Read Northwest Gbaya 1 WANNU 11 Bible Online

1 WANNU 11 - Northwest Gbaya bible

1 WANNU 11

¹Wannu Salomɔŋ kɔ̧ɔ̧ so okoo gɔni nù nɛ̀ dɔka-a: o boko-be Mɔab, o boko-be Amɔŋ, o boko-be Edɔm, o boko-be Sidɔŋ in o boko-be Hit, ba boko-bem ko wannu Egiptɛ n'aa baa so'i e sɛnɛ.

²Tugun wa nɛ́ o bíí nɛ̀ GASA WAN tɔ̧ɔ̧ so ha̧ o be o Israɛl‘e ndé: «Ɛ́nɛ́ beka ye tɛ kɔ-wa na, ɓɛɛ wa beka ye tɛ k’ɛ́nɛ́ na mbɛt; wen ká wa tɛɛ zik see'nɛ́ sitɛ o sɔ̧ kɔ-wa.» Salomɔŋ ndaɗa ndaɗa-a in o tugun bíí nɔ‘i wen o kóò kɔ̧-a̧.

³A̧ kaia o boko be-wan gɔmŋmaa-mɔɔrɔ-ɗoŋ-yiitoo in o ŋma kóò mbɛt gɔmŋmaa-taar. O kóò kɔ̧-a̧ zika see-aa.

⁴Ŋgimbi nɛ Salomɔŋ sɔka kaɗi, o kóò nɔ‘i ɔra a̧ sitɛ o sɔ̧ kɔ-wa, ɓɛɛ a̧ e see-aa lɛŋ tɛ GASA WAN Sɔ̧ kɔ̧-a̧ hee dáà kɔ̧-a̧ David ga na.

⁵Salomɔŋ ndaka ɗoŋ Astarte[14], sɔ̧ ko o be Sidɔŋ, in Milkɔm, ŋma ɗaŋ sɔ̧ ko o be Amɔŋ.

⁶Salomɔŋ dee ɗaŋmɔ ti GASA WAN, ɓɛɛ a̧ ndak ɗoŋ GASA WAN nɛ̀ see kpɔk hee dáà kɔ̧-a̧ David ga na.

⁷Hegɔ Salomɔŋ mboo fara-ɗafi-sɔ̧ sɛn zu kaya nɛ̀ duk ti Jerusalɛm ha̧ Kɛmɔs, ɗaŋ sɔ̧ ko o be Mɔab, in ha̧ Mɔlɛk, ɗaŋ sɔ̧ ko o be Amɔŋ.

⁸A̧ dee kpɔk mɔ‘i wen o sɔ̧ ko o kóò kɔ̧-a̧ mɛ gɔni nù lɛŋ. Wa dɔ so nɛ fuu-nyama ɗafi nɛ̀ o sɔ̧ kɔ-wa.

⁹See GASA WAN kura zu Salomɔŋ wen a̧ e see-aa tɛ GASA WAN Sɔ̧ ko Israɛl nɛ̀ usa tɛ ha̧ a̧ war yiitoo,

¹⁰in nɛ dora so a̧ tɛ ndaka ɗoŋ o ŋma sɔ̧ na. Salomɔŋ de mɔ nyɛm ɗoŋ tɔ̧ɔ̧-wen ko GASA WAN na.

¹¹Ɓɛɛ GASA WAN tɔ̧ ha̧ Salomɔŋ: «Hee mɔ'ɔ nɛ̀ mɛ de mɔ hegɔ, in nɛ̀ mɛ kasi nɔɔ-tɔk kɔ‘m, kóó nɛ́ heembea kɔ‘m n'am ha̧a̧ ha̧ mɛ na ga, mi tɛ ɓar mɔɔ-wan er-mɛ yinɛ ɓɛɛ mi tɛ ha̧ ha̧ ŋma wi-de-tom kɔ-mɛ.

¹²Bo nɛ tɛ ŋgimbi duka-a kɔ-mɛ kpasa a̧‘m tɛ ɓar nɛnɛ yinɛ na, wen zu dáà kɔ-mɛ David; mi tɛ ɓar ɓara-a yinɛ er bem kɔ-mɛ.

¹³Mi beka ɓar mɔɔ-wan yinɛ lɛŋ na; mi tɛ ha̧ ŋma zuduk bíí kpɔk ha̧ bem kɔ-mɛ, wen zu dáà kɔ-mɛ David in wen zu Jerusalɛm n'am hoka!»

¹⁴GASA WAN foo ŋma wisɛn pii zu Salomɔŋ; mɛ̀ nɛ́ ŋma be-wan Edɔm, nin-a nɛ́ Hadad.

¹⁵Ŋgimbi nɛ David bìì so nɛ̀ Edɔm, Jɔab, gasawi ko o wi-biro daŋa so mɛ nɛ̀ɛ́ gun o bíí kɔ̧-a̧ nɛ̀ fee yí biro, ɓɛɛ a̧ gbɛ o wiwii in o be wiwii sɛn Edɔm lɛŋ.

¹⁶Jɔab in o be Israɛl lɛŋ ɔɔ hi̧i̧ fio-zɛ mɔɔrɔ-ɗoŋ-kpɔk hɔ ŋgimbi nɛ̀ wa kuma o wiwii sɛn Edɔm lɛŋ.

¹⁷Hadad yuu so mɔ yak si Egiptɛ in o ŋma be Edɔm nɛ̀ yaa so nɛ o wi-de-tom ko dáà kɔ̧-a̧. Ŋgimbi'i, Hadad so nɛ́ géé daŋa ŋgaiwi.

¹⁸Wa kura Madiaŋ hɔ Paraŋ, ɓɛɛ wa kur in o ŋma wi ye'i yak nɛnɛ hɔ tɛ wannu Egiptɛ. Wannu Egiptɛ usa tua ha̧ Hadad; a̧ ɗafa mɔ wen nyɔŋmɔ kɔ̧-a̧, ɓɛɛ a̧ usi ŋma nù ha̧ a̧.

¹⁹Wannu Egiptɛ kɔ̧ɔ̧ so Hadad nyɛmna, ɓɛɛ a̧ ha̧ nya ko kóò kɔ̧-a̧, nya ko Tapɛnɛz ko-wan kɔ̧-a̧ ha̧ Hadad nɛ̀ kóò.

²⁰Nya ko Tapɛnɛz koo be-wiwii, nin-a nɛ́ Genubat ha̧ Hadad, ɓɛɛ Tapɛnɛz dai a̧ kɔ̧ tua ko wannu; a̧ duk so kɔ̧ tua ko wannu Egiptɛ, mgbara o bem kɔ̧-a̧.

²¹Hadad duka Egiptɛ zii nɛnɛ‘e ndé, David fea in gasa wi-duk-zu-biro kɔ‘i Jɔab, ɓɛɛ a̧ tɔ̧ ha̧ wannu Egiptɛ: «Ɛ̀nɛ̀ é ha̧‘m si nù kɔ‘m.»

²²Wannu Egiptɛ aka a̧: «Nɛ́ ge a̧ ɓan mɛ katɛ‘m hɛ̧ɛ̧, sa mɛ kɔ̧ɔ̧ mɛ yak tɛ nù kɔ-mɛ nɛ̀ haya-a ge?» A̧ kifa nú: «Ŋma mɔ bo na, ɓɛɛ ɛ̀nɛ̀ é kànà ha̧‘m yak.»

²³GASA WAN dee ha̧ mbe wisɛn mɛ kur in Salomɔŋ; mɛ̀ nɛ́ Rɛzɔŋ, bem ko Eliada. A̧ yuu so mɔ nɛ̀ tɛ ko Hadadɛzɛr wannu Soba, wan kɔ̧-a̧ yak.

²⁴A̧ mɔi̧a o ŋma bíí pii tɛ-a, ɓɛɛ a̧ ɔ wan zu wa. Hee mɔ'ɔ nɛ̀ David gbɛ so nɛ wa ga, wa yaka so si Damas, wa baa ye, ɓɛɛ wa ɔ wan sɛn hi̧i̧.

²⁵Rɛzɔŋ duka nɛ́ wisɛn ko Israɛl ŋgimbi nɛ Salomɔŋ duka nɛnɛ kpasa. Ɗaŋmɔ nɛ̀ Hadad dea nɛ́ mɔ'ɔ: a̧ sɛna Israɛl, ɓɛɛ a̧ ɔ wan zu Aram.

²⁶Jeroboam bem ko Nɛbat duka nɛ́ be Efraim, nú Serada. Nin nàà kɔ̧-a̧ nɛ́ Sɛruya; Sɛruya duka so nɛ́ ko-gera. Jeroboam duka nɛ́ wi-de-tom ko Salomɔŋ, ɓɛɛ a̧ kur zu a̧.

²⁷Mɔ nɛ̀ dee ha̧ a̧ mɛ kur zu wannu nɛ́ mɔ'ɔ: Salomɔŋ hur so nɛ gboŋgo Milo, kpe nɛ̀ gbina ŋgeŋ ye ko dáà kɔ̧-a̧ David mbɛt.

²⁸Jeroboam so nɛ́ ŋgaiwi, a̧ so nɛ́ dita-bíí mbɛt. Wannu Salomɔŋ mbaɗa daŋa ŋgaiwi'i ŋgimbi n'aa de nɛ̀ tom, ɓɛɛ e a̧ zu o wi-de-tom ko Efraim in Manase.

²⁹Ŋma wese, Jeroboam gboo so saaye Jerusalɛm, ɓɛɛ wi-tɔ̧-wen oi nú Sɔ̧ Ahiya sɛn Silo kpaa ŋmaa in a̧ sɛn yuwar. Ahiya pi̧i̧ so nɛ ŋma mbe gba-laa, ɓɛɛ wa a̧a̧ so ɛ̀nɛ́-wa yiitoo zaŋbɛɛ.

³⁰Nɛ́ mɔ'ɔ nɛ̀ Ahiya baa mbe gba-laa nɛ̀ a̧a̧ tɛ‘i, ɓɛɛ a̧k tɛ fara ɓu-zua-yiitoo.

³¹A̧ tɔ̧ɔ̧ ha̧ Jeroboam: «Mɛ̀ káí a̧ka̧ laa’ɛ ɓu, wen wen nɛ̀ GASA WAN Sɔ̧ ko Israɛl tɔ̧ nɛ́ mɔ'ɔ: ‹Mi tɛ ɓar wan er Salomɔŋ yinɛ, ɓɛɛ mi tɛ ha̧ zuduk ɓu ha̧ mɛ.

³²Ɓɛɛ zuduk kpɔk nɛ̀ tɛ ɓɔn in a̧‘i, mɛ̀ nɛ́ wen zu David wi-de-tom kɔ‘m, in wen zu Jerusalɛm n'am hoka mgbara o zuduk be Israɛl lɛŋ.

³³Mɛ̀ nɛ́ wen ea'm nɛ̀ wa ee duk, yak nɛ́ɛ̀ gu nɛ̀ nù ti Astarte sɔ̧ ko o be Sidɔŋ, ti Kɛmɔs, sɔ̧ ko o be Mɔab in ti Milkɔm, sɔ̧ ko o be Amɔŋ, ɓɛɛ wa nɛ nɔ̀ tɛ o yuwar kɔ‘m, de nɛ̀ o mɔ nɛ̀ tan yí‘m, nyɛm nɛ̀ ɗoŋ o heembea in yuwar duka-a kɔ‘m hee dáà kɔ-wa David ga na.

³⁴Mi beka ba ŋma mɔ tɛ mɔɔ-wan yinɛ er Salomɔŋ na, wen mi ee a̧ nɛ̀ wan ŋgimbi duka-a kɔ̧-a̧ kpasa lɛŋ, wen zu David wi-de-tom kɔ‘m n'am hoka, nɛ̀ kasa o geŋa in o heembea kɔ‘m.

³⁵Ɓɛɛ mi tɛ ɓar mɔɔ-wan yinɛ er bem kɔ̧-a̧, mɛ ha̧ ha̧ mɛ: mɛ̀ nɛ́ zuduk ɓu a̧‘m tɛ ha̧ ha̧ mɛ.

³⁶Mi tɛ ha̧ ŋma zuduk kpɔk ha̧ bem kɔ̧-a̧ wen ha̧ ŋma pɛ́r-nam kɔ̧-a̧ mɛ duk ti'm ɓɔnsɛnɛ sɛn Jerusalɛm n'am hoka ha̧ nin-am mɛ duk sɛnɛ.

³⁷« ‹Ɓɛɛ kɔ-mɛ Jeroboam, mi tɛ ba mɛ, ɓɛɛ mɛ tɛ ɔ wan fara lɛŋ nɛ̀ mɛ tɛ kɔ̧; mɛ tɛ ɔ wan zu Israɛl.

³⁸Kà mɛ zii mɔ lɛŋ n'am tɛ tɔ̧ ha̧ mɛ, kà mɛ ba o yuwar kɔ‘m, kà mɛ de mɔ nɛ̀ yuwar-a yí‘m, kasi nɛ̀ o heembea in o geŋa kɔ‘m hee mɔ'ɔ nɛ̀ David, wi-de-tom kɔ‘m dee so ga, mi tɛ duk in mɛɛ, ɓɛɛ mi tɛ de ha̧ pɛ́r-nam kɔ-mɛ mɛ yor tɛ mɔɔ-wan nɛ̀ nɔa-a, hee wan n'am dee so in David ga; mi tɛ ha̧ Israɛl ha̧ mɛ.

³⁹Mi tɛ pi̧ búù zu duk ko David tɛ mɔ‘i, ɓɛɛ bo nɛ ɓɔnsɛnɛ na.› »

⁴⁰Nɛ́ mɔ'ɔ nɛ̀ Salomɔŋ kia mɛ gbɛ Jeroboam, ɓɛɛ a̧ kur yu mɔ yak sitɛ Sisak wannu Egiptɛ, ɓɛɛ a̧ duk hi̧i̧ hɔ ŋgimbi fio ko Salomɔŋ.

⁴¹Oi o tom ko Salomɔŋ, mɔ lɛŋ n'aa dea in iŋa-mgbara-mɔ kɔ̧-a̧ yɔra zaŋ Kalata Nyɛrɛ ko Salomɔŋ.

⁴²Pɛ-wan ko Salomɔŋ zu Israɛl sɛn Jerusalɛm duka nɛ́ ɓu-naar.

⁴³Salomɔŋ fea, ɓɛɛ wa gun a̧ tɛ ye ko David dáà kɔ̧-a̧. Bem kɔ̧-a̧ Roboam ɔɔ wan oi-aa.