Read Northwest Gbaya 1 WANNU 3 Bible Online

1 WANNU 3 - Northwest Gbaya bible

1 WANNU 3

¹Salomɔŋ kifa be-for Faraɔŋ wannu Egiptɛ tɛ báá boko-bem kɔ̧-a̧ nɛ̀ kóò. Wa mgbɔɔ kóò‘i e kɔ̧ tua tɛ ye ko David, wen ha̧ tom-tua ko Salomɔŋ in Tua ko GASA WAN ba nɛ̀ garo nɛ̀ wa mbo zik nɛ̀ gasa ye Jerusalɛm mɛ kaɗi sɛ.

²Mɔ kpɔk, o bíí ɓɔna tɛ ɗafa sɔ̧ sɛn zu o kusa-fara wen nɛ wa tɛ de Tua ko GASA WAN hɔ̧ɔ̧ na.

³Salomɔŋ kɔ̧ɔ̧ GASA WAN, ɓɛɛ a̧ kasi heembea ko dáà kɔ̧-a̧ David; zu-a'i, a̧ ɗafa sɔ̧ dɔ nɛ fuu-nyama sɛn zu o kusa-fara.

⁴Wannu Salomɔŋ nɛ̀ɛ́ sɛn Gabaɔŋ mɛ ɗafi sɔ̧ wen mɛ̀ nɛ́ ŋma kusa-fara nɛ dee nyɛmna. A̧ dɔɔ kpoo-sɔ̧ hi̧i̧ tɛ dùk-aa booro-kpɔk ɗafi nɛ̀ sɔ̧.

⁵Sɛn Gabaɔŋ mɛ zɛ, GASA WAN hɔɔ zu ha̧ Salomɔŋ; ɓɛɛ tɔ̧ ha̧ a̧: «Mɛ̀ ák mɔ nɛ mɛ kɔ̧a̧, ɓɛɛ mi tɛ ha̧ mɛ.»

⁶Salomɔŋ kifa nú: «Ɛ́nɛ́ usa so gasa kɔ̧ɔ̧mɔ k’ɛ́nɛ́ ha̧ wi-de-tom k’ɛ́nɛ́ dáà kɔ‘m David, wen a̧ nɛ̀ɛ́ nɔ̀ ti'nɛ́ nɛ̀ yuwar-a tɛ deemɔ nɛ̀ de-a in nɛ̀ sa̧a̧-see; ɛnɛ yora ɗoŋ wen k’ɛ́nɛ́ ha̧ a̧, hegɔ, ɛnɛ dee ha̧ ŋma bem kɔ̧-a̧ mɛ duk zu damti kɔ̧-a̧ sɔsɔɔ.

⁷Kinii, GASA WAN Sɔ̧ kɔ‘m, ɛnɛ ee wi-de-tom k’ɛ́nɛ́ nɛ̀ wannu oi dáà kɔ̧-a̧ David; ɓɛɛ mi nɛ daŋa ŋgaiwi géè, mi iŋ dee tom-wan na.

⁸Wi-de-tom k’ɛ́nɛ́ a̧a̧ zu dukbíí k’ɛ́nɛ́ n’ɛnɛ hoka, mɛ̀ nɛ́ giiwi nyɛmna nɛ‘i beka tɔr pi̧ nù na.

⁹Hegɔ ɛ̀nɛ̀ há̧ iŋa-mgbara-mɔ ha̧‘m mɛ ɔ wan zu dukbíí k’ɛ́nɛ́ nɛ̀ yuwar-a in ha̧‘m mɛ iŋ kɛ̧ɛ̧ mgbara demɔ in ɗaŋmɔ; kà bó hegɔ na, nɛ́ o'o nyɛma mɛ ɔ wan zu dukbíí k’ɛ́nɛ́ nɛ̀ dɔka hegɔ'ɔ o?»

¹⁰Akamɔ ko Salomɔŋ dee tɛ GASA WAN,

¹¹ɓɛɛ Sɔ̧ tɔ̧ ha̧ a̧: «Hee mɔ'ɔ nɛ mɛ aka mɛ kpa nɛ́ iŋa-mgbara-mɔ, wen ɔɔ wan nɛ yuwar-a, bo nɛ mɛ aka nɛ́ duka-a zaŋnu ɗoŋ-aa nyɛi̧ na, kóó nɛ́ kpaa dɔka mɔ na, kóó nɛ́ fio ko wisɛn kɔ-mɛ na mbɛt ga,

¹²mi tɛ de mɔ nyɛm nɛ̀ ɗoŋ akamɔ kɔ-mɛ. Mi ha̧a̧ iŋa-mgbara-mɔ in iŋamɔ ha̧ mɛ nɛ̀ bíí nɛ̀ wa kòò ti ha̧ mɛ, in wan nɛ̀ wa tɛ ko nɛ̀ ɗoŋ mbɛt beka kpa na.

¹³Mɔ nɛ mɛ ak na mbɛt, mi ha̧a̧ ha̧ mɛ. Mgbara o wan lɛŋ, wi nɛ nin-a tɛ hur ká kpaa dɔka mɔ in zɔnamɔ hee mɛ ga bo tɛ ŋgimbi duka-a kɔ-mɛ zu nù'ɛ na.

¹⁴Kà mɛ nɛ́ nɔ̀ tɛ yuwar kɔ‘m, kà mɛ kásí o heembea in o geŋa kɔ‘m hee dáà kɔ-mɛ David dee so ga, mi tɛ de ha̧ mɛ mɛ duk zu nù ɗoŋ-aa nyɛi̧.»

¹⁵Salomɔŋ tuna tɛ ɔɔ-zu'i. A̧ pia ɗoŋ Jerusalɛm, ɓɛɛ a̧ nɛ́ɛ̀ yor ti Kuɓa nɔɔ-tɔk ko GASA WAN; a̧ dɔɔ kpoo ɗafi nɛ sɔ̧; a̧ ha̧a̧ mɔɔ-gaŋmɔ, ɓɛɛ a̧ de gbaŋa ha̧ o bíí kɔ̧-a̧ lɛŋ.

¹⁶Ŋma wese, o ŋma kó-de-mɔ nɛ mbɔɗɔnu yiitoo tɛɛ tɛ wannu.

¹⁷Kuti-a tɔ̧a̧: «Nyaa, mi aia nú h’ɛ́nɛ́, ɛ̀nɛ̀ zíí wen n'am tɛ tɔ̧‘i: kóò'ɛ in am, ɛɛ ɔ kɔ̧ tua kpɔk, ɓɛɛ nɛ́ mɔ'ɔ n'am kòó nɛ̀ gbaa yí-a.

¹⁸Dee zɛ taar, ɓɛɛ kóò'ɛ ko bem mbɛt; ɛɛ duk kpɔk in ŋmaa, ŋma bíí hɔ kɔ̧ tua k’ɛɛ na; kànà nɛ́ ɛɛ yiitoo ɓɛɛ.

¹⁹Bem ko kóò'ɛ fea wen n'aa ɔɔ zu a̧;

²⁰nɛ́ mɔ'ɔ n'aa kura mɛ ɗuka-zɛ, ba bem kɔ‘m sɛn katɛ‘m ŋgimbi nɛ kó-de-tom k’ɛ́nɛ́ ɓɔna fara ɔ ya. A̧ baa bem kɔ‘m gu yí ŋguɗi-a, ɓɛɛ a̧ ba wɔr bem kɔ̧-a̧ gu yí ŋguɗ‘am.

²¹Mi kura mɛ gɔnamɔ mɛ e bere nú bem kɔ‘m, ɓɛɛ mi zɔk a̧ fea. Nɛ̀ mɔ sa̧a̧, mi mbaɗa a̧, ɓɛɛ bo nɛ bem kɔ‘m n'am koa'i na.»

²²Ɓii kóò‘i tɔ̧a̧: «Bem kɔ‘m nɛ́ wan nɛ̀ duk kpasa'i, ɓɛɛ bem kɔ-mɛ nɛ́ wan nɛ̀ fea'i.» Ɓii sɛm kɔ̧-a̧ kifa nú: «Bo nɛ kpasa wen na, bem’ɛi nɛ́ bem kɔ-mɛ, ɓɛɛ bem kɔ‘m nɛ́ mɔ'ɔ nɛ̀ duk kpasa’ɛ.» Wa kpɛra hegɔ ti wannu.

²³Wannu Salomɔŋ tɔ̧a̧: «Ɛ̧ɛ̧ kóò'ɛ hee, bem kɔ‘i nɛ́ mɔ'ɔ nɛ̀ duk kpasa'i, bem kɔ-mɛ nɛ́ mɔ'ɔ nɛ̀ fea'i; ɓɛɛ ɓii-aa mbɛt'e, bó nɛ́ kpasawen na, bem kɔ-mɛ nɛ́ mɔ'ɔ nɛ̀ fea'i, ɓɛɛ kɔ‘i nɛ́ wan nɛ̀ duk kpasa'i ɛ̧!

²⁴Kaɗa, ɛ̀nɛ̀ bá ŋma gba-paa tɛnɛ ha̧‘m.» Ɓɛɛ wa ba gba-paa tɛnɛ ha̧ a̧.

²⁵Wannu tɔ̧a̧: «Ɛ̀nɛ̀ ɓír bem’ɛ nɛ̀ duk kpasa’ɛ tan see-a, ha̧ okoo nɔ'ɔ bá ɓira-a kpɔk kpɔk.»

²⁶See mgbák nàà ko bem nɛ̀ duk kpasa'i ɗaŋa nyɛmna, ɓɛɛ a̧ tɔ̧ ha̧ wannu: «Wen ge nde dáà, ɛ̀nɛ̀ há̧ bem’ɛ nɛ̀ kpasa ha̧ a̧; k’ɛ́nɛ́ gbɛ a̧ na.» Ɓɛɛ ɓii kóò‘i tɔ̧: «Bem’ɛi beka duk nɛ́ kɔ-mɛ na, a̧ bo nɛ́ kɔ‘m na mbɛt; ɛ̀nɛ̀ kɛ̧́ a̧.»

²⁷Ɓɛɛ wannu Salomɔŋ e zu wen: «Ɛ̀nɛ̀ há̧ bem’ɛi ha̧ okoo nɛ tɔ̧a̧‘e, ká‘i gbɛ a̧ na'i; k’ɛ́nɛ́ ɓir bem’ɛi ɓɔna, mgbák nàà kɔ̧-a̧ a̧‘i.»

²⁸O bíí Israɛl yuu kíí wannu nyɛmna, ŋgimbi nɛ wa zia nɛ̀ gɔna-kita'i. Wa zɔka iŋa-mgbara-mɔ ko Sɔ̧ a̧a̧ sɛn tɛ-a, wen gɔna kita nɛ̀ yuwar-a.