Read Northwest Gbaya 2 WANNU 3 Bible Online

2 WANNU 3 - Northwest Gbaya bible

2 WANNU 3

¹Yoram bem ko Akab ɔɔ wan *Israɛl sɛn Samarii tɛ ɓu-zua-mɔɔrɔ-ɗoŋ-taar pɛ-wan ko Josafat, wannu Juda. A̧ ɔɔ wan pɛ ɓu-zua-yiitoo.

²A̧ dee mɔ ɗaŋ yí GASA WAN, ɓɛɛ bo hee ko dáà in nàà kɔ̧-a̧ ga na, wen n'aa ira ta-zu-nù nɛ̀ duka so wen ɗafa sɔ̧ Bal nɛ̀ dáà kɔ̧-a̧ dee so pi̧ nù.

³Mɔ kpɔk, a̧ ndaka ɗoŋ ɗaŋmɔ nɛ Jeroboam bem ko Nɛbat dee so ha̧ o be *Israɛl lɛŋ mɛ tik sɛnɛ. A̧ e ɗaŋmɔ‘i duk na.

⁴Mɛsa, wannu Mɔab duka nɛ́ wi-dai-mɔ, ɓɛɛ garama kɔ̧-a̧ n'aa gbo tɛ pɛ kpɔk ha̧ wannu *Israɛl nɛ́ *be-sami booro-gɔmŋmaa in o fùk-fùk-tɛ vala sami booro-gɔmŋmaa mbɛt.

⁵Ɗoŋ fio ko Akab, wannu Mɔab kura zu wannu *Israɛl.

⁶Wese'i, wannu Yoram tɛ̀ɛ́ nɛ̀ Samarii, nɛ́ɛ̀ zɔk o wi-biro *Israɛl lɛŋ.

⁷A̧ yaka, ɓɛɛ a̧ tom tɔ̧ ha̧ wannu Juda hee mɔ'ɔ ga: «Wannu Mɔab kura zu'm. Mɛ kɔ̧ɔ̧ mɛ nɛ̀ mɛ bi Mɔab in am nde?» Wannu Juda kifa nú: «Mi tɛ nɛ! Mɔ nɛ tɛ kpa mɛ, tɛ kpa'm; mɔ nɛ tɛ kpa o bíí kɔ-mɛ tɛ kpa o bíí kɔ‘m, ɓɛɛ mɔ nɛ tɛ kpa o nyaŋa kɔ-mɛ, tɛ kpa o nyaŋa kɔ‘m mbɛt.»

⁸A̧ tɔ̧ɔ̧ woyo: «Ɛɛ tɛ ba nɛ ge yuwar ge nɛ́ nɛ̀ biro'i ge nde?» Wannu Judea kifa nú: «Ɛɛ tɛ ba nɛ war ŋga-gbárà Edɔm.»

⁹Wannu *Israɛl, wannu Juda in wannu Edɔm yaka biro. Ɗoŋ zɛ mɔɔrɔ-ɗoŋ-yiitoo, ɓɛɛ yí-nɔɔ ko o wi-biro in o saɗi-tui-mɔ kaɗi.

¹⁰Wannu *Israɛl aia nú: «Ho! GASA WAN saa yɛ o wannu nɔ'ɔ taar’ɛ mɛ a yɛ kɔ̧ er wannu Mɔab nde?»

¹¹Josafat aka mɔ: «Ŋma *wi-tɔ̧-wen oi nú Sɔ̧ bo hɛ̧ɛ̧ ha̧ a̧ mɛ ak GASA WAN h’ɛ́ɛ́ na nde?» Ŋma wi-de-tom ko wannu *Israɛl kifa nú: «Elisee bem ko Safat nɛ̀ de so tom ha̧ Elii a̧a̧ hɛ̧ɛ̧.»

¹²Josafat tɔ̧a̧: «A̧ nɛ́ bíí nɛ̀ wen ko GASA WAN a̧a̧ nú-a.» Josafat, wannu *Israɛl in wannu Edɔm zira nɛ́ sitɛ Elisee.

¹³Ɓɛɛ Elisee ak wannu *Israɛl: «Ŋma mɔ a̧a̧ mgbara'm in mɛɛ nde? Mɛ̀ nɛ́ tɛ o *wi-tɔ̧-wen oi nú sɔ̧ ko dáà kɔ-mɛ in ko nàà kɔ-mɛ ɛ̧́!» Wannu *Israɛl kifa nú ha̧ a̧: «Mi beka nɛ na, wen duk hee GASA WAN saa yɛ o wannu nɔ'ɔ taar’ɛ mɛ a yɛ kɔ̧ er o be Mɔab ga.»

¹⁴Elisee tɔ̧a̧: «Hee mɔ'ɔ nɛ̀ GASA WAN nɛ̀ a̧a̧ nɛ̀ ŋgayamɔ lɛŋ n'am de tom ha̧ a̧‘i duk kpasa ga, kà bó só nɛ́ Josafat wannu Juda na, bo nɛ mi tɛ̀ɛ́ pi̧ so nú tɛ mɛ na.

¹⁵Kaɗa, ɛ̀nɛ̀ sá ŋma wi-mbɛr-bi̧ɔ̧[5] tɛnɛ ha̧‘m.» Hee mɔ'ɔ nɛ̀ wi-mbɛr-bi̧ɔ̧ ku̧u̧ naŋ dee saa ga, ŋgai ko GASA WAN yee tɛ Elisee,

¹⁶ɓɛɛ a̧ tɔ̧: «GASA WAN tɔ̧ɔ̧ ndé, ɛ̀nɛ̀ zá̧ kɔ̧ nɛ̀ dɔka-a kɔ̧ gboŋgo’ɛ.

¹⁷GASA WAN tɔ̧a̧, ɛ́nɛ́ beka zɔk búk in kórò na, ɓɛɛ yì tɛ dun kɔ̧ gboŋgo’ɛ lɛŋ h’ɛ́nɛ́ mɛ nɔ; ɛnɛ in o mɔ-dai gú nɛ̀ o saɗi-tui-mɔ k’ɛ́nɛ́ lɛŋ.

¹⁸Mɔ‘i tɛ duk nɛ́ geɗek mɔ yí GASA WAN. A̧ tɛ e Mɔab kɔ̧ er'nɛ́.

¹⁹Ɛnɛ tɛ gbin o ŋga ye in o gasa ye lɛŋ, ɛnɛ tɛ gɔm o te nɛ‘i nyɔŋ waya-a nyɔŋ a nù, ɛnɛ tɛ kpe o be foka-yì lɛŋ, ɓɛɛ ɛnɛ tɛ kin o ta a kpɛɛfɔ lɛŋ.»

²⁰Mɛ tutuyɛ, ŋgimbi ha̧a̧ mɔɔ-ɗafi-sɔ̧, yì ku̧u̧ naŋ foka-a tɛnɛ nɛ Edɔm, ɓɛɛ yì dam fara lɛŋ.

²¹O be Mɔab lɛŋ zia ndé, o wannu daŋa mɛ de biro in wa, wa saa o bíí lɛŋ nɛ̀ nyɛma mɛ ba mɔɔ-de-biro in wan nɛ̀ pɛ wa dɔka mbɛt, ɓɛɛ wa ya *gbìsí nù.

²²Mɛ tutuyɛ tɛ ŋgimbi daŋa-wese, o be Mɔab kura, ɓɛɛ wa zɔk yì ti wa hee tɔk ga.

²³Wa tɔ̧a̧: «Mɛ̀ nɛ́ tɔk! Nɛ mbetɛ, o wannu tika zu ŋmaa nɛ̀ gba-paa, wa gbɛɛ ŋmaa kaɗi; kinii, o be Mɔab, ɛ̀nɛ̀ tɛ́ ɛ̀ɛ̀ nɛ́ɛ̀ kai mɔɔ-oi-wa!»

²⁴Ŋgimbi nɛ wa hɔɔ kɔ̧ gbagari ko o be *Israɛl, o be *Israɛl kura nɛ̀ biro in wa; wa gbɛɛ o be Mɔab, ɓɛɛ oi o be Mɔab yu mɔ yak. O be *Israɛl yee nú Mɔab, ɓɛɛ wa tik biro.

²⁵Wa ɗaŋa o ye, ɓɛɛ wa kin o ta a kpɛɛfɔ; wa kpee o foka-yì, ɓɛɛ wa gɔm o de te nɛ wai wai a nù; nɛ́ garo Kir-Hɛrɛs kpɔk a̧ ɓɔna, ɓɛɛ o wi-pi̧-ta kɛr yo gbin a nù.

²⁶Ŋgimbi nɛ̀ wannu Mɔab zɔka'e, a̧ beka de biro'i pi̧ nù na, a̧ kaia o ŋma wi-biro gɔmŋmaa-mɔɔrɔ-ɗoŋ-yiitoo nɛ̀ gba-paa er lɛŋ ha̧ wa mɛ gɔm gbo yak sitɛ wannu Edɔm, ɓɛɛ wa hɔ tɛ-a na.

²⁷A̧ baa kaya-bem kɔ̧-a̧ nɛ̀ tɛ ɔ wan oi-aa dɔ nɛ̀ kpoo-sɔ̧ sɛn zu garo ye. Tɛ zɔka mɔ‘i, see o be *Israɛl tu̧a, ɓɛɛ wa zik tɛ si ɗoŋ nù kɔ-wa.