Read Northwest Gbaya 1 WANNU 13 Bible Online

1 WANNU 13 - Northwest Gbaya bible

1 WANNU 13

¹Ŋma bíí ko Sɔ̧ tɛɛ nɛ̀ Juda pii Bɛtɛl tɛ tɔ̧ɔ̧-wen ko GASA WAN, ɓɛɛ ká Jeroboam dɔ so nɛ́ o ha̧a̧mɔ zu fara-ɗafi-sɔ̧ tɛ ŋgimbi'i.

²Ɓɛɛ wi’ɛi hiɗi mɔ zu fara-ɗafi-sɔ̧ tɛ tɔ̧ɔ̧-wen ko GASA WAN hee mɔ'ɔ ga: «Fara-ɗafi-sɔ̧! Fara-ɗafi-sɔ̧! Tɔ̧ɔ̧-wen ko GASA WAN nɛ́ mɔ'ɔ: ‹Mɛ̀ zɔ̀k, wa tɛ ko ŋma bem kɔ̧ tua ko David, wa tɛ sa nin-a nɛ Josias. A̧ tɛ kai o wi-ɗafi-sɔ̧ mɛ kusa-fara nɛ̀ dɔ fuu-nyama zu mɛ gbɛ, ɗafi nɛ̀ sɔ̧, ɓɛɛ a̧ tɛ dɔ o gba̧a̧ bíí zu mɛ mbɛt.› »

³Kpɔk kale wese'i, bíí ko Sɔ̧ dee mɔɔ-usi-mɔ tɔ̧ nɛnɛ: «Zɔ́k, fara-ɗafi-sɔ̧ tɛ mbaŋ, ɓɛɛ nɔ̧́ nɛ̀ a̧a̧ zu a tɛ fok a nù. Hegɔ, ɛ́nɛ́ tɛ iŋ‘e nɛ́ GASA WAN a̧ tɔ̧ɔ̧ wen!»

⁴Tɛ zia wen nɛ̀ bíí ko Sɔ̧ tɔ̧ɔ̧ zu fara-ɗafi-sɔ̧ Bɛtɛl'i, wannu Jeroboam baa er nɛ̀ duka so zu fara-ɗafi-sɔ̧‘i nɛ̀ ŋgɔn tɔ̧ nɛnɛ: «Ɛ̀nɛ̀ bá a̧!» Ɓɛɛ er-a n'aa nyɛi̧a sitɛ bíí ko Sɔ̧ kor; a̧ nyɛm mɛ ba pii ɗoŋ ɓɔna.

⁵Fara-ɗafi-sɔ̧ mbaŋa, ɓɛɛ nɔ̧́ fok nɛ̀ zu-a a nù, nyɛm nɛ̀ ɗoŋ mɔ nɛ̀ bíí ko Sɔ̧ baa tɔ̧ tɛ ha̧a̧nú ko GASA WAN.

⁶Ɓɛɛ wannu tɔ̧ ha̧ bíí ko Sɔ̧: «Mi kɔfi mɛ, mɛ̀ gá̧ see GASA WAN Sɔ̧ kɔ-mɛ, mɛ̀ áí nú ha̧ a̧ wen am, ha̧ er-am kpasi.» Bíí ko Sɔ̧ ga̧a̧ see GASA WAN, ɓɛɛ er wannu kpasi. Er-a duka hee wan nɛ̀ duka so nɛti ga.

⁷Wannu tɔ̧ɔ̧ ha̧ bíí ko Sɔ̧: «Ɛ̀ɛ̀ sí ɗoŋ tɛ kɔ‘m a̧ mɛ̀ nyɔ́ŋ mɔ. Mi tɛ ha̧ ŋma be mɔ ha̧ mɛ.»

⁸Bíí ko Sɔ̧ tɔ̧ɔ̧ ha̧ wannu: «Kóó mɛ ha̧a̧ so nɛ reeta tua kɔ-mɛ ha̧‘m, bo nɛ mi tɛ̀ɛ́ ye so tɛ kɔ-mɛ na, bo nɛ mi tɛ̀ɛ́ nyɔŋ so brɛt in nɔɔ yì fara’ɛ na;

⁹wen mɛ̀ nɛ́ tɔ̧ɔ̧-wen ko GASA WAN ha̧‘m: ‹Mɛ beka nyɔŋ brɛt na, mɛ beka nɔ yì na, mɛ beka si ɗoŋ nɛ̀ oi pata-mɛ na.› »

¹⁰Ɓɛɛ a̧ ba nɛ ŋma yuwar nɛtɛ yak nɛnɛ, a̧ si ɗoŋ nɛ̀ yuwar n'aa baa so tɛ nɛnɛ pii Bɛtɛl na.

¹¹Ŋma sɔka wi-tɔ̧-wen oi nú Sɔ̧ a̧a̧ so sɛnɛ nɛ̀ ɔ sɛn Bɛtɛl. O bem kɔ̧-a̧ tɛɛ tɔ̧ mɔ nɛ̀ bíí ko Sɔ̧ dee sɛn Bɛtɛl wese'i ha̧ a̧. Wa wee ɗoŋ o wen n'aa tɔ̧ɔ̧ ha̧ wannu ha̧ dáà kɔ-wa.

¹²Dáà kɔ-wa aka wa: «A̧ baa nɛ́ ge yuwar ge yak nɛnɛ ge?» O bem kɔ̧-a̧ aka mɔ mɛ iŋ yuwar nɛ̀ bíí ko Sɔ̧ nɛ̀ tɛ̀ɛ́ nɛ̀ Juda baa yak nɛnɛ.

¹³A̧ tɔ̧ɔ̧ ha̧ bem kɔ̧-a̧: «Ɛ̀nɛ̀ hɛ́r tuifuu ha̧‘m!» Wa hɛra tuifuu ha̧ a̧, ɓɛɛ a̧ daŋ zu a̧.

¹⁴A̧ ndaka pata bíí ko Sɔ̧, ɓɛɛ a̧ nɛ́ɛ̀ kpa a̧ fara duk nù ti ŋma gasa te, ɓɛɛ a̧ tɔ̧ ha̧ a̧: «Bíí ko Sɔ̧ nɛ̀ tɛ̀ɛ́ nɛ̀ Juda nɛ̀ mɛ nde?» Wi’ɛi kifa nú: «Nɛ mi!»

¹⁵A̧ tɔ̧ɔ̧ ha̧ a̧: «Ɛ̀ɛ̀ sí ɗoŋ in mɛɛ kɔ̧ tua, a̧ mɛ̀ nyɔ́ŋ brɛt.»

¹⁶Ɓɛɛ bíí ko Sɔ̧ kifi nú ha̧ a̧: «Mi beka nyɛm mɛ si ɗoŋ kóó nɛa-a in mɛɛ na. Mi beka nyɔŋ brɛt, in nɔɔ yì in mɛɛ sɛn fara’ɛ na,

¹⁷wen GASA WAN tɔ̧ɔ̧ ha̧‘m ndé: ‹Mɛ beka nyɔŋ brɛt in nɔɔ yì sɛn fara’ɛ na, mɛ beka si ɗoŋ nɛ̀ yuwar nɛ̀ mɛ baa tɛ nɛnɛ na.› »

¹⁸Wi-tɔ̧-wen oi nú Sɔ̧ tɔ̧ɔ̧ ha̧ a̧: «Mi mbɛt, mi nɛ́ wi-tɔ̧-wen oi nú Sɔ̧ hee mɛ ga, ɓɛɛ ŋma betom ko Sɔ̧ tɔ̧ɔ̧ ha̧‘m ndé, GASA WAN tɔ̧a̧: ‹Mɛ̀ dé ha̧ a̧ mɛ si ɗoŋ in mɛɛ kɔ̧ tua kɔ-mɛ a̧ a̧ nyɔ́ŋ brɛt in a̧ a̧ nɔ́ yì.› » Sɔka wi-tɔ̧-wen oi nú Sɔ̧‘i de so nɛ ndela ha̧ a̧.

¹⁹Nɛ́ mɔ'ɔ nɛ̀ bíí ko Sɔ̧ sii ɗoŋ in a̧ sɛn tɛ kɔ̧-a̧. A̧ nyɔŋa brɛt, nɔ nɛ̀ yì sɛn kɔ̧ tua kɔ̧-a̧.

²⁰Hee mɔ'ɔ nɛ̀ wa ya ká̧ fara-nyɔŋ-mɔ ga, GASA WAN tɔ̧ɔ̧ wen ha̧ wi-tɔ̧-wen oi nú Sɔ̧ nɛ̀ mgbɔɔ so a̧ piinɛ ɗoŋ‘i,

²¹ɓɛɛ sɔka wi-tɔ̧-wen oi nú Sɔ̧‘i tɔ̧ ha̧ bíí ko Sɔ̧ nɛ̀ tɛɛ so nɛ̀ Juda'i. A̧ tɔ̧a̧: «GASA WAN tɔ̧a̧: ‹Hee mɔ'ɔ nɛ̀ mɛ mbo zu tɛ tɔ̧ɔ̧-wen ko GASA WAN in hee mɔ'ɔ nɛ̀ mɛ kasi geŋa nɛ GASA WAN Sɔ̧ kɔ-mɛ gɔna so ha̧ mɛ na ga,

²²hee mɔ'ɔ nɛ̀ mɛ pia ɗoŋ, nɛ̀ mɛ nyɔŋa brɛt, in nɛ̀ mɛ nɔɔ yì sɛn fara n'aa tɔ̧ɔ̧ so wen sɛnɛ ha̧ mɛ ndé, ká mɛ́ nyɔŋ brɛt, in ká mɛ́ nɔ yì hi̧i̧ na mbɛt› ga wó, wa beka gun mɛ mgbara o dáà kɔ-mɛ na.»

²³Ɗoŋ nɛ̀ bíí ko Sɔ̧ nyɔŋa brɛt nɔ nɛ̀ yì kaɗi, sɔka wi-tɔ̧-wen oi nú Sɔ̧ hɛra tuifuu ko wi-tɔ̧-wen oi nú Sɔ̧ n'aa mgbɔɔ so pii nɛ ɗoŋ‘i,

²⁴ɓɛɛ a̧ yak. Ŋma dila kpaa a̧ yuwar, ɓɛɛ gbɛ a̧. Wɔr-aa ɔɔ so nù sɛn yuwar, ɓɛɛ tuifuu yor nɛ̀ war mgbɔɔr, dila nɛ̀ mgbɔɔr.

²⁵O wi-ɓir-war zɔka wɔr bíí fara ɔɔ nù sɛn yuwar nɛ̀ dila yor ká̧ a̧. Wa nɛɛ tɔ̧ wen-aa sɛn saaye nɛ sɔka wi-tɔ̧-wen oi nú Sɔ̧ ɔ sɛnɛ‘i.

²⁶Wi-tɔ̧-wen oi nú Sɔ̧ nɛ̀ mgbɔɔ so a̧ piinɛ ɗoŋ tɛ yuwar kɔ̧-a̧‘i zia nyɛrɛ mɔ‘i, ɓɛɛ tɔ̧: «A̧ nɛ bíí ko Sɔ̧! Wi nɛ̀ bɛ̧ɛ̧ mboo zu tɛ wen ko GASA WAN, GASA WAN ee a̧ er dila nɛ̀ gbina o gba̧a̧-tɛ-a, ɓɛɛ gbɛ a̧ nyɛm nɛ̀ ɗoŋ wen nɛ̀ GASA WAN baa tɔ̧ so ha̧ a̧.»

²⁷A̧ tɔ̧ɔ̧ ha̧ o bem kɔ̧-a̧: «Ɛ̀nɛ̀ hɛ́r tuifuu ha̧‘m!» Wa hɛra tuifuu ha̧ a̧,

²⁸ɓɛɛ a̧ yak. A̧ kpaa wɔr fara ɔɔ nù sɛn yuwar, tuifuu nɛ̀ mgbɔɔr, dila nɛ̀ mgbɔɔr ká̧ wɔr'i. Dila nyɔŋ so wɔr'i na, in a̧ gbin so o gba̧a̧ tɛ tuifuu na mbɛt.

²⁹Wi-tɔ̧-wen oi nú Sɔ̧ baa wɔr bíí ko Sɔ̧‘i nɛ̀ ŋgɔn e zu tuifuu, ɓɛɛ ba pii nɛ ɗoŋ. Sɔka wi-tɔ̧-wen oi nú Sɔ̧ pia ɗoŋ saaye kɔ‘i mɛ hi̧i̧ fio in mɛ gun a̧.

³⁰A̧ guna a̧ kɔ̧ fio kɔ̧-a̧ mɛ tɛ-a, ɓɛɛ a̧ hi̧i̧ a̧ tɔ̧ nɛnɛ: «Naa-oo! Nya'm!»

³¹Ɗoŋ n'aa guna a̧ kaɗi, a̧ tɔ̧ɔ̧ ha̧ o bem kɔ̧-a̧: «Ŋgimbi fio kɔ‘m, ɛnɛ tɛ gun am kɔ̧ fio n’ɛɛ guna bíí ko Sɔ̧ sɛnɛ‘i. Ɛnɛ tɛ a o gba̧a̧‘m katɛ o gba̧a̧-a̧.

³²Wen wen ko GASA WAN n'aa tɔ̧ɔ̧ zu fara-ɗafi-sɔ̧ sɛn Bɛtɛl, in zu o kusa-fara lɛŋ nɛ̀ a̧a̧ sɛn tɛ o ye Samarii tɛ hɔ gba̧a̧.»

³³Zu mɔ‘i, Jeroboam kɔ̧ mɛ e ɗaŋ naŋanɔ kɔ‘i duk na. A̧ kai nɛ o bíí mgbara dukbíí mɛ a wa hee o wi-ɗafi-sɔ̧ ga, zu o kusa-fara. A̧ e so nɛ wi n'aa kɔ̧ɔ̧ nɛ̀ wi-ɗafi-sɔ̧ zu o kusa-fara.

³⁴Ɗaŋmɔ nɛ̀ nutua ko Jeroboam dea nɛ́ mɔ‘i, ɓɛɛ mɛ̀ nɛ́ wen mɔ‘i a̧ wa kuma kaɗi nɛnɛ zu nù lɛŋ.