Read Northwest Gbaya 2 SAMUƐL 9 Bible Online

2 SAMUƐL 9 - Northwest Gbaya bible

2 SAMUƐL 9

¹David aka mɔ: «Ŋma bíí ko Saul kpɔk nɛ̀ duk kpasa a̧a̧ sɛnɛ ha̧‘m mɛ de mɔ in a̧ nɛ̀ de-a wen zu Jɔnataŋ nde?»

²Ɓɛɛ ŋma wi-de-tom nutua ko Saul a̧a̧ so sɛnɛ, nin-a nɛ́ Siba. Wa saa a̧ tɛnɛ ha̧ David, ɓɛɛ a̧ ak a̧: «Mɛ́ nɛ́ Siba nde?» Siba kifa nú: «Wi-de-tom k’ɛ́nɛ́ nɛ́ mɔ'ɔ.»

³Wannu aka a̧: «Ŋma bíí nutua ko Saul, kóó kpɔk bo ha̧‘m mɛ de demɔ in a̧ nɛ̀ war ko Sɔ̧ na nde?» Siba kifa nú ha̧ wannu: «Ŋma bem ko Jɔnataŋ a̧a̧ sɛnɛ nɛ̀ ku yiitoo mɔka mɔk.»

⁴Wannu aka a̧: «Wi’ɛi a̧a̧ déè?» Siba kifa nú ha̧ a̧: «A̧ a̧a̧ tɛ ko Makir, bem ko Amiɛl, sɛn nú Lo-Dabar.»

⁵Wannu David toma Siba ha̧ a̧ mɛ nɛ̀ɛ́ mgbɔ wi’ɛi sɛn tɛ ko Makir bem ko Amiɛl sɛn Lo-Dabar tɛnɛ.

⁶Nɛ́ mɔ'ɔ nɛ̀ Mɛfibosɛt bem ko Jɔnataŋ, be-koo Saul hɔɔ ti David. A̧ tika nù gu yí-a nɛ nù. David saa mɔ: «Mɛfibosɛt!» Mɛfibosɛt kɔ̧ɔ̧ sara: «Wi-de-tom k’ɛ́nɛ́ nɛ́ mɔ'ɔ.»

⁷David tɔ̧ɔ̧ ha̧ a̧: «Ká mɛ́ de kíì na; mi saa mɛ wen ha̧‘m mɛ de demɔ in mɛɛ wen zu dáà kɔ-mɛ Jɔnataŋ. Mi tɛ ha̧ nù ko zɔmdáa kɔ-mɛ Saul siɗoŋ ha̧ mɛ lɛŋ, ɓɛɛ mɛ tɛ nyɔŋ mɔ in am kpɔk.»

⁸Mɛfibosɛt guu nù, ɓɛɛ tɔ̧: «Wi-de-tom k’ɛ́nɛ́ nɛ́ o s’ɛnɛ tɛ zɔk mɔ sitɛ géé wɔr-toyo hee mi ga o?»

⁹Wannu saa Siba wi-de-tom ko Saul, ɓɛɛ tɔ̧ ha̧ a̧: «Mɔ lɛŋ nɛ duka so nɛ́ ko Saul in o bíí nutua kɔ̧-a̧ lɛŋ, mi ha̧a̧ ha̧ bem ko wan kɔ-mɛ.

¹⁰Mɛ tɛ de tom-nyɔnɔ ha̧ a̧, mɛ, bem kɔ-mɛ in o wi-de-tom kɔ-mɛ. Mɛ tɛ mɔi̧ nyɔnɔ tɛnɛ dai nɛ̀ bem ko wan kɔ-mɛ. Ɓɛɛ Mɛfibosɛt bem ko wan kɔ-mɛ tɛ nyɔŋ mɔ kpɔk in am.» Siba a̧a̧ so nɛ̀ bem ɓu-zua-mɔɔrɔ in o wi-de-tom ɓu-yiitoo.

¹¹Nɛ́ mɔ'ɔ nɛ̀ Siba tɔ̧ɔ̧ ha̧ wannu: «Wi-de-tom k’ɛ́nɛ́ tɛ de mɔ nyɛm nɛ̀ ɗoŋ mɔ lɛŋ nɛ̀ nyaa wannu tɛ ha̧ nú sɛnɛ.» Ɓɛɛ Mɛfibosɛt duk nyɔŋ nɛ mɔ kpɔk fara in wannu hee ŋma bem kɔ̧-a̧ ga.

¹²Mɛfibosɛt a̧a̧ so nɛ̀ ŋma be-wiwii, nin-a nɛ́ Mika, ɓɛɛ o bíí lɛŋ nɛ̀ ya so tɛ ko Siba de so nɛ tom ha̧ Mɛfibosɛt.

¹³Mɛfibosɛt ɔ so kɔ‘i sɛn Jerusalɛm, wen a̧ duka so nyɔŋ mɔ kpɔk in wannu. Ku-a yiitoo mɔka mɔk.