Read Northwest Gbaya 1 WANNU 2 Bible Online

1 WANNU 2 - Northwest Gbaya bible

1 WANNU 2

¹Ŋgimbi fio ko David hɛɗa kaɗi, ɓɛɛ a̧ sa bem kɔ̧-a̧ Salomɔŋ mɛ tɔ̧ o sɔŋkur ha̧a̧nú kɔ̧-a̧ ha̧ a̧ hee mɔ'ɔ ga:

²«Mi tɛ ba yuwar nɛ o bíí zu nù'ɛ lɛŋ ba so'i. Mɛ̀ yór a̧ nɔ́, ɓɛɛ mɛ̀ dúk nɛ́ wiwii.

³Mɛ̀ kásí heembea ko GASA WAN Sɔ̧ kɔ-mɛ. Mɛ̀ bá nɛ́ yuwar kɔ̧-a̧; mɛ̀ kásí o geŋa kɔ̧-a̧, o wen kɔ̧-a̧, o yuwar duka-a kɔ̧-a̧ in o mɔ n'aa kɔ̧a̧, hee mɔ'ɔ nɛ yɔra zaŋ Kalata Heembea ko Moisɛ ga; hegɔ mɔ nɛ mɛ tɛ de in mɔ nɛ mɛ tɛ kii, mɛ tɛ kpa.

⁴Ɓɛɛ GASA WAN tɛ de ha̧ ha̧a̧nú kɔ̧-a̧ ha̧‘m mɛ hɔ gba̧a̧, wen a̧ tɔ̧ɔ̧ so'e: ‹Ŋma bezaŋ-mɛ, David, tɛ duk zu damti Israɛl ɓɔnsɛnɛ, kà o bem kɔ-mɛ nɛ́ baa yuwar nɛ̀ de-a ti'm, in kà wa nɛ́ mboo zu ha̧‘m nɛ̀ see-wa lɛŋ in nɛ̀ kiitɛ-wa lɛŋ.›

⁵«Mɛ iŋa mɔ nɛ Jɔab, bem ko Sɛruya dee so in am, mɔ n'aa dee so in o gasa wi-biro ko Israɛl yiitoo: Abnɛr bem ko Nɛr in Amasa, bem ko Yɛtɛr. A̧ gbɛɛ so wa yinɛ tɛ ŋgimbi nɛ biro bo na, wen nɛ wa gbɛɛ so ŋma nya-a̧ sɛn yí biro. A̧ gbaia tɔk-tɛ bíí a nù ŋgimbi nɛ biro bo so na. Wen-aa a̧a̧ zu a̧.[1]

⁶Mɛ̀ dé mɔ nyɛm nɛ ɗoŋ iŋa-mgbara-mɔ kɔ-mɛ, ɓɛɛ ká mɛ́ e ha̧ a̧ mɛ sɔk sɛka a̧ yee kɔ̧ fio tɛ ga̧a̧mɔ na.

⁷«Mɛ̀ dé demɔ in o bem ko Barzilai be Galad; mɛ̀ é ha̧ wa mɛ nyɔŋ mɔ in mɛɛ, wen nɛ́ kpɔk demɔ‘i, a̧ wa dee in am ŋgimbi n'am yuu nɛ̀ mɔ ti zɔmwi kɔ-mɛ Absalɔm.

⁸«Ŋma bíí a̧a̧ katɛ mɛ, nɛ́ Simɛi bem ko Gɛra; a̧ nɛ bezaŋ Bɛnjamin sɛn Bahurim; a̧ foma so'm nɛ̀ ɗáŋ-a wese yuu mɔ kɔ‘m si Mahanayim, ɓɛɛ tɛ pia ɗoŋ kɔ‘m, a̧ wee ti'm, ɓɛɛ ɛɛ kpa ŋmaa nú Jurdɛn. Mi kana mɔ ha̧ a̧ nɛ̀ nin GASA WAN'e ndé, mi beka gbɛ a̧ nɛ̀ gba-paa na.

⁹Ɓɛɛ nɛ̀ kɔ-mɛ, ká mɛ e a̧ na; mɛ́ nɛ́ wi-iŋ-mgbara-mɔ, mɛ́ tɛ iŋ mɔ nɛ mɛ tɛ de, wen ha̧ zu-a nɛ̀ oi mbui mɛ ɔ ɗɔɔ tɔk.»

¹⁰Nɛ́ mɔ'ɔ nɛ̀ David sii ɗoŋ kpa o dáà kɔ‘i, ɓɛɛ wa gun a̧ sɛn saaye kɔ̧-a̧.

¹¹David ɔɔ wan sɛn Israɛl pɛ ɓu-naar; a̧ dee pɛ mɔɔrɔ-ɗoŋ-yiitoo sɛn Hebrɔŋ, ɓɛɛ a̧ de pɛ ɓu-taar-zua-taar sɛn Jerusalɛm.

¹²Salomɔŋ ɔɔ wan ko dáà kɔ‘i David, ɓɛɛ wan kɔ̧-a̧ yor nɛ̀ nɔa-a.

¹³Adonias bem ko Hagit tɛ̀ɛ̀ kpa Bɛtsabee nàà ko Salomɔŋ, ɓɛɛ Bɛtsabee ak a̧: «Mɛ́ tɛ́ zaŋ ga̧a̧mɔ nde?» A̧ kifa nú a̧: «Ii,

¹⁴ɓɛɛ mi kɔ̧ɔ̧ mɛ we ɗoŋ ŋma be wen h’ɛ́nɛ́.» Bɛtsabee tɔ̧ɔ̧ ha̧ a̧: «Mɛ̀ tɔ̧̀.»

¹⁵Ɓɛɛ a̧ tɔ̧ wen’ɛ ha̧ a̧: «Ɛ́nɛ́ iŋa nɛ̀ tɛ‘nɛ́ ndé, mɔɔ-wan duk so nɛ́ kɔ‘m, ɓɛɛ o be Israɛl lɛŋ zika so tɛ pii tɛ‘m, ha̧‘m mɛ ɔ wan. Mɔ kpɔk, mɔɔ-wan yuu er-am duk nɛ́ ko nya'm; mɛ̀ nɛ́ wen nɛ GASA WAN kɔ̧ɔ̧ hegɔ.

¹⁶Kinii, mi kɔ̧ɔ̧ mɛ ak nɛ́ mɔ kpɔk er'nɛ́ ɓɛɛ, k’ɛ́nɛ́ dɔ nɛ‘m na.» Nàà ko Salomɔŋ tɔ̧a̧: «Mɛ̀ àk.»

¹⁷A̧ kifa nú: «Mi kɔfi ɛnɛ, ɛ̀nɛ̀ tɔ̧́ ha̧ wannu Salomɔŋ wen a̧ nyɛm mɛ dɔ‘nɛ́ na; a̧ a̧ há̧ Abisak boko-be Sunɛm ha̧‘m nɛ̀ kóò.»

¹⁸Bɛtsabee kifa nú: «Ɔ dee, mi tɛ we ɗoŋ wen kɔ-mɛ ha̧ wannu.»

¹⁹Bɛtsabee nɛ̀ɛ́ tɛ ko wannu Salomɔŋ mɛ we ɗoŋ wen ko Adonias'i ha̧ a̧. Wannu wee ti a̧, gbɛ zugur nù, ɓɛɛ pii ɗoŋ duk zu damti kɔ‘i woyo; wa baa mɔɔ-duk-nɛnɛ tɛnɛ ha̧ nàà kɔ̧-a̧, ɓɛɛ a̧ duk nù nɛ̀ war wii-er wannu.

²⁰A̧ tɔ̧a̧: «Mi kɔ̧ɔ̧ mɛ ak ŋma mɔ tikiɗi er mɛ; ká mɛ́ dɔ nɛ‘m na.» Wannu kifa nú ha̧ a̧: «Ɛ̀nɛ̀ ák géè, nàá, mi beka dɔ‘nɛ́ na.»

²¹A̧ tɔ̧a̧: «Wi nyɛma mɛ ha̧ Abisak, boko-be Sunɛm ha̧ Adonias, zɔmwi kɔ-mɛ nɛ̀ kóò nde?»

²²Wannu Salomɔŋ kifa nú ha̧ nàà kɔ‘i: «Wen ge ɛnɛ ak nɛ Abisak boko-be Sunɛm nɛ̀ kóò ha̧ Adonias ge? Ɛ̀nɛ̀ ák nɛ́ mɔɔ-wan ha̧ a̧ wen a̧ nɛ zɔmwi kɔ‘m ɓɛɛ na nde? Ɛ̀nɛ̀ ák wan ha̧ a̧, in ha̧ wi-ɗafi-sɔ̧ Abiatar in ha̧ Jɔab, bem ko Sɛruya ɓɛɛ gɔ!»

²³Wannu Salomɔŋ kàná mɔ nɛ̀ nin GASA WAN tɔ̧ nɛnɛ‘e: «GASA WAN a̧ dé ŋgayamɔ in am ka Adonias nɛ yoɓa wen’ɛ nɛ̀ fio kɔ‘i na.

²⁴Hee mɔ'ɔ nɛ GASA WAN duk kpasa ɓɛɛ ba'm mitak e tɛ wan ko dáà kɔ‘m David ga, in n'aa ea'm mgbara pɛ́r-nam ko wannu, nyɛm nɛ ɗoŋ wen n'aa tɔ̧ɔ̧ so ga, sɔsɔɔ, Adonias tɛ fe.»

²⁵Wannu toma Bɛnaya, bem ko Yehoyada, ɓɛɛ a̧ gbɛ Adonias yinɛ.

²⁶Ɓɛɛ nɛ̀ ko wi-ɗafi-sɔ̧ Abiatar, wannu tɔ̧ɔ̧ ha̧ a̧: «Mɛ̀ sí ɗoŋ sɛn Anatot, fara kɔ-mɛ. Mɛ nyɛma so mɛ fe mbɛt; ɓɛɛ sɔsɔɔ mi beka gbɛ mɛ na, wen mɛ tuia so Kuɓa nɔɔ-tɔk ko GASA WAN Sɔ̧ yak ti ha̧ dáà kɔ‘m David, in mɛ zɔka so bɔnɛ n'aa zɔka so mbɛt.»

²⁷Salomɔŋ foo a̧ yinɛ tɛ tom-ɗafa-sɔ̧, ha̧ wen nɛ̀ GASA WAN tɔ̧ɔ̧ so ha̧ o bíí nutua ko Elii sɛn Silo mɛ hɔ gba̧a̧.

²⁸Jɔab yee so nɛ́ ɗoŋ Adonias; bo nɛ Absalɔm na; ɓɛɛ ŋgimbi n'aa zia nyɛrɛ‘i, a̧ yuu mɔ ye fara-duk ko GASA WAN, ɓɛɛ a̧ kasi zak fara-ɗafi-sɔ̧ duk nɛnɛ.

²⁹Wa tɔ̧ɔ̧ ha̧ wannu Salomɔŋ‘e, Jɔab yuu mɔ ye fara-duk ko GASA WAN, ɓɛɛ duk mgbák ká̧ fara-ɗafi-sɔ̧ wó; ɓɛɛ Salomɔŋ tom Bɛnaya, bem ko Yehoyada mɛ nɛ̀ɛ́ gbɛ a̧.

³⁰Bɛnaya yee fara-duk ko GASA WAN, ɓɛɛ tɔ̧ ha̧ Jɔab: «Wannu hee ndé, mɛ̀ gbò.» Ɓɛɛ Jɔab tɔ̧: «Weyaa, mi tɛ fe hɛ̧ɛ̧.» Bɛnaya wee ɗoŋ mɔ tɛ yuwar tɔ̧ɔ̧-wen in kifa-nú ko Jɔab ha̧ wannu.

³¹Wannu tɔ̧ɔ̧ ha̧ a̧: «Mɛ̀ dé hee a̧ tɔ̧a̧ ga. Mɛ̀ gbɛ́ a̧, ɓɛɛ mɛ̀ gún a̧ wen ká simbo-bíí n'aa gbɛɛ so géè tɛɛ ba'm in o bíí nutua ko dáà kɔ‘m.

³²GASA WAN tɛ de ha̧ simbo ko o wi-de-mɔ nɛ̀ yuwar-a yiitoo n'aa gbɛɛ so nɛ̀ gba-paa, ká dáà kɔ‘m iŋ na'i, mɛ ba a̧. Mɛ̀ nɛ́ Abnɛr bem ko Nɛr gasa wi-biro sɛn Israɛl, in Amasa bem ko Yɛtɛr gasa wi-biro sɛn Juda.

³³Simbo ko wi nɔ‘i tɛ tik zu a̧ in o bezaŋ-aa kpoo nɛ kpoo; ɓɛɛ nɛ̀ ko David, bezaŋ-aa, o bíí nutua kɔ̧-a̧ in damti kɔ̧-a̧ tɛ kpa kɔ‘i nɛ́ desee ko GASA WAN yaknɛ sɔ̧i̧i̧.»

³⁴Bɛnaya bem ko Yehoyada sii ɗoŋ kɔ̧ tua, ɓɛɛ gbɛ Jɔab; ɓɛɛ wa gun a̧ kɔ̧ tua kɔ̧-a̧ sɛn ŋga-gbárà.

³⁵Wannu hoka Bɛnaya bem ko Yehoyada mɛ duk gasa wi-biro oi-aa, ɓɛɛ wi-ɗafi-sɔ̧ Sadɔk kpai kɔ‘i nɛ wi-ɗafi-sɔ̧ Abiatar.

³⁶Wannu Salomɔŋ saa Simɛi, ɓɛɛ tɔ̧ ha̧ a̧: «Mɛ̀ dé tua kɔ-mɛ sɛn Jerusalɛm; mɛ beka gbo mɛ nɛ si ŋma fara na.

³⁷Wese nɛ mɛ tɛ gbo saaye ku gboŋgo Sɛdrɔŋ, ɓɛɛ mɛ̀ íŋ‘e ndé, mɛ tɛ fe nɛ mbetɛ. Tɔk tɛ-mɛ tɛ si ɗoŋ zu mɛ.»

³⁸Simɛi kifa nú ha̧ wannu: «Wen'i ɔ dee; wi-de-tom k’ɛ́nɛ́ tɛ de mɔ hee mɔ'ɔ nɛ nyaa wannu tɔ̧a̧ ga.» Ɓɛɛ Simɛi ɔ Jerusalɛm zɛ nɛ̀ dɔka-a.

³⁹Ɓɛɛ ɗoŋ pɛ taar, bara ko Simɛi yiitoo yuu mɔ si tɛ ko Akis bem ko Maka, wannu Gat. Ɗoŋ nɛ wa mbaŋa nɛ tɛ Simɛi ndé, o bara kɔ̧-a̧ a̧a̧ nù ko Gat wó,

⁴⁰Simɛi kura hɛr tuifuu kɔ‘i, ɓɛɛ nɛ tɛ Akis, wen kaia o bara kɔ‘i piinɛ ɗoŋ. Simɛi nɛ̀ɛ̀ war kpɔk ɓɛɛ, kai nɛ̀ o wi-de-tom kɔ‘i piinɛ ɗoŋ nɛ̀ Gat.

⁴¹Wa tɔ̧ɔ̧ ha̧ Salomɔŋ‘e, Simɛi kura Jerusalɛm nɛ sɛn nù Gat; nɛ mɔ'ɔ n'aa pia ɗoŋ kaɗi wo.

⁴²Wannu saa Simɛi, ɓɛɛ ak a̧: «Bo nɛ mi dee so ha̧ mɛ mɛ kan mɔ nɛ̀ nin GASA WAN, ɓɛɛ mi mbaŋ tɛ-mɛ ndé, wese nɛ mɛ tɛ gbo saaye mɛ nɛ si ŋma fara, mɛ̀ íŋ‘e ndé, wi tɛ fe na nde? Wese'i bo nɛ mɛ tɔ̧ɔ̧ ha̧‘m'e, wen nɛ‘i zia'i ɔ dee na nde?

⁴³Wen ge nɛ mɛ mbo zu tɛ kanamɔ nɛ̀ mɛ kànà ti GASA WAN in wen n'am tɔ̧ɔ̧ ha̧ mɛ na ge?»

⁴⁴Wannu tɔ̧ɔ̧ ha̧ Simɛi woyo: «Mɛ iŋa ɗaŋmɔ nɛ mɛ dea in dáà kɔ‘m David nɛ̀ sa̧a̧-a̧; hegɔ GASA WAN tɛ de ha̧ ɗaŋ kɔ-mɛ mɛ tik zu mɛ.

⁴⁵GASA WAN tɛ tok de yoŋgo ha̧ wannu Salomɔŋ, ɓɛɛ damti ko David tɛ yor nɛ̀ nɔa-a ti GASA WAN ɓɔnsɛnɛ.»

⁴⁶Wannu ha̧a̧ nú ha̧ Bɛnaya bem ko Yehoyada mɛ gbɛ Simɛi; ɓɛɛ a̧ gbo ba a̧ gbɛ. Oi mɔ‘i, mɔɔ-wan ko Salomɔŋ yora nɛ̀ nɔa-a.