Read Northwest Gbaya 2 WANNU 13 Bible Online

2 WANNU 13 - Northwest Gbaya bible

2 WANNU 13

¹Tɛ ɓu-yiitoo-zua-taar pɛ-wan ko Jɔas bem ko Akazias wannu Juda, Jɔakaz bem ko Jɛhu ɔɔ wan *Israɛl sɛn Samarii tɛ pɛ ɓu-zua-mɔɔrɔ-ɗoŋ-yiitoo.

²A̧ dee mɔ ɗaŋ yí GASA WAN; a̧ ndaka ɗoŋ ɗaŋmɔ nɛ̀ Jeroboam bem ko Nɛbat kaia so o be *Israɛl a sɛnɛ. A̧ e ɗaŋmɔ‘i duk na.

³See GASA WAN ɗaŋa zu o be *Israɛl, ɓɛɛ a̧ a wa kɔ̧ er Hazaɛl wannu Aram in Bɛn-Hadad bem ko Hazaɛl ŋgimbi lɛŋ.

⁴Jɔakaz ga̧a̧ see GASA WAN, ɓɛɛ GASA WAN zii aia-nú kɔ̧-a̧ wen bɔnɛ nɛ̀ wannu Aram usi ha̧ o be *Israɛl'i.

⁵GASA WAN toma ŋma wi-kpasi-wi ha̧ *Israɛl; o be *Israɛl gboo ɗɔɔ bɔnɛ ko o be Aram, ɓɛɛ wa ɔ kɔ̧ tua kɔ-wa tɛ ga̧a̧mɔ hee nɛti ga.

⁶Zu-a'i, wa e ɗaŋmɔ nɛ̀ o bíí nutua ko Jeroboam foo so wa a sɛnɛ duk na. Wa duka tɛ dea-a siti; sɛka-te nɛ‘i gasi gasi yora kànà ɓɔn sɛn Samarii.

⁷O oi wi-biro nɛ̀ ɓɔna ha̧ Jɔakaz nɛ́ o wan-nyaŋa ɓu-mɔɔrɔ, keekee-nyaŋa ɓu in o wi-biro-nɛ-nɔ̀ nɛ̀ naŋ booro-ɓu, wen wannu Aram kuma so o dɔka-a. A̧ dee so mɔ in wa hee fuunu nɛ‘i i̧si̧ nɛ̀ naŋ-wi’ɛ ga.

⁸Oi o tom ko Jɔakaz, mɔ lɛŋ n'aa dea in o ŋgaŋamɔ kɔ̧-a̧ yɔra zaŋ Kalata Nyɛrɛ ko o wannu *Israɛl.

⁹Jɔakaz fee si ɗoŋ o dáà kɔ‘i, ɓɛɛ wa gun a̧ sɛn Samarii. Bem kɔ̧-a̧ Jɔas ɔɔ wan oi-aa.

¹⁰Tɛ ɓu-taar-zua-mɔɔrɔ-ɗoŋ-yiitoo pɛ-wan ko Jɔas wannu Juda, Jɔas bem ko Jɔakaz ɔɔ wan *Israɛl sɛn Samarii tɛ pɛ ɓu-zua-mɔɔrɔ-ɗoŋ-kpɔk.

¹¹A̧ dee mɔ ɗaŋ yí GASA WAN. A̧ e ŋma ɗaŋmɔ nɛ̀ Jeroboam bem ko Nɛbat foo so o be *Israɛl a sɛnɛ kpɔk duk na. A̧ duka tɛ dea-a siti.

¹²O oi tom ko Jɔas, mɔ lɛŋ n'aa dea, o ŋgaŋamɔ kɔ̧-a̧, o biro kɔ̧-a̧ in Amasia wannu Juda yɔra zaŋ Kalata Nyɛrɛ ko o wannu *Israɛl.

¹³Jɔas fea si ɗoŋ o dáà kɔ‘i, ɓɛɛ Jeroboam daŋ zu damti oi-aa. Wa guna Jɔas sɛn Samarii in o wannu *Israɛl.

¹⁴Zɛɛ-fio baa Elisee, ɓɛɛ Jɔas wannu *Israɛl nɛ́ mɛ zɔk a̧. Jɔas zika yí sitɛ a̧, hí̧í̧ nɛ̀ kɔ̧a̧, ɓɛɛ tɔ̧: «Naa-oo, dáà kɔ‘m! Dáà kɔ‘m! Naa-oo, keekee-nyaŋa ko *Israɛl in o wi-daŋ-aa!»

¹⁵Elisee tɔ̧ɔ̧ ha̧ a̧: «Mɛ̀ káí góò.» Jɔas kaia góò,

¹⁶ɓɛɛ Elisee tɔ̧ ha̧ a̧: «Mɛ̀ ŋgáŋ kusuaa.» Ɓɛɛ a̧ ŋgaŋ. Elisee aa er zu er-a,

¹⁷ɓɛɛ tɔ̧: «Mɛ̀ hú̧í̧ woi-tua nɛ̀ zɔk mɔ si daŋa-wese.» Ɓɛɛ Jɔas hu̧i̧. Elisee tɔ̧ɔ̧ ha̧ a̧: «Mɛ̀ pì̧ gɔ!» Ɓɛɛ Jɔas pi̧. Elisee tɔ̧a̧: «Mɛ̀ nɛ́ góò-gbin-biro ko GASA WAN! Góò-gbin-biro ti o be Aram! Mɛ́ tɛ́ bi Aram sɛn Afɛk, ɓɛɛ mɛ kuma wa lɛŋ.»

¹⁸Elisee tɔ̧ɔ̧ ha̧ Jɔas: «Mɛ̀ káí o góò.» Ɓɛɛ a̧ kai. Elisee tɔ̧ɔ̧ ha̧ wannu *Israɛl: «Mɛ̀ gúsí nɛ̀ nù.» Nɛ́ mɔ'ɔ n'aa gusa nɛ̀ nù war taar, ɓɛɛ a̧ kaɗi.

¹⁹See bíí ko Sɔ̧ nyima in a̧, ɓɛɛ tɔ̧: «Kà mɛ gusi so nù war mɔɔrɔ koo mɔɔrɔ-ɗoŋ-kpɔk, mɛ tɛ̀ɛ́ kum o be Aram lɛŋ; kinii, mɛ tɛ gbin biro ti o be Aram war taar ɓɛɛ.»

²⁰Elisee fea, ɓɛɛ wa gun a̧. Tɛ ku̧u̧naŋ pɛ, o gii wi-ɗaŋ-mɔ tɛ tɛɛ dɔ̧ɔ̧-dɔ̧ɔ̧ nɛ̀ Mɔab pii nú *Israɛl.

²¹Ŋma wese, o ŋma bíí gun nɛ fio, ɓɛɛ wa zɔk o ŋma gíí wi-ɗaŋ-mɔ nɔ‘i nɛ̀ tɛ́ nɛ̀ Mɔab. Wa siŋa wɔr'i pi̧ kɔ̧ pɛsi-fio ko Elisee nɛ̀ haya-a, ɓɛɛ wa yu mɔ yak. Wɔr'i hɔŋa gba̧a̧ Elisee; wi’ɛi kpasa, ɓɛɛ a̧ kur yor ŋgɔn.

²²Hazaɛl wannu Aram dee so bɔnɛ in o be *Israɛl tɛ duka-a ko Jɔakaz zu nù.

²³GASA WAN usa *kɔ̧ɔ̧mɔ kɔ‘i ha̧ o be *Israɛl, ɓɛɛ a̧ de ko ha̧ wa. A̧ zika tɛ-a sitɛ wa wen *nɔɔ-tɔk n'aa nɔɔ so in Abraham, Izak in Jakob. A̧ kɔ̧ so mɛ kum wa na; a̧ e wa duk na hɔ tɛ ŋgimbi'i.

²⁴Hazaɛl wannu Aram fea, ɓɛɛ bem kɔ̧-a̧ Bɛn-Hadad ɔ wan oi-aa.

²⁵Hegɔ, Jɔas baa o ye ko dáà kɔ‘i Jɔakaz nɛ̀ Bɛn-Hadad bem ko Hazaɛl baa so er dáà kɔ̧-a̧ pii ɗoŋ. Jɔas bìí Bɛn-Hadad war taar, ɓɛɛ kai o ye *Israɛl piinɛ ɗoŋ.