nɛ̀ naŋ tɛ booro-ɓu-yiitoo. A̧ ɓira ɗaɗi-naŋ o nyaŋa lɛŋ e oi nyaŋa nyɛm nɛ̀ keekee gɔmŋmaa ɓɛɛ.

⁵O be Aram nɛ ya Damas tɛɛ gbak Hadadɛzɛr wannu Soba, ɓɛɛ David gbɛ o bíí booro-ɓu-yiitoo-zua-yiitoo mgbara wa.

⁶David aa o gasawi dam Aram nú Damas, ɓɛɛ o be Aram ya ɗɔɔ ŋgai ko David, gbo nɛ̀ garama ha̧ a̧. GASA WAN dee ha̧ David mɛ gbin biro fara lɛŋ n'aa nɛ.

⁷David kaia o ŋgee ko o wi-biro ko Hadadɛzɛr nɛ wa dee nɛ̀ lɔr piinɛ Jerusalɛm.

⁸Wannu David kaia ndɛrɛ nɛ̀ dɔka-a sɛn Bɛta in Bɛrotai, o ye ko Hadadɛzɛr.

⁹Toi, wannu Hamat zia'e David bìì o wi-biro ko Hadadɛzɛr lɛŋ,

¹⁰nɛ́ mɔ'ɔ n'aa toma bem kɔ̧-a̧ Yoram nɛ̀ haya-a sitɛ wannu David, mɛ fan a̧, zɔn nɛ̀ a̧ wen n'aa bìí biro in Hadadɛzɛr, ɓɛɛ a̧ gan a̧, wen Hadadɛzɛr duka so nɛ́ wisɛn ko Toi. Yoram kaia nɛ́ o mɔ nɛ‘i dee nɛ̀ bu-mbɔi, lɔr in ndɛrɛ nɛnɛ ha̧ wannu David.

¹¹Wannu David ee o mɔɔ nɔ‘i ha̧ GASA WAN e zu bu-mbɔi in lɔr n'aa kaia so nɛti er o dukbíí n'aa bìì so.

¹²A̧ kaia so o mɔɔ nɔ‘i er o be Aram, o be Mɔab, o be Amɔŋ, o be Filistii in o be Amalɛk gu nɛ̀ o mɔ n'aa kaia so er Hadadɛzɛr bem ko Rehob wannu Soba.

¹³Nin David hura siti ŋgimbi n'aa pia nɛ ɗoŋ tɛ bíí o be Aram mgbara ɗɔŋgɔ Tɔŋ. Bíí n'aa gbɛɛ lɛŋ nɛ́ booro-ɓu-zua-mɔɔrɔ-ɗoŋ-taar.

¹⁴A̧ aa o gasawi kɔ̧-a̧ dam nú Edɔm lɛŋ, ɓɛɛ o be Edɔm lɛŋ ya ɗɔɔ ŋgai kɔ̧-a̧. Fara nɛ̀ David nɛ́ lɛŋ, GASA WAN dee ha̧ a̧ mɛ gbin biro.

¹⁵David ɔɔ wan zu nú Israɛl lɛŋ de nɛ̀ mɔ nɛ̀ yuwar-a in nɛ̀ de-a ha̧ bíí nù kɔ̧-a̧ lɛŋ.

¹⁶Jɔab bem ko Sɛruya duka zu o wi-biro; Yehosafat bem ko Ahilud duka nɛ́ wan-kalata.

¹⁷Sadɔk bem ko Ahitub in Ahimɛlɛk bem ko Abiatar yaa so nɛ́ o wi-ɗafi-sɔ̧; Sɛraya nɛ́ wi-yɔr-mɔ,

¹⁸Bɛnaya bem ko Yehoyada ɔɔ wan zu o be Kɛrɛt in o be Pɛlɛt. O bem ko David yaa so nɛ́ o wi-ɗafi-sɔ̧.