Read Northwest Gbaya 2 WANNU 18 Bible Online

2 WANNU 18 - Northwest Gbaya bible

2 WANNU 18

¹Tɛ taar pɛ ɔɔ-wan ko Osee bem ko Ɛla wannu *Israɛl, Ezɛkias bem ko Ahaz wannu Juda ɔɔ wan.

²A̧ a̧a̧ so nɛ̀ pɛ ɓu-yiitoo-zua-mɔɔrɔ ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-yiitoo-zua-mɔɔrɔ-ɗoŋ-naar sɛn Jerusalɛm. Nin nàà kɔ̧-a̧ nɛ́ Abi boko-bem ko Zakarii.

³A̧ dee so mɔ nɛ̀ yuwar-a yí GASA WAN, kànà hee ko zɔmdáa kɔ̧-a̧ David ga.

⁴A̧ gbina o *kusa-fara in o ta-zu-nù a nù, a̧ gɔma te nɛ‘i gasi gasi pi̧ nù, ɓɛɛ a̧ gbin gɔk-ndɛrɛ nɛ̀ Moisɛ dee so'i a nù, wen o be *Israɛl dɔɔ so fuu-nyama ti gɔk ndɛrɛ‘i hɔ ŋgimbi'i; wa sa so nin-a'e, Nɛhustaŋ.

⁵Ezɛkias ee ta nɛ̀ GASA WAN Sɔ̧ ko *Israɛl. Ɗoŋ n'aa fee kaɗi, ŋma wannu Juda nɛ‘i tɛ we nɛ̀ a̧ nɛti, kóó nɛ̀ ɗoŋ, bo na mbɛt.

⁶A̧ ndaɗa kànà in GASA WAN; a̧ zik tɛ-a na, a̧ kasa o geŋa nɛ̀ GASA WAN ha̧a̧ so ha̧ Moisɛ nɛ̀ de-a.

⁷GASA WAN duka so in a̧, ɓɛɛ o mɔ n'aa de lɛŋ hɔ nɛ́ gba̧a̧. A̧ dee ŋgazu in wannu Asirii, ɓɛɛ a̧ duk ɗɔɔ ŋgai kɔ̧-a̧ ɓɔna.

⁸A̧ bìì o be Filistii hɔ Gaza in nù nɛ̀ zii nɛ̀ a̧; a̧ ɗaŋa o kusa fara-pɛm-mɔ in o ŋga-ye-biro mbɛt.

⁹Tɛ naar pɛ-wan ko Ezɛkias, tɛ mɔɔrɔ-ɗoŋ-yiitoo-aa ko Osee bem ko Ɛla wannu *Israɛl, Salmanasar wannu Asirii baa zu dúk nɛ̀ Samarii, ɓɛɛ a̧ kpe ye e nu.

¹⁰O be Asirii baa ye'i ɗoŋ pɛ taar. Ezɛkias dee pɛ mɔɔrɔ-ɗoŋ-kpɔk tɛ wan, Osee wannu *Israɛl dee kɔ‘i mɔɔrɔ-ɗoŋ-naar sɛka wa be tɛ̀ɛ́ ba Samarii.

¹¹Wannu Asirii kaia o be *Israɛl yaknɛ nɛ̀ bara-biro si tɛ kɔ‘i, ɓɛɛ a̧ mgbɔ wa si Hala, si ká̧ zaŋ yí Habɔr, foka-yì Gozaŋ, in sitɛ o ye Mɛdii.

¹²Mɛ̀ nɛ́ wen nɛ̀ wa zii wen ko GASA WAN Sɔ̧ kɔ-wa na, gbin nɛ̀ *nɔɔ-tɔk kɔ̧-a̧; mɔ lɛŋ nɛ̀ Moisɛ wi-de-tom ko GASA WAN yɔra so'i, wa zii géé zia-a, kà bó nɛ̀ kasa-a de nɛ̀ tom na mbɛt.

¹³Ezɛkias ɔɔ wan pɛ ɓu-zua-naar, ɓɛɛ wannu Asirii Sɛnakɛrib ba zu dúk nɛ̀ o ŋga-ye Juda lɛŋ, ɓɛɛ kai.

¹⁴Ezɛkias wannu Juda pi̧i̧ tom ha̧ wannu Asirii sɛn Lakis hee mɔ'ɔ ga: «Mi dee ŋma ɗaŋmɔ! K’ɛ́nɛ́ bi'm na! Mi tɛ de mɔ lɛŋ n’ɛnɛ tɛ kɔ̧ ha̧‘m mɛ de!» Wannu Asirii tɔ̧ɔ̧ ha̧ Ezɛkias wannu Juda mɛ yoɓi kilo bu-mbɔi booro-mɔɔrɔ-ɗoŋ-naar in kilo lɔr gɔmŋmaa-mɔɔrɔ-ɗoŋ-naar.

¹⁵Ezɛkias ha̧a̧ sede nɛ̀ duk kɔ̧ Tua ko GASA WAN'i in wan mɛ kɔ̧ tua ko wannu ha̧ a̧.

¹⁶Nɛ́ ŋgimbi'i a̧ Ezɛkias gbina nɛ̀ o nú Tua ko GASA WAN in kpar nú-a nɛ̀ a̧ nɛ̀ tɛ-a baa yɔk so ɗoŋ-aa nɛ̀ lɔr. A̧ kaia wa ha̧ wannu Asirii.

¹⁷Wannu Asirii toma gasa wi-biro, gasawi ko o kpàná in gasa betom kɔ‘i ká bá nɛ̀ o ŋma gíí wi-biro nɛ̀ Lakis sitɛ wannu Ezɛkias sɛn Jerusalɛm. Nɛ̀ wa hɔɔ kaɗi, wa yora ká̧ fara-e-yì nɛ̀ duk nɛ̀ war ŋgɔn yuwar fara-mgbɔ-laa.

¹⁸Wa aka mɔ wen wannu, ɓɛɛ Ɛliakim bem ko Hilkia nɛ̀ duk zu tua-wan, in wi-yɔr-kalata Sɛbna, in Yɔa bem ko Asaf nɛ̀ duk nɛ́ wi-he-mbea gbo pii tɛ-wa.

¹⁹Gasa betom tɔ̧ɔ̧ ha̧ wa: «Ɛ̀nɛ̀ nɛ́ɛ̀ tɔ̧ ha̧ Ezɛkias ndé, gasa wannu Asirii tɔ̧ɔ̧ ndé, mɛ́ é ta-mɛ nɛ̀ o nde?

²⁰Mɛ́ é ta-mɛ nɛ̀ o ha̧ mɛ mɛ de nɛ̀ ŋgazu in am o?

²¹Mɛ́ é ta-mɛ nɛ̀ Egiptɛ ɗaŋ nuka-tòrò sɔɔ géè, kà ŋma bíí de mɛ ba, ɓɛɛ gbina yur er-wi’ɛ nde? Wannu Egiptɛ duk hegɔ in o wi nɛ̀ e ta nɛ̀ a̧ lɛŋ!

²²«Ŋmafara ɛ́nɛ́ tɛ́ tɔ̧ ha̧‘m ndé, wi e ta nɛ̀ GASA WAN Sɔ̧ kɔ‘i; ɓɛɛ nɛ́ a̧ á̧ Ezɛkias gbina o *kusa-fara kɔ̧-a̧ in o fara-ɗaf'aa, tɔ̧ nɛnɛ ha̧ o be Juda in o be Jerusalɛm ndé, a'i gbɛ́ zugur-wi nù ti *fara-ɗaf'aa sɛn Jerusalɛm wó'ɛ gɔ!

²³Mɛ̀ é nú mɛ in nyaa wannu Asirii, ha̧‘m ha̧ o nyaŋa booro-yiitoo ha̧ mɛ, kà mɛ nɛ́ nyɛma mɛ kpa o wi-daŋ-aa!

²⁴Kóó mɛ́ e ta-mɛ nɛ̀ Egiptɛ wen ha̧ mɛ mɛ kpa o keekee-nyaŋa in o wi-daŋ-aa! Héé ge mɛ tɛ zik ɗoŋ-mɛ e ha̧‘m, mi nɛ̀ duk nɛ́ geɗek wi-duk-zu zika-nù ko gasa wan kɔ‘m, mi nɛ̀ duk nɛ́ geɗek-wi mgbara o bíí kɔ̧-a̧, ge nde?

²⁵Mɛ́ ta kɔ-mɛ‘e, ye kɔ-mɛ n'am tɛ ɗaŋ yínɛ́'ɛ, bó nɛ́ nɛ̀ ŋgai ko GASA WAN na nde? GASA WAN tɔ̧ɔ̧ ha̧‘m'e, a̧‘m tɛ́ɛ̀ bi ye’ɛ, a̧‘m ɗáŋ a̧ yinɛ!»

²⁶Ɛliakim bem ko Hilkia in Sɛbna bá nɛ̀ Yoa tɔ̧ɔ̧ ha̧ gasa betom: «Ɛ́ɛ́ aia nú h’ɛ́nɛ́, ɛ̀nɛ̀ tɔ̧́ nɛ̀ nú aram sɛk’ɛɛ zia gba̧a̧-a̧; k’ɛ́nɛ́ tɔ̧ nú hébreu na, wen ká o bíí nɛ ya zu garo tɛɛ zii.»

²⁷Gasa betom kifa nú ha̧ wa: «Nyaa toma'm ha̧ wan kɔ-mɛ in mɛɛ nde? Bo nɛ a̧ toma'm ha̧ o wi nɔ'ɔ n’ɛnɛ tɛ nɔ ini in nyɔŋa ɗɔr ndaa'nɛ́ in o ŋmaa’ɛ na nde?»

²⁸Nɛ́ mɔ'ɔ nɛ̀ gasa betom yora ŋgɔn tɔ̧ nɛ̀ wen nɛ̀ hee-ger nɛ̀ nú hébreu hee mɔ'ɔ ga: «Ɛ̀nɛ̀ zíí wen ko gasa wannu Asirii nɛ tɔ̧‘i.

²⁹Wannu tɔ̧ɔ̧ ndé, k’ɛ́ɛ́ e ha̧ Ezɛkias mɛ ɔr'nɛ́ géè na, wen a̧ nyɛm mɛ gbo'nɛ́ yinɛ er-am na.

³⁰Ká Ezɛkias de h’ɛ́nɛ́ mɛ e ta nɛ̀ GASA WAN tɔ̧ nɛnɛ‘e: ‹GASA WAN tɛ gbo yɛ nɛ mbetɛ, wannu Asirii nyɛm mɛ ba ye’ɛ na wó,› na!

³¹K’ɛ́nɛ́ zii wen ko Ezɛkias na, wen wannu Asirii tɔ̧a̧: ‹Ɛ̀nɛ̀ nɔ́ tɔk in am, ɛ̀nɛ̀ mbó zu ha̧‘m, ɓɛɛ ɛ́nɛ́ tɛ nyɔŋ waya-nyak-dɔ̧ɔ̧ in waya-te-mbɔra k’ɛ́nɛ́; ɛ́nɛ́ tɛ nɔ yì k’ɛ́nɛ́

³²hɔ ŋgimbi n'am tɛ tɛ̀ɛ́ kai'nɛ́ sitɛ ŋma nù nɛ̀ hɔɔ ŋmaa in k’ɛ́nɛ́, nù nɛ̀ alkamaari in nyɔ̧ɔ̧ dɔ̧ɔ̧ a̧a̧ sɛnɛ, nù nɛ̀ nyɔŋmɔ in nyak-dɔ̧ɔ̧ a̧a̧ sɛnɛ, nù nɛ̀ o te-nɔ̧́ in gɔrɔ a̧a̧ sɛnɛ, hegɔ ɛnɛ tɛ ya kpasa, ɛnɛ beka fe na.› K’ɛ́nɛ́ zii ɔramɔ ko Ezɛkias na! Wen'i n'aa tɔ̧‘e, GASA WAN tɛ gbo'nɛ́ wó‘i, nɛ́ ndela!

³³O sɔ̧ ko o tugun bíí nɛtɛ nɛtɛ gboo so o bíí kɔ‘i er wannu Asirii nde?

³⁴O sɔ̧ ko o be Hamat in ko be Arpad a̧a̧ déè? O sɔ̧ ko o be Sɛfarvaim, ko o be Hɛna in Iwa a̧a̧ déè? Wa gboo Samarii yinɛ er-am nde?

³⁵Mgbara o sɔ̧ nɔ‘i lɛŋ, nɛ́ o'o gboo nù kɔ‘i yinɛ er-am, sá nɛ́ GASA WAN a̧ tɛ gbo Jerusalɛm yinɛ er-am o?»

³⁶O wi nɔ‘i yaa selele, wa kifi nú-wen kpɔk na, wen wannu ha̧a̧ so nú‘e ndé, ká wa kifi nú na.

³⁷Ɛliakim bem ko Hilkia nɛ̀ duk zu tua-wan, in wi-yɔr-kalata Sɛbna, bá nɛ̀ Yɔa bem ko Asaf wi-he-mbea a̧ka̧ laa tɛ lɛŋ, ɓɛɛ wa nɛ́ ti Ezɛkias mɛ we ɗoŋ wen ko gasa betom ha̧ a̧.