Read Northwest Gbaya 1 WANNU 7 Bible Online

1 WANNU 7 - Northwest Gbaya bible

1 WANNU 7

¹Salomɔŋ dee mgbák tua kɔ‘i mbɛt tɛ pɛ ɓu-zua-taar sɛka biti kaɗi lɛŋ.

²Wa saa nin tua'i Kombo Libaŋ[8]. Dura tua'i nɛ́ mɛtrɛ ɓu-mɔɔrɔ, pɛsa-a nɛ́ mɛtrɛ ɓu-yiitoo-zua-mɔɔrɔ, ɓɛɛ kusa-a nɛ́ mɛtrɛ ɓu-zua-mɔɔrɔ. A̧ nɛka nɛ́ o mbiŋ gbatui ɗoŋ ŋmaa tɛ fara naar de nɛ̀ tua'i, ɓɛɛ o kpaakpee-gbatui a̧a̧ zu wa.

³Nɛka mbiŋ kpɔk kpɔk ba nɛ kpaakpee ɓu-zua-mɔɔrɔ; kpaakpee nɔ‘i lɛŋ dee nɛ́ ɓu-zua-mɔɔrɔ. A̧ kpee zu tua'i nɛ̀ o te gbatui see zu o kpaakpee nɛ̀ ya zu o mbiŋ nɔ‘i.

⁴Nɛ̀ ká̧ ɔm tua yiitoo, nɛka woi-tua a̧a̧ sɛnɛ taar nɛ̀ zɔk nɛ ŋmaa, ɓɛɛ woi-tua nɔ‘i a̧a̧ nɛ̀ mgbii wa naar; o nú tua nɛka so kànà tɛ fara taar hee ko o woi-tua ga, ɓɛɛ wa a̧a̧ nɛ̀ mgbii-wa naar mbɛt.

⁵

⁶A̧ dee ŋma tua nɛ̀ wa sa'e Tua-mbiŋ nɛ̀ dura-a nɛ́ mɛtrɛ ɓu-yiitoo-zua-mɔɔrɔ, in pɛsa-a nɛ́ mɛtrɛ ɓu-zua-mɔɔrɔ. Fara ye nɛnɛ a̧a̧ so nɛ̀ o mbiŋ in zala mbɛt.

⁷A̧ dee ŋma tua wen damti, ɓɛɛ tua'i nɛ́ fara-ɓa-kita mbɛt. Wa ɗafa kɔ̧ a̧ nɛ̀ te gbatui nɛ̀ mbɔɗɔnu hɔ kɔ̧ ger-a.

⁸Mgbák tua-ɔɔ ko Salomɔŋ a̧a̧ nɛ̀ ɗoŋ tua-ɓa-kita, ɓɛɛ o tua nɔ‘i hɔɔ ŋmaa; a̧ dee pɛrti tua'i ha̧ kóò kɔ̧-a̧ boko-bem ko wannu Egiptɛ mbɛt.

⁹O tua nɔ‘i lɛŋ nɛ̀ naŋ-a hɔ tɛ o gan-ndui, o ɗoŋ tua hɔ nɛnɛ tɛ gasa bee-gara mbɛt, wa sɛka nɛ̀ ká̧-yí-ta nɛti in nɛ̀ ɗoŋ hee ŋmaa ga de nɛnɛ.

¹⁰Wa dee o naŋ tua nɔ‘i nɛ̀ o gasa ta nɛ‘i hoka hok, dura o ŋma nɛ́ mɛtrɛ mɔɔrɔ, o ŋma nɛ́ mɛtrɛ naar.

¹¹Wa aa o de ta nɛ̀ wa sɛka sɛk in o te gbatui zu naŋ tua.

¹²Wa nɛka ta zu ŋmaa taar in te gbatui gbaŋ-aa kpɔk zik nɛ ɗoŋ gasa bee-gara, kànà hee ko bee-gara Tua ko GASA WAN in zala-a mbɛt ga.

¹³Wannu Salomɔŋ aka mɔ mɛ ba Hiram be Tir tɛ tom.

¹⁴A̧ duka so nɛ́ bem ko ŋma ko-gera tɛ zuduk ko Nɛftalii, ɓɛɛ dáà kɔ̧-a̧ nɛ́ be Tir. Hiram duka nɛ́ wi-de-tom-ndɛrɛ nɛ̀ iŋa tom'i in nɛ̀ a̧a̧ so nɛ̀ haya taamɔ zu tom'i. A̧ tɛɛ tɛ ko wannu Salomɔŋ ha̧ a̧ mɛ de tom ndɛrɛ lɛŋ.

¹⁵A̧ dee mbiŋ-ndɛrɛ yiitoo: kusa kuti-a nɛ́ mɛtrɛ mɔɔrɔ-ɗoŋ-naar, ɓɛɛ yoo-ɔm-a nɛ́ mɛtrɛ mɔɔrɔ-ɗoŋ-kpɔk; ɓii-aa kànà hee kuti-a ga.

¹⁶A̧ nɔi̧a gan-ndui-ndɛrɛ yiitoo nɛ̀ ya zu o mbiŋ. Kusa wa kpɔk kpɔk nɛ́ mɛtrɛ yiitoo nɛ reeta.

¹⁷A̧ fana boi a zu gan-ndui yiitoo nɛ̀ ya zu o mbiŋ. Fanamɔ mɔɔrɔ-ɗoŋ-yiitoo a̧a̧ zu o gan-ndui kpɔk kpɔk.

¹⁸A̧ nɔi̧a ndɛrɛ hee waya kóɓò[9] ga, nɛka-a yiitoo zu o fanamɔ nɛ̀ a̧a̧ zu o gan-ndui.

¹⁹War ko o gan-ndui nɛ̀ ya zu o mbiŋ nú zala, wa hɔɔ ŋmaa in o gba-dɛŋ; kusa-wa nɛ́ mɛtrɛ yiitoo.

²⁰Ŋma gɔna-keɗemɔ a̧a̧ mgbák zu o gan-ndui. Gɔna-keɗe mɔ‘i a̧a̧ zu o fanamɔ in o nɔi̧a-ndɛrɛ gɔmŋmaa-yiitoo hee waya kóɓò nɛ‘i nɛka wa a zu o gan-ndui kpɔk kpɔk ga.

²¹Hiram kaia o mbiŋ-ndɛrɛ nɔ‘i yiitoo'i a ŋgɔn ká̧ nú zala Tua ko GASA WAN. A̧ ee ŋma kpɔk nɛ̀ war wiiko, ɓɛɛ a̧ sa nin-a'e Yakin; a̧ ee ɓii-aa nɛ̀ war gale, ɓɛɛ a̧ sa nin i̧i̧‘e Boaz.

²²O zu o mbiŋ ya hee o gba-dɛŋ ga. Hegɔ tom mbiŋ kaɗa nɛ̀ de-a.

²³Hiram nɔi̧a boi de nɛ̀ gba-kpáná-yì. Ɗuka-a nɛ́ mɛtrɛ yiitoo nɛ reeta, pɛsa-a nɛ́ mɛtrɛ mɔɔrɔ, ɓɛɛ zika nú-a kpa nɛ́ mɛtrɛ ɓu-zua-mɔɔrɔ.

²⁴A̧ nɔi̧a o be mɔ nɛ̀ hɔɔ ŋmaa in mira do-te, ɓɛɛ nɛk nú zer gba-kpánà‘i kpa ŋmaa ɗɛ́kɛ́t, ɓu-yiitoo tɛ mɛtrɛ kpɔk kpɔk. Wa nɔi̧a o be mɔɔ nɔ‘i tɛ nɛka-a yiitoo kpɔk in gba-kpánà‘i.

²⁵Gba-kpánà‘i duka zu ndai-ndɛrɛ ɓu-zua-yiitoo; mgbara o ndai nɔ‘i ɓu-zua-yiitoo'i, ŋma taar zɔka mɔ si ká̧-zan-mɛ́-ŋgɔn, o ŋma taar zɔka kɔ‘i mɔ si yee-wese, taar woyo zɔka mɔ si ká̧-zan-mɛ́-ɗɔɔ, ɓɛɛ taar zɔk mɔ si daŋa-wese. Gba-kpánà‘i duk nɛ zu wa; ɓɛɛ goto ndai lɛŋ zɔk nɛ ŋmaa ɗɔɔ gba kpanà‘i.

²⁶Ndota-a hee bɔ̧i̧a̧ wii-see er-wi ga, ɓɛɛ wa ɗafi nú-zer-aa hee yèé-nɔ-mɔ nɛ hɔɔ ŋmaa in mira gba-dɛŋ ga. Gba-kpánà nyɛma mɛ ba litrɛ yì booro-ɓu-mɔɔrɔ-ɗoŋ-taar.

²⁷Wa dee o mɔɔ-tui-kpánà ɓu nɛ̀ ndɛrɛ: dura wa kpɔk kpɔk nɛ́ mɛtrɛ yiitoo; pɛsa wa nɛ mɛtrɛ yiitoo, ɓɛɛ kusa wa nɛ́ mɛtrɛ kpɔk nɛ reeta.

²⁸Wa dee mɔɔ-tui-kpáná nɔ‘i hee mɔ'ɔ ga: ká̧-yí-a in mgbii-aa lɛŋ wa duia nɛ́ o pɛsa ndɛrɛ de nɛnɛ,

²⁹ɓɛɛ wa gɔn o dap dila, in o wiwii ndai in o keribim sɛnɛ. Nɛ̀ ɗɔɔ o dap saɗi nɔ‘i, wa aa o zika-ndɛrɛ hee mbɛɗum ga sɛnɛ[10].

³⁰O mɔɔ-tui-kpáná nɔ‘i kpɔk kpɔk a̧a̧ nɛ̀ koe-naŋ naar kirkiti nɛ‘i dee nɛ̀ ndɛrɛ. O naŋ nɔ‘i naar'i a̧a̧ so nɛ̀ mɔ nɛ̀ kasi wa zik nɛnɛ. O mɔɔ-kasi-wa a̧a̧ ɗɔɔ kpánà, e o zika-ndɛrɛ hee mbɛɗum ga nɔ‘i nɛ zan.

³¹Fara-e-ndaa kpánà sɛnɛ ɔ zika nɛ̀ kusa-a hee reeta mɛtrɛ ga, ɓɛɛ ɗuka-a hɛɗa ká̧ tɛ mɛtrɛ; wa gɔna dap zik ká̧-nú-a kpa. Ɓɛɛ ká̧-yí mɔɔ-tui-kpáná nɔ‘i in pɛsa-wa hee ŋmaa ga.

³²O koe-naŋ naar a̧a̧ ɗɔɔ mɔɔ-tui-kpánà nɛ̀ ká̧ a̧, ɓɛɛ o mɔɔ-kasi-wa gbo nɛ̀ kɔ̧ a̧. Pɛsa o naŋ-a hɛɗa si ká̧ mɛtrɛ kpɔk.

³³A̧ dee o naŋ-a nɛ̀ zika-a hee naŋ keekee-nyaŋa ga, o boi-kasi-naŋ-a, o boi-koe-naŋ-a, in o boi mɛ see-aa lɛŋ, wa nɔi̧a nɛ́ ndɛrɛ de nɛnɛ.

³⁴O mɔɔ-kasi-wa naar dama ɗoŋ mgbii-aa naar lɛŋ, ɓɛɛ ndaɗi ŋmaa kpɔk in mɔɔ-tui-kpánà.

³⁵Ŋma zika-ndɛrɛ a̧a̧ zu mɔɔ-tui-kpánà, kusa-a de reeta mɛtrɛ na; ɓɛɛ nɛ̀ zu-a o mɔɔ-ira-a a̧a̧ so sɛnɛ nɛ̀ ndaɗa kpɔk in o ká̧-yí-a.

³⁶Tɛ yɔka ɗoŋ-aa, in o mɔɔ-ira-a, gú nɛ̀ o ká̧-yí-a, Hiram gɔna dap o keribim, dap o dila, in o dap wa̧a̧ ndɛŋgɛ sɛnɛ, ɓɛɛ a̧ de o zika-ndɛrɛ hee mbɛɗum ga e sɛnɛ.

³⁷Mɛ̀ nɛ́ hegɔ a̧ a̧ dee nɛ̀ o mɔɔ-tui-kpáná nɔ‘i ɓu; wa dee wa nɛ̀ kpɔk boi, wa lɛŋ hee ŋmaa ga.

³⁸A̧ dee gasa kpánà ɓu nɛ̀ ndɛrɛ nɛ̀ nyɛma mɛ ba litrɛ booro-nɛ-gɔmŋmaa-mɔɔrɔ-ɗoŋ-kpɔk; pɛsa-wa nɛ́ mɛtrɛ yiitoo; ɓɛɛ wa kpɔk kpɔk a̧a̧ zu mɔɔ-tui-kpánà.

³⁹Sɛn ká̧ Tua'i, a̧ aa mɔɔ-tui-kpánà mɔɔrɔ nɛ̀ war wiiko, mɔɔrɔ nɛ̀ war gale, ɓɛɛ a̧ e gba-kpánà mgbii Tua nɛ̀ war wiiko nɛ̀ ká̧-zan-mɛ́-ɗɔɔ si daŋa-wese.

⁴⁰Hiram dee o gasa kpánà, o mɔɔ-ɗu-mɔ, in o yèé-gaŋmɔ. A̧ dee tom nɛ wannu Salomɔŋ usa ha̧ a̧ mɛ de tɛ Tua ko GASA WAN kaɗi lɛŋ.

⁴¹A̧ dee o mbiŋ yiitoo, o ká̧ nú-gan-ndui nɛ̀ ya zu mbiŋ, in o fanamɔ yiitoo mɛ kpe ká̧ nú-gan-ndui yiitoo nɛ̀ gu zu o mbiŋ.

⁴²A̧ nɔi̧a ndɛrɛ hee waya kóɓò ga gɔmŋmaa-naar a tɛ fana-boi yiitoo, nɛka-a yiitoo zu o fana boi kpɔk kpɔk wen kpee ká̧ nú-gan-ndui yiitoo zu o mbiŋ.

⁴³A̧ dee mɔɔ-tui-kpánà ɓu, in o gasa kpánà ɓu nɛ̀ ya zu wa;

⁴⁴gba-kpánà kpɔk ɓɛɛ in o ndai ɓu ɗɔɔ-aa,

⁴⁵o gasa kpánà, o mɔɔ-ɗu-mɔ, o pɛsa tasi in o oi nyɛk lɛŋ. Mɔ nɛ Hiram dee ha̧ wannu Salomɔŋ lɛŋ, sɛn kɔ̧ Tua ko GASA WAN, duka nɛ́ yɔka ndɛrɛ.

⁴⁶Wannu nɔi̧a ndɛrɛ de nɛ̀ o nyɛk nɔ‘i lɛŋ ɗɔɔ gìì sɛn nú Jurdɛn mgbara Sukot in Sartaŋ.

⁴⁷Salomɔŋ ee o mɔɔ nɔ‘i sɛn fara-a; dɔka-a nyɛmna ɓɛɛ wi nyɛm mɛ tɔr kilo ndɛrɛ nɛ̀ yaka na.

⁴⁸Salomɔŋ dee o mɔ lɛŋ wen Tua ko GASA WAN: fara-ɗafi-sɔ̧ nɛ‘i dee nɛ̀ lɔr, fara-a-brɛt ha̧ Sɔ̧ kànà nɛ́ lɔr mbɛt.

⁴⁹Dek-e-wee mɔɔrɔ nɛ̀ wiiko in nɛ̀ gale nɛ‘i ee ti sa̧a̧ gɔna-bɛr-tua, wa dee kànà nɛ̀ sa̧a̧ lɔr. O be mira do-te, o lamba, o be mɔɔ-ɓam-mɔ kànà nɛ́ lɔr lɛŋ.

⁵⁰O be tasi, o paa, o yèé-gaŋmɔ, o mɔɔ-ɗu-mɔ, o be-tasi dɔ fuu-nyama in o boi kpar-nú Tua kànà nɛ́ lɔr.

⁵¹Ŋgimbi nɛ tom nɛ wannu Salomɔŋ dee kɔ̧ Tua ko GASA WAN kaɗa nɛ̀ de-a kaɗi, a̧ kaia mɔ nɛ̀ dáà kɔ̧-a̧ David ee so nɛtɛ ha̧ Sɔ̧ tɛnɛ, bu-mbɔi, lɔr in o nyɛk nɛtɛ nɛtɛ, a fara-a-mbɔi Tua ko GASA WAN.