Read Northwest Gbaya 2 WANNU 25 Bible Online

2 WANNU 25 - Northwest Gbaya bible

2 WANNU 25

¹Sedekias kura zu wannu Babilɔŋ. Tɛ mɔɔrɔ-ɗoŋ-naar pɛ-wan ko Sedekias, tɛ ɓu fio-zɛ, tɛ ɓu ɔɔ-zɛ, Nabukɔdɔnɔsɔr wannu Babilɔŋ hɔɔ ti Jerusalɛm in o wi-biro kɔ‘i lɛŋ. A̧ baa fara nú Jerusalɛm, ɓɛɛ wa mbo nù zik nɛnɛ.

²Wa kɛra ye'i duk nɛnɛ hegɔɔ hɔ tɛ ɓu-zua-kpɔk pɛ-wan ko Sedekias.

³Tɛ naar fio-zɛ, tɛ mɔɔrɔ-ɗoŋ-naar ɔɔ-zɛ, kaɓa tika, ɓɛɛ o bíí kpa mɔ mɛ nyɔŋ na.

⁴Garo mbaŋa, ɓɛɛ nɛ̀ oi kɛra ye nɛ̀ o be Kaldee kɛra e nù‘i, o wi-biro lɛŋ yuu mɔ nɛ̀ nú garo nɛ̀ duk mgbara ŋgeŋ yiitoo mgbák ká̧ be fɔ ko wannu; wa baa nɛ́ yuwar si nú Jurdɛn.

⁵O wi-biro Kaldee ndaka ɗoŋ wannu, ɓɛɛ wa kpa a̧ tɛ bɔkɔ-nú Jeriko. O wi-biro kɔ̧-a̧ yuu so mɔ e a̧ duk.

⁶O be Kaldee baa wannu nɛnɛ ha̧ wannu Babilɔŋ sɛn Ribla mɛ, ha̧ wa mɛ gɔn kita zu a̧.

⁷Wa gɔna ger o bem ko Sedekias nɛ̀ gbaayí-a, ɓɛɛ Nabukɔdɔnɔsɔr o yí Sedekias, hɛr a̧ nɛ̀ nyak-ndɛrɛ gbam ŋmaa yiitoo, ɓɛɛ mgbɔ a̧ si Babilɔŋ.

⁸Zɛ yaka mɔɔrɔ-ɗoŋ-yiitoo tɛ mɔɔrɔ fio-zɛ, ɓɛɛ Nabukɔdɔnɔsɔr, gasawi zu o wi-pɛm-wannu Babilɔŋ ye Jerusalɛm. Ŋgimbi'i ká Nabukɔdɔnɔsɔr wannu Babilɔŋ dee pɛ ɓu-zua-mɔɔrɔ-ɗoŋ-naar tɛ wan kaɗi.

⁹A̧ dɔɔ Tua ko GASA WAN, tua ko wannu in o tua sɛn Jerusalɛm lɛŋ; a̧ pi̧i̧ wee tɛ tua ko o gasawi lɛŋ.

¹⁰O wi-biro Kaldee lɛŋ nɛ̀ nɛ̀ɛ̀ so in gasawi kɔ‘i gbina garo nɛ̀ zika Jerusalɛm a nù.

¹¹Nabukɔdɔnɔsɔr gasawi zu o wi-pɛm-wannu kaia oi bíí nɛ̀ ɓɔna yaknɛ si Babilɔŋ, in o wan nɛ̀ yuu so mɔ si ɗoŋ wannu Babilɔŋ, in oi o dɔka bíí mbɛt.

¹²Gasawi zu o wi-pɛm-wannu ee o ŋma gee bíí mɛ wa o fɔ-nyak-dɔ̧ɔ̧ in o géé fɔ.

¹³O be Kaldee gbina mbiŋ nɛ‘i dee nɛ̀ ndɛrɛ sɛn kɔ̧ Tua ko GASA WAN, wa gbina o mɔɔ-tui-kpánà in gba-kpáná-ndɛrɛ nɛ yaa so kɔ̧ Tua ko GASA WAN a nu, ɓɛɛ wa kai ndɛrɛ-a yaknɛ si Babilɔŋ mɛ.

¹⁴Wa kaia o nyɛk-a-bùk, o mɔɔ-ɗu-mɔ, o paa, o mɔɔ-nɔ-mɔ in o nyɛk-ndɛrɛ nɛtɛ nɛtɛ nɛ̀ ya wen dee tom kɔ̧ Tua ko Sɔ̧ yaknɛ mbɛt.

¹⁵Gasawi zu o wi-pɛm-wannu kaia o *dek-e-wee, o daaro wen misa̧ gaŋmɔ, o be yèè nɛ‘i dee nɛ̀ lɔr in bu-mbɔi mbɛt lɛŋ.

¹⁶War ko o mbiŋ yiitoo, gba-kpáná-ndɛrɛ in o mɔɔ-tui-kpánà nɛ̀ Salomɔŋ dee so wen Tua ko GASA WAN, in o nyɛk-ndɛrɛ lɛŋ, wi nyɛm mɛ iŋ dita-a na.

¹⁷Kusa kuti mbiŋ nɛ́ mɛtrɛ mɔɔrɔ-ɗoŋ-taar, nɛ̀ gan-ndui-ndɛrɛ a̧a̧ so zu a̧. Kusa gan-ndui'i nɛ́ mɛtrɛ kpɔk nɛ reeta. Fanamɔ, in o be waya kóɓò nɛ‘i dee nɛ̀ ndɛrɛ a̧a̧ so zu gan-ndui'i mbɛt. O mbiŋ yiitoo lɛŋ hee ŋmaa ga.

¹⁸Gasawi zu o wi-pɛm-wannu baa wan-ɗafi-sɔ̧ Sɛraya, in Sɛfania, yiitoo wi-ɗafi-sɔ̧, in o wi-pɛm Tua ko GASA WAN taar.

¹⁹A̧ baa ŋma gasawi sɛn saaye nɛ̀ duka so zu o wi-biro in o ŋma bíí mɔɔrɔ nɛ̀ duk katɛ wannu saaye'i; a̧ kaia ŋma gasa wi-yɔr-kalata ko o wi-biro nɛ̀ hok o bíí tɛ nù‘i in o bíí ɓu-mɔɔrɔ-ɗoŋ-kpɔk nɛ̀ ɓɔna saaye mbɛt.

²⁰Nabukɔdɔnɔsɔr, gasawi zu o wi-pɛm-wannu kaia wa nɛ̀ bara-biro tom nɛnɛ ha̧ wannu Babilɔŋ sɛn Ribla.

²¹Ɓɛɛ wannu Babilɔŋ gbɛ wa sɛn Ribla nú Hamat. Nɛ́ hegɔ a̧ wa kaia nɛ̀ o be Juda yak nɛnɛ nɛ̀ bara-biro nyɛi̧ nɛ̀ nù kɔ-wa.

²²Ko o oi bíí nɛ̀ Nabukɔdɔnɔsɔr wannu Babilɔŋ ee ɓɔn Juda, a̧ hoka nɛ Gedalias bem ko Ahikam be-koo Safaŋ mɛ duk zu wa.

²³Ŋgimbi nɛ o gasa wi-biro in o bíí kɔ-wa zia'e ndé, nɛ́ Gedalias a̧ wannu Babilɔŋ hoka mɛ ɔ wan wó, wa tɛɛ kpa a̧ sɛn Mispa, wa in o bíí kɔ-wa. O wi nɛ̀ tɛa'i nɛ́ Ismaɛl bem ko Mɛtania, Yohanaŋ bem ko Karea, Sɛraya bem ko Tanumɛt be Nɛtɔfa, in Yazania bem ko Maka.

²⁴Gedalias kàná mɔ ti wa'e ndé, ká wa ya nɛ̀ kíì wen duka-a mgbara o wi-de-tom ko o be Kaldee na. Wa a̧ ɔ́ tɛ nù‘i, wa a̧ dé tom ha̧ wannu Babilɔŋ, ɓɛɛ wa tɛ ya nɛ̀ de-a.

²⁵Gedalias dee fio-zɛ mɔɔrɔ-ɗoŋ-yiitoo tɛ wan, ɓɛɛ Ismaɛl bem ko Nɛtania be-koo Ɛlisama, ŋma be-wan mbɛt kai o ŋma bíí ɓu in a̧, ɓɛɛ wa nɛ́ɛ̀ gbɛ Gedalias gú nɛ̀ o be Juda in o be Kaldee nɛ̀ dee so ye in a̧ sɛn Mispa.

²⁶Dukbíí nɛ̀ oi-aa, o ge bíí ge ndé lɛŋ, gú nɛ̀ o gasawi, o wi-duk-zu o wi-biro yuu o be Kaldee, ɓɛɛ wa yak si Egiptɛ mɛ.

²⁷Tɛ ɓu-taar-zua-mɔɔrɔ-ɗoŋ-yiitoo pɛ nɛ̀ wa baa nɛ̀ Jɔakin wannu Juda yaknɛ nɛ̀ bara-biro, tɛ ɓu-zua-yiitoo fio-zɛ tɛ ɓu-zua-mɔɔrɔ-ɗoŋ-yiitoo ɔɔ-zɛ, Mɛrodak wannu Babilɔŋ dee kó ha̧ Jɔakin wannu Juda, ká a̧ yee wan nɛ̀ mbe-a, ɓɛɛ a̧ gbo a̧ yinɛ kɔ̧ zɔɓɔ.

²⁸A̧ tɔ̧ɔ̧ de wen zu a̧, ɓɛɛ a̧ ha̧ de fara ha̧ a̧ gan ko o wannu nɛ̀ a̧a̧ so kɔ̧ zɔɓɔ in a̧ sɛn Babilɔŋ.

²⁹Jɔakin kpɔ̧i̧a̧ o laa-bara a nù ɓɛɛ duk nyɔŋ mɔ in wannu wese lɛŋ.

³⁰Wannu ha̧a̧ mɔ lɛŋ ha̧ a̧ wese kpɔk kpɔk wen duka-a kɔ̧-a̧ hɔ ŋgimbi fio kɔ̧-a̧.