Read Northwest Gbaya 1 WANNU 1 Bible Online

1 WANNU 1 - Northwest Gbaya bible

1 WANNU 1

¹Wannu David sɔka kaɗi, pɛ-a dɔka so nyɛmna. Kà‘i kpe laa nɛ̀ tɛ-a, ɓɛɛ tɛ-a ba wee na.

²O wi-de-tom kɔ̧-a̧ tɔ̧ɔ̧ ha̧ a̧: «Wi tɛ kii ŋma be-zɔŋa nɛ tɛ iŋ tɛ na ha̧ nyaa wannu k’ɛɛ, wen dee tom ha̧ a̧ hee kóò kɔ̧-a̧ ga. A̧ tɛ kpe gɛ̧ɛ̧ ha̧ wannu, ɓɛɛ tɛ nyaa wannu baa wee.»

³Nɛ́ mɔ'ɔ nɛ̀ wa kia ŋma de be-zɔŋa nú Israɛl lɛŋ; wa kpaa Abisak, ŋma boko-be Sunɛm, ɓɛɛ wa mgbɔ a̧ tɛnɛ ha̧ wannu.

⁴Boko-bem’ɛi yora so zɔŋa nyɛmna; a̧ duka hee kóò ko wannu ga, de nɛ tom ha̧ a̧. Mɔ kpɔk, wannu duk in a̧ na.

⁵Adonias, bem ko David in Hagit, taa so kɔ‘i nɛ́ wi a̧ tɛ ba wan, ɓɛɛ tɔ̧: «Nɛ́ mi a̧ tɛ ɔ wan.» A̧ baa keekee-biro kpɔk, o nyaŋa in bíí ɓu-mɔɔrɔ mɛ nɛ in a̧.

⁶Ku̧u̧naŋ-a n'aa duka nɛ̀ bem gasi nɛnɛ, dáà kɔ̧-a̧ gai a̧ ndé, «Mɛ de mɔ hegɔ wen ge nde?» na. In mbɛt a̧ yora so ŋgaiwi nyɛmna, ɓɛɛ nɛ́ a̧ a̧ gboo ɗoŋ Absalɔm.

⁷A̧ ee nú in Jɔab bem ko Sɛruya in wi-ɗafi-sɔ̧ Abiatar, ɓɛɛ wa ye ɗoŋ-aa;

⁸ɓɛɛ nɛ̀ ko wi-ɗafi-sɔ̧ Sadɔk, in Bɛnaya bem ko Yehoyada, in wi-tɔ̧-wen oi nú Sɔ̧ Nataŋ, in Simɛi, in Rɛi, ká bá nɛ̀ o ŋgaŋa wi-biro ko David, wa yor so kɔ-wa ɗoŋ Adonias na.

⁹Adonias ɗafa sɔ̧ nɛ̀ o sami, o ndai in o ŋmaŋa be ndai sɛn ká̧ gasa ta ko Zohɛlɛt zu-zer Ɛn-Rogɛl, ɓɛɛ a̧ sa o bem ko wannu, o nya-a̧ lɛŋ, in o be Juda lɛŋ nɛ de tom ha̧ wannu.

¹⁰Ɓɛɛ o wi n'aa sa na, nɛ́ Nataŋ wi-tɔ̧-wen oi nú Sɔ̧, Bɛnaya, o ŋgaŋa wi-biro in nya a̧ Salomɔŋ.

¹¹Nɛ́ mɔ'ɔ nɛ̀ Nataŋ tɔ̧ɔ̧ ha̧ Bɛtsabee, nàà ko Salomɔŋ ndé: «Mɛ zii kɔ-mɛ‘e Adonias, bem ko Hagit baa wan, ɓɛɛ wannu David iŋ na, na nde?

¹²Kinii, mɛ̀ zíí mbɔrɔ n'am tɛ tɔ̧ ha̧ mɛ. Mɛ̀ kpásí kiitɛ-mɛ in bem kɔ-mɛ Salomɔŋ.

¹³Mɛ̀ nɛ́ mɛ̀ yé tɛ ko wannu David, a̧ mɛ̀ tɔ̧́ ha̧ a̧‘e: ‹Bo nɛ nyaa wannu kànà so mɔ ha̧ kó-de-tom kɔ‘i'e, bem kɔ̧-a̧ Salomɔŋ tɛ ɔ wan oi-wi, ɓɛɛ a̧ duka nù zu damti kɔ‘i na nde? Wen ge sa Adonias baa wan ge?›

¹⁴Ŋgimbi nɛ mɛ tɛ ɓɔn tɛ tɔ̧ɔ̧ wen in wannu, mi tɛ ye tua, ɓɛɛ mi yora ɗoŋ wen nɛ mɛ tɛ tɔ̧‘i.»

¹⁵Bɛtsabee yee tɛ ko wannu si fara-ɔ kɔ̧-a̧. Wannu sɔka so nyɛmna, ɓɛɛ Abisak boko-be Sunɛm de so nɛ tom ha̧ a̧.

¹⁶Bɛtsabee guu nù, gbɛ zugur nù ti wannu, ɓɛɛ wannu ak mɔ: «Nɛ́ ge a̧ mɛ kɔ̧ɔ̧ ge?»

¹⁷Bɛtsabee kifa nú ha̧ a̧: «Nyaa, bo nɛ ɛnɛ kànà so mɔ ha̧ kó-de-tom k’ɛ́nɛ́ nɛ nin GASA WAN Sɔ̧ k’ɛ́nɛ́‘e: bem kɔ‘m Salomɔŋ tɛ ɔ wan oi'nɛ́, ɓɛɛ a̧ tɛ daŋ zu damti oi'nɛ́ na nde?

¹⁸Ɓɛɛ kinii nɛ́ Adonias a̧ ɔɔ wan oi'nɛ́, ɓɛɛ nyaa wannu iŋ kɔ‘i na!

¹⁹A̧ ɗafa sɔ̧ nɛ̀ o wiwii ndai, o ŋmaŋa be ndai in o sami nɛ̀ dɔka-a; a̧ saa o bem ko wannu lɛŋ, wi-ɗafi-sɔ̧ Abiatar in gasa wi-biro Jɔab; ɓɛɛ a̧ sa wi-de-tom k’ɛ́nɛ́ Salomɔŋ na.

²⁰War k’ɛ́nɛ́ nyaa wannu, gbaayí o be Israɛl lɛŋ zɔk nɛ mɔ sitɛ‘nɛ́; wa pɛm nɛ mɔ h’ɛ́nɛ́ mɛ usi mgbák bíí nɛ tɛ ba fara oi'nɛ́, mɛ duk zu damti oi nyaa wannu.

²¹Kà bo hegɔ na, ŋgimbi nɛ wannu tɛ si ɗoŋ kpa o dáà kɔ‘i, wa tɛ usi bɔnɛ ha̧‘m in bem kɔ‘m Salomɔŋ hee ŋma wen a̧a̧ so zu yɛ ga.»

²²A̧ biti tɔ̧ɔ̧ wen'i ha̧ wannu, ɓɛɛ Nataŋ wi-tɔ̧-wen oi nú Sɔ̧ ye tua.

²³Wa tɔ̧ɔ̧ ha̧ wannu'e: «Nataŋ wi-tɔ̧-wen oi nú Sɔ̧ hɔa.» A̧ tɛɛ pii tɛ wannu, ɓɛɛ a̧ gbɛ zugur nù ba yí-a gu nù,

²⁴ɓɛɛ a̧ tɔ̧: «Nyaa wannu, nɛ́ ɛ́nɛ́ a̧ ha̧a̧ nú‘e, Adonias a̧ ɔ wan oi'nɛ́, ɓɛɛ a̧ duka zu damti oi'nɛ́ nde?

²⁵Wen a̧ zira sɔsɔɔ si zu-zer Ɛn-Rogɛl; a̧ ɗafa sɔ̧ nɛ̀ o wiwii ndai in o ŋmaŋa be ndai gú nɛ̀ o sami nɛ dɔka-a. A̧ saa o bem ko wannu lɛŋ, o gasa wi-biro in wi-ɗafi-sɔ̧ Abiatar. Kinii wa nyɔŋ nɛ mɔ, nɔ nɛ mɔ hiɗi nɛ mɔ‘e: ‹Nyaa Adonias, wannu kànà nɛ́ ɛ́nɛ́ ɓɛɛ!›

²⁶Ɓɛɛ kɔ‘m wi-de-tom k’ɛ́nɛ́ in wi-ɗafi-sɔ̧ Sadɔk, in Bɛnaya bem ko Yehoyada, ká bá nɛ̀ wi-de-tom k’ɛ́nɛ́ Salomɔŋ, a̧ sa yɛ na.

²⁷Nɛ́ nyaa wannu a̧ ha̧a̧ nú ha̧ wa mɛ de mɔ‘i hegɔ nde? Hɔ kinii, ɛnɛ tɛ usi mgbák wi nɛ tɛ duk oi'nɛ́ ha̧ wi-de-tom k’ɛ́nɛ́ hɔ̧ɔ̧ na.»

²⁸Wannu David kifa nú: «Ɛ̀nɛ̀ sá Bɛtsabee ha̧‘m.» Bɛtsabee yee tua pii tɛ wannu;

²⁹ɓɛɛ wannu kan mɔ hee mɔ'ɔ ga: «Hee mɔ'ɔ nɛ GASA WAN duk kpasa in n'aa kpasa'm tɛ bɔnɛ lɛŋ ga,

³⁰ɓɛɛ hee mɔ'ɔ n'am kànà so mɔ nɛ̀ nin GASA WAN Sɔ̧ ko Israɛl ndé: ‹Bem kɔ-mɛ Salomɔŋ tɛ ɔ wan oi-am, a̧ tɛ duk nù zu damti oi-am› ga, mi tɛ de mɔ‘i sɔsɔɔ.»

³¹Bɛtsabee baa yí gu nù ti wannu, ɓɛɛ tɔ̧: «Nyaa wannu David a̧ dúk ɓɔnsɛnɛ!»

³²Wannu David tɔ̧a̧: «Ɛ̀nɛ̀ sá wi-ɗafi-sɔ̧ Sadɔk in Nataŋ wi-tɔ̧-wen oi nú Sɔ̧ ká bá nɛ̀ Bɛnaya bem ko Yehoyada ha̧‘m.» Wa hɔa ti wannu,

³³ɓɛɛ wannu David tɔ̧ ha̧ wa: «Ɛ̀nɛ̀ káí o wi-de-tom ko wan k’ɛ́nɛ́, ɛ̀nɛ̀ bá bem kɔ‘m Salomɔŋ e zu sunda kɔ‘m, ɓɛɛ ɛ̀nɛ̀ mgbɔ́ a̧ si nú yí Gihɔŋ.

³⁴Nɛ́ hi̧i̧ a̧ wi-ɗafi-sɔ̧ Sadɔk in wi-tɔ̧-wen oi nú Sɔ̧ Nataŋ tɛ tɛn nɔ̧́ a zu a̧ de nɛ̀ wan Israɛl ha̧ a̧; ɛnɛ tɛ dɔm zak hiɗi nɛ mɔ‘e: ‹Nyaa Salomɔŋ, wannu kànà nɛ́ ɛ́nɛ́ kpɔk ɓɛɛ!›

³⁵Ɛnɛ tɛ pii ɗoŋ in a̧ ha̧ a̧ mɛ daŋ zu damti kɔ‘m, wen ɔɔ wan oi-am, wen mɛ̀ nɛ́ a̧ a̧‘m hoka wen ɔɔ wan zu Israɛl in Juda.»

³⁶Bɛnaya bem ko Yehoyada kifa nú ha̧ wannu hee mɔ'ɔ ga: «Mɔ'ɔ dé hegɔ! Nɛ́ GASA WAN Sɔ̧ ko nyaa wannu a̧ tɔ̧a̧ wen'i.

³⁷GASA WAN tɛ duk in Salomɔŋ hee mɔ'ɔ n'aa duka nɛnɛ in nyaa wannu ga, ɓɛɛ a̧ a̧ bá damti ko Salomɔŋ nɛ tɛ de'i e ŋgɔn gan ko nyaa wannu David!»

³⁸Wi-ɗafi-sɔ̧ Sadɔk in wi-tɔ̧-wen oi nú Sɔ̧ Nataŋ, Bɛnaya bem ko Yehoyada in o be Kɛrɛt ká bá nɛ̀ o be Pɛlɛt zira nɛnɛ, wa baa Salomɔŋ e zu sunda ko wannu David, ɓɛɛ wa mgbɔ a̧ nɛnɛ si nú yí Gihɔŋ.

³⁹Wi-ɗafi-sɔ̧ Sadɔk yee si fara-duk ko GASA WAN, ba dak nɔ̧́ tɛn a zu Salomɔŋ, de nɛ̀ wan ha̧ a̧. Wa dɔma zak, ɓɛɛ o bíí lɛŋ gai mɔ: «Nyaa Salomɔŋ, wannu kànà nɛ́ ɛ́nɛ́ kpɔk ɓɛɛ!»

⁴⁰Dukbíí nɛ̀ oi-aa lɛŋ daŋa si ɗoŋ, dɔm nɛ̀ mɔ, yɔ nɛ̀ yɔyɛ, de nɛ̀ nyɛŋɛ, ɓɛɛ nù nak tɛ o giti mɔ nɛ wa de'i.

⁴¹Adonias in o wi n'aa saa zia gasa gitimɔ ŋgimbi nɛ wa kaɗa nɛ̀ nyɔŋa mɔ. Jɔab zia giti zak, ɓɛɛ ak mɔ: «Ɛ̧ɛ̧ nɛ́ giti ge mɔ ge saaye’ɛ ge?»

⁴²Jɔab ɓɔna tɛ tɔ̧ɔ̧ wen'i, ɓɛɛ Yɔnataŋ bem ko wi-ɗafi-sɔ̧ Abiatar hɔ; Adonias tɔ̧ɔ̧ ha̧ a̧: «Mɛ tɛ pii ti; mɛ́ nɛ́ kpasa bíí. Mɛ̀ nɛ́ de nyɛrɛ a̧ mɛ ba tɛnɛ gɔ!»

⁴³Jonataŋ kifa nú ha̧ Adonias: «Bo nɛ de nyɛrɛ na; nyaa wannu David ee wan ha̧ Salomɔŋ kaɗi.

⁴⁴O bíí nɛ wannu toma nɛnɛ in a̧ nɛ wi-ɗafi-sɔ̧ Sadɔk, wi-tɔ̧-wen oi nú Sɔ̧ Nataŋ, Bɛnaya bem ko Yehoyada in o be Kɛrɛt ká bá nɛ̀ o be Pɛlɛt. Wa baa a̧ e zu sunda ko wannu.

⁴⁵Wi-ɗafi-sɔ̧ Sadɔk in wi-tɔ̧-wen oi nú Sɔ̧ Nataŋ tɛna nɔ̧́-wan a zu-a sɛn Gihɔŋ. Wa pia ɗoŋ nɛ̀ hi̧i̧ nɛ̀ desee, ɓɛɛ o bíí saaye de nyɛŋɛ. Nɛ́ giti mɔ‘i ɛnɛ zia'i.

⁴⁶Salomɔŋ duka nù zu damti kaɗi.

⁴⁷O gasawi saaye nɛ̀ɛ́ zɔn nyaa wannu David tɔ̧ nɛnɛ‘e ndé: ‹Sɔ̧ k’ɛ́nɛ́ a̧ dé ha̧ nin Salomɔŋ mɛ hur gan k’ɛ́nɛ́! Wan kɔ̧-a̧ a̧ gasi gan k’ɛ́nɛ́!› Nɛ́ mɔ'ɔ nɛ̀ wannu nyafa tɛ gɔn gado kɔ‘i,

⁴⁸ɓɛɛ tɔ̧: ‹Zɔnamɔ a̧ dúk nɛ ko GASA WAN Sɔ̧ ko Israɛl nɛ dee ha̧‘m mɛ zɔk wi nɛ̀ kpaia'm zu damti sɔsɔɔ.› »

⁴⁹O bíí nɛ Adonias saa so lɛŋ pɛsa sót-sót nɛ gasa kíì, kóó o ndé ba nɛ yuwar kɔ‘i.

⁵⁰Adonias dee kíí Salomɔŋ, ɓɛɛ nɛ́ɛ̀ kasi zak nɛ̀ duk zu fara-ɗafi-sɔ̧.

⁵¹Wa nɛ̀ɛ̀ tɔ̧ nyɛrɛ mɔ‘i ha̧ Salomɔŋ‘e: «Kíí wannu Salomɔŋ dee Adonias, ɓɛɛ a̧ nɛ́ɛ̀ kasi zak fara-ɗafi-sɔ̧ tɔ̧ nɛnɛ‘e wannu Salomɔŋ a̧ kan mɔ ha'i sɔsɔɔ‘e ndé, wi beka gbɛ wi-de-tom kɔ‘i nɛ̀ gba-paa na.»

⁵²Salomɔŋ kifa nú: «Kà a̧ nɛ́ dee mɔ nɛ̀ yuwar-a, kóó mui̧-zu-a kpɔk beka tik nù na. Ɓɛɛ kà a̧ nɛ́ dee ŋma be ɗaŋmɔ tikiɗi, a̧ tɛ fe.»

⁵³Wannu Salomɔŋ toma o bíí mɛ mgbɔ a̧ yinɛ fara-ɗafi-sɔ̧. Nɛ́ mɔ'ɔ n'aa tɛɛ gu nù ti wannu, ɓɛɛ wannu tɔ̧ ha̧ a̧: «Mɛ̀ sí ɗoŋ tɛ kɔ-mɛ.»