Read Northwest Gbaya 1 WANNU 6 Bible Online

1 WANNU 6 - Northwest Gbaya bible

1 WANNU 6

¹Pɛ yaka gɔmŋmaa-naar-zua-ɓu-mɔɔrɔɔ-ɗoŋ-taar ɗoŋ gboa-a ko o be Israɛl nɛ nú Egiptɛ, tɛ naar pɛ ɔɔ-wan ko Salomɔŋ zu Israɛl, tɛ zɛ Zif nɛ̀ duk nɛ́ yiitoo fio-zɛ, Salomɔŋ dee Tua ko GASA WAN.

²Zi̧a̧ Tua nɛ Salomɔŋ dee ha̧ GASA WAN duka nɛ́ mɛtrɛ ɓu-taar, pɛsa-a duka nɛ́ mɛtrɛ ɓu, ɓɛɛ kusa-a duka nɛ́ mɛtrɛ ɓu-zua-mɔɔrɔ.

³Zi̧a̧ zala nɛ̀ duk nú gasa bɛr-tua nɛ́ mɛtrɛ ɓu nyɛm nɛ̀ ŋmaa in pɛsa tua, ɓɛɛ zala'i ɔ ɗuka tɛ mɛtrɛ mɔɔrɔ.

⁴A̧ ee woi-tua ɓɛɛ a̧ fan boi e sɛnɛ.

⁵Wa dee ŋma geɗek tua taar zu ŋmaa ndaɗi nɛ̀ ŋgeŋ gasa bɛr-tua'i in wan mɛ ndaa tua.

⁶Pɛsa geɗek tua mɛ ɗɔɔ‘i nɛ́ mɛtrɛ yiitoo nɛ reeta; yiitoo tua'i nɛ́ mɛtrɛ taar, ɓɛɛ taar-a nɛ́ mɛtrɛ taar nɛ reeta. Wannu Salomɔŋ nyɛkɛ̧ɗa ŋgeŋ tua nɛ̀ ɗɔɔ daŋnɛ wen ká gaŋgala o geɗek tua nɔ‘i tɛɛ ye zaŋ ŋgeŋ gasa bɛr-tua.

⁷Ta Tua'i, wa gba zaŋbɛɛ mɛ lɛŋ; hegɔ ŋgimbi nɛ̀ wa de nɛ̀ Tua'i, wi zii gee giti dɔnɔ kà bá nɛ̀ kpi̧i̧, kóó giti boi na mbɛt.

⁸Nú Tua mɛ ɗɔɔ‘i duk nɛ̀ war wii-er; fara-daŋ-nɛnɛ sɛka'i hɔɔ kɔ̧ bɛr-tua mɛ see-a a̧a̧ sɛnɛ. Wi hɔ tɛ bɛr-tua see-a kaɗi, sɛka'i daŋa sitɛ taar-a mɛ ŋgɔn.

⁹Ɗoŋ nɛ̀ wannu Salomɔŋ dee Tua kaɗi lɛŋ, a̧ kpee zu a̧ nɛ̀ o pɛsa gbáá-te gbatui.

¹⁰A̧ dee o geɗek tua zik gasa-a kpa. O tua nɔ‘i zu ŋmaa taar'i, kusa wa kpɔk kpɔk nɛ́ mɛtrɛ yiitoo nɛ reeta. Gaŋgala te gbatui dee ha̧ geɗek tua nɔ‘i mɛ ye ŋmaa in gasa-a.

¹¹GASA WAN tɔ̧ɔ̧ wen ha̧ Salomɔŋ hee mɔ'ɔ ga:

¹²«Tua nɛ́ mɔ'ɔ nɛ̀ mɛ de’ɛ; kà mɛ nɛ́ nɔ̀ nyɛm nɛ ɗoŋ o heembea kɔ‘m, kà mɛ dé mɔ nyɛm nɛ ɗoŋ o yuwar duka-a kɔ‘m, ɓɛɛ kà mɛ kásí o geŋa kɔ‘m de nɛ̀ mɔ nyɛm sɛnɛ, mi tɛ de ha̧ wen kɔ‘m n'am tɔ̧ɔ̧ ha̧ dáà kɔ-mɛ David mɛ hɔ gba̧a̧.

¹³Mi tɛ duk mgbara o be Israɛl, mi beka e dukbíí kɔ‘m Israɛl duk na.»

¹⁴Salomɔŋ mboo Tua kaɗi lɛŋ,

¹⁵ɓɛɛ a̧ gɔn o bɛr-aa mɛ kɔ̧ a̧ nɛ̀ o gbáá-te gbatui nɛ̀ mbɔɗɔnu hɔ sɛn tɛ o te-ba-ger tua. A̧ aa o gbáá-te kpe nɛ̀ ŋgeŋ nɛ̀ kɔ̧ a̧, ɓɛɛ a̧ ɗafi mbɔɗɔnu nɛ̀ o gbáá-te zawaya.

¹⁶A̧ gɔna ŋma bɛr-tua nɛ̀ te gbatui si war ndaa tua wen ee Kuɓa nɔɔ-tɔk sɛnɛ; kusa bɛr-tua'i nɛ́ mɛtrɛ ɓu. Fara'i wa sa nɛ́ sa̧a̧-fara nyɛmna.

¹⁷Dura bɛr-tua nɛ̀ duk ti sa̧a̧-fara'i nɛ́ mɛtrɛ ɓu-yiitoo.

¹⁸Wa ɗafa tɛ te nɛ̀ wa aa kɔ̧ tua'i nɛ̀ yɔka-a, ɓɛɛ wa gɔn dap-aa nɛtɛ nɛtɛ hee mira o do-te[5] ga; wi zɔk géé zɔka ta na wen te gbatui kpee zu mɔ lɛŋ.

¹⁹A̧ ɗafa gasa bɛr-tua mɛ ndaa tua wen ee Kuɓa nɔɔ-tɔk ko GASA WAN sɛnɛ; fara'i nɛ́ sa̧a̧-fara.

²⁰Fara-ɗafi-sɔ̧ nɛ‘i dee nɛ̀ gbatui sɔ̧ nɛ̀ lɔr ɗoŋ-aa duka ti ha̧ sa̧a̧ bɛr-tua. Zi̧a̧-a̧ nɛ́ mɛtrɛ ɓu, pɛsa-a nɛ́ mɛtrɛ ɓu in kusa-a mbɛt nɛ́ mɛtrɛ ɓu.

²¹Salomɔŋ kpee kɔ̧ Tua ko GASA WAN lɛŋ nɛ̀ sa̧a̧ lɔr, ɓɛɛ a̧ kun nyak boi nɛ‘i dee nɛ̀ lɔr nú sa̧a̧-fara.

²²A̧ kpee tɛ Tua'i lɛŋ nɛ̀ lɔr. A̧ kpee fara-ɗafi-sɔ̧ nɛ̀ a̧a̧ tɛ sa̧a̧-fara nɛ̀ lɔr lɛŋ.

²³A̧ dee o keribim yiitoo nɛ̀ te-nɔ̧́ a kɔ̧ sa̧a̧-fara. Kusa keribim nɔ‘i nɛ́ mɛtrɛ mɔɔrɔ.

²⁴Dura ɓaa kuti keribim nɛ́ mɛtrɛ yiitoo nɛ reeta; ɓii ɓaa-a mbɛt nɛ́ kpɔk mɔ; hegɔ wɔr ɓaa-a lɛŋ nɛ́ mɛtrɛ mɔɔrɔ.

²⁵Dura wɔr-ɓaa yiitoo keribim kànà nɛ́ mɛtrɛ mɔɔrɔ mbɛt. Kiitɛ-wa in mɔɔ-tɛ-wa hee ŋmaa ga.

²⁶Kusa kuti keribim nɛ́ mɛtrɛ mɔɔrɔ. Kusa ɓii-aa kànà hegɔ.

²⁷A̧ kaia o keribim nɔ‘i a bɛr sa̧a̧-fara mgbák see-a. Ɓaa o keribim nyar nyar duk nɛnɛ; wɔr-ɓaa kuti-a ndɔ nɛ́ ŋgeŋ, ɓɛɛ wɔr-ɓaa ɓii-aa ndɔɔ ɓii ŋgeŋ mbɛt. Hegɔ ɓaa-wa nɛ̀ see-a ndɔ nɛ́ ŋmaa.

²⁸A̧ yɔka tɛ o keribim nɛ̀ lɔr.

²⁹Nɛ̀ ɗoŋ ŋgeŋ-tua, nɛ̀ kɔ̧ a̧ in nɛ̀ zan, a̧ gɔna dap o keribim, dap gi̧ɔ̧ wa̧a̧ ndɛŋgɛ in dap mira do-te sɛnɛ.

³⁰A̧ yɔka mbɔɗɔnu nɛ̀ kɔ̧ Tua in nɛ̀ zan lɛŋ nɛ̀ lɔr.

³¹A̧ dee kpar-nú tua sa̧a̧-fara nɛ̀ te-nɔ̧́; ɓɛɛ o te mɛ ká̧ nú-a in mɛ ŋgɔn a̧a̧ nɛ̀ mgbii-wa mɔɔrɔ.[6]

³²A̧ gɔna dap keribim, dap wa̧a̧ ndɛŋgɛ in dap mira do-te ɗoŋ o kpar-nú tua nɔ‘i yiitoo n'aa dee nɛ̀ te-nɔ̧́‘i, ɓɛɛ a̧ yɔk ɗoŋ-wa nɛ̀ lɔr.

³³Nɛ́ kpɔk mɔ‘i a̧ a̧ dee sɛn tɛ gasa nú Tua: a̧ dee o te ká̧ nú Tua nɛ̀ te-nɔ̧́ nɛ̀ mgbii-wa naar.[7]

³⁴A̧ dee kpar-nú tua yiitoo nɛ̀ te zawaya nɛ‘i hu̧i̧ nɛtɛ nɛtɛ.

³⁵A̧ gɔna dap o keribim in dap wa̧a̧ ndɛŋgɛ in dap mira do-te ɗoŋ wa, ɓɛɛ a̧ sɔ̧ lɔr sɛnɛ.

³⁶A̧ mboo ŋgeŋ zik nɛ̀ bee-gara mɛ kɔ̧ a̧ nɛ̀ sɛka-ta zu ŋmaa, in sɛka-te-gbatui kpe nɛ̀ zu-a.

³⁷Wannu Salomɔŋ ɔɔ wan nɛ́ pɛ naar, ɓɛɛ wa e naŋ Tua ko GASA WAN tɛ fio-zɛ Zif.

³⁸Nɛ́ tɛ̀ ɓu-zua-kpɔk pɛ ɔɔ-wan ko Salomɔŋ tɛ zɛ Bul nɛ̀ duk nɛ́ mɔɔrɔ-ɗoŋ-taar fio-zɛ a̧ tom Tua ko GASA WAN kaɗa nɛnɛ lɛŋ; tom Tua'i dee nɛ́ pɛ mɔɔrɔ-ɗoŋ-yiitoo.