Read Northwest Gbaya 2 WANNU 14 Bible Online

2 WANNU 14 - Northwest Gbaya bible

2 WANNU 14

¹Tɛ yiitoo pɛ-wan ko Jɔas bem ko Jɔakaz wannu *Israɛl, Amasia bem ko Jɔas wannu Juda ɔɔ wan.

²Ŋgimbi n'aa ɔɔ nɛ wan, a̧ a̧a̧ nɛ̀ pɛ ɓu-yiitoo-zua-mɔɔrɔ, ɓɛɛ a̧ de pɛ ɓu-yiitoo-zua-mɔɔrɔ-ɗoŋ-naar tɛ wan sɛn Jerusalɛm. Nàà kɔ̧-a̧ nɛ́ zɔŋa Jerusalɛm; nin-a nɛ́ Jɔadin.

³A̧ dee mɔ nɛ̀ dee tɛ GASA WAN, ɓɛɛ bo nɛ́ hee ko dáà kɔ̧-a̧ David ga na. A̧ dee kànà mɔ hee ko dáà kɔ̧-a̧ Jɔas ga.

⁴Mɔ kpɔk, o *kusa-fara kaɗi na; dukbíí ɓɔn kànà tɛ ɗafa sɔ̧ in dɔɔ fuu-nyama zu o fara-ɗafi géé-sɔ̧ nɔ‘i.

⁵Ɗoŋ nɛ Amasia mgbita tɛ wan kaɗi, ɓɛɛ a̧ gbɛ o gasa wi-biro kɔ̧-a̧ nɛ̀ gbɛɛ so dáà kɔ̧-a̧ wannu lɛŋ a nù.

⁶A̧ gbɛ o bem ko o wi nɛ̀ gbɛɛ dáà kɔ̧-a̧‘i na, nyɛm nɛ̀ ɗoŋ mɔ nɛ̀ yɔra zaŋ kalata Heembea ko Moisɛ, nɛ̀ GASA WAN ha̧a̧ so nɛ̀ nú‘e: «Dáà beka fe oi nú bem na; bem nyɛm mɛ fe oi nú dáà na mbɛt; ɓɛɛ kóó o ndé tɛ fe nɛ́ fio ɗaŋmɔ kɔ‘i.»

⁷Nɛ́ Amasia a̧ gbɛɛ so o be Edɔm booro-ɓu sɛn kɔ̧ ɗɔŋgɔ Tɔŋ, ɓɛɛ a̧ ba Sɛla tɛ biro'i; a̧ aa nin ye'i ndé Jokteɛl. Nin ye'i ɓɔna hegɔ hɔ sɔsɔɔ.

⁸Amasia toma bíí nɛnɛ tɛ Jɔas bem ko Jɔakaz bezaŋ Jɛhu, wannu *Israɛl, ɓɛɛ tɔ̧ ha̧ a̧: «Mɛ̀ tɛ́ ɛ̀ɛ̀ bí ŋmaa!»

⁹Jɔas wannu *Israɛl toma tɔ̧ ha̧ Amasia wannu Juda hee mɔ'ɔ ga: «Tɛn-ga̧a̧ Libaŋ toma ha̧ *gbatui Libaŋ‘e: ‹Mɛ̀ há̧ boko-bem kɔ-mɛ nɛ̀ kóò ha̧ bem kɔ‘m!› Ɓɛɛ ŋma saɗi zaŋbɛɛ nɛ̀ a̧a̧ Libaŋ ɓir yak hi̧i̧, i̧si̧ tɛn-ga̧a̧‘i e nù.

¹⁰Nɛ̀ mbetɛ, mɛ gana o be Edɔm, ɓɛɛ mɛ́ dúk nɛ̀ desee. Mɛ̀ zɔ́n tɛ-mɛ, ɓɛɛ mɔ kpɔk, mɛ̀ dúk tɛ kɔ-mɛ. Wen ge mɛ́ kɔ̧ɔ̧ mɛ ye géé tum biro ha̧ mɛ mɛ fe in o be Juda lɛŋ ge?»

¹¹Amasia zii wen nú-a na; hegɔ Jɔas wannu *Israɛl daŋa, ɓɛɛ wa ba zu dúk nɛ̀ ŋmaa sɛn Bɛt-Sɛmɛs nú Juda.

¹²*Israɛl gana zu o be Juda tɛ biro, ɓɛɛ wa pɛsi si ɗoŋ tɛ kɔ-wa.

¹³Jɔas wannu *Israɛl baa Amasia wannu Juda, bem ko Jɔas, be-koo Akazias nɛ̀ bara-biro sɛn Bɛt-Sɛmɛs, ɓɛɛ tɛ pii Jerusalɛm, gbin garo-biro a nù, nyɛi̧a ɗoŋ-aa nɛ́ mɛtrɛ gɔmŋmaa-yiitoo, ku̧u̧-naŋ-a nɛ̀ nú garo ko Efraim hɔ nɛnɛ nú garo mɛ mgbii-aa.

¹⁴A̧ kaia o lɔr in bu-mbɔi, o mɔɔ-de-tom n'aa kpaa kɔ̧ Tua ko GASA WAN lɛŋ, in o ŋma dɔka mɔ mgbara mbɔi, kɔ̧ tua ko wannu, a̧ kaia o bara-biro mbɛt, ɓɛɛ a̧ si ɗoŋ sɛn Samarii.

¹⁵Oi o tom ko Jɔas, mɔ n'aa dea, o ŋgaŋamɔ kɔ̧-a̧, in o biro kɔ̧-a̧ in Amasia wannu Juda yɔra zaŋ Kalata Nyɛrɛ ko o wannu *Israɛl.

¹⁶Jɔas fea si ɗoŋ o dáà kɔ‘i, ɓɛɛ wa gun a̧ sɛn Samarii in o wannu *Israɛl. Bem kɔ̧-a̧ Jeroboam ɔɔ wan oi-aa.

¹⁷Amasia bem ko Jɔas, wannu Juda duka zu nù pɛ ɓu-zua-mɔɔrɔ ɗoŋ fio ko Jɔas, bem ko Jɔakaz, wannu *Israɛl.

¹⁸Oi o dɔka tom ko Amasia yɔra zaŋ Kalata Nyɛrɛ ko o wannu Juda.

¹⁹Wa baa ɗaŋ keta zu a̧ sɛn Jerusalɛm, ɓɛɛ a̧ yu mɔ yak si Lakis. Wa toma o bíí ndak ɗoŋ-aa nɛ́ɛ̀ gbɛ a̧ hi̧i̧.

²⁰Wa baa wɔr-aa nɛ̀ nyaŋa sinɛ Jerusalɛm, ɓɛɛ wa gun a̧ in o dáà kɔ̧-a̧, sɛn *Ye ko David.

²¹Azaria[12] dee pɛ ɓu-zua-mɔɔrɔ-ɗoŋ-kpɔk, ɓɛɛ o be Juda lɛŋ hok a̧ mɛ ɔ wan oi dáà kɔ̧-a̧ Amasia.

²²Nɛ́ a̧ a̧ ɗafa ye Elat woyo, ɓɛɛ ha̧ siɗoŋ ha̧ Juda, ɗoŋ fio ko dáà kɔ̧-a̧ Amasia.

²³Amasia bem ko Jɔas ɔɔ wan Juda pɛ ɓu-zua-mɔɔrɔ, ɓɛɛ Jeroboam bem ko Jɔas ɔ wan *Israɛl sɛn Samarii. A̧ dee pɛ ɓu-naar-zua-kpɔk tɛ wan.

²⁴A̧ dee mɔ ɗaŋ yí GASA WAN; a̧ e ɗaŋmɔ nɛ̀ Jeroboam bem ko Nɛbat dee so, kai nɛ̀ o be *Israɛl a sɛnɛ‘i kóó kpɔk duk na.

²⁵Nɛ́ a̧ a̧ ɗafa mɔ sɛn nú *Israɛl lɛŋ woyo, ku̧u̧naŋ-a nɛ̀ Lɛbo-Hamat hɔ ká̧ gba-tɔp Araba mɛ, nyɛm nɛ̀ ɗoŋ wen nɛ̀ GASA WAN Sɔ̧ ko *Israɛl tɔ̧ɔ̧ so nɛ̀ nú Jɔnas *wi-tɔ̧-wen oi nú Sɔ̧, bem ko Amitai, be Gat-Hefɛr.

²⁶GASA WAN zɔka gasa bɔnɛ nɛ̀ o be *Israɛl a̧a̧ so sɛnɛ‘i; kóó ŋma bíí kpɔk mɛ gbak *Israɛl bo so na.

²⁷Ɓɛɛ bo nɛ GASA WAN tɔ̧ɔ̧ so, wi tɛ bi nin *Israɛl yinɛ zu nù na; hegɔ, a̧ ha̧a̧ ŋgai ha̧ Jeroboam bem ko Jɔas mɛ kpasi wa.

²⁸Oi o tom ko Jeroboam, mɔ lɛŋ n'aa dea, o ŋgaŋamɔ kɔ̧-a̧ in o biro kɔ̧-a̧ yɔra zaŋ Kalata Nyɛrɛ ko o wannu *Israɛl. A̧ baa Damas in Hamat nɛ̀ Juda baa so piinɛ ɗoŋ ha̧ *Israɛl.

²⁹Jeroboam fea, ɓɛɛ wa gun a̧ in o dáà kɔ̧-a̧, o wannu *Israɛl. Bem kɔ̧-a̧ Zakarii ɔɔ wan oi-aa.