Read Northwest Gbaya 2 WANNU 12 Bible Online

2 WANNU 12 - Northwest Gbaya bible

2 WANNU 12

¹Nɛ́ tɛ mɔɔrɔ-ɗoŋ-yiitoo pɛ-wan ko Jɛhu a̧ wa dee nɛ̀ wan ha̧ Jɔas, ɓɛɛ a̧ ɔ wan pɛ ɓu-naar sɛn Jerusalɛm. Nin nàà kɔ̧-a̧ so nɛ́ Sibia zɔŋa Bɛrseba.

³Jɔas dee mɔ nɛ̀ yuwar-a yí GASA WAN ŋgimbi duka-a kɔ̧-a̧ zu nù, wen wi-ɗafi-sɔ̧ Yehoyada usa so mɔ ha̧ a̧.

⁴Mɔ kpɔk, o fara-ɗafi géé-sɔ̧ zu o *kusa-fara kaɗi so na; o bíí duka tɛ ɗafa sɔ̧, dɔ nɛ̀ fuu-nyama fara-ɗafi géé-sɔ̧ nɔ‘i.

⁵Jɔas tɔ̧ɔ̧ ha̧ o wi-ɗafi-sɔ̧: «Sede nɛ̀ o bíí ha̧ ha̧ Sɔ̧, nɛ̀ wa ba tɛnɛ kɔ̧ Tua ko GASA WAN, sede zu-mɔ nɛ̀ bíí lɛŋ ha̧, o sede nɛ̀ bíí ba nɛ̀ ta-tɛ tɛnɛ kɔ̧ Tua ko GASA WAN,

⁶o wi-ɗafi-sɔ̧ a̧ bá lɛŋ, o ndé er o wi n'aa iŋa, ɓɛɛ wa a̧ ɗáfí nɛ̀ o mɔ nɛ̀ ɗaŋa kɔ̧ Tua ko GASA WAN.»

⁷Hegɔ hɔ tɛ ɓu-yiitoo-zua-naar pɛ-wan ko Jɔas, o wi-ɗafi-sɔ̧ tɛ ɗafi o mɔ nɛ̀ ɗaŋa kɔ̧ Tua ko GASA WAN hɔ̧ɔ̧ na.

⁸Wannu Jɔas saa Yehoyada in o dɔka wi-ɗafi-sɔ̧ tɛnɛ, ɓɛɛ tɔ̧ ha̧ wa: «Ɛ́nɛ́ ɗafi Tua ko GASA WAN na wen ge? K’ɛ́nɛ́ ba sede er o wi n’ɛnɛ iŋa ɓɔna, wen ɛ́nɛ́ tɛ̀ɛ́ ba so sede'i wen ɗafa-a nɛ̀ Tua ko GASA WAN.»

⁹O wi-ɗafi-sɔ̧ tɔ̧ɔ̧ a nú ŋmaa'e wi beka ba mbɔi er ŋma bíí ɓɔna, in wi beka ɗafi Tua ko GASA WAN ɓɔna mbɛt.

¹⁰Wi-ɗafi-sɔ̧ Yehoyada baa ŋma be kuɓa-te, ɓɛɛ ɗɔi gu-zu-nú-a ba e ká̧ fara ɗafi-sɔ̧ nɛ̀ war wii-er, tɛ yee Tua ko GASA WAN. Kóó o ndé nɛ̀ ba sede nɛnɛ kɔ̧ Tua ko GASA WAN tɛ nyɛi̧ ha̧ o wi-ɗafi-sɔ̧ nɛ̀ pɛm nú tua, ɓɛɛ wa kaia a kɔ̧ kuɓa'i.

¹¹Kà wa zɔk sede dɔka kɔ̧ kuɓa'i kaɗi, ɓɛɛ wi-yɔr-kalata ko wannu in gasa wi-ɗafi-sɔ̧ tɛɛ kai mɛ tɔr mɔ nɛ̀ wa kpaa kɔ̧ Tua ko GASA WAN.

¹²Kà wa tɔr kaɗi, ɓɛɛ wa ee er o wi-duk-zu tom Tua ko GASA WAN, wen yoɓa-a nɛ̀ o wi-mgboi-tua, o wi nɛ̀ de tom sɛn kɔ̧ Tua ko GASA WAN'i,

¹³o wi-mbo-tua in o wi-sɛk-ta, in wen hi̧fa-a nɛ̀ o mbiŋ, in o sɛka-ta wen ɗafa Tua ko GASA WAN in wen o dɔka mɔ lɛŋ nɛ‘i nyɛma mɛ kpa wen tom Tua'i.

¹⁴Mɔ nɛ̀ wa hi̧fi nɛ sede'i a kɔ̧ Tua ko GASA WAN na, nɛ́ o mɔɔ-nɔ-mɔ nɛ‘i dee nɛ̀ bu-mbɔi, paa, yèé-gaŋmɔ, mbia in o nyɛk nɛ‘i dee nɛ̀ bu-mbɔi in lɔr.

¹⁵Wa ha̧a̧ so o sede nɔ‘i ha̧ o wi-de-tom wen ɗafa-a nɛ̀ Tua ko GASA WAN.

¹⁶Wa ak ndaa sede nɛ̀ o wi-kasi-sede ha̧ ha̧ o wi-duk-zu tom wen yoɓa-a nɛ̀ o bíí‘i na, wen wa de mɔ nɛ̀ yuwar-a.

¹⁷Sede ɗafa-sɔ̧-gaŋmɔ in sede ɗafa sɔ̧ wen ea-ɗaŋmɔ ye tɛ tom Tua ko GASA WAN na; duka so nɛ́ ko o wi-ɗafi-sɔ̧.

¹⁸Tɛ ŋgimbi'i, Hazaɛl wannu Aram bìì ye Gat, ɓɛɛ ba; ɓɛɛ a̧ ɗafi mɔ mɛ ba biro dúk nɛ̀ Jerusalɛm mbɛt.

¹⁹Jɔas wannu Juda kaia o ha̧a̧mɔ nɛ̀ Josafat, Yoram in Akazias nɛ̀ ɔɔ so wan nɛti ha̧ a̧ ee so kɔ̧ Tua ko GASA WAN e zu war kɔ̧-a̧ mɛ tɛ-a, gú nɛ̀ o lɔr mɛ kɔ̧ Tua ko GASA WAN in wan mɛ kɔ̧ tua ko wannu tom nɛnɛ ha̧ Hazaɛl wannu Aram, ɓɛɛ Hazaɛl e bíí Jerusalɛm duk.

²⁰Oi o tom ko Jɔas, mɔ lɛŋ n'aa dea yɔra zaŋ Kalata Nyɛrɛ ko o wannu Juda.

²¹O wi-de-tom ko Jɔas baa ɗaŋ keta zu a̧, ɓɛɛ wa gbɛ a̧ sɛn yuwar nɛ̀ nɛ́ si Bɛt-Milo, ká a̧ zir zir si Sila.

²²Mɛ nɛ́ Yozakar bem ko Simɛat in Yehozabad bem ko Sɔmɛr o wi-de-tom kɔ̧-a̧ a̧ gbɛɛ a̧. Wa guna a̧ in o dáà kɔ̧-a̧ saaye ko David, ɓɛɛ bem kɔ̧-a̧ Amasia ɔ wan oi-aa.