Read Northwest Gbaya 1 WANNU 5 Bible Online

1 WANNU 5 - Northwest Gbaya bible

1 WANNU 5

¹Salomɔŋ ɔɔ wan zu nù lɛŋ, ku̧u̧naŋ-a tɛ foka-yí Efrat hɔ saaye ko o be Filistii hɔ nɛnɛ nú Egiptɛ mɛ. O wan fara nɔ‘i duka yoɓi nɛ garama ha̧ a̧, de nɛ tom ha̧ a̧ hɔ wese fio kɔ̧-a̧.

²Sɛn tɛ wese kpɔk, nyɔŋmɔ ko o bíí ko Salomɔŋ nɛ́ kilo mɔka fuu booro-mɔɔrɔ-ɗoŋ-naar in kilo fuu nɛ̀ mɔk gan na booro-ɓu-zua-mɔɔrɔ-ɗoŋ-taar, kpánà géé nyɔŋmɔ booro-ɓu,

³ŋmaŋa ndai ɓu, o gee ndai ɓu-yiitoo, sami gɔmŋmaa, sɛka o saɗi nɛ̀ hɔɔ ŋmaa in zambɛrɛ, o kalamba, o kɔɗɛ gú nɛ̀ o gasa nɔ̧́í̧-yì nɛ̀ dee nɔ̧́ nyɛmna.

⁴Salomɔŋ ɔɔ wan zu nù lɛŋ ku̧u̧naŋ nɛ̀ Tifsak ye mgbák nú yí Efrat gɔm Gaza; mɔ duka nɛ̀ ga̧a̧-a̧ mgbara a̧ in o bíí nɛ̀ ɔ zik a̧ lɛŋ.

⁵O be Juda in o be Israɛl lɛŋ yaa tɛ ga̧a̧mɔ, kóó o ndé duka ɗɔɔ gi̧ɔ̧ nyak-dɔ̧ɔ̧ in gi̧ɔ̧ te-mbɔra kɔ‘i, ku̧u̧naŋ-a nɛ Dan hɔ Bɛrseba sɛn tɛ ŋgimbi lɛŋ nɛ Salomɔŋ ɔɔ nɛ wan.

⁶Salomɔŋ a̧a̧ so nɛ̀ fara-a nyaŋa-keekee booro-ɓu-naar, ɓɛɛ o wi-daŋ-nyaŋa nɔ‘i nɛ́ booro-ɓu-zua-yiitoo.

⁷Zaŋ fio-zɛ kpɔk kpɔk, o gasa wi-duk-zu zika-nù tɛ ba nyɔŋmɔ tɛnɛ ha̧ wannu Salomɔŋ in o bíí nɛ̀ ya in a̧ fara-nyɔŋ-mɔ wen ká ŋma mɔ tɛɛ ɓan wa.

⁸O wi nɔ‘i kpɔk kpɔk ba nɛ nyɔŋmɔ in o hoe tɛnɛ tɛ ŋgimbi-a ha̧ o nyaŋa-keekee in o saɗi-de-tom sɛn fara nɛ̀ wannu duk sɛnɛ.

⁹Sɔ̧ ha̧a̧ iŋa-mgbara-mɔ in iŋamɔ in ɗuka taamɔ nɛ‘i nyɛm mɛ tɔ̧ na ha̧ Salomɔŋ.

¹⁰Iŋa-mgbara-mɔ ko Salomɔŋ gana ko o bíí mɛ daŋa-wese in o bíí Egiptɛ lɛŋ.

¹¹Bíí kpɔk kpa iŋa-mgbara-mɔ hee a̧ ga na. A̧ iŋa mgbara mɔ gan Elam be Ɛzra in Heman, Kalkɔl in Darda o bem ko Mahɔl. Nin-a hura mgbara o dukbíí nɛ̀ ɔɔ zik a̧ lɛŋ.

¹²A̧ tɔ̧ɔ̧ tua-wen booro-taar, ɓɛɛ o gima n'aa yɔra dee nɛ́ booro-nɛ-mɔɔrɔ.

¹³A̧ tɔ̧ɔ̧ wen ko o te, ku̧u̧naŋ-a nɛ̀ te gbatui mɛ Libaŋ hɔ nɛnɛ tɛ géé be-te[3] nɛ̀ gbo zaŋ ŋgeŋ. A̧ tɔ̧ɔ̧ wen ko o saɗi in o nɔ̧́í̧, o saɗi-gbur-zaŋ nɛ nu gú nɛ̀ o zoro mbɛt.

¹⁴O zuduk nɛtɛ nɛtɛ tɛɛ tɛ Salomɔŋ wen zia iŋa-mgbara-mɔ kɔ̧-a̧, o wannu zaŋnu lɛŋ nɛ̀ zia nyɛrɛ iŋa-mgbara-mɔ kɔ̧-a̧‘i toma o betom kɔ‘i tɛnɛ tɛ a̧ mbɛt.

¹⁵Hiram wannu Tir zia'e, wa tɛna nɔ̧́ a zu Salomɔŋ de nɛ wan oi dáà kɔ̧-a̧ ha̧ a̧, ɓɛɛ a̧ tom wi-de-tom tɛnɛ tɛ a̧, wen Hiram in wannu David yaa so nɛ́ o de sɛm.

¹⁶Salomɔŋ toma tɔ̧ ha̧ Hiram hee mɔ'ɔ ga:

¹⁷«Mɛ iŋa nɛ̀ de-a'e, dáà kɔ‘m David de Tua ko GASA WAN Sɔ̧ kɔ̧-a̧ na, wen o biro nɛ̀ wisɛn nɛtɛ nɛtɛ dee in a̧ hɔ ŋgimbi nɛ GASA WAN ee o wisɛn kɔ̧-a̧ nɔ‘i lɛŋ ɗɔɔ naŋ-a.

¹⁸Ɓɛɛ kinii, ká̧ zika-nù kɔ‘m lɛŋ, GASA WAN Sɔ̧ kɔ‘m ha̧a̧ ɔma-tɛ ha̧‘m; o wisɛn bo ɓɔna, kíì ŋgayamɔ nɛ̀ tɛ hɔ bo na mbɛt.

¹⁹Mi ta nɛ mɔ mɛ de Tua wen nin GASA WAN Sɔ̧ kɔ‘m nyɛm nɛ̀ ɗoŋ mɔ nɛ GASA WAN tɔ̧ɔ̧ so ha̧ dáà kɔ‘m hee mɔ'ɔ ga: ‹Mɛ̀ nɛ́ bem kɔ-mɛ n'am tɛ e zu damti oi mɛ‘i a̧ tɛ de Tua ha̧‘m.›

²⁰Kinii, mɛ̀ tɔ̧́ ha̧ wa mɛ gɔm o gbatui Libaŋ ha̧‘m; o wi-de-tom kɔ‘m tɛ de tom in kɔ-mɛ kpɔk; mi tɛ ha̧ sede-tom ko wi-de-tom kɔ-mɛ nɛ̀ mɛ tɛ gɔn'i ha̧ mɛ, wen mɛ iŋa ŋma bíí tɛ k’ɛɛ nɛ̀ iŋa gɔma te hee o be Sidɔŋ ga, bo na.»

²¹Ŋgimbi nɛ Hiram zia wen nɛ Salomɔŋ tɔ̧a̧‘i, a̧ kpaa desee nyɛmna, ɓɛɛ a̧ tɔ̧: «Zɔnamɔ a̧ dúk nɛ́ ko GASA WAN, wen n'aa ha̧a̧ iŋa-mgbara-mɔ ha̧ bem ko David mɛ ɔ wan zu zɔm dukbíí hegɔ.»

²²Ɓɛɛ a̧ tom kifa-nú ha̧ Salomɔŋ hee mɔ'ɔ ga: «Mi zia tom kɔ-mɛ; mi tɛ ha̧ o gbatui in o zawaya[4] hee mɛ kɔ̧ɔ̧ ga ha̧ mɛ.

²³O wi-de-tom kɔ‘m tɛ kai nɛ̀ Libaŋ si ká̧ gba-tɔp mɛ. Mi tɛ hɛr o te nɔ‘i a ɗɔɔ yì hɔ fara nɛ mɛ tɛ usi ha̧‘m'i; kà wa nɛ́ hɔɔ hi̧i̧ kaɗi, mi tɛ gbur a zan, ɓɛɛ mɛ kaia wa. Ɓɛɛ kɔ-mɛ, mɔ n'am kɔ̧ɔ̧ ha̧ mɛ mɛ tom ha̧‘m nɛ́ o nyɔŋmɔ wen o bíí nutua kɔ‘m.»

²⁴Hegɔ Hiram toma o gbatui in o zawaya ha̧ Salomɔŋ nɛ̀ dɔka-a hee mɔ'ɔ nɛ̀ Salomɔŋ kɔ̧ɔ̧ ga.

²⁵Ɓɛɛ Salomɔŋ tom kɔ‘i nɛ́ kilo fuu alkamaari miliɔŋ-mɔɔrɔ-ɗoŋ-kpɔk in dak mbe nɔ̧́ booro-mɔɔrɔ-ɗoŋ-taar ha̧ o bíí nutua ko Hiram. Mɔ nɛ Salomɔŋ toma ha̧ Hiram dam ɗoŋ pɛ kpɔk kpɔk nɛ́ mɔ‘i.

²⁶Salomɔŋ kpaa iŋa-mgbara-mɔ hee mɔ'ɔ nɛ̀ GASA WAN ha̧a̧ so nú sɛnɛ ha̧ a̧ ga. Salomɔŋ in Hiram yaa nɛ́ o de sɛm, ɓɛɛ wa nɔ tɔk in ŋmaa.

²⁷Wannu Salomɔŋ hoka o ŋma wi-de-tom booro-ɓu-taar sɛn nú Israɛl lɛŋ.

²⁸Sɛn tɛ fio-zɛ kpɔk kpɔk, a̧ tom nɛ wi-de-tom booro-ɓu nɛnɛ Libaŋ kpai nɛ̀ ŋmaa wen dee tom hi̧i̧ tɛ fio-zɛ kpɔk, ɓɛɛ wa pia de fio-zɛ yiitoo ye kɔ-wa. Nɛ́ Adoniram a̧ duk zu o wi-de-tom nɔ‘i.

²⁹O wi-tui-tui ko Salomɔŋ nɛ́ booro-ɓu-mɔɔrɔ-ɗoŋ-yiitoo, o wi nɛ̀ gba kɔ‘i nɛ́ tá-tua sɛn zu kaya nɛ́ booro-ɓu-mɔɔrɔ-ɗoŋ-taar.

³⁰Wi tɔr o gasawi nɛ̀ o gasa wi-duk-zu zika-nù ko Salomɔŋ hoka so wen duka-a zu tom na: wa nɛ́ booro-taar-nɛ-gɔmŋmaa-taar.

³¹Wannu ha̧a̧ nú ha̧ wa mɛ hok nɛ́ gasa ta, ɓɛɛ wa sɛka wen mboo naŋ-tua ko GASA WAN.

³²O wi-de-tom ko Salomɔŋ in ko Hiram gú nɛ̀ o be Gebal sɛka te in ta wen dee Tua ko Sɔ̧.