Read Northwest Gbaya 1 WANNU 8 Bible Online

1 WANNU 8 - Northwest Gbaya bible

1 WANNU 8

¹Wannu Salomɔŋ mɔi̧a o gasawi Israɛl, o wan ko o zuduk bíí lɛŋ, o be-wan nutua ko o be Israɛl si katɛ a̧ sɛn Jerusalɛm wen gɔɔ Kuɓa nɔɔ-tɔk ko GASA WAN daŋnɛ nɛ̀ ye ko David nɛ‘i sa'e Siɔŋ.

²O be Israɛl lɛŋ mɔi̧a katɛ wannu Salomɔŋ wese gbaŋa tɛ mɔɔrɔ-ɗoŋ-yiitoo fio-zɛ nɛ‘i sa'e Etanim.

³Ŋgimbi nɛ o gasawi Israɛl lɛŋ hɔɔ kaɗi, o wi-ɗafi-sɔ̧ gɔɔ Kuɓa.

⁴Wa gɔɔ Kuɓa nɔɔ-tɔk ko GASA WAN in Tua-kpa-ŋmaa in o sa̧a̧ nyɛk ko GASA WAN nɛ̀ yaa kɔ̧ tua-laa: mɛ̀ nɛ́ wi-ɗafi-sɔ̧ in o be Levii a̧ gɔɔ mɔɔ nɔ‘i daŋnɛ.

⁵Wannu Salomɔŋ in o be Israɛl lɛŋ nɛ̀ mɔi̧a katɛ a̧ nɛ̀ yaa in a̧ ká̧ Kuɓa nɔɔ-tɔk gɔna o sami in o ndai nɛ‘i nyɛm mɛ tɔr na ɗafi nɛ̀ sɔ̧.

⁶O wi-ɗafi-sɔ̧ gɔɔ Kuɓa nɔɔ-tɔk ko GASA WAN si fara-ea-a kɔ̧ sa̧a̧ gɔna-bɛr-tua sɛn fara nɛ̀ ɔ sa̧a̧ nyɛmna ɗɔɔ wɔr-ɓaa o keribim.

⁷Wɔr-ɓaa o keribim nyai̧a zu fara-e-kuɓa, kpe zu kuɓa in o te-gɔa-a.

⁸O te-gɔ-kuɓa'i dura nyɛmna, ɓɛɛ wi duk sɛn sa̧a̧-fara nɛ̀ duk nɛ̀ ti ha̧ sa̧a̧ bɛr-tua zɔk nɛ̀ nú wa; ɓɛɛ wi zɔk wa nɛ̀ war zan na. O te nɔ‘i a̧a̧ sɛn fara'i hɔ sɔsɔɔ.

⁹Ŋma mɔ bo so kɔ̧ Kuɓa'i na, kànà nɛ́ sɛka ta yiitoo nɛ̀ Moisɛ aa so kɔ̧ a̧ sɛn Hɔrɛb, ŋgimbi nɛ GASA WAN nɔɔ nɛ̀ tɔk in o be Israɛl tɛ gboa-a kɔ-wa nɛ̀ nú Egiptɛ.

¹⁰Ŋgimbi nɛ o wi-ɗafi-sɔ̧ gboo nɛ̀ kɔ̧ sa̧a̧-fara, tura-zan duna Tua ko GASA WAN.

¹¹O wi-ɗafi-sɔ̧ nyɛm so mɛ ya hi̧i̧ wen tom kɔ-wa na, wen zu tura-zan'i, wen gasamɔ ko GASA WAN duna kɔ̧ Tua ko GASA WAN.

¹²Salomɔŋ tɔ̧a̧: «GASA WAN tɔ̧ɔ̧ so'e, wi kɔ̧ɔ̧ mɛ duk zaŋ tum!

¹³Mɛ̀ nɛ́ wen zu'nɛ́ a̧‘m dee nɛ̀ gba de Tua’ɛ, h’ɛ́nɛ́ mɛ duk sɛnɛ ɓɔnsɛnɛ.»

¹⁴Wannu zika tɛ, ɓɛɛ tok de yoŋgo zu o be Israɛl lɛŋ nɛ mɔi̧a. O be Israɛl lɛŋ nɛ mɔi̧a'i yor so nɛ̀ ŋgɔn.

¹⁵A̧ tɔ̧a̧: «Zɔnamɔ a̧ dúk nɛ́ ko GASA WAN Sɔ̧ ko Israɛl nɛ̀ tɔ̧ɔ̧ wen nɛ̀ nú ha̧ dáà kɔ‘m David, ɓɛɛ de mɔ n'aa tɔ̧a̧ lɛŋ nɛ̀ er-a.

¹⁶Wen n'aa tɔ̧ɔ̧ so'i nɛ mɔ'ɔ: ‹Ku̧u̧naŋ-a nɛ wese n'am gboo nɛ̀ dukbíí kɔ‘m nɛ̀ nú Egiptɛ, mi hok ŋma ye kóó kpɔk mgbara o zuduk be Israɛl ha̧‘m mɛ mbo Tua nɛ̀ nin-am tɛ duk sɛnɛ na, ɓɛɛ mi hoka nɛ́ David ha̧ a̧ mɛ ɔ wan zu dukbíí kɔ‘m.›

¹⁷«Dáà kɔ‘m David taa so mɔ wen dee Tua wen nin GASA WAN Sɔ̧ ko Israɛl.

¹⁸Ɓɛɛ GASA WAN tɔ̧ ha̧ dáà kɔ‘m David'e: ‹Taamɔ kɔ-mɛ mɛ de Tua wen nin-am'i ɔ dee.

¹⁹Mɔ kpɔk, bo nɛ mɛ nɛ̀ tɛ-mɛ a̧ tɛ de Tua'i ha̧‘m na, mɛ̀ nɛ́ bem kɔ-mɛ nɛ̀ mɛ koa a̧ tɛ de dea-a.›

²⁰«Wen nɛ̀ GASA WAN tɔ̧ɔ̧ so'i hɔɔ gba̧a̧. Mi ɔɔ wan oi dáà kɔ‘m David, ɓɛɛ nɛ́ mɔ'ɔ n'am duka zu damti Israɛl hee mɔ'ɔ nɛ GASA WAN baa tɔ̧ so ga; mi dee Tua’ɛ wen nin GASA WAN Sɔ̧ ko Israɛl,

²¹ɓɛɛ nɛ́ mɔ'ɔ n'am ɗafa fara-e-kuɓa nɔɔ-tɔk nɛ̀ GASA nɔɔ so in o dáà k’ɛɛ, ŋgimbi n'aa gboo nɛ wa nɛ̀ nú Egiptɛ.»

²²Salomɔŋ yora ti fara-ɗafi-sɔ̧ ko GASA WAN ti o be Israɛl lɛŋ nɛ̀ mɔi̧a; a̧ nyɛi̧a er-a si ŋgɔn,

²³ɓɛɛ a̧ tɔ̧: «GASA WAN Sɔ̧ ko Israɛl! Ŋma sɔ̧ hee ɛnɛ ga, kóó nɛ̀ ŋgɔn yiwese, kóó nɛ̀ ɗɔɔ zu nù nɛ̀ tɛ kasi nɔɔ-tɔk in usa kɔ̧ɔ̧mɔ kɔ‘i ha̧ o wi-de-tom kɔ‘i nɛ̀ nɛ́ nɔ̀ sɛn ti'nɛ́ nɛ see kpɔk, bo na.

²⁴Ɛnɛ kasa o ha̧a̧nú k’ɛ́nɛ́ ha̧ dáà kɔ‘m David, wi-de-tom k’ɛ́nɛ́; ɛnɛ dee mɔ n’ɛnɛ tɔ̧ɔ̧ so nɛ̀ nú‘nɛ́ nɛ̀ er'nɛ́, hee mɔ'ɔ nɛ‘i zɔk sɔsɔɔ ga.

²⁵Kinii, GASA WAN Sɔ̧ ko Israɛl, ɛ̀nɛ̀ kásí wen n’ɛnɛ tɔ̧ɔ̧ so ha̧ dáà kɔ‘m David, wi-de-tom k’ɛ́nɛ́ nɛ̀ de-a. Ɛnɛ tɔ̧ɔ̧ so'e: ‹Kà o bem kɔ-mɛ mbo zu, kà wa nɛ́ nɔ̀ hee mɔ'ɔ nɛ̀ mɛ nɛɛ so nɛ̀ nɔ̀ ti'm ga, bem kɔ-mɛ beka nyaŋ zu damti Israɛl ti'm na ɓɔnsɛnɛ.›

²⁶Ɓɛɛ kinii, Sɔ̧ ko Israɛl, wen n’ɛnɛ baa tɔ̧ so ha̧ dáà kɔ‘m David, wi-de-tom k’ɛ́nɛ́ a̧ hɔ́ gba̧a̧.

²⁷«Nɛ mbetɛ, Sɔ̧ nyɛma so mɛ ɔ zu nù'ɛ nde? Yiwese’ɛ in o wan mɛ ɗoŋ-aa nɛ̀ nyɛm'nɛ́ na’ɛ, sɛka bó nɛ̀ Tua’ɛ n'am mboa’ɛ nde?

²⁸GASA WAN Sɔ̧ kɔ‘m, ɛ̀nɛ̀ yéŋ zer'nɛ́ tɛ gɔma-er in aia-nú ko wi-de-tom k’ɛ́nɛ́; ɛ̀nɛ̀ zíí sara in mɔ nɛ̀ wi-de-tom k’ɛ́nɛ́ ak er'nɛ́ sɔsɔɔ‘i.

²⁹Ɛ̀nɛ̀ zɔ́k Tua’ɛ mɛ wese in mɛ zɛ; ɛ̀nɛ̀ zɔ́k mɔ si fara n’ɛnɛ tɔ̧ɔ̧ so'e, nin-wi tɛ duk sɛnɛ wó‘i; ɛ̀nɛ̀ zíí mɔ nɛ̀ wi-de-tom k’ɛ́nɛ́ tɛ ak in'nɛ̀ɛ́ sɛn hɛ̧ɛ̧.

³⁰Kà wi-de-tom k’ɛ́nɛ́ in dukbíí k’ɛ́nɛ́ Israɛl ak mɔ in'nɛ̀ɛ́ fara’ɛ, ɓɛɛ n’ɛ̀nɛ̀ zíí aia-nú kɔ-wa. Ɛ̀nɛ̀ zíí tɛ fara n’ɛnɛ duk sɛnɛ yiwese mɛ, ɓɛɛ ɛ̀nɛ̀ é ɗaŋmɔ kɔ-wa ha̧ wa.

³¹«Kà ŋma bíí de ɗaŋmɔ in ŋmá-a, kà‘i dé ha̧ a̧ mɛ kan mɔ nɛ̀ fom, ɓɛɛ kà a̧ tɛ́ɛ̀ kan mɔ‘i ti fara-ɗafi-sɔ̧ kɔ̧ Tua’ɛ,

³²ɓɛɛ n’ɛ̀nɛ̀ zíí sɛn yiwese mɛ. Ɛ̀nɛ̀ gɔ́n kita zu o wi-de-tom k’ɛ́nɛ́. Ɛ̀nɛ̀ úsí wi-de-ɗaŋmɔ pi̧ nɛ̀ ɗaŋmɔ kɔ̧-a̧ zu a̧, ɓɛɛ ɛ́nɛ́ usa wi-de-mɔ nɛ̀ yuwar-a, de nɛ̀ mɔ in a̧ nyɛm nɛ̀ ɗoŋ deemɔ kɔ̧-a̧ nɛ̀ yuwar-a mbɛt.

³³«Ŋgimbi nɛ wisɛn tɛ gan Israɛl dukbíí k’ɛ́nɛ́ tɛ biro, wen nɛ wa dee ɗaŋmɔ ti'nɛ́, kà wa pii ɗoŋ tɛ‘nɛ́, kà wa gasi nin'nɛ́, kà wa kɔfi'nɛ́, ɓɛɛ kà wa ai nú h’ɛ́nɛ́ kɔ̧ Tua’ɛ,

³⁴ɓɛɛ n’ɛ̀nɛ̀ zíí wen'i sɛn yiwese mɛ. Ɛ̀nɛ̀ é ɗaŋmɔ ko Israɛl dukbíí k’ɛ́nɛ́ ha̧ wa, ɓɛɛ ɛ̀nɛ̀ mgbɔ́ wa pii ɗoŋ tɛ nù n’ɛnɛ ha̧a̧ so ha̧ o dáà kɔ-wa.

³⁵«Ŋgimbi nɛ yiwese tɛ kpe, nɛ̀ kórò beka hɔ na, wen nɛ dukbíí dee ɗaŋmɔ in'nɛ̀ɛ́, kà wa kɔfi mɔ pii hɛ̧ɛ̧ gasi nɛ̀ nin'nɛ́, ɓɛɛ kà wa kifi see-wa wen n’ɛnɛ pi̧i̧ bɔnɛ zu wa,

³⁶ɓɛɛ n’ɛ̀nɛ̀ zíí aia-nú kɔ-wa sɛn yiwese mɛ. Ɛ̀nɛ̀ é ɗaŋmɔ ko o wi-de-tom k’ɛ́nɛ́ in dukbíí k’ɛ́nɛ́ Israɛl ha̧ wa, ɓɛɛ ɛ̀nɛ̀ úsí de yuwar nɛ̀ wa tɛ ba ha̧ wa. Ɛ̀nɛ̀ dé ha̧ kórò mɛ hɔ a zu nù k’ɛ́nɛ́ n’ɛnɛ baa ha̧ so ha̧ dukbíí k’ɛ́nɛ́ nɛ̀ mɔɔ-oi.

³⁷«Kóó nɛ́ kaɓa a̧ tika, kóó nɛ́ zɛɛ-geŋa, kóó nɛ́ mɔ a̧ baa doko, kóó nɛ́ laambam, kóó nɛ́ kooŋa̧i̧ a̧ tika nù, kóó nɛ́ gba-dɔya, kóó nɛ́ wisɛn a̧ kɛra o ye e nù, kóó nɛ́ ge ŋgamɔ ge, kóó nɛ́ ge zɛɛ ge,

³⁸kà ŋma be Israɛl kɔfi mɔ in'nɛ̀ɛ́, kà a̧ ai nú-a ŋgimbi n'aa ta mɔ wen ŋgamɔ nɛ̀ ɗaŋ see-aa'i, ɓɛɛ kà a̧ nyɛi̧ er-a pii tɛ Tua’ɛ,

³⁹ɓɛɛ n’ɛ̀nɛ̀ zíí sɛn yiwese fara n’ɛnɛ duk sɛnɛ‘i, ɛ̀nɛ̀ é ɗaŋmɔ kɔ̧-a̧ ha̧ a̧, ɓɛɛ ɛ̀nɛ̀ dé mɔ in a̧ nyɛm nɛ̀ ɗoŋ naŋanɔ kɔ̧-a̧ lɛŋ, wen n’ɛnɛ iŋa kɔ̧ see-aa. Mɛ̀ nɛ́ ɛ́nɛ́ kpɔk a̧ iŋa kɔ̧ see bíí ɓɛɛ.

⁴⁰Ɛ̀nɛ̀ dé hegɔ wen ha̧ o be Israɛl mɛ yu'nɛ́ dam ɗoŋ wese lɛŋ nɛ wa tɛ duk kpasa zu nù n’ɛnɛ ha̧a̧ so ha̧ o dáà k’ɛɛ.

⁴¹«Kóó nɛ́ gɛnɛ nɛ̀ bo nɛ́ be Israɛl dukbíí k’ɛ́nɛ́ na, kà a̧ tɛ nɛ̀ nyɛi̧a fara wen nin'nɛ́,

⁴²wen wa tɛ zii nyɛrɛ hura nin'nɛ́, ŋga er'nɛ́ in ɓaa'nɛ́ n’ɛnɛ nyai̧a, kà a̧ kɔfi mɔ pii tɛ Tua’ɛ,

⁴³ɓɛɛ n’ɛ̀nɛ̀ zíí sɛn yiwese fara n’ɛnɛ ɔ sɛnɛ‘i; ɛ̀nɛ̀ dé mɔ nyɛm nɛ̀ ɗoŋ mɔ lɛŋ nɛ̀ gɛnɛ aka er'nɛ́ wen ha̧ o dukbíí zu nù lɛŋ mɛ iŋ nin'nɛ́, ha̧ wa mɛ yu'nɛ́ hee Israɛl dukbíí k’ɛ́nɛ́ ga, in ha̧ wa mɛ iŋ ndé, wi sa nɛ nin'nɛ́ tɛ Tua n'am mboa’ɛ.

⁴⁴«Ŋgimbi nɛ dukbíí k’ɛ́nɛ́ tɛ ba biro dúk nɛ̀ wisɛn kɔ-wa sɛn fara n’ɛnɛ tom wa si sɛnɛ‘i, kà wa kɔfi mɔ sitɛ GASA WAN zik nɛ̀ tɛ-wa pii Jerusalɛm n’ɛnɛ hoka in pii tɛ Tua n'am mboo wen nin'nɛ́'ɛ,

⁴⁵ɛ̀nɛ̀ zíí kɔfamɔ in aia-nú kɔ-wa sɛn yiwese mɛ, ɓɛɛ ɛ̀nɛ̀ gbák wa.

⁴⁶«Ŋgimbi nɛ o be Israɛl tɛ de ɗaŋmɔ sitɛ‘nɛ́, wen ŋma bíí nɛ̀ de ɗaŋmɔ na bo na, ŋgimbi nɛ see'nɛ́ tɛ tu̧ zu wa, n’ɛnɛ tɛ e wa kɔ̧ er o wisɛn kɔ-wa in ŋgimbi nɛ wisɛn kɔ-wa tɛ kai wa nɛ̀ bara sitɛ ŋma nù nɛ ɔ nyɛi̧a, kóó nɛ̀ nyɛi̧ na mbɛt,

⁴⁷kà wa ta mɔ tɛ nù nɛ wa de bara sɛnɛ‘i, kà wa kifi see-wa ai nɛ nú h’ɛ́nɛ́ tɛ nù ko o wi-gan-wa'i, tɔ̧ nɛnɛ h’ɛ́nɛ́ ndé, wi nɛ́ ɗaŋwi, wi yɔɔ kaya, wi iŋa ɗaŋmɔ kɔ‘i wó,

⁴⁸kà wa pii ɗoŋ pii tɛ‘nɛ́ nɛ̀ see kpɔk, nɛ̀ kiitɛ-wa lɛŋ tɛ nù ko o wisɛn nɛ̀ wa kaia wa si sɛnɛ‘i, ɓɛɛ kà wa kɔfi mɔ sitɛ‘nɛ́ si war nù kɔ-wa, nù n’ɛnɛ ha̧a̧ so ha̧ o dáà kɔ-wa, sitɛ ye n’ɛnɛ hoka in sitɛ Tua n'am mboo wen nin'nɛ́,

⁴⁹ɛ̀nɛ̀ zíí sɛn yiwese, fara n’ɛnɛ duk sɛnɛ, ɓɛɛ ɛ̀nɛ̀ gbák wa.

⁵⁰Ɛ̀nɛ̀ é ɗaŋmɔ ko dukbíí k’ɛ́nɛ́ nɛ dee ti'nɛ́‘i ha̧ wa, ɓɛɛ ɛ̀nɛ̀ dé ha̧ o bíí nɛ̀ kaia wa nɛ̀ bara mɛ de ko ha̧ wa,

⁵¹wen wa nɛ́ dukbíí k’ɛ́nɛ́, in mɔɔ-oi k’ɛ́nɛ́; wa nɛ̀ o wi n’ɛnɛ foo gbonɛ nɛ̀ nú Egiptɛ, nɛ̀ kɔ̧ lɔk.

⁵²«Ɛ̀nɛ̀ zíí aia-nú ko wi-de-tom k’ɛ́nɛ́ in dukbíí k’ɛ́nɛ́ Israɛl. Ɛ̀nɛ̀ zíí saa-sara kɔ-wa sitɛ‘nɛ́‘i.

⁵³GASA WAN Sɔ̧, nɛ́ ɛnɛ'ɛ hoka wa mgbara o dukbíí lɛŋ, ɓɛɛ ɛnɛ e wa nɛtɛ hee mɔɔ-oi k’ɛ́nɛ́ ga, hee mɔ'ɔ n’ɛnɛ tɔ̧ɔ̧ so nɛ̀ nú wi-de-tom k’ɛ́nɛ́ Moisɛ, ŋgimbi n’ɛnɛ gboo nɛ̀ o dáà k’ɛɛ nɛ̀ nú Egiptɛ mɛ ga.»

⁵⁴Ɗoŋ nɛ Salomɔŋ kaɗa kɔfa-sɔ̧ lɛŋ in aia-nú sitɛ GASA WAN kaɗi, a̧ kura sɛn fara-ɗafi-sɔ̧, fara n'aa gbɛɛ so zugur-aa sɛnɛ, nyɛi̧ nɛ̀ er si yiwese'i.

⁵⁵A̧ yora ŋgɔn, a̧ toka de yoŋgo nɛ̀ hee ger sitɛ o be Israɛl nɛ mɔi̧a, ɓɛɛ tɔ̧:

⁵⁶«Zɔnamɔ a̧ dúk nɛ́ ko GASA WAN nɛ̀ ha̧a̧ ŋma fara-ɔm-tɛ ha̧ Israɛl dukbíí kɔ̧-a̧ hee mɔ'ɔ n'aa tɔ̧ɔ̧ so ga. Ŋma wen mgbara o de wen n'aa tɔ̧ɔ̧ so nɛ̀ nú Moisɛ wi-de-tom kɔ̧-a̧ nɛ̀ hɔ gba̧a̧ na, bo na.

⁵⁷GASA WAN Sɔ̧ k’ɛɛ a̧ dúk in yɛɛ hee mɔ'ɔ n'aa duka so nɛnɛ in o dáà k’ɛɛ ga: ká a̧ siŋ yɛ a nù na, ká a̧ e yɛ duk na.

⁵⁸A̧ a̧ zík see yɛ sitɛ a̧ h’ɛ́ɛ́ mɛ nɛ nɔ̀ nɛ̀ o yuwar kɔ̧-a̧ lɛŋ in h’ɛ́ɛ́ mɛ kasi, o geŋa, o heembea kɔ̧-a̧ in o yuwar duka-a kɔ̧-a̧ n'aa ha̧a̧ so ha̧ o dáà k’ɛɛ.

⁵⁹Tɔ̧ɔ̧-wen n'am tɔ̧ ai nɛ̀ nú‘m ha̧ GASA WAN'i a̧ dúk mɛ́ wese in mɛ́ zɛ sɛn ti GASA WAN Sɔ̧ k’ɛɛ; ɓɛɛ a̧ a̧ gbák wi-de-tom kɔ̧-a̧ in dukbíí kɔ̧-a̧ Israɛl tɛ o mɔ nɛ wa kɔ̧a̧ wese kpɔk kpɔk,

⁶⁰ha̧ o dukbíí zu nù lɛŋ mɛ iŋ ndé, GASA WAN nɛ́ Sɔ̧, ŋma mbe-a bo na.

⁶¹Ɓɛɛ nɛ̀ war k’ɛ́nɛ́ o bíí, see'nɛ́ a̧ dúk tɛ GASA WAN Sɔ̧ k’ɛɛ, h’ɛ́nɛ́ mɛ nɛ nɔ̀ nyɛm nɛ̀ ɗoŋ o heembea kɔ̧-a̧ in h’ɛ́nɛ́ mɛ kasi o geŋa kɔ̧-a̧ hee mɔ'ɔ n’ɛnɛ de sɔsɔɔ ga.»

⁶²Wannu in o be Israɛl lɛŋ ɗafa sɔ̧ ha̧ GASA WAN.

⁶³Salomɔŋ ɗafa sɔ̧-gaŋmɔ nɛ ndai booro-ɓu-yiitoo-zua-yiitoo, o sami in o gbadua booro-gɔmŋma-nɛ-ɓu-yiitoo. Nɛ́ hegɔ a̧ wannu in o be Israɛl lɛŋ dee nɛ̀ gbaŋa Tua ko GASA WAN.

⁶⁴Wese'i wannu ee bee-gara nɛ duk ti Tua ko GASA WAN nɛtɛ ha̧ Sɔ̧; nɛ́ sɛn fara'i a̧ a̧ dɔɔ kpoo-sɔ̧, ha̧ nɛ̀ mɔ in o nɔ̧́-kpoo ha̧a̧mɔ-gaŋmɔ sɛnɛ, wen fara ɗafi-sɔ̧ nɛ‘i dee nɛ̀ ndɛrɛ nɛ̀ duk ti GASA WAN dee geɗek-a nyɛmna, ɓɛɛ nyɛm so wen dɔɔ kpoo-sɔ̧, o ha̧a̧mɔ in nɔ̧́-kpoo ha̧a̧mɔ-gaŋmɔ na.

⁶⁵Wannu Salomɔŋ dee gasa gbaŋa ŋgimbi'i. O be Israɛl lɛŋ, ku̧u̧naŋ-a nɛ̀ nú Lebo-Hamat hɔ nɛnɛ nú be-zer Egiptɛ mɔi̧a sɛn ti GASA WAN Sɔ̧ k’ɛɛ, ɓɛɛ wa de gbaŋa hegɔɔ zɛ mɔɔrɔ-ɗoŋ-yiitoo.

⁶⁶Ɓɛɛ tɛ mɔɔrɔ-ɗoŋ-taar ɔɔ-zɛ, Salomɔŋ foo o bíí lɛŋ si ɗoŋ fara kɔ-wa. Wa fana wannu, ɓɛɛ kóó o ndé si ɗoŋ tɛ kɔ‘i nɛ̀ gasa tortɛ. Wa lɛŋ duka nɛ̀ desee wen demɔ nɛ̀ GASA WAN dee ha̧ wi-de-tom kɔ‘i David in dukbíí kɔ‘i Israɛl.