Read Northwest Gbaya 1 WANNU 22 Bible Online

1 WANNU 22 - Northwest Gbaya bible

1 WANNU 22

¹Dee pɛ taar nɛ̀ o be Aram in o be Israɛl bi ŋmaa na.

²Tɛ taar pɛ, Josafat wannu Juda zira sitɛ wannu Israɛl mɛ zɔk a̧.

³Wannu Israɛl tɔ̧ɔ̧ so ha̧ o wi-de-tom kɔ‘i ndé: «Ɛ́nɛ́ iŋa'e, Ramot nú Galad duk nɛ́ k’ɛɛ, ɓɛɛ ɛ́ɛ́ nik nɛ́ naŋ yɛ tɛ baa a̧ er wannu Aram.»

⁴A̧ aka Josafat: «Mɛ kɔ̧ɔ̧ mɛ́ nɛ̀ in am mɛ bi Ramot nú Galad nde?» Josafat kifa nú ha̧ wannu Israɛl: «Mɔ nɛ̀ tɛ kpa mɛ tɛ kpa'm; mɔ nɛ tɛ kpa o bíí kɔ-mɛ tɛ kpa o bíí kɔ‘m, ɓɛɛ mɔ nɛ tɛ kpa o nyaŋa kɔ-mɛ tɛ kpa o nyaŋa kɔ‘m mbɛt.»

⁵Ɓɛɛ Josafat tɔ̧ɔ̧ ha̧ wannu Israɛl woyo: «Mɛ̀ kíí mgbara wen ko GASA WAN sɛ.»

⁶Wannu Israɛl mɔi̧a o wi-tɔ̧-wen oi nú Sɔ̧ kɔ‘i hee gɔmŋmaa-naar ga, ɓɛɛ ak wa: «A̧‘m nɛ́ɛ̀ bi Ramot nú Galad náà, kóó ká‘m nɛ na nde?» Wa kifa nú: «Ɛ̀nɛ̀ nɛ̀, GASA WAN tɛ e nù‘i kɔ̧ er wannu.»

⁷Josafat aka mɔ woyo: «Ŋma wi-tɔ̧-wen oi nú Sɔ̧ bo hɛ̧ɛ̧ ha̧ a̧ mɛ ak GASA WAN h’ɛ́ɛ́ na nde?»

⁸Wannu Israɛl tɔ̧ɔ̧ ha̧ Josafat: «Ŋma bíí a̧a̧ sɛnɛ n’ɛɛ nyɛma mɛ ak mgbara taamɔ ko GASA WAN nɛ̀ ɗoŋ-aa, ɓɛɛ kɔ‘m, mi kɔ̧ a̧ na, wen a̧ tɔ̧ wen-tɛ‘m de na, kànà nɛ́ ɗaŋ wen. Wi’ɛi nɛ́ Michee bem ko Yimla.» Josafat tɔ̧a̧: «Wannu, k’ɛ́nɛ́ tɔ̧ wen hegɔ na!»

⁹Wannu Israɛl saa ŋma gasawi tɛnɛ ɓɛɛ tɔ̧ ha̧ a̧: «Mɛ̀ nɛ́ɛ̀ sa Michee bem ko Yimla tɛnɛ nɛ̀ haya-a.»

¹⁰Wannu Israɛl in Josafat wannu Juda pi̧i̧ so nɛ́ laa-wan; ɓɛɛ wa ya zu damti sɛn bee-gara nú ye Samarii. O wi-tɔ̧-wen oi nú Sɔ̧ lɛŋ tɔ̧ so nɛ wen oi nú Sɔ̧ sɛn ti wa.

¹¹Sidekia bem ko Kenana ɗafa ŋma zak nɛ̀ boi e zu ɓɛɛ tɔ̧: «GASA WAN'e ndé, ɛnɛ tɛ gɔm Aram nɛ̀ o zak nɔ'ɔ gbɛ.»

¹²Ɓɛɛ o wi-tɔ̧-wen oi nú Sɔ̧ lɛŋ tɔ̧ nɛ kpɔk wen'e ndé: «Ɛ̀nɛ̀ dáŋ si Ramot nú Galad! Ɛnɛ tɛ gbin biro! GASA WAN tɛ e ye'i er'nɛ́.»

¹³Betom nɛ̀ nɛ̀ɛ̀ so mɛ sa Michee tɔ̧ɔ̧ ha̧ a̧: «O wi-tɔ̧-wen oi nú Sɔ̧ ko wannu lɛŋ tɔ̧ nɛ de wen tɛ-a; hegɔ, wen kɔ-mɛ a̧ nɛ́ kànà nɛ́ ɗoŋ kɔ-wa mbɛt! Mɛ̀ tɔ̧́ nɛ́ de wen.»

¹⁴Michee tɔ̧a̧: «Hee GASA WAN duk kpasa ga, nɛ́ wen n'aa tɛ tɔ̧ ha̧‘m a̧‘m tɛ tɔ̧.»

¹⁵A̧ hɔɔ tɛ wannu, ɓɛɛ wannu ak a̧: «Michee, ɛ̀ɛ̀ nɛ́ɛ̀ bí Ramot nú Galad náà, kóó k’ɛɛ nɛ na nde?» A̧ kifa nú: «Ɛ̀nɛ̀ nɛ́! Ɛ́nɛ́ tɛ gbin biro, GASA WAN tɛ e ye'i kɔ̧ er wannu.»

¹⁶Wannu tɔ̧ɔ̧ ha̧ a̧: «Mɛ̀ nɛ́ war géè a̧‘m tɛ de nɛnɛ ha̧ mɛ mɛ kan mɔ tɔ̧ nɛ̀ kpasawen nɛ̀ nin GASA WAN ha̧‘m ge?»

¹⁷Michee kifa nú: «Mi zɔka o be Israɛl nɛ̀ pɛsa dam zu kaya hee o sami nɛ̀ wi-dai-a bo na ga; GASA WAN tɔ̧a̧: ‹O wi nɔ'ɔ bó nɛ̀ wi-dai-wa ɓɔna; kóó o ndé a̧ sí ɗoŋ tɛ kɔ‘i zaŋ ga̧a̧mɔ.› »

¹⁸Wannu Israɛl tɔ̧ɔ̧ ha̧ Josafat: «Bo nɛ mi baa tɔ̧ so ha̧ mɛ na nde? A̧ tɔ̧ ŋma de wen-tɛ‘m na, kànà nɛ́ ɗaŋ wen ɓɛɛ!»

¹⁹Michee tɔ̧a̧: «Ɛ̀nɛ̀ zíí wen ko GASA WAN; mi zɔka GASA WAN fara duk nù zu damti kɔ‘i in o gíí wi-biro mɛ yiwese nɛ̀ ya ŋgɔn katɛ a̧ nɛ̀ war wiiko in nɛ̀ war gale mbɛt,

²⁰ɓɛɛ GASA WAN ak wa: ‹Mɛ̀ nɛ́ o'o tɛ ɔr Akab mɛ́ nɛ̀ biro sɛn Ramot nú Galad ha̧ a̧ mɛ fe o?› Ɓɛɛ ger wen kɔ-wa ye ŋmaa na.

²¹Ŋma ɔmi gboo pii ti yor ti GASA WAN, ɓɛɛ tɔ̧: ‹Nɛ́ mi'i tɛ ɔr a̧.› GASA WAN aka a̧: ‹Mɛ tɛ ɔr a̧ hee ge?›

²²A̧ kifa nú: ‹Mi tɛ nɛ ɓɛɛ mi tɛ duk nɛ́ ɔmi-ndela kɔ̧ nú o wi-tɔ̧-wen oi nú Sɔ̧ kɔ̧-a̧ lɛŋ.› GASA WAN tɔ̧ɔ̧ ha̧ a̧: ‹Mɛ tɛ ɔr a̧; mɛ a̧a̧ nɛ̀ ŋgai mɛ de hegɔ. Mɛ̀ nɛ́, ɓɛɛ mɛ̀ dé hegɔ.› »

²³«Kà GASA WAN a̧ ee ɔmi-ndela kɔ̧ nú o wi-tɔ̧-wen oi nú Sɔ̧ kɔ-mɛ lɛŋ, mɛ̀ nɛ́ wen nɛ̀ tɔ̧ a̧ nɛ̀ tɛ-a tɔ̧ nɛ wen ɗaŋmɔ zu mɛ.»

²⁴Sidekia bem ko Kɛnana ɗɔŋa siti, mbɛr ká̧ yí Michee, ɓɛɛ tɔ̧: «Ɔmi ko GASA WAN gboo tɛ‘m nɛ̀ déè, sa tɔ̧ nɛ̀ wen ha̧ mɛ ge?»

²⁵Michee tɔ̧a̧: «Mɛ tɛ zɔk, wese nɛ̀ mɛ tɛ hu̧si nɛnɛ nɛ kɔ̧ gɔna-bɛr-tua nɛnɛ.»

²⁶Wannu Israɛl tɔ̧a̧: «Ɛ̀nɛ̀ bá Michee, ɛ̀nɛ̀ mgbɔ́ a̧ siɗoŋ ha̧ wanye Amɔŋ in ha̧ Jɔas bem ko wannu,

²⁷ɓɛɛ mɛ tɔ̧ ha̧ wa: ‹Wen ko wannu nɛ mɔ'ɔ: Ɛ̀nɛ̀ pí̧ wi’ɛ kɔ̧ zɔɓɔ, ɓɛɛ ɛ̀nɛ̀ há̧ nɛ́ be brɛt in yì kɛ̧́ɛ̧́ ha̧ a̧ ɓɛɛ, hɔ ŋgimbi n'am tɛ pii, ŋma mɔ kpa'm na.› »

²⁸Michee tɔ̧a̧: «Kà mɛ nɛ́ pia nɛ mbetɛ, ŋma mɔ kpa mɛ na, ɓɛɛ GASA WAN tɔ̧ wen nɛ̀ nú‘m na.» Ɓɛɛ a̧ tɔ̧ woyo: «Ɛ̀nɛ̀ zíí wen'i, ɛnɛ o bíí lɛŋ!»

²⁹Wannu Israɛl in Josafat wannu Juda kura mɛ nɛ̀ɛ́ bi biro sɛn Ramot nú Galad mɛ.

³⁰Wannu Israɛl tɔ̧ɔ̧ ha̧ Josafat: «Mi tɛ kpai laa ha̧‘m mɛ ye biro, ɓɛɛ nɛ̀ kɔ-mɛ, mɛ̀ dúk nɛ̀ oi laa kɔ-mɛ.» Wannu Israɛl kpaia laa, ɓɛɛ ye biro.

³¹Wannu Aram ha̧a̧ so nú ha̧ wi-duk-zu o wan keekee-nyaŋa kɔ‘i ɓu-taar-zua-yiitoo hee mɔ'ɔ ga: «Ká wa fo tɛ o bem, kóó gasawi na, ɓɛɛ kànà nɛ́ wannu Israɛl kpɔk ɓɛɛ.»

³²O wan ko o wi-daŋ keekee-nyaŋa zɔka Josafat ɓɛɛ tɔ̧: «Wannu Israɛl nɛ́ mɔ'ɔ mɛ‘i, ndela bo na!» Ɓɛɛ wa gbo biro sitɛ a̧. Josafat ŋmaa nú tɛ hiɗimɔ,

³³ɓɛɛ ŋgimbi nɛ̀ o wan ko o wi-daŋ keekee-nyaŋa zɔka a̧ bó nɛ́ wannu Israɛl na, wa ee a̧ duk.

³⁴Ŋma bíí pi̧i̧ kɔ‘i góò nɛ̀ nú tum, ɓɛɛ tok wannu Israɛl nɛ̀ woi laa-biro. Wannu tɔ̧ɔ̧ ha̧ wi ba keekee-nyaŋa kɔ‘i: «Mɛ̀ zík nú nyaŋa a̧ mɛ̀ bá‘m gbonɛ yí-biro, wen mi baa da̧i̧.»

³⁵Wese'i, biro ŋgaia batɛ, ɓɛɛ wa e wannu ɓɔn kɔ̧ keekee-nyaŋa sɛn nú ye Aram, ɓɛɛ a̧ fe mɛ ga̧a̧mɔ. Tɔk tɛ-a foka a kɔ̧ keekee-nyaŋa.

³⁶Ŋgimbi yee-wese, wa hiɗa mɔ hee mɔ'ɔ ga kɔ̧ gbagari: «Kóó o ndé a̧ sí saaye kɔ‘i, kóó o ndé a̧ sí tɛ nù kɔ‘i!»

³⁷Ɗoŋ fio ko wannu, wa baa a̧ si Samarii, ɓɛɛ wa gun a̧ hi̧i̧.

³⁸Ŋgimbi nɛ wa fɔr nɛ́ keekee-nyaŋa ɗɔɔ gasa gɔna-yì sɛn Samarii, nɛ̀ o toyo ndal nɛ́ tɔk tɛ Akab'i, o kó-de-mɔ nɛ̀ mbɔɗɔnu ya so kɔ‘i zui nɛ̀ yì nyɛm nɛ̀ ɗoŋ wen nɛ̀ GASA WAN baa tɔ̧ so.

³⁹Oi o tom ko Akab, mɔ lɛŋ n'aa dea, tua-gba̧a̧-nin-fɔrɔ n'aa mboa, in o ye n'aa mboa yɔra zaŋ Kalata Nyɛrɛ ko o wannu Israɛl.

⁴⁰Akab sii ɗoŋ tɛ o dáà kɔ‘i, ɓɛɛ bem kɔ̧-a̧ Akazias ɔ wan oi-aa.

⁴¹Tɛ naar pɛ-wan ko Akab wannu Israɛl, Josafat bem ko Asa ɔɔ wan Juda.

⁴²Josafat a̧a̧ so nɛ̀ pɛ ɓu-taar-zua-mɔɔrɔ ŋgimbi n'aa ɔɔ nɛ wan, ɓɛɛ a̧ ɔ wan pɛ ɓu-yiitoo-zua-mɔɔrɔ sɛn Jerusalɛm; nin nàà kɔ̧-a̧ nɛ́ Azuba boko-bem ko Sili.

⁴³A̧ nɛɛ ɗoŋ dáà kɔ̧-a̧ Asa tɛ yuwar mɔ lɛŋ, a̧ e ŋma mɔ duk na, de nɛ̀ mɔ nɛ yuwar-a ti GASA WAN.

⁴⁴Mɔ kpɔk, o fara-ɗafi géé-sɔ̧ mɛ kusa-fara kaɗi na: dukbíí ɓɔna kànà tɛ ɗafa sɔ̧ in dɔɔ fuu-nyama zu o fara-ɗafi géé-sɔ̧.

⁴⁵Josafat nɔɔ tɔk wen ga̧a̧mɔ mgbara a̧ in wannu Israɛl.

⁴⁶Oi o tom ko Josafat, o ŋgayamɔ n'aa dea in o biro kɔ̧-a̧ yɔra zaŋ Kalata Nyɛrɛ ko o wannu Juda.

⁴⁷A̧ ndaka o wiwii-de-dàlà mɛ fara-ɗafi-sɔ̧ nɛ ɓɔna so tɛ ŋgimbi ko dáà kɔ̧-a̧ Asa hɔ tɛ ŋgimbi kɔ̧-a̧ yinɛ.

⁴⁸Tɛ ŋgimbi'i, ŋma wan bo so sɛn nú Edɔm na.

⁴⁹Josafat a̧a̧ so nɛ̀ kombon ɓu sɛn Tarsis mɛ nɛ̀ɛ́ kai lɔr sɛn Ofir. Mɔ kpɔk, wa nɛ́ hɔ ti na, wen o kombon kɔ̧-a̧ mbaŋa sɛn Ɛsiɔŋ-Gebɛr.

⁵⁰Akazias bem ko Akab tɔ̧ɔ̧ ha̧ Josafat: «O wi-de-tom kɔ‘m a̧ nɛ́ kpɔk in o wi-de-tom kɔ-mɛ.» Ɓɛɛ Josafat bɛ̧.

⁵¹Josafat fea, ɓɛɛ wa gun a̧ saaye ko zɔmdáa kɔ̧-a̧ David. Nɛ́ bem kɔ̧-a̧ Yoram a̧ ɔɔ wan oi-aa.

⁵²Akazias bem ko Akab ɔɔ wan zu Israɛl sɛn Samarii tɛ pɛ ɓu-zua-mɔɔrɔ-ɗoŋ-yiitoo pɛ-wan ko Josafat, wannu Juda; a̧ ɔɔ wan pɛ yiitoo zu Israɛl.

⁵³A̧ dee mɔ ɗaŋ see GASA WAN, ɓɛɛ ba kɔ‘i nɛ yuwar ko dáà in nàà kɔ‘i nɛ baa so. Kpɔk mɔ‘i nɛ́ mɔ'ɔ nɛ̀ Jeroboam bem ko Nɛbat dee so mgbɔ nɛ̀ o be Israɛl pi̧ tɛ ɗaŋmɔ.

⁵⁴A̧ dee tom ha̧ géé-sɔ̧ Bal, ɓɛɛ gu nù ti a̧; a̧ tu̧u̧ see GASA WAN Sɔ̧ ko Israɛl hee mɔ'ɔ nɛ̀ dáà kɔ̧-a̧ dee so kànà ga.