Read Northwest Gbaya 1 WANNU 10 Bible Online

1 WANNU 10 - Northwest Gbaya bible

1 WANNU 10

¹Wannu-okoo Seba zia nyɛrɛ hura nin Salomɔŋ wen zu nin GASA WAN, ɓɛɛ a̧ tɛ tɛ a̧ mɛ we a̧ nɛ̀ o sumgba.

²O bíí nɛ̀ dɔka-a nɛɛ́ in a̧ sɛn Jerusalɛm nɛ̀ o ŋgeloba nɛ̀ tui nɛ o nɔ̧́-nyama, in lɔr in o ŋma de ta nɛ̀ gɛnɛ-a ɔ ŋgaya nɛ̀ dɔka-a. A̧ tɔ̧ɔ̧ mɔ n'aa ta kɔ̧ see-aa lɛŋ ha̧ Salomɔŋ ŋgimbi n'aa hɔɔ nɛnɛ tɛ kɔ̧-a̧,

³ɓɛɛ Salomɔŋ kifi nú tɛ o akamɔ nɔ‘i lɛŋ. Ŋma ɗuka akamɔ nɛ̀ wannu kifi nú sɛnɛ na bo na.

⁴Wannu-okoo Seba zɔka iŋa-mgbara-mɔ ko Salomɔŋ, tua n'aa mboo so,

⁵nyɔŋmɔ sɛn zu fara-nyɔŋ-mɔ kɔ̧-a̧, fara-ɔɔ ko o wi-de-tom kɔ̧-a̧, de laa-pi̧i̧ ko o wi-ha̧-nyɔŋmɔ in dɔ̧ɔ̧ kɔ̧-a̧, in o kpoo-sɔ̧ n'aa dɔ kɔ̧ Tua ko GASA WAN; a̧ zɔka mɔɔ nɔ‘i, ɓɛɛ hiɗ‘a gɔn.

⁶A̧ tɔ̧ɔ̧ ha̧ wannu: «Nyɛrɛ tɔ̧ɔ̧-wen k’ɛ́nɛ́ in iŋa-mgbara-mɔ k’ɛ́nɛ́ n'am zia tɛ nù kɔ‘m mɛ‘i nɛ́ kpasawen nɛ̀ mbetɛ.

⁷Mi kɔ̧ so ɗɔɔ o wen nɔ‘i na, wen n'am tɛ so mɛ zɔk nɛ yí‘m na. Kóó be reeta-a tikiɗi, wa we so ɗoŋ-aa ha̧‘m na. Ɛnɛ gana de duka-a in iŋa-mgbara-mɔ n'am zia so nyɛrɛ-a'i.

⁸O bíí k’ɛ́nɛ́, o wi-de-tom k’ɛ́nɛ́ nɛ ya katɛ‘nɛ́ wese lɛŋ zii nɛ̀ iŋa-mgbara-mɔ k’ɛ́nɛ́, a̧a̧ nɛ̀ de sɔnti.

⁹Zɔnamɔ a̧ dúk nɛ ko GASA WAN Sɔ̧ k’ɛ́nɛ́ nɛ̀ ee'nɛ́ zu damti Israɛl; mɛ̀ nɛ́ wen nɛ̀ GASA WAN kɔ̧ɔ̧ Israɛl nyɛmna, sa a̧ e'nɛ́ nɛ̀ wannu h’ɛ́nɛ́ mɛ kɛ̧ mgbara mɔ nɛ̀ de-a in nɛ̀ yuwar-a.»

¹⁰A̧ ha̧a̧ kilo lɔr booro-taar-nɛ-reeta, o dak nɔ̧́-nyama nɛ̀ dɔka-a in o de toka-ta nɛ̀ gɛnɛ-a ɔ ŋgaya ha̧ wannu. Tɛ ŋgimbi'i hɔ sɔsɔɔ wi zɔk pɛrti dɔka dak nɔ̧́-nyama hee mɔ'ɔ nɛ̀ wannu-okoo Seba kaia tɛnɛ ha̧ Salomɔŋ ga na.

¹¹O kombon ko Hiram nɛ̀ baa so lɔr mɛ Ofir tɛnɛ‘i kaia o te-nyama[12] nɛ̀ dɔka-a in o ta nɛ̀ gɛnɛ-a ɔ ŋgaya mbɛt tɛnɛ ha̧ wannu Salomɔŋ.

¹²Wa dee mɔɔ-tɔn Tua ko GASA WAN in ko wannu nɛ̀ o ŋga te nɔ‘i. Wa sɛka koloŋ in o kunde nɛnɛ mbɛt wen o wi-bii-gima. Wi zɔk o pɛrti ŋga te nɔ‘i ɓɔna hɔ sɔsɔɔ.

¹³Wannu Salomɔŋ ha̧a̧ mɔ lɛŋ nɛ̀ okoo-wannu Seba kɔ̧ɔ̧ so ha̧ a̧; zu i̧i̧ nɔ‘i n'aa ha̧a̧‘i, see-aa e mɔ na, a̧ ha̧a̧ mbe-a woyo nɛ̀ dɔka-a e zu-a, ɓɛɛ okoo-wannu zik tɛ si ɗoŋ tɛ nù kɔ‘i in o bíí kɔ‘i.

¹⁴Tɛ pɛ kpɔk kpɔk, lɔr nɛ̀ wannu Salomɔŋ kpa nɛ́ kilo booro-ɓu-yiitoo,

¹⁵wi tɔr wan nɛ̀ o wi-nɛ-gɛnɛ, o wi-ɗɔr-mɔ, o wannu mɛ yee-wese lɛŋ ba nɛ o gasa wi-duk-zu zika-nù kai tɛnɛ na.

¹⁶Wannu Salomɔŋ nɔi̧a lɔr de nɛ̀ gasa ŋgee gɔmŋmaa-yiitoo; kpɔk ŋgee ba nɛ kilo lɔr mɔɔrɔ-ɗoŋ-kpɔk.

¹⁷A̧ dee o geɗek ŋgee gɔmŋmaa-taar; kpɔk ŋgee ba nɛ kilo lɔr yiitoo. A̧ kaia wa a kɔ̧ tua nɛ‘i sa'e Kombo-Libaŋ.

¹⁸Wannu dee gasa damti gba̧a̧-nin-fɔrɔ, ɓɛɛ a̧ yɔk ɗoŋ-aa nɛ̀ de lɔr.

¹⁹Fara-daŋ-nɛnɛ sitɛ damti'i a̧a̧ ɗoŋ ŋmaa mɔɔrɔ-ɗoŋ-kpɔk, fara-ɛk-ɗoŋ duk nɛ̀ zika-a, in o fara-e-tui-er a̧a̧ nɛ̀ ká̧ a̧ yiitoo mbɛt; wa dee o dila yiitoo a fara-e-er,

²⁰ɓɛɛ wa de dila ɓu-zua-yiitoo nɛk tɛ o fara-daŋ-nɛnɛ mɔɔrɔ-ɗoŋ-kpɔk'i. Pɛrti mɔ hegɔ wa tɛ de tɛ ŋma mɔɔ-wan hɔ̧ɔ̧ na.

²¹Wa dee o mɔɔ-nɔ-mɔ ko Salomɔŋ lɛŋ nɛ̀ lɔr; o nyɛk nɛ̀ ya kɔ̧ tua Kombo-Libaŋ lɛŋ nɛ́ sa̧a̧ lɔr. Wa de ŋma mɔ kpɔk nɛ̀ bu-mbɔi na, wen ŋma bíí pi̧ so nú tɛ bu-mbɔi tɛ ŋgimbi ko Salomɔŋ na.

²²Wannu a̧a̧ so nɛ̀ o kombon mɛ Tarsis nɛ̀ yar nɛ̀ zu yì kpɔk in ko Hiram. Kombon Tarsis kai so nɛ lɔr, bu-mbɔi, o nin-fɔrɔ, o dawa in o nɔ̧́í̧-gɔ-tɛ tɛnɛ ha̧ wannu Salomɔŋ war kpɔk ɗoŋ pɛ taar.

²³Wannu Salomɔŋ gana o wannu zaŋnu lɛŋ nɛ̀ kpaamɔ in iŋa-mgbara-mɔ.

²⁴O bíí zaŋnu lɛŋ kii so mɛ zɔk nɛ́ Salomɔŋ wen zia iŋa-mgbara-mɔ nɛ̀ Sɔ̧ ha̧a̧ ha̧ a̧.

²⁵Kóó o ndé ba nɛ ha̧a̧mɔ kɔ‘i tɛnɛ: o mɔ nɛ‘i dee nɛ̀ bu-mbɔi in o mɔ nɛ‘i dee nɛ̀ lɔr, laa, o boi-biro, o nɔ̧́-nyama, o nyaŋa in o sunda ti pɛ nɛ̀ yak lɛŋ.

²⁶Salomɔŋ mɔi̧a o keekee in o wi-daŋ-nyaŋa. A̧ a̧a̧ so nɛ̀ o keekee-nyaŋa booro-nɛ-gɔmŋmaa-naar in o wi-daŋ-nyaŋa booro-ɓu-zua-yiitoo. A̧ kɛ̧ɛ̧ wa a tɛ o ye-a-boi-biro, ɓɛɛ a̧ e oi-aa katɛ a̧ sɛn Jerusalɛm.

²⁷Wannu dee ha̧ bu-mbɔi mɛ dɔk sɛn Jerusalɛm hee gee ta ga, in ha̧ o te-gbatui mɛ dɔk hee te-mbɔ́ra[13] ká̧ gba-tɔp ga.

²⁸Kpar nyaŋa ko Salomɔŋ tɛ nɛ̀ Egiptɛ in Silisii; o wi-ɗɔr-mɔ ko wannu nɛ́ɛ̀ hi̧fi so wa sɛn Silisii.

²⁹Gɛnɛ keekee-nyaŋa Egiptɛ kpɔk nɛ́ kɔya sede gɔmŋmaa-mɔɔrɔ-ɗoŋ-kpɔk, ɓɛɛ gɛnɛ nyaŋa nɛ́ kɔya sede gɔmŋmaa-nɛ-ɓu-mɔɔrɔ. O wannu Hit in o wannu Aram hi̧fi so kana nɛ́ nyaŋa nɔ‘i tɛ kpɔk gɛnɛ nɛ̀ ɗoŋ o wi-ɗɔr-mɔ ko wannu Salomɔŋ.