Read Northwest Gbaya 1 WANNU 21 Bible Online

1 WANNU 21 - Northwest Gbaya bible

1 WANNU 21

¹Mɔ nɛ̀ yaka ɗoŋ o mɔɔ nɔ‘i nɛ́ mɔ'ɔ. Nabot be Yizreɛl a̧a̧ so nɛ̀ fɔ-nyak-dɔ̧ɔ̧ kɔ‘i; fɔ‘i duka so ká̧ tua-wan ko Akab wannu Samarii.

²Akab tɔ̧ɔ̧ ha̧ Nabot: «Mɛ̀ é fɔ-nyak-dɔ̧ɔ̧ kɔ-mɛ ha̧‘m de nɛ̀ fɔ wa̧a̧-kpoo, wen a̧ duk mgbák ká̧ tua kɔ‘m, ɓɛɛ mi tɛ ha̧ ŋma mbe de fɔ-nyak-dɔ̧ɔ̧ ha̧ mɛ oi-aa, kóó kà mɛ nɛ́ kɔ̧a̧, mi ha̧a̧ nɛ́ sede oi-aa ha̧ mɛ mbɛt.»

³Nabot tɔ̧ɔ̧ ha̧ Akab: «Mi kànà nin GASA WAN, kà‘m nɛ́ ha̧a̧ mɔɔ-oi o dáà kɔ‘m h’ɛ́nɛ́, ɓɛɛ mɔ‘i tɛ duk nɛ́ gasa ɗaŋmɔ wen am nyɛmna.»

⁴Akab sii ɗoŋ nɛ̀ ga̧a̧-tɛ in tu̧u̧-see wen wen nɛ̀ Nabot be Yizreɛl kifa ha̧ a̧‘e, wi beka ha̧ mɔɔ-oi o dáà kɔ‘i ha̧ a̧ na wó‘i. A̧ ɔɔ nù gɔn gado kɔ̧-a̧ zik tɛ si zaŋ ŋgeŋ, ɓɛɛ bɛ̧ nyɔŋa mɔ.

⁵Kóò kɔ̧-a̧ Jezabɛl tɛ̀ɛ̀ kpa a̧, ɓɛɛ tɔ̧ ha̧ a̧: «Wen ge mɛ duk bɔɔ nɛ̀ ɗaŋsee, ɓɛɛ mɛ kɔ̧ nyɔŋa mɔ na ge?»

⁶A̧ kifa nú ha̧ a̧: «Mɛ̀ nɛ́ wen n'am aka Nabot be Yizreɛl ndé, a̧ a̧ ɗɔ́r fɔ-nyak-dɔ̧ɔ̧ kɔ̧-a̧ ha̧‘m, ɓɛɛ kà a̧ nɛ́ kɔ̧ɔ̧ sede na, ɛɛ kpaia nɛ̀ fɔ-nyak-dɔ̧ɔ̧ kɔ‘m, ɓɛɛ a̧ kifi nú ha̧‘m ndé, wi beka ha̧ fɔ-nyak-dɔ̧ɔ̧ kɔ‘i ha̧‘m na.»

⁷Jezabɛl kóò ko wannu kifa nú ha̧ a̧: «Mɔɔ bó nɛ́ mɛ́ a̧ ɔ wan zu Israɛl na nde? Mɛ̀ kúr, mɛ̀ nyɔ́ŋ mɔ, ká mɛ́ kpa ɗaŋsee géè na! Nɛ́ mi a̧ tɛ ha̧ fɔ-nyak-dɔ̧ɔ̧ ko Nabot be Yizreɛl ha̧ mɛ.»

⁸Jezabɛl yɔra o kalata nɛ̀ nin Akab e tumbal kɔ̧-a̧ sɛnɛ, ɓɛɛ tom ha̧ o kuti-wi in o dita-bíí nɛ̀ ɔ kpɔk saaye in Nabot.

⁹Gba̧a̧ wen kalata'i nɛ́ mɔ'ɔ: «Ɛ̀nɛ̀ hé mbea wen zima-yì, ɓɛɛ ɛ̀nɛ̀ é ha̧ Nabot mɛ duk ti ha̧ o bíí nɛ tɛ mɔi̧.

¹⁰Ɛ̀nɛ̀ dé ha̧ o ŋma wi-de-gba̧a̧-mɔ-na yiitoo mɛ ya nù sɛn ti a̧, ɓɛɛ wa a̧ ɓír wen e nú-a tɔ̧ nɛnɛ‘e, a̧ foma Sɔ̧ in wannu; hegɔ, ɛ̀nɛ̀ fó a̧ gbonɛ saaye ɓɛɛ ɛ̀nɛ̀ yó a̧ nɛ̀ ta gbɛ.»

¹¹O bíí saaye Yizreɛl, o kuti-wi in o dita-bíí nɛ̀ ɔ so saaye'i dee mɔ nyɛm nɛ̀ ɗoŋ tɔ̧ɔ̧-wen ko Jezabɛl hee mɔ'ɔ nɛ̀ yɔra zaŋ o kalata nɔ‘i n'aa toma ha̧ wa'i ga.

¹²Wa hee mbea zima-yì, ɓɛɛ wa e Nabot tɛ kuti fara ti o bíí nɛ̀ mɔi̧a.

¹³O wi-de-gba̧a̧-mɔ-na nɔ‘i yiitoo'i tɛ̀ɛ̀ ya nù ti a̧. Wa yaa ti dukbíí ɓir nɛ̀ wen e nú Nabot hee mɔ'ɔ ga: «Nabot foma Sɔ̧ in wannu.» Wa mgbɔɔ a̧ gbonɛ si ɗoŋ ye, ɓɛɛ wa yo a̧ nɛ̀ ta gbɛ.

¹⁴Wa toma tɔ̧ ha̧ Jezabɛl ndé, wa yoo Nabot nɛ̀ ta gbɛ kaɗi.

¹⁵Ŋgimbi nɛ Jezabɛl zia'e ndé, wa yoo Nabot nɛ̀ ta gbɛ kaɗi, a̧ tɔ̧ɔ̧ ha̧ Akab: «Mɛ̀ kúr, mɛ̀ bá fɔ-nyak-dɔ̧ɔ̧ nɛ̀ Nabot be Yizreɛl bɛ̧ɛ̧ so ɗɔra-a ha̧ mɛ'ɛ, wen a̧ bo ɓɔna, a̧ fee kaɗi.»

¹⁶Ŋgimbi nɛ Akab zia'e Nabot fea kaɗi, a̧ kura mɛ nɛ si kpɛɛfɔ-nyak-dɔ̧ɔ̧ ko Nabot be Yizreɛl so'i wen baa a̧ nɛ̀ kɔ̧-a̧.

¹⁷GASA WAN tɔ̧ɔ̧ ha̧ Elii be Tisbe hee mɔ'ɔ ga:

¹⁸«Mɛ̀ kúr, mɛ̀ wé ti Akab wannu Israɛl sɛn Samarii; a̧ zira si kpɛɛfɔ-nyak-dɔ̧ɔ̧ ko Nabot ha̧ a̧ mɛ ba.

¹⁹Mɛ̀ tɔ̧́ ha̧ a̧ hee mɔ'ɔ ga: ‹Wen nɛ̀ GASA WAN tɔ̧ nɛ́ mɔ'ɔ: Ɗoŋ nɛ̀ mɛ gbɛɛ zu kaɗi, mɛ kɔ̧ɔ̧ mɛ ba mɔɔ-oi-aa nɛ̀ kɔ-mɛ nde? Mɛ̀ tɔ̧́ ha̧ Akab'e, wen nɛ̀ GASA WAN tɔ̧ nɛ mɔ'ɔ: O toyo tɛ ndal tɔk tɛ-a kpɔk fara nɛ̀ o toyo ndala tɔk tɛ Nabot sɛnɛ‘i.› »

²⁰Akab tɔ̧ɔ̧ ha̧ Elii: «Ho! Wisɛn kɔ‘m, mɛ kpaa'm woyo na nde!» Elii kifa nú: «Mi kpaa mɛ woyo wen nɛ̀ mɛ dee gasa ɗaŋmɔ yí GASA WAN.

²¹A̧ tɔ̧a: ‹Mi tɛ fo ɗaŋmɔ pi̧ zu mɛ, mi tɛ ɗaŋ mɛ yinɛ, mi tɛ fo o wiwii yinɛ tɛ kɔ-mɛ, kóó nɛ́ bara, kóó nɛ́ o bíí nɛ̀ bo nɛ́ bara na sɛn Israɛl.

²²Mi tɛ de mɔ in o bíí nutua kɔ-mɛ hee mɔ'ɔ n'am dee so nɛnɛ in o bíí nutua ko Jeroboam, bem ko Nɛbat ká bá nɛ̀ o bíí nutua ko Baesa bem ko Ahiya ga, wen zu ɗaŋmɔ nɛ mɛ dea, in wan nɛ mɛ dee ha̧ o be Israɛl mɛ de mbɛt.›

²³GASA WAN tɔ̧ɔ̧ wen zu Jezabɛl mbɛt ndé, o toyo tɛ nyɔŋ Jezabɛl tɛ nú Yizreɛl.

²⁴Bíí nutua ko Akab nɛ tɛ fe saaye, o toyo tɛ nyɔŋ wa, ɓɛɛ wan mɛ zaŋbɛɛ, o nɔ̧́í̧ tɛ nyɔŋ wa.»

²⁵Ŋma bíí nɛ pi̧i̧ tɛ, tɛ dee ɗaŋmɔ yi Sɔ̧ hee Akab ga wen nɛ̀ kóò kɔ̧-a̧ Jezabɛl ɔra a̧ bo na.

²⁶A̧ dee o ɗaŋmɔ nɛ̀ dɔka-a nɛ́ nɛ̀ ɗoŋ o géé-sɔ̧, nyɛm ŋmaa in o be Amɔr nɛ̀ GASA WAN ndaka so yinɛ tɛ nù kɔ-wa ti o be Israɛl.

²⁷Akab a̧ka̧ laa sɛn tɛ tɛ́ ŋgimbi n'aa zia wen'i, ɓɛɛ pi̧ nɛ́ laa-bufu; a̧ zima yì, a̧ ɔ so nɛ̀ oi bufu'i, yar nɛnɛ nɛ̀ ga̧a̧-tɛ.

²⁸Ɓɛɛ GASA WAN tɔ̧ ha̧ Elii, be Tisbe hee mɔ'ɔ ga:

²⁹«Mɛ zɔka hee mɔ'ɔ nɛ̀ Akab duka si ɗɔɔ sɛn ti'm ga nde? Hee mɔ'ɔ n'aa yuu am ga, mi beka e ha̧ ŋma bɔnɛ mɛ hɔ tɛ ŋgimbi kɔ̧-a̧ na; mɛ̀ nɛ́ tɛ ŋgimbi ko o bem kɔ̧-a̧ a̧‘m tɛ fo nɛ̀ bɔnɛ‘i pi̧ zu o bíí nutua kɔ̧-a̧.»