Read Northwest Gbaya 2 WANNU 1 Bible Online

2 WANNU 1 - Northwest Gbaya bible

2 WANNU 1

¹Ɗoŋ fio ko Akab, Mɔab dee ŋgazu in *Israɛl.

²Akazias hɔ̧fa̧ so tik nù nɛ kɔ̧ bɛr-tua mɛ ŋgɔn sɛn Samarii, ɓɛɛ tɛ-a nyim nyim nɛ̀ ŋgaya-a. A̧ toma o betom tɔ̧ nɛnɛ ha̧ wa hee mɔ'ɔ ga: «Ɛ̀nɛ̀ nɛ́ɛ̀ zɔk Bal-Zebub, sɔ̧ ko o be Ekrɔŋ; a̧ a̧ tɔ̧́ ha̧‘m, mi tɛ kpasi tɛ zɛɛ kɔ‘m’ɛ nde?»

³Tɛ ŋgimbi'i betom ko GASA WAN tɔ̧ɔ̧ ha̧ Elii be Tisbe: «Mɛ̀ kúr ŋgɔn, ɓɛɛ mɛ̀ wé ti o betom ko wannu Samarii. Mɛ̀ tɔ̧́ ha̧ wa'e ndé, ŋma Sɔ̧ bo *Israɛl na, sa wa nɛ́ɛ̀ ak nɛ́ Bal-Zebub, sɔ̧ ko o be Ekrɔŋ nde?

⁴Hee mɔ'ɔ nɛ̀ wa dee hegɔ ga, GASA WAN'e ndé: ‹Mɛ beka kur ŋgɔn gɔn gado-zɛɛ kɔ-mɛ‘i na, mɛ tɛ fe nɛ̀ mbetɛ!› » Ɓɛɛ Elii si kɔ‘i ɗoŋ.

⁵O betom pia ɗoŋ tɛ Akazias, ɓɛɛ a̧ ak wa: «Ɛnɛ pia ɗoŋ wen ge nde?»

⁶Wa kifa nú-wa: «Ŋma wiwii kpaa ŋmaa in yɛɛ, ɓɛɛ nɛ́ mɔ'ɔ n'aa tɔ̧ɔ̧ h’ɛ́ɛ́‘e, ɛ̀ɛ̀ sí ɗoŋ tɔ̧́ ha̧ wannu nɛ̀ toma yɛ tɛnɛ‘i, GASA WAN tɔ̧ɔ̧ ndé: ‹Ŋma Sɔ̧ bo sɛn *Israɛl na, sa mɛ tom nɛ bíí mɛ nɛ̀ɛ́ ak nɛ́ Bal-Zebub, sɔ̧ ko o be Ekrɔŋ'ɛ nde? Mɛ̀ nɛ́ hegɔ nɛ mɛ beka kur ŋgɔn sɛn gɔn gado-zɛɛ kɔ-mɛ‘i ɓɔna; mɛ tɛ fe nɛ̀ mbetɛ!› »

⁷Wannu aka wa: «Wi nɛ̀ wee ti'nɛ́ ɓɛɛ nɛ̀ tɔ̧ɔ̧ o wen nɔ‘i h’ɛ́nɛ́‘i duk hee ge?»

⁸Wa kifa nú ha̧ a̧‘e: «Nɛ́ ŋma bíí nɛ̀ pi̧i̧ nɛ́ buma-a a̧a̧ sɛnɛ, ɓɛɛ a̧ mar ŋma laa-ndàrá guntir-aa.» Ɓɛɛ wannu tɔ̧: «Mɛ̀ nɛ́ Elii be Tisbe!»

⁹Wannu toma ŋma wi-duk-zu o wi-biro ɓu-mɔɔrɔ in o wi-biro kɔ̧-a̧ mbɛt nɛnɛ tɛ Elii. Elii duk so nɛ nù zu kaya, ɓɛɛ wi’ɛi tɔ̧ ha̧ Elii: «Bíí ko Sɔ̧! Wannu'e ndé, mɛ̀ zìr!»

¹⁰Elii kifa nú ha̧ wan ko o wi-biro ɓu-mɔɔrɔ‘i: «Kà‘m nɛ́ bòò nɛ́ bíí ko Sɔ̧, wee a̧ tík nù nɛ̀ yiwese, ɓɛɛ a̧ a̧ dɔ́ mɛ in o bíí kɔ-mɛ ɓu-mɔɔrɔ'ɛ lɛŋ.» Wee ko Sɔ̧ tika nù nɛ̀ yiwese, ɓɛɛ dɔ wi’ɛi in o bíí kɔ̧-a̧ ɓu-mɔɔrɔ‘i.

¹¹Wannu toma ŋma wi-duk-zu o wi-biro ɓu-mɔɔrɔ in o wi-biro kɔ̧-a̧ nɛnɛ woyo; a̧ tɔ̧ɔ̧ ha̧ Elii: «Bíí ko Sɔ̧, wannu ha̧a̧ nú hegɔ: ‹Mɛ̀ zír nɛ̀ haya-a!› »

¹²Elii kifa nú ha̧ a̧: «Kà‘m nɛ́ bòò nɛ́ bíí ko Sɔ̧ nɛ̀ mbetɛ, wee a̧ tík nù nɛ̀ yiwese, ɓɛɛ a̧ a̧ dɔ́ mɛ in o bíí kɔ-mɛ ɓu-mɔɔrɔ'ɛ lɛŋ.» Wee ko Sɔ̧ tika nù nɛ̀ yiwese, ɓɛɛ dɔ a̧ in o bíí kɔ̧-a̧ ɓu-mɔɔrɔ‘i lɛŋ.

¹³Wannu toma taar wi-duk-zu o wi-biro ɓu-mɔɔrɔ in o wi-biro kɔ̧-a̧; ŋgimbi n'aa hɔa, a̧ gbɛɛ zugur-aa nù ti Elii, ɓɛɛ ai nú ha̧ a̧ hee mɔ'ɔ ga: «Bíí ko Sɔ̧, duka-kpasa kɔ‘m in ko o wi-de-tom k’ɛ́nɛ́ ɓu-mɔɔrɔ'ɛ a̧ dúk nɛ́ gasamɔ sɛn yí‘nɛ́!

¹⁴Wee tika nù nɛ̀ yiwese, ɓɛɛ dɔ o wi-duk-zu o wi-biro yiitoo in o wi-biro kɔ-wa gɔmŋmaa lɛŋ gbɛ a nù. Kinii, mi ai nú h’ɛ́nɛ́, duka-kpasa kɔ‘m a̧ dúk nɛ́ gasamɔ sɛn yí‘nɛ́.»

¹⁵Ɓɛɛ betom ko GASA WAN tɔ̧ ha̧ Elii: «Mɛ̀ zír, mɛ̀ nɛ́ in a̧, ká mɛ de kíì na.» Elii kura, ɓɛɛ zir in a̧ sitɛ wannu,

¹⁶ɓɛɛ tɔ̧ ha̧ wannu hee mɔ'ɔ ga. «GASA WAN tɔ̧a̧ ndé, toma bíí nɛ̀ mɛ toma mɛ zɔk Bal-Zebub sɔ̧ ko o be Ekrɔŋ‘i, ŋma Sɔ̧ bo sɛn *Israɛl nɛ‘i nyɛma mɛ ak mgbara mɔ tɛ-a na nde? Mɛ beka kur gɔn gado-zɛɛ kɔ-mɛ‘i ɓɔna, mɛ tɛ fe nɛ̀ mbetɛ wen nɛ̀ mɛ dee hegɔ.»

¹⁷Akazias fea hee mɔ'ɔ nɛ̀ GASA WAN baa tɔ̧ so nɛ nú Elii ga. Hee mɔ'ɔ n'aa bo so nɛ̀ bem na ga, Yoram nya-a̧ ɔɔ wan oi-aa tɛ yiitoo pɛ-wan ko Yoram [1] bem ko Josafat wannu Juda.

¹⁸Oi o tom ko Akazias, mɔ n'aa dea, yɔra zaŋ Kalata Nyɛrɛ ko o wannu *Israel.