Read Northwest Gbaya 2 WANNU 2 Bible Online

2 WANNU 2 - Northwest Gbaya bible

2 WANNU 2

¹Mɔ nɛ̀ hɔɔ ŋgimbi nɛ̀ GASA WAN baa nɛ̀ Elii nɛ̀ gba-búk si yiwese nɛ́ mɔ'ɔ. Elii in Elisee kura Gilgal yak.

²Elii tɔ̧ɔ̧ ha̧ Elisee: «Mi ai nú ha̧ mɛ, mɛ̀ dúk kɔ-mɛ hɛ̧ɛ̧ wen GASA WAN tom nɛ‘m si Bɛtɛl mɛ.» Elisee kifa nú: «Kpasawen a̧‘m tɔ̧, hee mɔ'ɔ nɛ̀ GASA WAN duk kpasa in ɛnɛ mbɛt duk kpasa ga, mi beka e kɔ‘m ‘nɛ́ duk na.» Ɓɛɛ wa zir in ŋmaa si Bɛtɛl.

³O ŋma gbama *wi-tɔ̧-wen oi nú Sɔ̧ nɛ̀ ya kɔ‘i Bɛtɛl wee ti Elisee tɛnɛ ɓɛɛ tɔ̧ ha̧ a̧: «Mɛ iŋa'e ndé, GASA WAN tɛ ba wan kɔ-mɛ er-mɛ sɔsɔɔ yaknɛ nde?» A̧ kifa nú: «Mi iŋa mbɛt; k’ɛ́nɛ́ tɔ̧ wen-aa ha̧‘m na!»

⁴Elii tɔ̧ɔ̧ ha̧ a̧ woyo: «Mi ai nú ha̧ mɛ Elisee; mɛ̀ dúk kɔ-mɛ hɛ̧ɛ̧ wen GASA WAN tom nɛ‘m si Jeriko mɛ.» A̧ kifa nú: «Kpasawen a̧‘m tɔ̧, hee mɔ'ɔ nɛ̀ GASA WAN duk kpasa in ɛnɛ mbɛt duk kpasa ga, mi beka e kɔ‘m'nɛ́ duk na!» Ɓɛɛ wa yak in ŋmaa si Jeriko mɛ.

⁵O gbama *wi-tɔ̧-wen oi nú Sɔ̧ nɛ̀ ya sɛn Jeriko ɗɔŋa pii katɛ Elisee, ɓɛɛ tɔ̧ ha̧ a̧: «Mɛ iŋa'e GASA WAN tɛ ba wan kɔ-mɛ yaknɛ er-mɛ sɔsɔɔ nde?» A̧ kifa nú: «Mi iŋa mbɛt; k’ɛ́nɛ́ tɔ̧ wen-aa ha̧‘m na.»

⁶Elii tɔ̧ɔ̧ ha̧ a̧ woyo: «Mi ai nú ha̧ mɛ, mɛ̀ dúk hɛ̧ɛ̧, wen GASA WAN tom nɛ‘m nɛnɛ si nú Jurdɛn.» A̧ kifa nú: «Kpasawen a̧‘m tɔ̧, hee mɔ'ɔ nɛ̀ GASA WAN duk kpasa in ɛnɛ mbɛt duk kpasa ga, mi beka e kɔ‘m'nɛ́ duk na!» Ɓɛɛ wa yak in ŋmaa yiitoo lɛŋ.

⁷O ŋma gbama *wi-tɔ̧-wen oi nu Sɔ̧ ɓu-mɔɔrɔ tɛa pii nú Jurdɛn yor nɛ̀ nyɛi̧a-a nɛ̀ wa. Elii in Elisee yor mgbák ká̧ foka-yí Jurdɛn

⁸Elii kpɔ̧i̧a̧ gba-laa kɔ‘i kar gusi nɛ̀ foka-yí Jurdɛn, ɓɛɛ yì kɛ̧ si ŋgɔn, kɛ̧ si ɗɔɔ. Wa kuu yì in ŋmaa nɛ̀ naŋ-wa kútú-kútú.

⁹Ŋgimbi nɛ wa kuu yì kaɗi, Elii tɔ̧ɔ̧ ha̧ Elisee: «Mɛ̀ ák mɔ n'am tɛ de ha̧ mɛ sɛka wa baa'm yaknɛ er-mɛ.» Elisee kifa nú: «Mi kɔ̧ɔ̧ mɛ kpa ŋgai [2] hee k’ɛ́nɛ́ ga war yiitoo.»

¹⁰Ɓɛɛ Elii tɔ̧: «Mɛ́ ák nɛ́ ŋgayamɔ nyɛmna. Kà mɛ̀ zɔk am tɛ ŋgimbi yaka-a kɔ‘m, mɛ tɛ kpa; kà bó hegɔ na, mɛ beka kpa na.»

¹¹Hee mɔ'ɔ nɛ̀ wa nɛ́ in ŋmaa tɔ̧ nɛ̀ nyɛrɛ nɛnɛ ga, ŋma keekee-wee in o nyaŋa-wee tɛɛ kɛ̧ mgbara wa yiitoo, ɓɛɛ gasa gba-búk ɓaɓari Elii yaknɛ si yiwese mɛ.

¹²Elisee zɔka mɔ‘i, ɓɛɛ hiɗi mɔ: «Naa-oo, dáà kɔ‘m![3] Dáà kɔ‘m! Naa-oo, keekee-nyaŋa ko *Israɛl in o wi-daŋ-aa!» Ɗoŋ mɔ‘i, Elisee zɔk a̧ ɓɔna, ɓɛɛ a̧ a̧k laa tɛ-a tan see-a yiitoo.

¹³A̧ baa gba-laa ko Elii nɛ̀ kpɔ̧i̧a̧ tik nù, a̧ pia ɗoŋ pii nú Jurdɛn, ɓɛɛ a̧ yor ká̧ ŋgere.

¹⁴A̧ baa gba-laa'i gusi nɛ̀ yì tɔ̧ nɛnɛ: «GASA WAN Sɔ̧ ko Elii a̧a̧ déè nde?» A̧ gusa yì hee ko Elii ga; yì kɛ̧ɛ̧ si ŋgɔn si dɔɔ, ɓɛɛ a̧ ku yak.

¹⁵O gbama *wi-tɔ̧-wen oi nú Sɔ̧ mɛ Jeriko nɛ̀ zɔka saŋa-yí-a tɔ̧a̧: «Ŋgai ko Elii yee tɛ Elisee.» Wa wee ti a̧, ɓɛɛ wa gbɛ zugur-wa nù ti a̧,

¹⁶tɔ̧ nɛnɛ ha̧ a̧: «O ŋma ŋga bíí ɓu-mɔɔrɔ a̧a̧ mgbara o wi-de-tom kɔ-mɛ hɛ̧ɛ̧, mɛ̀ nɛ́ o wi-biro; mɛ̀ é ha̧ wa mɛ kii wan kɔ-mɛ. Ŋma-fara *ɔmi ko GASA WAN baa a̧, ɓɛɛ siŋ a̧ pi̧ zu ŋma kaya, kóó kɔ̧ ŋma ɗɔŋgɔ.» Ɓɛɛ a̧ kifi nú: «K’ɛ́nɛ́ tom ŋma bíí kpɔk na.»

¹⁷Hee mɔ'ɔ nɛ̀ wa ir nɛ a̧ ga, a̧ tɔ̧ ha̧ wa: «Ɛnɛ nyɛma toma wa.» Wa toma bíí ɓu-mɔɔrɔ, ɓɛɛ o wi nɔ‘i kii Elii hegɔɔ zɛ taar takaɗi, wa kpa a̧ na.

¹⁸Elisee ɓɔna so kɔ‘i Jeriko. Wa pia ɗoŋ tɛ a̧, ɓɛɛ a̧ tɔ̧ ha̧ wa: «Bo nɛ mi tɔ̧ɔ̧ so h’ɛ́nɛ́, k’ɛ́nɛ́ kii a̧ na, na nde?»

¹⁹O wi saaye Jeriko tɔ̧ɔ̧ ha̧ Elisee: «Hee mɔ'ɔ nɛ̀ nyaa zɔk ga, duka-a saaye-ɛ ɔ dee, ɓɛɛ yí-nɔɔ de na; nù dɛm nyɔnɔ nɛ de-a na mbɛt.»

²⁰A̧ tɔ̧a̧: «Ɛ̀nɛ̀ bá mbe yèè tɛnɛ ha̧‘m, ɓɛɛ ɛ̀nɛ̀ á tɔŋ kɔ̧ a̧.» Wa baa tɛnɛ ha̧ a̧,

²¹ɓɛɛ a̧ yak si zu-zer-yì, nɛ́ɛ̀ á tɔŋ ɗɔɔ a̧ tɔ̧ nɛnɛ: «Tɔ̧ɔ̧-wen ko GASA WAN nɛ́ mɔ'ɔ: ‹Mi dee ha̧ yì'ɛ mɛ duk nɛ̀ sa̧a̧-a̧, a̧ beka gbɛ bíí bɔna, a̧ beka ɗaŋ nù ɓɔna.› »

²²Yì duka nɛ̀ sa̧a̧-a̧ hɔ sɔsɔɔ nyɛm nɛ̀ ɗoŋ wen nɛ̀ Elisee tɔ̧ɔ̧ so.

²³A̧ kura hi̧i̧ daŋ si Bɛtɛl, ɓɛɛ o ŋma be-ŋgaiwi tɛ nɛ̀ saaye mam nɛ̀ a̧ tɔ̧ nɛnɛ: «Mɛ̀ yák siɓi, ɗaŋ zuɗa zu-mɛ, mɛ̀ yák.»

²⁴A̧ zika tɛ-a sitɛ wa, ɓɛɛ a̧ fom wa nɛ̀ nin GASA WAN. Ŋma ŋga saɗi yiitoo nɛ̀ hɔɔ ŋmaa in baŋgiiɗoŋ[4] gboo nɛ̀ zaŋbɛɛ, ɓɛɛ nyɔŋ o bem ɓu-naar-zua-yiitoo mgbara wa.

²⁵Nɛ́ mɔ'ɔ nɛ̀ Elisee daŋa si zu kaya Karmɛl, ɓɛɛ a̧ duk hi̧i̧ si nɛ̀ ɗoŋ si Samarii.