Read Northwest Gbaya 2 WANNU 16 Bible Online

2 WANNU 16 - Northwest Gbaya bible

2 WANNU 16

¹Tɛ ɓu-zua-mɔɔrɔ-ɗoŋ-yiitoo pɛ-wan ko Pɛka bem ko Rɛmalia, Ahaz bem ko Yotam wannu Juda ɔɔ wan.

²Ahaz a̧a̧ so nɛ pɛ̀ ɓu-yiitoo, ɓɛɛ a̧ ɔ wan Jerusalɛm pɛ ɓu-zua-mɔɔrɔ-ɗoŋ-kpɔk. A̧ de mɔ nɛ̀ yuwar-a yí GASA WAN Sɔ̧ kɔ̧-a̧ hee mɔ'ɔ nɛ̀ zɔmdáà kɔ̧-a̧ David dee so ga na.

³A̧ baa nɛ́ yuwar ko o dɔka wannu *Israɛl; a̧ dɔɔ bem kɔ̧-a̧ ha̧ o géé-sɔ̧ ko o dukbíí nɛ̀ GASA WAN ndaka so yinɛ ti o be *Israɛl.

⁴A̧ ɗafa sɔ̧ dɔ nɛ̀ fuu-nyama zu o *kusa-fara, zu o kaya in ɗɔɔ o da̧a̧ wa̧a̧-te lɛŋ.

⁵Rɛsin wannu Aram in Pɛka bem ko Rɛmalia wannu *Israɛl daŋa mɛ nɛ̀ɛ́ bi Ahaz sɛn Jerusalɛm; wa kɛra ye, ɓɛɛ wa nyɛm so mɛ ku̧ biro na.

⁶Tɛ ŋgimbi'i, wannu Edɔm baa Elat woyo. A̧ ndaka o be Juda sɛn Elat lɛŋ; o be Edɔm baa fara, ɓɛɛ wa ya sɛnɛ hɔ sɔsɔɔ.

⁷Ahaz toma bíí nɛnɛ tɛ Tiglat-Pilesɛr wannu Asirii mɛ tɔ̧ ha̧ a̧ hee mɔ'ɔ ga: «Mi nɛ wi-de-tom k’ɛ́nɛ́ in mi nɛ bem k’ɛ́nɛ́ mbɛt! Ɛ̀nɛ̀ tɛ́ɛ̀ gbó‘m er wannu Aram in wannu *Israɛl nɛ̀ kur zu'm’ɛ yinɛ.»

⁸Ahaz kaia bu-mbɔi in lɔr nɛ̀ duk kɔ̧ Tua ko GASA WAN in wan mɛ kɔ̧ tua ko wannu lɛŋ tom nɛnɛ ha̧ wannu Asirii nɛ̀ ha̧a̧mɔ.

⁹Wannu Asirii kpɛka ha̧a̧mɔ‘i, ɓɛɛ a̧ nɛ́ɛ̀ bi Damas ba; a̧ kaia o wi ye'i lɛŋ nɛ̀ bara-biro si Kir, ɓɛɛ a̧ gbɛ Rɛsin.

¹⁰Wannu Ahaz nɛɛ kpa ŋmaa in Tiglat-Pilesɛr wannu Asirii sɛn Damas. A̧ zɔka *fara-ɗafi-sɔ̧ nɛ̀ duk sɛn Damas, ɓɛɛ a̧ tom yuwar mboo fara-ɗafi-sɔ̧‘i in yuwar ɗafa-a ha̧ wi-ɗafi-sɔ̧ Uria, wen ha̧ a̧ mɛ zɔk de nɛnɛ.

¹¹Uria wi-ɗafi-sɔ̧ mboo *fara-ɗafi-sɔ̧ nyɛm nɛ̀ ɗoŋ mɔ nɛ̀ wannu Akaz toma tɛnɛ nɛ̀ Damas. Tom'i kaɗa nɛti sɛka wannu Ahaz be tɛ̀ɛ́ pii ɗoŋ nɛ̀ Damas.

¹²Wannu zɔka *fara-ɗafi-sɔ̧ tɛ pia-a kɔ‘i nɛ̀ Damas, ɓɛɛ a̧ nɛ́ si ká̧ a̧.

¹³A̧ *dɔɔ kpoo-sɔ̧, ɓɛɛ a̧ ha̧ mɔ mbɛt. A̧ aa zɛzɛ, ɓɛɛ a̧ misi̧ tɔk saɗi ha̧a̧mɔ-gaŋmɔ a zu-a.

¹⁴A̧ baa *fara-ɗafi-sɔ̧ nɛ‘i dee nɛ̀ ndɛrɛ nɛ̀ duk ti GASA WAN yinɛ wen duka so mgbara mbe *fara-ɗafi-sɔ̧ in Tua ko GASA WAN, ɓɛɛ a̧ ba e nɛ̀ war mgbɔɔr nɛ̀ war ká̧-zan-mɛ-ŋgɔn.

¹⁵Wannu Ahaz ha̧a̧ nú ha̧ wi-ɗafi-sɔ̧ Uria hee mɔ'ɔ ga: «Mɛ̀ dɔ́ kpoo-sɔ̧ mɛ tutuyɛ in ha̧a̧mɔ mɛ ga̧a̧mɔ; mɛ̀ dɔ́ kpoo-sɔ̧ in ha̧a̧mɔ ko wannu, gú nɛ̀ ha̧a̧mɔ in o zɛzɛ ko bíí lɛŋ sɛn zu gasa *fara-ɗafi-sɔ̧. Mɛ̀ gbáí tɔk o saɗi, dɔɔ kpoo-sɔ̧ lɛŋ, in tɔk o saɗi-ɗafi-sɔ̧ a zu-a; ɓɛɛ nɛ̀ war ko *fara-ɗafi-sɔ̧ nɛ‘i dee nɛ̀ ndɛrɛ, mi tɛ zɔk mɔ n'am tɛ de nɛnɛ.»

¹⁶Wi-ɗafi-sɔ̧ Uria dee mɔ lɛŋ nyɛm nɛ̀ ɗoŋ *ha̧a̧nú ko Ahaz.

¹⁷Wannu Ahaz yaia o ká̧-yí mɔɔ-tui-kpánà, kai o gasa kpánà nɛ̀ ya zu-a'i yinɛ, ɓɛɛ ba gba kpánà nɛ‘i dee nɛ ndɛrɛ nɛ̀ duk so zu o ndai-ndɛrɛ e zu nɛka-ta.

¹⁸A̧ kpaia mɔ sɛn kɔ̧ Gɔna-bɛr-tua Sabat kɔ̧ Tua ko Sɔ̧, in nú tua ko wannu nɛ̀ duk nɛ̀ war zan mbɛt mɛ ha̧ desee ha̧ wannu Asirii.

¹⁹Oi o tom ko wannu Ahaz in mɔ n'aa dea yɔra zaŋ Kalata Nyɛrɛ ko o wannu Juda.

²⁰Ahaz fea si ɗoŋ o dáà kɔ‘i, ɓɛɛ wa gun a̧ in o dáà kɔ̧-a̧ sɛn *Ye ko David. Bem kɔ̧-a̧ Ezɛkias ɔɔ wan oi-aa.